Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 62

Wan bigi bon di e prenki wan kownukondre

Wan bigi bon di e prenki wan kownukondre

Wan neti Nebukadnesar kisi wan dren di ben meki a frede. A kari ala den koniman fu en kon fu fruteri en san a dren wani taki. Ma nowan fu den ben man du dati. Te fu kaba a kownu taki nanga Danièl.

Nebukadnesar taigi Danièl: ’Na ini mi dren mi si wan bigi bon. A gro kon so bigi taki a doro te na hemel. Sma na ala sei fu grontapu ben kan si en. Den wiwiri fu en ben moi èn a ben lai froktu. Den meti ben e suku kowru na ondro a bon èn den fowru ben e meki nesi na tapu den taki fu en. Ne wan engel saka komoto fu hemel, dan a bari nanga wan tranga sten: „Koti a bon trowe èn koti den taki fu en puru. Ma un musu libi a tompu fu en na ini a gron. Poti wan banti fu isri nanga wan banti fu kopro lontu a tompu. Na ati fu a bon di de wan libisma ati, o kenki kon tron na ati fu wan meti. Èn a o tan so teleki seibi pisi ten pasa. Ala sma o sabi taki Gado na Tiriman èn taki a e gi a kownukondre na suma a wani.”’

Yehovah meki Danièl kon sabi san a dren wani taki. Di Danièl frustan a dren, a kon frede. A taki: ’Lespeki Kownu, mi ben winsi taki a dren disi ben e sori san o pasa nanga den feanti fu yu, ma a dren e taki fu yu. Na yu na a bigi bon di den koti trowe. Yu o lasi yu kownukondre èn yu o nyan grasi neleki busimeti. Ma fu di na engel taki dati den musu libi a tompu fu a bon, meki yu o tiri leki kownu baka.’

Wán yari baka di Nebukadnesar kisi a dren, a ben e waka na tapu a daki fu en palèisi e luku fa Babilon moi èn fa a bigi. A taki: ’Luku a bigi foto di mi srefi bow. Luku fa mi kefalek!’ A kownu no ben kaba taki srefi, di a yere wan sten na hemel taki: ’Nebukadnesar! Now yu lasi yu kownukondre.’

Wantewante Nebukadnesar lasi en frustan èn a bigin du leki wan meti. Den yagi en komoto na ini en palèisi èn a go libi nanga den busimeti. Nebukadnesar wiwiri kon langa neleki den wiwiri fu aka èn en nangra ben kon de leki den srapu nangra fu fowru.

 Baka seibi yari, Nebukadnesar kisi en frustan baka èn Yehovah meki a tron kownu fu Babilon. Ne Nebukadnesar taki: ’Mi e prèise Yehovah, a Kownu fu hemel. Now mi sabi taki Yehovah na Tiriman. A e lagi den sma di abi bigifasi èn a e gi a kownukondre na suma a wani.’

„Bigimemre e kon bifo wan sma fadon èn heimemre bifo wan sma naki futu.”​—Odo 16:18