Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 75

Didibri wani kori Yesus

Didibri wani kori Yesus

Baka di Yesus dopu, a santa yeye meki a go na ini a sabana. Fu di a no nyan nowan sani 40 dei langa, meki angri ben e kiri en. Didibri kon na Yesus fu kori en. A taki: ’Efu yu na Gado Manpikin, dan taigi den ston disi fu tron brede.’ Ma Yesus sori en san skrifi na ini den Santa Buku fu Bijbel: ’Gado buku taki dati a no nyanyan wawan yu abi fanowdu fu tan na libi. Yu musu arki ibri wortu di Yehovah taki.’

Baka dati Didibri taigi Yesus: ’Efu yu na Gado Manpikin trutru, dan dyompo fu a moro hei pisi fu a tempel go na gron bika a skrifi taki Gado o seni den engel fu en fu fanga yu.’ Ma Yesus sori en baka san skrifi na ini den Santa Buku fu Bijbel: ’Gado buku taki dati yu no musu tesi Yehovah.’

Baka dati Satan sori Yesus ala den kownukondre fu grontapu. A sori en sortu gudu den abi èn fa den moi. Dan a taki: ’Mi o gi yu ala den kownukondre disi nanga a moi fu den efu yu anbegi mi wán leisi nomo.’ Ma Yesus piki en: ’Gowe fu dya, Satan! Gado buku taki dati yu musu anbegi Yehovah wawan.’

Baka dati Didibri gowe èn den engel tyari nyanyan gi Yesus. Sensi a ten dati, Yesus bigin preiki a bun nyunsu fu a Kownukondre. Na fu a sani disi Yehovah seni en kon na grontapu. Sma ben lobi san Yesus ben e leri den èn ala sei pe a ben e go den ben e waka na en baka.

„Te [Didibri] e lei, a e taki soleki fa ensrefi de, fu di a de wan leiman èn a tata fu ala lei.”​—Yohanes 8:44