Sensi di Samuel ben de wan pikin boi, a ben e libi èn a ben e wroko na a tabernakel. A tabernakel ben de a presi pe sma ben kon fu anbegi Yehovah. Yu sabi fa a du kon taki Samuel ben tan na a tabernakel? Samuel en mama ben nen Hana. Meki wi luku fosi san wi kan leri fu Hana.

Langa ten kaba Hana ben wani wan beibi, ma a no ben man kisi wan. Dati meki a begi Yehovah fu yepi en. A pramisi en taki efu a kisi wan boi, dan a ben o seni en fu libi èn fu wroko na a tabernakel. Yehovah du san Hana aksi en èn Hana kisi wan boi. A kari en Samuel. Hana du san a pramisi. Di Samuel ben abi dri noso fo yari, dan Hana tyari en go na a tabernakel fu wroko drape gi Yehovah.

Eli ben de a moro prenspari priester di ben wroko na a tabernakel. Den tu boi fu en ben wroko drape tu. Den ben de priester. Soleki fa wi ben si, dan a tabernakel ben de a presi pe sma ben go fu anbegi Gado. Sma ben musu du bun sani drape. Ma den boi fu Eli ben du kefalek ogri sani. Samuel ben si san den boi ben e du. Samuel ben du ogri tu neleki den boi fu Eli?​— No, a ben tan du san bun. A ben du san en papa nanga en mama ben leri en.

San yu denki taki Eli ben musu du nanga den tu boi fu en?​— A ben musu strafu den. A no ben musu meki den wroko moro na a presi pe sma ben go fu anbegi Yehovah. Ma Eli no du dati. Dati meki Yehovah ati bron nanga Eli nanga den tu boi fu en. Yehovah ben taki dati a ben o strafu den.

Samuel gi Eli a boskopu fu Yehovah

Wan neti di Samuel ben e sribi, a yere wan sma e kari en: ’Samuel!’ A lon go na Eli, ma Eli taigi en: ’Mi no kari yu.’ A sani disi pasa ete tu leisi. Na a di fu dri leisi, Eli taigi Samuel taki efu a yere a sten baka, a musu piki: ’Iya Yehovah, mi e arki yu.’ Samuel du san Eli taigi en. Ne Yehovah  taigi Samuel: ’Taigi Eli taki mi o strafu en nanga en famiri fu den ogri sani di den du.’ Yu denki taki a ben makriki gi Samuel fu gi Eli a boskopu disi?​— No, a no ben makriki. Ma aladi Samuel ben e frede, toku a du san Yehovah taigi en. Èn a sani di Yehovah taki, pasa trutru. Sma kiri den tu boi fu Eli, èn Eli dede tu.

Wi kan leri furu fu Samuel. A ben du san bun aladi a ben si tra sma e du ogri sani. San yu o du? Yu o de leki Samuel èn yu o tan du san bun? Efu yu du dati, dan Yehovah èn yu papa nanga mama o breiti.

LEISI NA INI YU BIJBEL