Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 15

Yesus „e tyari retidu kon na grontapu”

Yesus „e tyari retidu kon na grontapu”

1, 2. Na sortu okasi Yesus ben kisi atibron? Fu san ede a ben atibron?

ALA sma ben kan si taki Yesus ben atibron, èn a ben abi leti fu atibron. Kande a no makriki gi yu fu si Yesus leki wan sma di e atibron, fu di ala ten a ben de so wan safri-ati man (Mateyus 21:5). Ma a ben sabi san a e du, fu di na atibron fu en ben de regtfardiki. * Ma fu san ede a man disi di ben lobi vrede, ben kon mandi so? A ben si fa sma ben e du sani di no ben regtfardiki kwetikweti.

2 Yesus ben lobi a tempel na ini Yerusalem srefisrefi. Na heri grontapu, dati ben de a wan-enkri santa presi pe sma ben kan go fu anbegi en hemel Tata. Den Dyu ben e komoto na farawe kondre fu anbegi Gado drape. Srefi sma di no ben de Dyu ma di ben abi frede gi Gado, ben e kon na ini a tempel fesidyari di ben seti spesrutu gi den. Ma na a bigin fu a diniwroko fu Yesus, a ben go na ini a tempel pe a si wan sani di no ben switi gi en kwetikweti. A presi ben gersi wan wowoyo. A no ben gersi wan presi fu anbegi Gado kwetikweti! A presi ben lai seriman nanga sma di ben e wissel moni. Ma fu san ede a sani dati no ben regtfardiki dan? Gi den man disi a tempel fu Gado ben de wan presi nomo pe den ben e kon fu puru moni na sma skin, iya, den ben e fufuru den sma srefi. Fa so?Yohanes 2:14.

3, 4. Fa sma ben e gebroiki na oso fu Yehovah fu den eigi gridi lostu? San Yesus ben du fu tyari wan kenki kon ini a tori?

3 Den kerki tiriman ben taki dati sma ben kan gebroiki soso wán sortu moni fu pai a tempel edemoni. Fu kan feni a sortu  moni dati, dan den fisitiman ben musu wissel a moni fu den. Dati meki sma di ben e wissel moni ben seti den tafra fu den na ini a tempel, aladi den ben e meki sma pai den ibri tron te den ben e kon wissel moni. Den ben e meki furu moni tu nanga den meti di den ben e seri. Fisitiman di ben wani tyari srakti-ofrandi, ben kan bai wan meti na iniwan seriman na ini a foto. Ma den fesiman fu a tempel ben kan taki dati den ofrandi dati no ben bun. Na a tra sei, den ben e teki ibriwan meti di sma ben bai na ini a tempel. Fu di den seriman ben sabi taki den sma ben abi den fanowdu, meki den ben e aksi den sma bun furu moni. * A sani disi ben ogri moro leki iniwan kruka fasi fa sma e meki moni. Fu tru, na fufuru den ben e fufuru sma!

„Puru den sani disi dyaso!”

4 Yesus no ben kan teki den sortu kruktudu dati. A tempel ben de na oso fu en eigi Tata! A ben meki wan wipi fu tetei èn a yagi ala den kaw nanga skapu komoto na ini a tempel. Baka dati a waka go na den sma di ben e wissel moni èn a naki den tafra fu den trowe. Prakseri fa ala a moni dati panya na tapu a marmer gron! Na wan krasi fasi a taigi den man di ben e seri doifi: „Puru den sani disi dyaso!” (Yohanes 2:15, 16) A gersi leki nowan sma ben e prefuru fu kakafutu gi a deki-ati man disi.

„Soleki fa a papa de, na so a manpikin de tu”

5-7. (a) Fa a ten di Yesus ben de na hemel bifo a tron wan libisma, ben abi krakti tapu a fasi fa a ben e sori retidu? San wi kan leri te wi e studeri na eksempre fu en? (b) Fa Krestes feti fu puru den kruktu denki di ben abi fu du nanga a posisi fu Yehovah leki a moro heiwan èn nanga a nen fu En?

5 A no de fu taki dati den seriman kon baka na ini a tempel. Sowan dri yari baka dati, Yesus kisi fu du nanga a srefi kruktu sani  disi, ma disi leisi a gebroiki den wortu fu Yehovah srefi fu krutu den sma di ben e meki na oso fu Yehovah kon tron „wan presi pe soso fufuruman e tan” (Mateyus 21:13; Yeremia 7:11). Iya, di Yesus si a gridi fasi fa sma ben e puru moni na tra sma skin èn fa den ben e doti a tempel fu Gado, dan a firi neleki fa en Tata ben e firi. Dati no e fruwondru wi! Someni milyun yari langa, Yesus ben kisi leri fu en hemel Tata. A bakapisi ben de, taki a ben man sori a srefi retidu di Yehovah e sori. A ben tron wan libilibi eksempre fu wan odo di sma e koti: „Soleki fa a papa de, na so a manpikin de tu.” Sobun, efu wi wani kon frustan krin fa Yehovah e sori retidu, dan a moro bun sani di wi kan du na fu prakseri bun fu na eksempre fu Yesus Krestes.Yohanes 14:9, 10.

6 A wan-enkri gebore Manpikin fu Yehovah ben yere di Satan ben kon nanga a falsi kragi taki Yehovah Gado na wan leiman èn di Satan ben feni taki a tiri fu Gado no de regtfardiki. Fu tru, dati ben de wan tu ogri-ati lei! A Manpikin ben yere sosrefi fa Satan ben tyalensi Yehovah bakaten; a ben taki dati sma no ben o dini Yehovah fu di den lobi en, ma fu di den ben o suku den eigi wini nomo. A no de fu taki dati den falsi kragi disi hati a Manpikin, di ben de regtfardiki. A ben musu prisiri srefisrefi di a yere taki a ben kisi wan tumusi prenspari frantwortu fu sori sma taki den lei dati no ben de tru! (2 Korentesma 1:20) Fa a ben o du dati?

7 Soleki fa wi ben leri na ini kapitel 14, dan Yesus Krestes sori krinkrin taki Satan no ben abi leti di a ben taki dati den libisani di Yehovah meki, no ben o tan getrow na En. Na a fasi dati Yesus seti a fondamenti fu sori te fu kaba taki Yehovah abi a reti fu de a moro hei tiriman èn fu meki a nen fu En kon de santa. Yesus, di de a Moro Prenspari Fesiman fu Gado, o meki taki na ala sei fu hemel nanga grontapu sma sa kon sabi a retidu fu Gado (Tori fu den Apostel 5:31). A fasi fa a libi na grontapu ben e sori a retidu fu Gado sosrefi. Yehovah ben taki fu en: „Mi sa poti mi yeye na en tapu èn a sa sori den trakondre sma san na retidu” (Mateyus 12:18). Fa Yesus ben meki den wortu dati kon tru?

 Yesus e fruteri moro fini „san na retidu”

8-10. (a) Fa den gwenti fu den Dyu kerki fesiman ben e meki taki sma bigin wisiwasi den wan di no ben de Dyu, èn den umasma? (b) Fa den wet di densrefi meki sorgu taki a Sabadei fu Yehovah, ben tron wan hebi gi sma?

8 Yesus ben lobi a Wet fu Yehovah èn a hori ensrefi na a wet dati. Ma den kerki fesiman fu a ten dati ben e drai a Wet èn den ben e gebroiki a Wet na wan fowtu fasi. Yesus ben taigi den: „Helu fu unu, un leriman fu Wet nanga Fariseiman, un hoigriman! . . . Unu e frigiti den moro prenspari sani fu a Wet, namku retidu nanga sari-ati nanga getrowfasi” (Mateyus 23:23). A de krin taki den man dati di ben de leriman fu a Wet fu Gado, no ben e yepi sma fu kon frustan „san na retidu”. Na presi fu dati den ben e meki taki sma no man si krin fa Gado e sori a retidu fu en. Fa so? Luku wan tu eksempre.

9 Yehovah ben taigi a pipel fu en fu hori densrefi aparti fu den heiden pipel lontu den (1 Kownu 11:1, 2). Ma wan tu kerki fesiman di ben wani hori densrefi nomonomo na san den ben e bribi, ben e gi a pipel deki-ati fu wisiwasi ala den sma di no ben de Dyu. Na ini a Misjna wan wet ben de srefi di ben e taki: „Yu no musu libi yu kaw na den presi fu sma di no de Dyu, fu di wi yere taki den e abi seks nanga meti.” A fasi disi fa den ben e krutu ala sma di no ben de Dyu, no ben fiti èn a ben de kontrari san a Wet fu Moses ben e leri den (Lefitikus 19:34). Tra wet di libisma ben meki, ben e lagi umasma. A wet di densrefi ben meki, ben e taki dati wan uma ben musu waka na baka en masra, a no ben musu waka na en sei. Mansma ben e kisi a warskow fu no taki nanga wan uma pe ala sma kan si den, awinsi na uma ben de den eigi wefi. Neleki fa srafu no ben musu gi kotoigi na fesi krutu, na so a ben de nanga umasma tu. Den ben abi wan spesrutu begi srefi pe mansma ben e taki Gado tangi taki den a no umasma.

10 Den kerki fesiman ben meki so furu wet nanga markitiki gi densrefi, taki sma no ben man si den Wet fu Gado moro. Fu eksempre: a wet fu a Sabadei ben e taki nomo dati sma no ben musu wroko tapu a Sabadei, fu di a dei dati ben de spesrutu fu anbegi Gado, fu kisi krakti na yeye fasi, èn fu rostu. Ma den Fariseiman ben meki a wet dati kon tron wan hebi. Densrefi ben  e bosroiti san na den „wroko” di sma no ben musu du. Sowan 39 difrenti sani ben de di den ben e si leki wroko, soleki kotiwroko, noso fu onti. Ma den sani disi ben e meki furu aksi opo kon. Yu ben kan taki dati wan sma e onti efu a ben sa kiri wan freifrei tapu a Sabadei, noso taki a e du kotiwroko fu di a e piki wan anu aleisi fu nyan dati, aladi a e waka pasa na wan presi? Efu wan sma ben sa dresi wan trawan di siki, dan dati ben de wroko tu? We, den Fariseiman ben meki den eigi hebi wet fu sori sma san den ben musu du na den okasi dati.

11, 12. Fa Yesus ben sori taki a no ben e agri nanga den gwenti fu den Fariseiman, di no ben e kruderi nanga den Santa Buku?

11 Fa Yesus ben musu yepi sma na ini so wan situwâsi fu kon frustan san na retidu? Te Yesus ben e gi sma leri, dan a ben e sori taki a e kakafutu gi den kerki fesiman dati. A sori dati sosrefi nanga a fasi fa a ben libi. Prakseri wan tu sani di a ben leri den sma. Yesus sori krin taki a e krutu den furu wet di densrefi ben meki. A ben taki: „Unu e meki a wortu fu Gado lasi krakti fu di unu wani hori unsrefi na den gwenti di unu ben leri sma.”Markus 7:13.

12 Na wan krakti fasi Yesus leri sma taki den sani di den Fariseiman ben e taki fu a Sabadei, no ben bun; den no ben frustan a marki fu a wet kwetikweti. A ben taki dati a Mesias na ’Masra fu a sabadei’ èn taki dati ben e gi en a reti fu dresi sma tapu a Sabadei (Mateyus 12:8). Fu poti krakti na a tori dati, dan a du wondru na fesi ala sma; a dresi sma tapu a Sabadei (Lukas 6:7-10). A fasi fa a dresi sma na a ten dati e sori wi fa a sa dresi sma na heri grontapu na a pisi ten fu a Dusun Yari Tiri fu en. A pisi ten dati fu wán dusun yari sa de wan bigi Sabadei, pe ala getrow libisma sa rostu fu den someni hondro yari di den sweti fu tyari a lai fu sondu nanga dede.

13. Sortu wet wi ben kisi leki bakapisi fu a diniwroko fu Krestes na grontapu? Fa a ben difrenti fu a Wet fu Moses?

13 Yesus ben sori sosrefi san na retidu, di a gi wan nyun wet, „a wet fu Krestes”, na a pisi ten di a kaba en diniwroko na grontapu (Galasiasma 6:2). A nyun wet disi ben de tra fasi leki a Wet fu Moses fu di a no ben abi fu du nanga wan heri ipi komando di skrifi na tapu papira, ma a ben abi fu du nanga gronprakseri. Ma  toku a ben abi fu du nanga wan tu komando sosrefi. Yesus ben kari wan fu den komando disi „wan nyun komando”. Yesus ben leri ala den bakaman fu en fu lobi makandra neleki fa en ben lobi den (Yohanes 13:34, 35). Iya, ala den sma di e libi akruderi „a wet fu Krestes” ben o de sma di e sori lobi, sondro fu prakseri densrefi nomo.

Wan libilibi eksempre fu retidu

14, 15. Fa Yesus sori taki a ben sabi te o fara a ben kan go nanga a makti fu en? Fu san ede disi de wan deki-ati gi wi?

14 Yesus no ben leri sma nomo san na lobi. Nanga a fasi fa a libi a sori wi san na „a wet fu Krestes”. En heri libi ben sori dati. Luku dri fasi fa na eksempre fu Yesus sori wi san na retidu.

15 Na a fosi presi, Yesus du ala muiti fu no du nowan kruktu sani. Kande yu si taki furu kruktu sani di sma e du e feni presi te sma e kon asranti èn te den e gebroiki a frantwortu fu den na fasi di no fiti. Yesus no ben du dati. Wan leisi, wan man ben kon na Yesus èn a ben taki: „Leriman, taigi a brada fu mi fu prati a gudu nanga mi.” San Yesus ben piki en? „Man, suma poti mi leki krutuman fu unu, noso leki a sma di musu prati sani na mindri unu?” (Lukas 12:13, 14) Yu no feni taki dati na wan kefalek sani? A koni fu Yesus, a fasi fa a ben man krutu sani, èn srefi a makti di Gado ben gi en, e pasa a di fu iniwan sma na grontapu; toku a ben weigri fu moksi ensrefi ini a tori disi, fu di a no ben kisi a spesrutu frantwortu fu du dati. Ala ten Yesus sori sakafasi, srefi na ini ala den dusundusun yari bifo a ben tron wan libisma (Yudas 9). Nanga sakafasi Yesus e frutrow tapu Yehovah èn a e meki Yehovah sori en san de reti. Disi e sori wi wan prenspari sani fu a man disi.

16, 17. (a) Fa Yesus sori retidu na ini a fasi fa a preiki a bun nyunsu fu Gado Kownukondre? (b) Fa a firi di Yesus ben abi fu du san reti ben meki taki a sori sari-ati gi sma?

16 Leki di fu tu sani, Yesus ben sori retidu na ini a fasi fa a preiki a bun nyunsu fu Gado Kownukondre. A no krutu sma na fesi. Na presi fu dati a suku fu taki nanga ala sortu sma, pôtiwan noso guduwan. Den Fariseiman ben de tra fasi, fu di den no ben e broko den ede nanga den pôtiwan èn nanga den mofinawan.  Den ben kari den ʽam-ha·ʼaʹrets, noso „pipel fu a kondre”, èn den wisiwasi den. Nanga deki-ati Yesus kakafutu gi a kruktu denki dati. Te a ben e leri sma a bun nyunsu, ma sosrefi te a ben e nyan nanga sma, te a ben e gi den nyan, te a ben e dresi den, noso te a ben e gi den wan opobaka, dan ala ten a hori ensrefi na a retidu fu a Gado di wani yepi „ala sortu sma”.1 Timoteyus 2:4. *

17 Leki di fu dri sani, dan a firi di Yesus ben abi fu du san reti ben meki taki a sori sari-ati gi sma trutru. A du furu muiti fu yepi sondari (Mateyus 9:11-13). A ben de esi fu yepi sma di no ben man kibri densrefi. Leki eksempre, Yesus no go leri sma taki den no ben musu frutrow den wan di no de Dyu, leki fa den kerki fesiman ben e leri sma. A ben sori sari-ati fu di a yepi sonwan fu den sma di no ben de Dyu èn fu di a gi den leri, aladi a moro prenspari marki fu en ben de fu gi leri na a Dyu pipel. A ben de klariklari fu du wan wondru gi wan srudati ofsiri fu Rome èn fu dresi wan sma gi en, aladi a taki: „Mi no feni nowan sma na ini Israel ete di abi so wan tranga bribi.”Mateyus 8:5-13.

18, 19. (a) Fa Yesus gi sma deki-ati fu sori lespeki gi umasma? (b) Fa na eksempre fu Yesus e yepi wi fu si san deki-ati abi fu du nanga retidu?

18 Yesus no horibaka tu gi den fasi fa sma ben e prakseri fu umasma. Na presi fu dati a ben tan sori deki-ati fu du sani di reti. Sma ben e bribi taki den Samaria uma no ben de krin, neleki den sma di no ben de Dyu. Toku Yesus no ben draidrai fu preiki gi a Samaria uma na a watrapeti fu Sikar. Fu taki en leti, dan na uma disi ben de a fosi sma di Yesus ben taigi krin taki en na a Mesias di ben musu kon (Yohanes 4:6, 25, 26). Den Fariseiman ben feni taki sma no ben musu leri umasma a Wet fu Gado, ma  Yesus teki furu ten èn a du furu muiti fu gi umasma leri (Lukas 10:38-42). Sma ben abi a denki taki yu no ben kan frutrow den sani di umasma ben e taki. Toku Yesus ben gi son uma a grani fu de den fosiwan di si en, baka di a kisi wan opobaka. Yesus ben taigi den uma disi srefi fu go fruteri den disipel fu en, di ben de mansma, fu a tumusi prenspari sani disi di ben pasa!Mateyus 28:1-10.

19 Iya, Yesus sori den pipel fu grontapu san na retidu. Furu tron a du dati, aladi a ben kan abi takru bakapisi gi en. Na eksempre fu Yesus e yepi wi fu si taki wan sma musu abi deki-ati fu tan sori tru retidu. Fu dati ede a fiti taki Bijbel e kari en „a Lew di de fu a lo fu Yuda” (Openbaring 5:5). Memre taki lew e prenki retidu di e sori na wan deki-ati fasi. Ma na ini a krosibei tamara, Yesus sa poti sani kon reti na wan moro kefalek fasi srefi. A sa tyari „retidu kon na [ala sei fu] grontapu”.Yesaya 42:4.

A Mesias Kownu „e tyari retidu kon na grontapu”

20, 21. Fa a Mesias Kownu du muiti fu tyari retidu kon na heri grontapu na ini a ten fu wi? Fa a du dati na ini a Kresten gemeente?

20 Sensi Yesus tron a Mesias Kownu na ini 1914, dan a du muiti fu tyari retidu kon na grontapu. Fa so? A teki a frantwortu na en tapu fu meki a profeititori fu Mateyus 24:14 kon tru. Den bakaman fu Yesus na grontapu, yepi sma fu ala kondre fu kon sabi a waarheid fu a Kownukondre fu Yehovah. Neleki Yesus, den preiki na wan regtfardiki fasi èn sondro fu teki sma sei. Den e suku fu gi ibriwan sma, yonguwan noso owruwan, guduwan noso pôtiwan, mansma noso umasma, wan okasi fu kon sabi Yehovah, a Gado fu retidu.

21 Leki Edeman fu a gemeente, Yesus e gi sma deki-ati sosrefi fu sori retidu na ini a Kresten gemeente. Soleki fa den profeiti taki na fesi, dan Yesus gi „presenti ini libisma”, namku getrow Kresten owruman di e teki fesi na ini a gemeente (Efeisesma 4:8-12). Den man disi e teki na eksempre fu Yesus Krestes fu di den e sori retidu na ini a fasi fa den e tiri na ipi di Gado lobi so te. Den e tan hori bun na prakseri taki Yesus wani taki sma musu handri na wan reti fasi nanga ala den skapu fu en; a no abi trobi san na a posisi fu den, efu den abi barinen, noso omeni gudu den abi.

22. Fa Yehovah e prakseri fu den someni kruktu sani di e pasa na ini a disiten grontapu? Sortu frantwortu a gi en Manpikin fu dati ede?

 22 Ma ete wan syatu pisi ten, dan Yesus sa tyari retidu kon na grontapu na wan fasi di wi no ben si noiti ete. Kruktudu lai na ini a kruka grontapu disi. Ibri tron te wan pikin e dede fu di a no abi nyanyan, dan dati na wan sani di no reti kwetikweti; disi de so spesrutu te wi e prakseri a moni nanga a ten di sma e frumorsu fu meki fetisani èn fu meki sani gi sma di wani plisi den eigi gridi lostu. Ibri yari someni milyun sma e dede fu soso. Toku a sani dati na soso wan fu den someni kruktu sani di sma e du. Ma den sani disi e meki a regtfardiki atibron fu Yehovah kuku kon na tapu. A ben poti a Manpikin fu en fu feti nanga a heri ogri sistema di de nownow, fu tyari wan kaba kon na ala kruktudu.Openbaring 16:14, 16; 19:11-15.

23. San Yesus sa du baka Armagedon fu hori retidu hei fu têgo?

23 Ma toku a retidu fu Yehovah no wani taki nomo dati ogrisma musu kisi pori. A ben poti en Manpikin sosrefi fu tiri leki a „Granman fu Vrede”. Baka a feti fu Armagedon, dan a tiri fu Yesus sa meki taki vrede de na heri grontapu, èn a sa tiri „nanga yepi fu retidu” (Yesaya 9:6, 7). Na a ten dati Yesus sa prisiri fu puru ala kruktudu di e meki taki so furu sari nanga pina de na ini grontapu. A retidu fu Yehovah bun dorodoro, èn fu têgo Yesus sa hori a retidu fu Gado hei na wan getrow fasi. Fu dati ede a de tumusi prenspari taki wi e suku fu sori a retidu fu Yehovah nownow kaba. Meki wi go luku fa wi kan du dati.

^ paragraaf 1 Di Yesus sori a regtfardiki atibron fu en, dan a ben e tyari ensrefi neleki Yehovah, di e ’atibron’ nanga ala ogridu (Nahum 1:2). Leki eksempre, baka di Yehovah ben fruteri a trangayesi pipel fu en taki den ben meki na oso fu en kon tron „wan presi pe fufuruman e tan”, dan a ben taki: „Mi e kanti mi atibron nanga mi faya atibron na tapu a presi disi.”Yeremia 7:11, 20.

^ paragraaf 3 Soleki fa a Misjna e sori, dan wan tu yari baka dati, sma ben bigin krutu fu den bigi moni di den ben musu pai fu bai doifi na ini a tempel. Wantewante den wan di ben e seri doifi ben saka a moni nanga sowan 99 procent! Suma ben e kisi wini moro furu fu a kefalek bisnis disi? Wan tu historia skrifiman e prakseri taki den wowoyo na ini a tempel ben de fu na osofamiri fu a Granpriester Anas, èn taki dati na a fasi fa na osofamiri fu a priester ben e kisi furu fu den gudu fu den.Yohanes 18:13.

^ paragraaf 16 Den Fariseiman ben e bribi taki den mofina sma, di no ben kisi leri na ini a Wet, ben de „frufruktu sma” (Yohanes 7:49). Den ben e taki dati den sortu sma dati no ben musu kisi leri, èn taki trawan no ben musu du bisnis nanga den, nyan nanga den, noso begi makandra nanga den. Efu wan sma ben sa meki en umapikin trow nanga wan fu den, dan dati ben o moro ogri leki fu libi na umapikin gi takru meti. Den ben feni taki a howpu fu na opobaka no ben de gi den mofina sma.