Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 85

Yesus e dresi sma tapu Sabat-dei

Yesus e dresi sma tapu Sabat-dei

Den Fariseiman no ben lobi Yesus èn dati meki den ben e suku wan fasi fu kiri en. Den ben feni taki a no ben mag dresi sma tapu Sabat-dei fu di tapu a dei disi sma no ben mag wroko. Ma tapu wan Sabat-dei, Yesus si wan breniman e begi sma sani tapu strati. A taigi den disipel fu en: ’Luku fa a krakti fu Gado o dresi a man disi.’ Yesus spiti na gron, a meki tokotoko nanga a spiti, dan a lobi en na tapu den ai fu a man. Ne a taigi a man: ’Go wasi yu ai na ini a watra fu Silowam.’ A man du dati èn fu a fosi leisi na ini en libi a ben man si.

Den sma ben skreki. Den taki: ’A no a man disi ben gwenti sidon begi sma sani? Noso na gersi a e gersi en?’ A man taki: ’Iya, mi na a man. Sensi di mi gebore mi ben breni.’ Den sma aksi en: ’Dan fa a du kon taki yu e si now?’ Di a fruteri den fa a du kon taki a e si, den tyari en go na den Fariseiman.

A man taigi den Fariseiman: ’Yesus lobi tokotoko na tapu mi ai, ne a taigi mi fu go wasi en puru. Di mi du dati, mi bigin si.’ Den Fariseiman taki: ’Efu Yesus e dresi sma tapu Sabat-dei, dan a no Gado e gi en a krakti.’ Ma trawan taki: ’A no ben o man dresi sma efu a no Gado ben gi en a krakti.’

Den Fariseiman seni kari a papa nanga mama fu a man, èn den aksi en: ’Fa a du kon taki a  boi fu yu e si now?’ A papa nanga mama ben frede fu di den Fariseiman ben taki dati efu wan sma ben e bribi na ini Yesus, den ben o yagi en puru na ini a snoga. Dati meki den taki: ’Wi no sabi. Un aksi en unsrefi.’ Den Fariseiman poti moro aksi gi a man. Te fu kaba a man taki: ’Mi taigi unu ala sani kaba. Fu san ede unu e tan aksi mi baka?’ Den Fariseiman ati bron, ne den trowe a man go na dorosei.

Yesus go na a man, dan a aksi en: ’Yu e bribi na ini a Mesias?’ A man taki: ’Efu mi sabi suma na en, mi o bribi na ini en.’ Yesus taigi en: ’Na mi na a Mesias.’ Yu no feni taki Yesus du wan moi sani? Boiti taki a dresi a man, a yepi en tu fu kon abi bribi.

„A no de soleki fa unu e taki, bika unu no sabi Gado Buku èn a krakti fu Gado.”​—Mateyus 22:29