Go na content

Go na a tra menu

Go na table of contents

Yehovah Kotoigi

Sranantongo

Leri den pikin fu yu

 LES 1

Wan kibritori di wi breiti fu sabi

Wan kibritori di wi breiti fu sabi

Oiti wan sma fruteri yu wan tori di a no fruteri nowan tra sma?​— * So wan tori wi e kari wan kibritori. Bijbel e taki tu fu wan kibritori. Bijbel e kari en „a santa kibritori”. A tori disi santa bika a de fu Gado. Èn a ben de wan kibritori fu di nowan sma ben sabi en. Srefi den engel ben wani sabi moro fu a tori disi. Yu wani sabi san na a tori disi?​—

San yu denki taki den engel ben wani sabi?

Langa ten pasa, Gado meki a fosi man nanga uma. Den ben nen Adam nanga Eva. Gado ben gi den wan moi presi fu tan. A presi ben nen a dyari fu Eden. Efu Adam nanga Eva ben du san Gado taki, dan den nanga den pikin fu den ben o man meki heri grontapu tron wan paradijs, leki a dyari fu Eden. Dan den ben o libi fu ala ten na ini Paradijs. Ma yu sabi ete san Adam nanga Eva ben du?​—

Adam nanga Eva trangayesi Gado. Dati meki wi no e libi na ini wan paradijs now. Ma Yehovah taki dati a o meki heri grontapu tron wan moi presi. Ala sma o libi fu ala ten èn den o de koloku. Fa Yehovah o du dati? Furu yari langa sma no ben sabi fa. A ben de wan kibritori.

Di Yesus ben de na grontapu a ben leri sma moro fu a kibritori disi. A ben taki dati a kibritori abi fu du nanga Gado Kownukondre. Yesus taigi sma taki den musu begi meki a Kownukondre disi kon. A Kownukondre o meki grontapu tron wan moi paradijs.

Yu breiti taki yu kon sabi a tori disi?​— No frigiti, soso den sma di e du san Yehovah taki o libi na ini Paradijs. Bijbel e fruteri furu tori fu man nanga uma di ben du san Yehovah taki. Yu wani sabi suma na den sma disi?​— Meki wi go luku suma ben de den sma disi. Èn wi o luku tu fa wi kan de leki den.

^ paragraaf 3 Na den difrenti tori na ini a brochure disi yu o si aksi di skrifi nanga fatu letter. Baka den aksi yu o si a strepi disi (—). Te yu si a strepi, dan yu kan stop èn meki yu pikin piki na aksi.