Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 11

„Ala san a e du, na retidu”

„Ala san a e du, na retidu”

1, 2. (a) Sortu tumusi onregtfardiki sani Yosef ben ondrofeni? (b) San Yehovah ben du fu poti sani kon reti?

A MOI yonkuman no ben du noti, toku a ben doro te na ini dungru-oso fu di sma ben lei gi en taki a ben suku fu dwengi wan uma fu didon nanga en. A sani dati no ben regtfardiki kwetikweti. Ma disi no ben de a fosi leisi di sma handri na so wan ogri-ati fasi nanga en. Wan tu yari na fesi, di a yonkuman disi, Yosef, ben abi 17 yari, dan en eigi brada ben tori en, èn pikinmoro den ben kiri en. Na a ten dati den ben seri en leki srafu gi sma fu wan tra kondre. Drape a ben weigri fu gi yesi na den switi wortu fu a wefi fu a basi fu en. A sani dati ben hati na uma dati so kefalek taki a waka fruteri wan heri ipi lei fu Yosef, èn na so fasi Yosef ben doro te na ini strafu-oso. A sari srefisrefi taki nowan sma ben de fu taki gi Yosef.

Yosef pina fu soso di a ben de na ini „dungru-oso”

2 Ma a Gado di „lobi regtfardikifasi nanga retidu” ben e luku san e pasa (Psalm 33:5). Yehovah poti sani kon reti, fu di a meki sani waka na so wan fasi taki Yosef ben komoto na strafu te fu kaba. Ma san moro moi, na taki a srefi Yosef disi di den ben trowe go na ini „dungru-oso”, ben kisi kefalek bigi frantwortu te fu kaba, nanga bigi grani sosrefi (Genesis 40:15; 41:41-43; Psalm 105:17, 18). Te fu kaba a ben kon na krin taki Yosef no ben du noti. A ben kisi wan kefalek bigi frantwortu, èn a ben gebroiki a frantwortu dati fu du a wani fu Gado.Genesis 45:5-8.

3. Fu san ede a no e fruwondru wi taki wi alamala wani taki tra sma musu libi nanga wi na wan reti fasi?

3 So wan tori e naki wi ati, a no so? Suma fu wi no si noiti fa sma e du kruktu sani nanga trawan? Wisrefi ondrofeni so wan sani kande. Iya, wi alamala wani taki sma musu libi nanga wi na wan fasi di fiti, noso na wan reti fasi. Disi no e fruwondru wi, fu di Yehovah gi wi den srefi fasi di en abi, èn retidu  na wan fu den moro prenspari fasi fu en (Genesis 1:27). Efu wi wani kon sabi Yehovah bun, dan wi musu kon frustan fa a retidu fu en e wroko. Dati sa yepi wi fu kon frustan den tumusi moi fasi fu en moro bun, èn wi sa kon moro krosibei na en.

San na retidu?

4. San na retidu, soleki fa furu libisma e prakseri?

4 Soleki fa libisma e si a tori furu tron, dan retidu na soso te sma e gebroiki wet na wan yoisti fasi. A buku Right and Reason—Ethics in Theory and Practice e taki dati „retidu abi fu du nanga wet, plekti, reti, nanga frantwortu di sma abi, èn a no e meki a wan sma kisi wini moro a trawan, ma ala ten a e pai ibriwan sma akruderi a wroko fu en”. Ma a retidu fu Yehovah abi fu du nanga moro sani leki fu hori yusrefi nomo na wet nanga gronprakseri fu di yu e si dati leki wan plekti.

5, 6. (a) San den wortu di vertaal nanga „retidu” wani taki na ini den fosi tongo di sma gebroiki fu skrifi Bijbel? (b) San a wani taki dati Gado e du san reti?

5 Fu kon frustan moro krin san na a bradi nanga a dipi fu a retidu fu Yehovah, dan a bun fu go luku san a wortu dati wani taki na ini den fosi tongo di sma ben gebroiki fu skrifi Bijbel. Na ini den Hebrew Buku fu Bijbel sma gebroiki dri wortu. A wortu di den vertaal furu tron nanga „retidu” kan vertaal sosrefi nanga „sani di de reti” (Genesis 18:25). Den tu tra wortu sma vertaal moro furu nanga „regtfardikifasi”. A wortu di vertaal nanga „regtfardikifasi” na ini den Kresten Griki Buku fu Bijbel, wani taki „wan sani di yoisti noso di reti”. Te yu luku en bun, dan wan difrenti no de na mindri regtfardikifasi nanga retidu.Amos 5:24.

6 Sobun, te Bijbel e taki dati Gado e du san reti, dan dati e sori wi taki a e du san bun èn san fiti, èn taki a e du dati doronomo, sondro fu teki sma sei (Romesma 2:11). Fu tru, noiti Gado ben o man tyari ensrefi na wan tra fasi. A getrow man Elihu ben taki: „A tru Gado no sa handri na wan kruktu fasi noiti, èn noiti na Almaktiwan sa du san no de reti!” (Yob  34:10) Fu tru, noiti Yehovah sa man du „san no de reti”. Fu san ede? Tu prenspari sani de fu san ede a no man du dati.

7, 8. (a) Fu san ede Yehovah no man tyari ensrefi na wan fasi di no de reti? (b) San e meki taki Yehovah de regtfardiki, noso reti na ini den sani di a e du?

7 Na a fosi presi, Gado de santa. Soleki fa wi si na ini kapitel 3, dan Yehovah de soifri èn opregti dorodoro. Fu dati ede, a no man tyari ensrefi na wan fasi di no de regtfardiki, noso di no de reti. Luku san dati wani taki. A santafasi fu wi hemel Tata e meki taki wi kan abi a frutrow taki a no sa du ogri nanga den pikin fu en noiti. Yesus ben abi a frutrow dati tu. Na a lasti neti fu en libi dyaso na grontapu, a ben begi: „Santa Tata, luku den [den disipel] fu yu eigi nen ede” (Yohanes 17:11). Na ini Bijbel, den wortu „Santa Tata” abi fu du nanga Yehovah wawan. A nen dati fiti Yehovah trutru, fu di nowan libisma papa man fu doro a santafasi fu Yehovah. Yesus ben e bribi trutru taki noti no ben o pasa nanga den disipel fu en te en Tata ben o sorgu gi den, fu di en Tata de krin èn soifri dorodoro, èn fu di A no abi nowan sondu.Mateyus 23:9.

8 Leki di fu tu sani, dan a lobi di rutu dipi na ini Gado, na wan sortu lobi di e meki taki a no e prakseri ensrefi nomo. A lobi dati e meki taki a wani de regtfardiki, noso taki a wani du san reti te a e yepi trawan. Ma kruktudu de na furu difrenti fasi. Son sma e si a wan ras moro hei leki a trawan, sma e desko makandra, èn pratifasi lai. Furu tron den sani disi e bigin nanga gridifasi èn nanga a prakseri di sma e prakseri densrefi nomo; den sani disi de kontrari fu lobi. Na ini Bijbel wi e leisi fu a lobi fu Gado èn drape wi e kisi a dyaranti: „Yehovah de regtfardiki; a lobi te sma e du sani na wan regtfardiki fasi” (Psalm 11:7). Yehovah e taki fu ensrefi: „Mi, Yehovah, lobi retidu” (Yesaya 61:8). A de wan bigi trowstu gi wi fu sabi taki a Gado fu wi e prisiri fu du san bun, noso reti, a no so?Yeremia 9:24.

 A sari-ati fu Yehovah nanga a retidu fu en di bun dorodoro

9-11. (a) San a retidu fu Yehovah abi fu du nanga a sari-ati fu en? (b) Fa a retidu nanga a sari-ati fu Yehovah e kon na krin na ini a fasi fa a e handri nanga sondu libisma?

9 Neleki fa ibriwan fu den kefalek fasi fu Yehovah bun dorodoro, na so a de tu taki a retidu fu En no e mankeri noti. Wan leisi Moses ben e prèise Yehovah èn a ben skrifi: „A Klepston, den wroko fu en bun dorodoro, bika ala san a e du, na retidu. Wan Gado fu getrowfasi, èn na en kruktudu no de; a de regtfardiki èn opregti” (Deuteronomium 32:3, 4). Ibriwan fasi fa Yehovah e sori a retidu fu en, bun dorodoro. Noiti a no e tapu en ai gi ogridu, ma a no e krutu sma tumusi hebi tu.

10 A retidu fu Yehovah nanga a sari-ati fu en e go anu nanga anu. Psalm 116:5 e taki: „Yehovah abi bunfasi èn a de regtfardiki [„a e du san reti”, The New American Bible]; wi Gado na wan Sma di e sori sari-ati.” Iya, Yehovah e du san reti èn a abi furu sari-ati. Den tu fasi disi no e gens makandra. A sari-ati fu en no e meki taki a no man sori a retidu fu en na a yoisti fasi, so taki a ben sa gersi leki den bakapisi fu a retidu fu en ben o hebi tumusi. Ma furu tron a e sori en retidu makandra nanga a sari-ati fu en, èn son tron a e sori den tu fasi disi na a srefi momenti tu. Luku wan eksempre.

11 Ala libisma e gebore na ini sondu èn fu dati ede den alamala e frudini a strafu fu sondu, namku dede (Romesma 5:12). Ma Yehovah no e prisiri te sondari e dede. A de „wan Gado di e gi sma pardon, di abi bun-ati èn di e sori sari-ati” (Nehemia 9:17). Fu di a de santa, meki a no kan gi pasi taki sma e tyari densrefi na wan fasi di no de regtfardiki. Ma fa Gado kan sori sari-ati gi libisma di e gebore nanga sondu? A piki de fu feni na ini wan fu den moro prenspari tru tori na ini a Wortu fu Gado, namku a sani di Yehovah ben seti fu pai wan lusu-paiman fu frulusu a libisma famiri. Na ini kapitel 14 wi sa leri moro fu a lobi-ati seti dati. Ma boiti dati, dan a seti disi regtfardiki dorodoro, aladi a de a moro kefalek fasi fa wan sma sori sari-ati oiti wan ten. Nanga a seti disi Yehovah man fu sori dipi firi fu sari-ati  gi sondari di e drai den libi, aladi a e tan hori ensrefi na a retidu fu en di bun dorodoro.Romesma 3:21-26.

A retidu fu Yehovah e meki wi firi prisiri trutru

12, 13. (a) Fu san ede a retidu fu Yehovah e meki taki wi wani kon krosibei na en? (b) San David ben leri fu a retidu fu Yehovah? Fa dati kan de wan trowstu gi wi?

12 A retidu fu Yehovah no de wan fasi di e meki taki a no e firi gi sma, so taki wi e suku fu tan farawe fu en. Ma a de wan moi fasi di e hari wi kon krosibei na En. Bijbel e taki finifini fu a sari-ati fasi fa Yehovah e sori a retidu, noso regtfardikifasi fu en. Meki wi go luku wan tu fu den tumusi moi fasi fa Yehovah e sori a retidu fu en.

13 Yehovah man sori retidu na wan fasi di bun dorodoro, dati meki a e sori taki a de getrow èn taki a no e gowe libi den bakaman fu en noiti. A psalm skrifiman David ben ondrofeni a sani disi na ini en eigi libi. We, san David leri fu den sani di a ben ondrofeni èn fu den sani di a ben kon frustan di a ondrosuku a fasi fa Gado e du sani? Ensrefi taki: „Yehovah na wan sma di lobi retidu, èn a no sa gowe libi den loyaalwan fu en. Fu tru den sa kisi kibri te ten di no skotu” (Psalm 37:28). Dati na wan dyaranti di e trowstu wi trutru! Noiti a Gado fu wi sa gowe libi den wan di e tan getrow na en dorodoro. Fu dati ede wi kan abi frutrow taki a sa tan krosibei fu wi èn taki a sa sorgu wi na wan lobi-ati fasi. A retidu fu en e gi wi a dyaranti dati!Odo 2:7, 8.

14. Fa a Wet di Yehovah ben gi Israel e sori taki a e broko en ede nanga den mofinawan?

14 Gado e sori a retidu fu en na so wan fasi taki a no e frigiti den nowtu fu den wan di e pina. A Wet di Yehovah ben gi Israel e sori krin taki A ben e broko en ede nanga den mofinawan. Leki eksempre, a Wet ben seti sani na so wan fasi taki pikin di no ben abi papa nanga mama, èn sosrefi uma di den masra ben dede kaba, ben kan kisi sorgu (Deuteronomium 24:17-21). Yehovah ben sabi taki a libi ben tranga gi den sortu famiri disi, dati meki ensrefi ben e tron a papa fu den, di ben de leki a Krutuman nanga a Kibriman fu den. A ben e tron a sma  di ben „e krutu na afersi fu den boi di no abi papa, nanga den uma di den masra dede kaba” (Deuteronomium 10:18; Psalm 68:5). * Yehovah ben warskow den Israelsma taki efu den ben sa pina den uma nanga den pikin di no ben man yepi densrefi, dan a ben o yere a babari fu den sma disi. A ben taki: „Fu tru mi sa kisi bigi atibron” (Exodus 22:22-24). Aladi atibron a no wan fu den moro prenspari fasi fu Yehovah, toku a de so taki nanga reti a e kisi atibron te a si taki sma e du kruktu sani fu espresi, spesrutu te den sma di den e pina, na mofina sma di no man yepi densrefi.Psalm 103:6.

15, 16. Sortu tumusi krin buweisi wi abi taki Yehovah no e teki sma sei?

15 Yehovah e gi wi a dyaranti sosrefi taki a „no e teki sei gi nowan sma èn [taki a no] e teki tyuku” (Deuteronomium 10:17). Tra fasi leki furu libisma di abi makti, dan gudu no e hari Yehovah, èn A no e luku sma fesi tu. A no e krutu sani na fesi èn a no e desko sma kwetikweti. Luku wan kefalek moi buweisi di e sori taki Yehovah no e teki sma sei. A no de so taki wan pikin grupu fu gudusma nomo abi na okasi fu tron tru anbegiman fu en, èn fu kisi têgo libi. Na presi fu dati, dan „na mindri ala pipel a sma di e frede en èn di e du san de regtfardiki, bun na en ai” (Tori fu den Apostel 10:34, 35). A tumusi moi okasi disi opo gi ala sma, awinsi den gudu noso den pôti. A no abi trobi sosrefi efu den blaka noso weti, noso na ini sortu kondre den e libi. Yu no feni taki disi na a moro bun fasi fa Yehovah e sori tru retidu?

16 Ma wi musu poti prakseri na ete wan tra sani di abi fu du  nanga a tumusi bun fasi fa Yehovah e sori en retidu. A de wan sani di wi musu sori lespeki gi en tu. A abi fu du nanga a fasi fa Gado e handri nanga sma di no e hori densrefi na den regtfardiki markitiki fu en.

A no e puru strafu

17. Fruteri fu san ede a kruktudu fu a grontapu disi no musu meki wi tweifri na a fasi fa Yehovah e sori a retidu fu en.

17 Kande son sma e aksi densrefi: ’Efu Yehovah no feni en bun te sma e du sani di no de regtfardiki, dan fa a du kon taki sma e pina na so wan ogri-ati fasi èn taki sma e du so furu kruka sani na ini a disiten grontapu fu wi?’ Den kruktudu disi no musu meki wi tweifri na a fasi fa Yehovah e sori a retidu fu en. Ala den kruktu sani di e pasa na ini na ogri grontapu disi na a bakapisi fu a sondu di libisma kisi fu Adam. Kruktudu lai na ini a grontapu disi, fu di sondu libisma teki a bosroiti fu libi na den eigi sondu fasi. Ma dati no sa tan so fu ala ten.Deuteronomium 32:5.

18, 19. San e sori taki Yehovah no sa tan gi pasi fu têgo taki sma e pasa den regtfardiki wet fu en fu espresi?

18 Aladi Yehovah e sori furu sari-ati gi den wan di e kon krosibei na en nanga wan krin ati, toku a no sa gi pasi taki sma tan du sani di e pori en santa nen (Psalm 74:10, 22, 23). Wi no musu spotu nanga a Gado fu retidu; ibriwan sma di e tan du sondu fu espresi sa kisi krutustrafu nomonomo. Yehovah na „wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki, . . . ma a no sa puru strafu kwetikweti” (Exodus 34:6, 7). Den wortu disi tru, fu di son leisi Yehovah ben feni en fanowdu fu krutu den sma di e pasa den regtfardiki wet fu en fu espresi.

19 Prakseri a fasi fa Gado handri nanga Israel fu owruten. Den Israelsma tan trangayesi Gado ibri tron baka, srefi baka di den ben de na ini a Pramisi Kondre kaba. Aladi a pori fasi fa den ben e tyari densrefi ben e „hati” Yehovah, toku a no ben trowe den wantewante (Psalm 78:38-41). Na presi fu dati, a ben sori sari-ati gi den fu di a ben gi den na okasi fu kenki den libi. A ben begi den taki: „Mi no e prisiri te na ogriwan e dede, ma mi  e prisiri te wan ogri sma e kenki a libi fu en èn te a e tan na libi trutru. Gowe libi, gowe libi den takru fasi fu unu, bika fu san ede unu musu dede, o oso fu Israel?” (Esekièl 33:11) Fu di Yehovah e si a libi leki wan warti sani, meki a seni en profeiti ibri tron baka so taki den Israelsma ben kan gowe libi den takru fasi fu den. Ma furu fu den tranga-ati sma disi no ben wani arki èn den no ben wani drai den libi. Te fu kaba Yehovah ben abi fu du wan sani fu kibri en santa nen èn fu kibri ibriwan tra sani di ben abi fu du nanga a nen dati. Dati meki a ben gi den Israelsma abra na den feanti fu den.Nehemia 9:26-30.

20. (a) San wi e leri fu a fasi fa Yehovah ben handri nanga Israel? (b) Fu san ede a fiti fu teki lew fu prenki a retidu fu Yehovah?

20 A fasi fa Yehovah handri nanga Israel e leri wi furu fu En. Wi e leri taki den ai fu en e si ala sani, sosrefi den sma di no de regtfardiki. Wi e leri tu taki san a e si abi krakti na en tapu (Odo 15:3). A de wan trowstu gi wi fu sabi sosrefi taki a e sori sari-ati gi sma te a si taki a fiti fu du dati. Boiti dati, wi e leri tu taki Gado no de tumusi esi fu krutu sani. Fu di Yehovah abi langa-pasensi, meki furu sma kisi a fowtu denki taki a no sa krutu den ogriwan noiti. Ma dati no tru kwetikweti, fu di a fasi fa Gado ben handri nanga Israel e leri wi tu taki A no e tan hori pasensi fu têgo. Yehovah na wan sma di e feti gi regtfardikifasi. Gado no de leki libisma di e frede fu du san reti. Ala ten a e sori deki-ati te a musu handri fu poti sani kon reti baka. Furu  tron Bijbel e gebroiki lew fu agersi retidu di sori na wan deki-ati fasi. Dati meki te Bijbel e gebroiki lew, dan dati abi fu du nanga Gado èn a tirimakti fu en (Esekièl 1:10; Openbaring 4:7). * Disi e gi wi a dyaranti taki a sa puru ala kruktudu fu grontapu, soleki fa a ben pramisi. Fu tru, te wi luku a fasi fa Gado e krutu sani, dan wi kan taki syatu: a e strafu sma te dati de fanowdu, aladi a e luku sosrefi pe a kan sori sari-ati.2 Petrus 3:9.

Fa fu kon krosibei na a Gado fu retidu

21. Fa wi musu si Yehovah te wi e denki dipi fu a fasi fa a e sori a retidu fu en? Fu san ede wi musu du dati?

21 Te wi e denki dipi fu a fasi fa Yehovah e sori a retidu fu en, dan wi no musu prakseri taki a de leki wan krutuman di no abi firi gi trawan, noso di e suku nomo fu strafu sma te den e meki fowtu. Na presi fu dati wi musu si en leki wan lobi-ati Papa di e strafu en pikin te a de fanowdu, ma di abi a gwenti tu fu handri nanga den na a moro bun fasi di de. Fu di Yehovah na wan Papa fu retidu, noso regtfardikifasi, meki a e tan hori ensrefi na san reti, aladi a e sori sari-ati tu gi den pikin fu en na grontapu, di abi yepi fanowdu èn di musu kisi pardon sosrefi.Psalm 103:10, 13.

22. Sortu sani wi kan fruwakti leki bakapisi fu a retidu fu Yehovah? Fu san ede a e handri nanga wi na so wan fasi?

22 Wi kan de nanga tangi na ati taki a retidu fu Gado no wani taki nomo taki a e strafu den wan di e meki fowtu! A retidu fu Yehovah meki taki wi kan fruwakti wan tumusi moi tamara, wan tamara fu volmaakti libi na ini wan grontapu pe „regtfardikifasi sa de” (2 Petrus 3:13). A Gado fu wi e handri nanga wi na so wan fasi fu di a retidu fu en e meki taki a wani kibri sma na presi fu krutu den. Fu tru, te wi kon frustan moro bun san a retidu fu Yehovah wani taki trutru, dan dati e hari wi kon moro krosibei na en! Na ini den kapitel di e kon wi sa go luku moro fini fa Yehovah e sori a kefalek moi fasi disi.

^ paragraaf 14 Aladi a Hebrew wortu di vertaal nanga „boi di no abi papa” e sori go na mansma, toku disi no wani taki kwetikweti dati Gado no ben e broko en ede nanga umapikin. Yehovah ben meki den skrifi wan tori na ini a Wet di ben abi fu du nanga wan krutu-afersi fu den umapikin fu Selafead. Fu di a papa fu den ben dede kaba meki Yehovah ben gi den a dyaranti taki den ben o kisi wan famirigudu tu. A sani dati ben tron wan eksempre fu a fasi fa sma ben musu koti krutu na ini den sortu afersi dati, so taki sma ben kan handri na wan reti fasi nanga umapikin di no ben abi papa moro.Numeri 27:1-8.

^ paragraaf 20 A moi fu si taki Yehovah e teki ensrefi gersi nanga wan lew na ini a fasi fa a strafu Israel di no ben de getrow.Yeremia 25:38; Hosea 5:14.