Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 14

Wan srafu di ben e gi yesi na Gado

Wan srafu di ben e gi yesi na Gado

Yosef ben de wan fu den yongu manpikin fu Yakob. Den bigi brada fu Yosef ben si taki den papa ben lobi Yosef moro den. Fa yu denki den ben e firi? Den ben dyarusu tapu Yosef èn den ben teige en. Wan leisi Yosef kisi wan tu aparti dren èn a fruteri den brada fu en san a dren. Den dren ben e sori taki den o boigi gi Yosef wan dei. A sani disi meki taki den ati ben bron moro nanga en!

Wan dei den brada fu Yosef ben e luku den skapu fu den papa krosibei fu a foto Sikem. Yakob seni Yosef fu go luku fa a e go nanga den. Yosef ben de farawe ete, di den si taki a e kon. Den taigi makandra: ’A man di e dren den bigi dren e kon. Kon meki wi kiri en.’ Den grabu en èn den trowe en go na ini wan dipi peti. Ma Yuda, wan fu den brada fu en taki: ’No kiri en, ma meki wi seri en leki wan srafu.’ Na so den seri Yosef gi bisnisman fu Midian gi 20 pisi solfru. Den man disi ben e go na Egepte.

Baka dati den brada fu Yosef dopu a langa krosi fu en na ini brudu fu wan bokoboko. Den seni en gi den papa, dan den taki: ’Disi a no a krosi fu yu manpikin?’ Yakob ben denki taki wan ogri meti kiri Yosef. A ben sari srefisrefi. Nowan sma ben kan trowstu en.

Di den bisnisman fu Midian doro na Egepte, den seri Yosef leki srafu gi Potifar, wan man di ben e wroko gi a kownu fu Egepte. Ma Yehovah ben de nanga Yosef. Potifar si taki Yosef ben e du en wroko bun èn taki a ben kan frutrow en. Dati meki heri esi Potifar gi Yosef a frantwortu fu luku ala den sani di a ben abi.

 A frow fu Potifar ben si taki Yosef moi èn taki a tranga. Ala dei a ben e aksi Yosef fu kon didon nanga en. San Yosef du? A no ben wani. A taigi a frow: ’Nôno! A sani disi no mag. Mi basi e frutrow mi èn yu na en frow. Efu mi didon nanga yu, dan mi o sondu teige Gado!’

Wan dei a frow fu Potifar ben wani dwengi Yosef fu didon nanga en. A grabu en krosi hori, ma Yosef lon gowe. Di Potifar doro na oso en frow taigi en taki Yosef ben pruberi fu didon nanga en. Ma a frow ben e lei. Potifar kisi wán bigi ati bron. Dati meki a poti Yosef na strafu-oso. Ma Yehovah no ben frigiti Yosef.

„Sobun, saka unsrefi na ondro a bigi èn makti Gado, so taki a kan hei unu na a reti ten.”​—1 Petrus 5:6