Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 59

Fo boi di gi yesi na Yehovah

Fo boi di gi yesi na Yehovah

Di Nebukadnesar tyari den granman fu Yuda kon na Babilon, a poti Aspenas a moro prenspari edeman fu en, fu luku den. Nebukadnesar taigi Aspenas fu suku den moro gosontu nanga den moro koni yongu boi. Den ben o gi den yongu boi disi leri dri yari langa so taki den ben kan du prenspari wroko na ini a kownu-oso fu Babilon. A ben musu leri den boi fu leisi, fu skrifi èn fu taki Akadiatongo, a tongo fu Babilon. Den boi ben musu nyan a srefi nyanyan tu di a kownu nanga den sma fu en ben e nyan. Fo fu den boi disi ben de Danièl, Hananya, Misael nanga Asaria. Aspenas gi den Babilon nen. A kari den Beltesasar, Sadrak, Meisak nanga Abedneikow. A leri di den boi ben o kisi, ben o tapu den fu dini Yehovah?

 Den fo boi disi ben wani gi yesi na Yehovah wawan. Den ben sabi taki den no mag nyan a nyanyan fu a kownu fu di a wet fu Yehovah ben e taki dati den no ben mag nyan son meti. Dati meki den taigi Aspenas: ’Grantangi, no gi wi a nyanyan fu Kownu.’ Aspenas taigi den: ’Efu unu no nyan a kownu nyanyan èn Kownu si taki unu kon mangri, a o kiri mi!’

Ma Danièl taigi a waktiman di ben e luku den: ’Mi e begi yu, gi wi soso gruntu fu nyan èn watra fu dringi tin dei langa. Baka dati yu musu kari wi nanga den boi di nyan a nyanyan fu Kownu, dan yu musu luku suma moro gosontu.’ A waktiman ben feni dati bun.

Baka den tin dei, Danièl nanga den dri mati fu en ben gosontu moro den tra boi. Yehovah ben breiti taki den arki en. A gi Danièl koni srefi fu man fruklari fisyun nanga dren.

Di Aspenas kaba gi den boi leri, a tyari den go na Nebukadnesar. A kownu taki nanga den èn a si taki Danièl, Hananya, Misael nanga Asaria ben koni tin tron moro ala den tra boi. A teki den fo boi disi fu wroko na ini Kownu-oso. A kownu ben lobi suku rai na den te a ben musu teki prenspari bosroiti. Yehovah ben meki taki den boi disi koni moro ala den koniman nanga den lukuman fu Kownu.

Aladi Danièl, Hananya, Misael nanga Asaria ben de ini wan tra kondre, toku den no ben frigiti taki Yehovah na den Gado. Yu o prakseri Yehovah ala ten, awinsi yu papa noso mama no de nanga yu?

„No meki nowan sma wisiwasi yu fu di yu yongu. Ma nanga a fasi fa yu e taki, nanga a fasi fa yu e tyari yusrefi, nanga a lobi fu yu, nanga a bribi fu yu èn nanga a krin libi fu yu, yu musu tron wan eksempre gi den sma di e gi yesi na Gado ala ten.”​—1 Timoteyus 4:12