Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 70

Engel e fruteri sma taki Yesus gebore

Engel e fruteri sma taki Yesus gebore

Grankownu Augustus fu a Gran Kownukondre Rome ben taki dati ala den Dyu ben musu go na den foto pe den gebore fu skrifi den nen na lantibuku. Dati meki Yosef nanga Maria go na Betlehem, a foto pe Yosef en famiri ben komoto. Heri esi Maria ben o kisi en beibi.

Di den doro na Betlehem, a wan-enkri presi pe den feni fu tan na wan pen pe den meti ben e tan. Na drape Maria meki en manpikin Yesus. A domru en na ini wan krosi, dan a poti en safri na ini wan nyanyan-baki fu den meti.

Krosibei fu Betlehem, wan tu skapuman ben de na dorosei e luku den skapu fu den. Ne wantronso wan engel ben tanapu na den fesi èn a glori fu Yehovah ben skèin na den lontu. Den skapuman ben frede srefisrefi, ma na engel taigi den: ’No frede. Mi abi bun nyunsu gi unu. Tide a Mesias gebore na Betlehem.’ Ne wantronso furu engel ben de  fu si na loktu èn den ben taki: ’Gi glori na Gado èn meki sani waka bun na grontapu.’ Baka dati den engel gowe. San den skapuman du?

Den skapuman taigi makandra: ’Meki wi go wantewante na Betlehem.’ Den go esi-esi èn den feni Yosef, Maria nanga a beibi na ini a pen.

Den skapuman fruteri san na engel taigi den fu a beibi. Ala sma di yere ben fruwondru. Maria ben e denki fu den sani di na engel taki èn noiti a frigiti den. Den skapuman go baka na den skapu fu den. Den gi Yehovah tangi fu ala den sani di den si èn yere.

„Na fu Gado mi kon èn na fu di Gado wani, meki mi de dya. A no ben de mi prakseri fu kon dya, ma na Gado seni mi kon.”​—Yohanes 8:42