Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 72

Yesus leki yongu boi

Yesus leki yongu boi

Yosef nanga Maria ben e libi na Nasaret makandra nanga Yesus nanga den tra manpikin nanga umapikin fu den. Yosef ben e du temrewroko fu sorgu gi en osofamiri èn a ben leri den fu Yehovah nanga a Wet fu en. Na osofamiri ben abi a gwenti fu go na a snoga fu anbegi Gado. Ibri yari den ben e go tu na Yerusalem fu hori a Paskafesa.

Di Yesus ben abi 12 yari, en osofamiri teki a langa pasi go na Yerusalem, soleki fa den ben gwenti du kaba. A foto ben lai nanga sma di ben kon fu hori a Paskafesa. Di a fesa ben kaba, Yosef nanga Maria teki a pasi baka go na soso èn den ben denki taki Yesus ben de na ini a grupu fu den. Ma di den go suku en na den famiriman fu den, den no ben man feni en.

Den drai go baka na Yerusalem pe den suku a boi fu den dri dei langa. Te fu kaba den go na a tempel. Yesus ben de drape e sidon na mindri den leriman. A ben e arki den bun èn a ben e poti bun aksi gi  den. Den leriman ben fruwondru so te, taki den bigin poti aksi gi Yesus. Èn den no ben man bribi taki so wan yongu boi e gi so bun piki. Den ben si taki a ben e frustan a Wet fu Yehovah.

Yosef nanga Maria ben e broko den ede srefisrefi. Maria aksi Yesus: ’Mi pikin, wi suku yu na ala sei! Pe yu ben de?’ Yesus taki: ’Unu no ben sabi taki mi musu de na ini na oso fu mi Papa?’

Yesus nanga en papa nanga mama go na den oso na Nasaret. Yosef leri Yesus a temrewroko. Fa yu denki taki Yesus ben de di a ben yongu? O moro Yesus ben kon bigi, o moro koni a ben kon abi èn Gado nanga tra sma ben lobi en.

„Gado, mi prisiri fu du yu wani. A wèt fu yu de na ini mi ati.”​—Psalm 40:8