Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 13

Yakob nanga Esau e lusu a trobi di den ben abi

Yakob nanga Esau e lusu a trobi di den ben abi

Yehovah ben pramisi Yakob taki a ben o kibri en, neleki fa a ben kibri Abraham nanga Isak. Yakob go tan na Haran. Drape a trow, a meki furu pikin èn a kon gudu.

Baka wan pisi ten Yehovah taigi Yakob: ’Drai go baka na a kondre fu yu.’ Ne Yakob nanga en osofamiri teki a langa pasi go na en kondre. Di den ben de na pasi, wan tu futuboi fu Yakob kon taigi en: ’Yu brada Esau e kon. A de nanga 400 man!’ Yakob ben frede taki Esau ben o du en nanga en osofamiri ogri. Dati meki a begi Yehovah: ’Grantangi, no meki mi brada du ogri nanga mi.’ A tra dei, Yakob seni furu skapu, krabita, kaw, kameili nanga buriki gi Esau leki wan kado.

A neti dati di Yakob ben de en wawan, a si wan engel. Na engel bigin feti nanga en. Den feti teleki mamanten. Aladi Yakob kisi mankeri, toku a no gi abra. Na engel taigi en: ’Lusu mi meki mi gowe.’ Ma Yakob taki: ’Solanga yu no blesi mi, mi no o lusu yu.’

Te fu kaba na engel blesi Yakob. Now Yakob ben sabi taki Yehovah no ben o meki Esau du en ogri.

A mamanten di Yakob ben de na pasi e gowe, a si Esau nanga den 400 man fu en e kon. Yakob go waka na fesi en osofamiri. Di a doro krosibei fu en brada, a boigi seibi tron gi en. Esau lon go miti Yakob èn a brasa en. Den tu brada bigin krei èn den  meki en bun nanga makandra. Fa yu denki taki Yehovah ben firi di a si san Yakob du fu lusu a trobi?

Bakaten Esau drai go baka na en oso èn Yakob waka go doro na en kondre. Yakob kisi 12 manpikin. Den nen na Ruben, Simeon, Leifi, Yuda, Dan, Naftali, Gad, Aser, Isaskar, Seibulon, Yosef nanga Benyamin. Yehovah ben gebroiki wan fu den manpikin disi, Yosef, fu yepi en pipel. Yu sabi fa a du dati? Meki wi go luku.

„Tan lobi un feanti èn tan begi gi den sma di e frufolgu unu. Dan sma kan si taki unu na pikin fu un Tata di de na hemel.”​—Mateyus 5:44, 45