Go na content

Go na a tra menu

Go na table of contents

Yehovah Kotoigi

Sranantongo

Moi les di yu kan leri fu Bijbel

 LES 2

Gado meki a fosi man nanga uma

Gado meki a fosi man nanga uma

Yehovah meki wan dyari na wan presi di ben nen Eden. A dyari ben lai nanga bromki, bon nanga meti. Dan Gado meki a fosi man, Adam. A meki en fu doti, dan a blo na ini en noso-olo. Yu sabi san pasa di a du dati? A man bigin libi! Yehovah taigi Adam fu sorgu a dyari èn fu gi ala den meti wan nen.

Yehovah gi Adam wan prenspari wet. A taigi en: ’Yu kan nyan den froktu fu ala den bon, ma fu wan fu den bon yu no mag nyan. Efu yu nyan a froktu fu a bon dati, yu o dede.’

Bakaten Yehovah taki: ’Mi o meki wan sma gi Adam di kan yepi en.’ Gado meki Adam sribi bun dipi, dan a teki wan fu den lebriki fu en èn a meki wan frow gi en. En nen na Eva. Adam nanga Eva tron a fosi osofamiri. Fa Adam ben firi di a kisi en frow? Adam ben breiti so te.  A taki: ’Luku san Yehovah meki nanga a lebriki fu mi! Ai, disi na wan sma di gersi mi.’

Yehovah taigi Adam nanga Eva fu meki pikin teleki den kon furu grontapu. A ben wani taki den ben musu wroko makandra fu meki a heri grontapu tron wan paradijs èn den ben musu prisiri nanga a wroko disi. A heri grontapu ben musu tron wan moi presi neleki a dyari fu Eden. Ma sani waka heri tra fasi. San pasa? Wi o si dati na ini a tra les.

„A sma di meki den na a bigin, meki wan man nanga wan uma.”​—Mateyus 19:4