Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 91

Yesus kon na libi baka

Yesus kon na libi baka

Baka di Yesus dede, wan guduman di nen Yosef aksi Pilatus efu a kan teki a dedeskin fu Yesus puru na a postu. Yosef domru a skin na ini fini linnen-krosi, dan a poti en na ini wan nyun grebi. Ne a meki den lolo wan bigi ston go poti na a mofo fu a grebi. Den edeman fu den priester taigi Pilatus: ’Wi frede taki sonwan fu den disipel fu en o fufuru a dedeskin, dan den o taki dati a kon na libi baka.’ Dati meki Pilatus taigi den: ’Un tapu a grebi bun, dan un poti waktiman drape.’

Dri dei baka dati, wan tu uma go fruku mamanten na a grebi èn den si taki a ston ben lolo puru na a mofo fu a grebi. Wan engel di ben de na ini a grebi taigi den uma: ’Un no musu frede. Yesus opo baka. Go taigi den disipel fu en fu go miti en na Galilea.’

Ma Maria Makdalena ben lon gowe kaba fu go suku Petrus nanga Yohanes. A taigi den: ’Wan sma teki a skin fu Yesus tyari gowe!’ Petrus nanga Yohanes lon go na a grebi. Di den si taki a leigi, den drai go baka na den oso.

Di Maria drai kon baka na a grebi, a si tu engel na ini a grebi èn a taigi den: ’Mi no sabi pe den puru mi Masra go poti.’ Ne a si wan man na ini a dyari. Fu di a ben denki taki na a man di e krin a dyari, a taigi en: ’Masra, taigi mi pe yu poti en.’ Ma di a man taki ’Maria’, a ben sabi taki na Yesus. Maria bari: ’Leriman!’ èn a lon go brasa en. Yesus taigi en: ’Go taigi den brada fu mi taki yu si mi.’ Wantewante Maria lon go taigi den disipel taki a si Yesus.

Moro lati a dei dati, tu disipel ben e waka fu Yerusalem go na wan dorpu di nen Ema-us. Wan man bigin waka nanga den èn a aksi den fu sortu tori den ben e taki. Den taki: ’Yu no yere san pasa? Dri dei pasa, den edeman fu den priester meki sma kiri Yesus. Now wan tu uma e taki dati a de na libi!’ A man aksi den: ’Unu no e bribi san den profeiti ben taki? Den ben taki dati a Krestes ben o dede èn baka dati a ben o wiki baka.’ A man fruteri den ala san skrifi na ini Gado Buku. Di den disipel doro Ema-us, den aksi a man fu kon nanga den. Di den  ben e nyan a neti dati a man begi gi a brede. Now fosi den disipel kon si taki na Yesus. Ma wantronso den no si en moro.

Den tu disipel lon go na a oso na Yerusalem pe den apostel ben kon makandra. Den fruteri den ala san pasa. Di den ben de na ini na oso, Yesus kon na den mindri èn den alamala ben kan si en. Na a bigin den apostel no ben man bribi taki na Yesus. Ne Yesus taki: ’Luku mi anu. Fasi mi. Gado Buku ben taki dati a Krestes ben o wiki baka fu dede.’

„Mi na a pasi, mi na san tru, èn mi na a libi. Nowan sma kan kon na a Tata sondro mi.”​—Yohanes 14:6