Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 32

Wan nyun fesiman nanga tu deki-ati uma

Wan nyun fesiman nanga tu deki-ati uma

Baka di Yosua tiri a pipel fu Yehovah furu yari langa, a dede di a ben abi 110 yari. A heri pisi ten di Yosua ben de na libi, den Israelsma anbegi Yehovah. Ma di Yosua dede, den bigin anbegi falsi gado neleki den Kanansma. Yehovah meki Yabin wan kownu fu Kanan pina den Israelsma hebi fu di den trangayesi en. A pipel begi Yehovah fu yepi den. Dati meki Yehovah gi den wan nyun fesiman di ben nen Barak. Barak ben o yepi a pipel fu dini Yehovah baka.

Na umaprofeiti Debora seni kari Barak. A ben o fruteri en san Yehovah taigi en. A taki: ’Teki 10.000 man, dan go miti a legre fu Yabin na a lagipresi pe Kison-liba e lon. Drape yu o wini Sisera, a legre-edeman fu Yabin. Barak taigi Debora: ’Mi o go soso efu yu kon nanga mi.’ Debora taki: ’Mi o go nanga yu. Ma yu musu sabi taki a no yu o kiri Sisera. Yehovah taki dati na wan uma o kiri en.’

Debora go nanga Barak nanga en legre na Tabor-bergi fu sreka gi a feti. Di Sisera yere disi a tyari den fetiwagi fu en nanga a legre fu en go na a lagipresi. Debora taigi Barak: ’Tide na a dei di Yehovah o meki  yu wini Sisera.’ Barak nanga den 10.000 man fu en saka komoto fu a bergi fu go feti nanga a tranga legre fu Sisera.

Ne Yehovah meki a watra fu Kison-liba kon hei èn a heri lagipresi sungu. A fetiwagi fu Sisera fasi na ini a tokotoko. Sisera komoto na ini en fetiwagi, dan a bigin lon gowe. Barak nanga den srudati fu en wini a legre fu Sisera, ma Sisera ben man lowe. A lon go kibri na ini wan tenti fu wan uma di nen Yael. Na uma disi gi en merki fu dringi, dan a tapu Sisera en skin nanga wan laken. Fu di Sisera ben weri, a fadon na sribi. Yael waka safrisafri go na Sisera, a teki wan pen fu a tenti, dan a naki en go na ini en sei-ede. Na so a kiri en.

Di Barak kon suku Sisera, Yael komoto na ini en tenti, dan a taki: ’Kon na inisei. Mi o sori yu a man di yu e suku.’ Barak go na inisei èn a si Sisera e didon na gron dededede. Barak nanga Debora prèise Yehovah nanga wan singi fu di a meki den Israelsma wini den feanti fu den. Baka dati feti no ben de moro na ini a kondre fotenti yari langa.

„Den umasma di e fruteri a bun nyunsu, na wan bigi legre.”​—Psalm 68:11

Kon sabi moro

A WAKTITOREN

„Mi opo leki wan mama na ini Israel”

Fa a Bijbel tori fu Debora kan yepi wi fu abi bribi nanga deki-ati?