Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 79

Yesus e du furu wondru

Yesus e du furu wondru

Yesus ben kon na grontapu fu preiki a bun nyunsu fu Gado Kownukondre. Fu di Yehovah ben gi Yesus santa yeye, meki a ben man du wondru. Na so Yesus sori san a o du te a o tiri leki Kownu. A ben man dresi ala sortu siki. Ala sei pe a ben e go, sikisma ben e kon suku yepi na en èn a ben e dresi den alamala. Den brenisma ben e si baka, dofusma ben e yere baka, sma di lan ben e waka baka èn a ben e puru ogri yeye na sma tapu. Efu sma ben fasi a franya fu en dyakti srefi, den ben e kon betre baka. Awinsi pe Yesus ben e go, den sma ben e go na en baka. Srefi te Yesus ben wani de en wawan, a no ben e yagi den sma gowe.

Wan leisi, sma tyari wan lanman go na a oso pe Yesus ben de. Ma na oso ben furu so te taki den no ben man go na inisei. Dati meki den sma puru wan pisi fu a daki, dan den saka a man go leti fesi Yesus. Yesus taigi en: ’Opo tanapu èn waka.’ Di a man bigin waka, den sma skreki.

Wan tra leisi baka, di Yesus go na ini wan dorpu, tin man di ben abi gwasi ben tanapu bun fara e bari: ’Yesus yepi wi!’ Na ini a ten dati, sma di ben abi gwasi no ben mag kon krosibei fu tra sma. Yesus taigi den man fu go na a tempel. Na dati a Wet fu Yehovah ben taki dati sma di abi gwasi musu du baka te den kon betre. Di den man ben de na pasi, den kon betre. Di wan fu den man si  taki a kon betre, a drai go baka na Yesus fu taki en tangi èn fu prèise Gado. Fu ala den tin man, na a man disi wawan go taki Yesus tangi.

Wan uma ben siki 12 yari langa èn na omeni langa kaba a ben suku fu kon betre. Na uma disi waka safri pasa na mindri den furu sma di ben de lontu Yesus, dan a go na baka Yesus èn a fasi a franya fu en krosi. Wantewante a kon betre. Ne Yesus aksi: ’Suma fasi mi?’ Na uma ben frede, ma toku a kon na Yesus, dan a fruteri en ala sani. Yesus trowstu en. A taigi en: ’Mi umapikin, meki sani waka bun gi yu.’

Wan fesiman fu a snoga di nen Yairus, kon na Yesus èn a begi en: ’Kon na mi oso! A meisje fu mi siki te fu dede.’ Ma fosi Yesus doro Yairus oso, a meisje dede. Di Yesus doro drape, a si taki a famiri nanga furu tra sma ben e krei. Yesus taigi den: ’Un no krei, a meisje e sribi.’ Ne a hori a meisje na en anu, dan a taki: ’Meisje, opo!’ Wantewante a meisje opo èn Yesus taigi en papa nanga mama fu gi en wan sani fu nyan. Prakseri fa a papa nanga a mama ben breiti!

„Gado salfu en nanga santa yeye èn nanga krakti. Yesus ben e waka na ini a heri kondre e du bun èn a ben e dresi ala sma di Didibri ben kwinsi, bika Gado ben de nanga en.”​—Tori fu den apostel 10:38