Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 101

Den seni Paulus go na Rome

Den seni Paulus go na Rome

Di Paulus ben go na difrenti presi fu preiki a bun nyunsu a di fu dri leisi, dan a lasti foto pe a go ben de Yerusalem. Drape den grabu en èn den poti en na strafu-oso. Wan neti Yesus taigi en na ini wan fisyun: ’Yu o go na Rome èn yu musu preiki drape.’ Den tyari Paulus fu Yerusalem go na Sesareya, pe a tan tu yari na ini strafu-oso. Di a ben de na krutu na fesi Granman Festus, Paulus taki: ’Mi wani meki Grankownu krutu mi na ini Rome.’ Festus taki: ’Yu aksi fu Grankownu krutu yu, dan na Grankownu yu o go.’ Den tyari Paulus go na Rome nanga wan sipi. Tu tra Kresten brada, Lukas nanga Aristarkus, go nanga en.

Di den ben de tapu se wan tranga winti bigin wai omeni dei langa. Ala sma ben denki taki den ben o dede. Ma Paulus taki: ’Un man, wan engel taigi mi na ini wan dren: „Paulus, no frede. Yu o doro na Rome èn nowan sma di de nanga yu na ini a sipi o dede.” No frede! Wi no o dede.’

A tranga winti ben e wai 14 dei. Te fu kaba den si taki den de krosibei fu syoro. A ben de na èilanti Malta. A sipi go fasi na wan santibangi, dan wan skwala naki en broko pisipisi. Ma ala den 276 sma di ben de na ini a sipi ben man go na syoro. Sonwan fu den swen èn trawan drifi go na syoro na tapu planga fu a sipi. Den sma fu Malta sorgu bun gi den èn den leti wan faya gi den fu hori den skin waran.

Dri mun baka dati den srudati tyari Paulus go na Rome na tapu wan tra sipi. Di a doro drape den brada go miti en. Di Paulus si den a taigi Yehovah tangi èn a kisi deki-ati. Aladi Paulus ben de wan strafuman, a ben mag libi na ini wan oso di a ben yuru, ma wan srudati ben hori wakti gi en. A tan drape tu yari langa. Te sma ben kon luku en, a ben e preiki gi den fu a Kownukondre fu Gado èn a ben e leri den fu Yesus. Paulus skrifi brifi tu gi den gemeente na Pikin Asia nanga Yudea. A no de fu taki dati Yehovah meki Paulus preiki a bun nyunsu gi furu pipel.

„Na ala fasi wi e sori taki wi na dinari fu Gado te wi e horidoro aladi furu tesi e miti wi, te wi e kisi banawtu, te wi de na nowtu, te wi e kisi problema.”​—2 Korentesma 6:4