Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 9

’Krestes na a krakti fu Gado’

’Krestes na a krakti fu Gado’

1-3. (a) Sortu sani di den disipel ben ondrofeni na a Se fu Galilea, ben frede den srefisrefi? San Yesus ben du? (b) Fu san ede a fiti taki Bijbel e taki dati Yesus na ’Krestes, a krakti fu Gado’?

DEN disipel ben frede srefisrefi. Den ben e seiri abra a Se fu Galilea, di wan bigi winti broko kon wantronso na den tapu. A no de fu taki dati den ben gwenti si bigi winti tapu a se disi, bika sonwan fu den man disi ben de fisiman di ben abi furu ondrofeni (Mateyus 4:18, 19). * Ma disi ben de wan „bigi krasi winti”, èn heri esi a sorgu gi hebi sekiwatra. Den man ben e feti fu man tyari a boto bun, ma a bigi winti ben hebi tumusi gi den. Den bigi skwala ben e „wasi kon na ini a boto”, so taki a bigin lai nanga watra. Aladi so wan dyugudyugu ben de na ini a boto, toku Yesus ben e sribi dipi na bakasei fu a boto; a ben weri, heri dei a ben gi leri na a pipel. Fu di den disipel ben e frede taki den ben o lasi den libi, meki den wiki Yesus, èn den begi en: „Masra, yepi wi, wi o sungu!”Markus 4:35-38; Mateyus 8:23-25.

2 Yesus no ben frede. Nanga tranga frutrow a piri-ai gi a winti nanga a se èn a taki: „Un tapu! Tan tiri!” Wantewante, a winti nanga a se gi yesi na en. A tranga winti saka, den skwala saka gowe safri, èn „ala sani kon tiri” baka. Now den disipel kon frede srefisrefi. „Suma na a sma disi?” den aksi makandra. Fu tru, sortu libisma ben kan piri-ai gi a winti nanga a se, neleki a e piri-ai gi wan pikin di trangayesi?Markus 4:39-41; Mateyus 8:26, 27.

 3 Ma Yesus no ben de leki tra libisma. Yehovah ben gebroiki a makti fu en fu horibaka gi Yesus, èn na tumusi aparti fasi a gebroiki Yesus tu fu sori sma a makti fu En. Nanga reti na apostel Paulus ben kari en: ’Krestes, a krakti fu Gado’ (1 Korentesma 1:24). Fa Yesus e sori a makti fu Gado? Te wi luku a fasi fa Yesus e gebroiki makti, dan sortu krakti a fasi dati kan abi tapu wi libi?

A makti fu a wan-enkri gebore Manpikin fu Gado

4, 5. (a) Sortu makti nanga frantwortu Yehovah ben gi en wan-enkri gebore Manpikin? (b) Fa a Manpikin disi ben man meki den sani di en Tata ben abi na prakseri?

4 Prakseri o furu makti Yesus ben abi bifo a tron wan libisma. Yehovah ben gebroiki a „têgo krakti” fu en fu meki en wan-enkri gebore Manpikin, di wi kon sabi leki Yesus Krestes (Romesma 1:20; Kolosesma 1:15). Baka dati, Yehovah gi bun furu makti nanga frantwortu na a Manpikin disi, fu di a gi Yesus a frantwortu fu yepi en fu meki den sani di A ben abi na prakseri. Bijbel e taki fu a Manpikin disi: „Ala sani kon de nanga yepi fu en, èn sondro en nowan sani kon de.”Yohanes 1:3.

5 Wi no man frustan trutru o bigi a frantwortu dati de. Prakseri o furu krakti de fanowdu fu man meki milyunmilyun tranga engel, fu meki ala den sani di wi e si na loktu, den milyardmilyard stari sistema, nanga grontapu di lai so furu difrenti libisani. Fu man du den sani disi, a wan-enkri gebore Manpikin ben kisi a moro bigi krakti fu hemel nanga grontapu, namku a santa yeye fu Gado. A Manpikin disi ben prisiri srefisrefi fu de a Tumusi Bun Wrokoman, di Yehovah gebroiki fu meki ala tra sani.Odo 8:22-31.

6. Sortu makti nanga sortu frantwortu Yesus ben kisi baka di a dede na grontapu èn di a kisi wan opobaka?

6 A wan-enkri gebore Manpikin ben kan kisi moro bigi makti nanga moro furu frantwortu ete? Baka di Yesus dede na grontapu èn di a kisi wan opobaka, a ben taki: „Mi kisi ala makti na ini hemel èn na grontapu” (Mateyus 28:18). Iya, Yesus kisi a makti nanga a reti fu tiri sani na hemel èn na grontapu. Leki „Kownu fu den kownu èn Masra fu den masra”, Yesus ben kisi a  makti fu ’meki ala tiri nanga ala makti nanga ala krakti di de kontrari en Tata, kon tron noti’, awinsi na makti di wi man si, noso makti di wi no man si (Openbaring 19:16; 1 Korentesma 15:24-26). Gado ’poti ala sani na Yesus ondro’, dati wani taki, ala sani boiti ensrefi.Hebrewsma 2:8; 1 Korentesma 15:27.

7. Fu san ede wi kan abi a dyaranti taki Yesus no sa du fowtu sani nanga a makti di Yehovah gi en?

7 We, wi musu frede dan taki kande Yesus sa gebroiki a makti fu en na wan fowtu fasi? Kwetikweti! Yesus lobi en Tata trutru, èn noiti a sa du wan sani fu hati En (Yohanes 8:29; 14:31). Yesus sabi heri bun taki Yehovah leki na Almaktiwan noiti e gebroiki en bigi makti na wan fowtu fasi. Nanga en eigi ai Yesus si taki Yehovah e suku okasi „fu gebroiki a krakti fu en, fu a bun fu den sma di lobi en nanga den heri ati” (2 Kroniki 16:9). Iya, Yesus abi a srefi lobi di en Tata abi gi a libisma famiri, sobun wi abi a dyaranti taki Yesus sa tan gebroiki a makti fu en fu du bun (Yohanes 13:1). Ini a tori disi Yesus na wan tumusi bun eksempre. Meki wi go luku sortu makti a ben abi di a ben de na grontapu èn fa a ben gebroiki a makti dati.

’A ben e taki na wan krakti fasi’

8. Sortu makti Yesus ben kisi baka di Gado salfu Yesus nanga santa yeye? Fa a ben gebroiki a makti fu en?

8 Soleki fa a sori, dan Yesus no du wondru di a ben e gro kon bigi na ini Nasaret. Ma dati kenki di a teki dopu na ini 29 G.T. Na a ten dati a ben abi sowan 30 yari (Lukas 3:21-23). Bijbel e fruteri wi: „Gado salfu Yesus nanga santa yeye èn nanga makti; Yesus ben e waka du bun na ini a heri kondre èn a ben e dresi ala sma di Didibri ben e kwinsi” (Tori fu den Apostel 10:38). Efu Yesus ben e „du bun”, dan dati e sori taki a ben e gebroiki a makti fu en na wan bun fasi, a no so? Baka di a kisi salfu, dan a „tron wan profeiti di ben e du bigi wroko èn di ben e taki na wan krakti fasi”.Lukas 24:19.

9-11. (a) Pe Yesus ben e preiki moro furu? Sortu tyalensi a ben kisi? (b) Fu san ede den sma ben e fruwondru fu a fasi fa Yesus ben e gi leri?

9 Yesus ben e taki na wan krakti fasi. Fa so? Furu tron a ben e gi sma leri na dorosei, namku na den sesyoro, na tapu pikin  bergi èn sosrefi na tapu strati èn na den wowoyo (Markus 6:53-56; Lukas 5:1-3; 13:26). Efu den arkiman fu en ben wani, dan den ben kan waka gowe efu den no ben lobi san a ben e taigi den. Di sma no ben e meki buku ete nanga masyin, dan den arkiman di ben lobi san Yesus ben e taki, ben musu hori den wortu fu en na ini den ati nanga frustan. Sobun, den sani di Yesus ben e leri den sma ben musu de sani di ben e hari den prakseri, sani di ben de makriki fu frustan, èn di ben makriki fu memre tu. Ma a tyalensi disi no ben de wan problema gi Yesus. Prakseri a Bergitaki fu en leki eksempre.

10 Fruku mamanten na ini 31 G.T., wan bigi grupu sma ben kon makandra na tapu wan pikin bergi krosibei fu a Se fu Galilea. Son sma ben komoto te na Yudea nanga Yerusalem, moro leki 100, noso 110 kilometer moro fara. Trawan ben komoto te na a noordsei, fu den kontren na a sesyoro fu Tirus nanga Sidon. Furu sikisma ben e kon na Yesus fu fasi en, èn a ben e dresi den alamala. Di ala sma na den mindri di ben siki hebi ben kon betre kaba, dan a bigin gi den leri (Lukas 6:17-19). Te fu kaba, di a ben kaba taki, dan den arkiman fruwondru fu san den ben yere. Fu san ede?

11 Someni yari na baka, wan fu den sma di ben yere a Bergitaki ben skrifi: „Ala den sma fruwondru fa a ben gi leri; bika a ben gi den leri leki wan sma di kisi makti fu Gado” (Mateyus 7:28, 29). Te Yesus ben e taki nanga sma, dan den ben man firi a makti fu en. A ben e taki gi Gado èn a ben e gebroiki a Wortu fu Gado fu horibaka gi den sani di a ben e leri sma (Yohanes 7:16). Den sani di Yesus ben e taki ben de krin fu frustan; a deki-ati di a ben e gi sma ben e naki den ati, èn nowan sma ben man strei nanga en te a ben e tyari buweisi kon na fesi. Te a ben e taki, dan a ben e sori san na a rutu fu difrenti problema, èn a ben e doro na ati fu den arkiman fu en. A ben leri den fa fu feni trutru koloku, fa fu begi, fa fu suku a Kownukondre fu Gado, èn san den ben musu du fu abi wan bun libi (Mateyus 5:3–7:27). Den wortu fu en ben e naki na ati fu den wan di ben e angri fu waarheid nanga retidu. Den sortu sma disi ben de klariklari fu  ’no teri’ densrefi moro, èn fu gowe libi ala sani fu kan tron bakaman fu Yesus (Mateyus 16:24; Lukas 5:10, 11). Den sani disi e sori krin o furu krakti den wortu fu Yesus ben abi!

’A ben e du bigi wroko’

12, 13. Na sortu fasi Yesus ben e du „bigi wroko”? Fa den wondru fu en ben e difrenti fu makandra?

12 Yesus „ben e du bigi wroko” sosrefi (Lukas 24:19). Den Evangelietori e taki fu moro leki 30 difrenti wondru di Yesus ben du nanga „a krakti fu Yehovah” (Lukas 5:17). * Den wondru fu Yesus kenki a libi fu dusundusun sma. Tu fu den wondru dati ben abi fu du kande nanga wan grupu fu, ala nanga ala, 20.000 sma; a ben gi nyanyan na 5000 man èn bakaten na 4000 man, „sondro fu teri den uma nanga den yongu pikin”!Mateyus 14:13-21; 15:32-38.

„Den si Yesus e waka na tapu a se”

13 Yesus ben e du furu difrenti wondru. A ben abi makti tapu ogri yeye, èn na wan makriki fasi a ben e yagi den puru na sma tapu (Lukas 9:37-43). Fu di a ben abi makti tapu sani soleki watra nanga winti, meki a ben man kenki watra kon tron win (Yohanes 2:1-11). A ben fruwondru den disipel fu Yesus fu si taki a ben man waka na tapu den bigi skwala fu a Se fu Galilea (Yohanes 6:18, 19). A ben abi a makti fu dresi siki, awinsi a ben de wan siki na ini wan sma skin, siki di sma ben abi bun langa kaba, noso siki di ben kan kiri sma (Markus 3:1-5; Yohanes 4:46-54). A ben e dresi sma na difrenti fasi tu. Wi sabi taki Yesus ben dresi son sma di ben de farawe fu en, aladi tra sma kon betre baka di a fasi den (Mateyus 8:2, 3, 5-13). Son sma a ben dresi wantewante, trawan a ben dresi safrisafri.Markus 8:22-25; Lukas 8:43, 44.

14. Na ini sortu situwâsi Yesus ben sori taki a abi makti fu wiki dedesma?

14 San moi srefisrefi, na taki Yesus ben abi a makti fu wiki dedesma.  Bijbel e kari dri okasi pe a wiki dedesma. A gi wan umapikin fu 12 yari baka na en papa nanga mama. A wiki a wan-enkri pikin fu wan uma di en masra ben dede kaba, èn a gi wan lobi brada baka na den sisa fu en (Lukas 7:11-15; 8:49-56; Yohanes 11:38-44). Nowan situwâsi ben muilek tumusi gi Yesus. A ben wiki na umapikin fu 12 yari leti baka di a dede na bedi. A ben wiki a manpikin fu na uma di en masra ben dede kaba, aladi den ben de na pasi kaba fu go beri en. A musu de taki a ben dede a srefi dei dati. Yesus ben wiki Lasarus komoto fu wan grebi-olo, aladi Lasarus ben dede fo dei kaba.

A gebroiki en makti sondro fu prakseri ensrefi nomo, a gebroiki en na wan yoisti fasi, èn a hori sma na prakseri

15, 16. San e sori taki Yesus no ben e gebroiki a makti fu en fu suku wini gi ensrefi?

15 Yu sabi o furu ogri wan sondu libisma tiriman ben kan du efu a ben abi a srefi makti leki Yesus? Ma Yesus no ben abi sondu (1 Petrus 2:22). A ben weigri fu kon tron wan sma di e prakseri ensrefi nomo, di e suku barinen, èn di gridi fu di den sani disi e meki taki sondu libisma e gebroiki a makti fu den fu pina trawan.

16 Noiti Yesus gebroiki a makti fu en fu suku wini gi ensrefi. Di angri ben e kiri en, dan a ben weigri fu meki ston tron brede, so taki a ben kan nyan (Mateyus 4:1-4). A no ben abi furu gudu, san e sori taki a no ben e gebroiki en makti fu seti en eigi libi (Mateyus 8:20). Moro sani de di e sori krin taki a no ben e du bigi wroko fu tyari wini gi ensrefi. Te a ben e du wondru, dan a ben e gi furu fu ensrefi. Te a ben e dresi sma, dan krakti ben e komoto na ini en skin. A ben man firi taki krakti e komoto na ini en skin, awinsi a ben e dresi wán sma nomo (Markus 5:25-34). Toku a gi pasi taki bigi grupu sma fasi en, èn den ben e kon betre (Lukas 6:19). Fu tru, a no ben e prakseri ensrefi nomo!

17. Fa Yesus sori taki a ben e gebroiki a makti fu en na wan yoisti fasi?

17 Yesus ben e gebroiki a makti fu en na a yoisti fasi. Noiti a  du krakti wroko fu meki bigi, noso fu switi sma ai (Mateyus 4:5-7). Yesus no ben wani du wondru soso fu meki Herodes firi prisiri, bika a man dati ben abi takru prakseri (Lukas 23:8, 9). Na presi fu dyaf fu a makti fu en, dan Yesus ben e taigi den wan di a ben e dresi fu no fruteri nowan sma taki na en ben dresi den (Markus 5:43; 7:36). A no ben wani taki sma musu poti bribi na ini en fu di den ben e yere fu den kefalek sani di a ben e du.Mateyus 12:15-19.

18-20. (a) Sortu sani ben abi krakti tapu a fasi fa Yesus ben e gebroiki a makti fu en? (b) Fa yu e firi fu a fasi fa Yesus ben dresi a dofuman?

18 Yesus, di ben abi so furu makti, ben difrenti krinkrin fu den tiriman di gebroiki a makti fu den sondro fu broko den ede nanga den nowtu fu trawan. Yesus ben e broko en ede nanga sma. Te a ben e si den sikiwan, dan dati ben e naki en ati so kefalek taki a ben e wani yepi den wantewante (Mateyus 14:14). A ben e hori den firi nanga den nowtu fu den na prakseri, èn a fasi fa a ben e broko en ede nanga den ben abi krakti tapu a fasi fa a ben e gebroiki a makti fu en. Wan kefalek moi eksempre na a di fu Markus 7:31-37.

19 Na a okasi dati, wan bigi ipi sma ben kon na Yesus èn den tyari furu sikiwan kon na en, èn a dresi den alamala (Mateyus 15:29, 30). Ma wan man ben de na den mindri di Yesus teki go na wan sei fu poti spesrutu prakseri na en. A man ben dofu, èn pikinmoro a no ben man taki. Kande Yesus ben man si taki a man disi ben e senwe pikinso, noso taki a ben e firi syen. Yesus hori den firi fu a man disi na prakseri, sobun, a puru en na mindri ala den tra sma èn a tyari en go na wan presi pe den ben kan de den wawan. Ne Yesus gebroiki en anu fu sori a man san a ben o du gi en. A „poti en finga na ini den yesi fu a man èn baka di a spiti, a fasi en tongo” (Markus 7:33). * Baka dati,  Yesus luku go na loktu èn a soktu leki a ben e begi Gado wan sani. Nanga den sani disi a taigi a man: ’San mi o du gi yu, mi e du fu di Gado gi mi a makti.’ Te fu kaba Yesus taki: „Kon opo” (Markus 7:34). Ne den yesi fu a man kon opo, èn a ben man taki leki ala tra sma.

20 A e naki wi ati trutru fu si taki Yesus ben e hori den firi fu sma na prakseri, srefi te a ben e gebroiki a makti di Gado ben gi en fu dresi sikiwan! A no e meki yu firi bun fu sabi taki Yehovah gi a Mesias Kownukondre na wan Tiriman di e broko en ede nanga sma, èn di e hori sma firi na prakseri?

Wan marki fu sani di musu kon ete

21, 22. (a) San den wondru fu Yesus ben e sori? (b) San wi kan fruwakti fu a pisi ten di Yesus o tiri leki Kownu, te wi e prakseri a makti di a abi tapu sani soleki winti nanga watra?

21 Den bigi wroko di Yesus du na grontapu, ben de fu sori wi sortu moro bigi blesi wi sa kisi te en o tiri leki kownu. Na ini a nyun grontapu fu Gado, Yesus sa du wondru baka, ma disi leisi a o du wondru na heri grontapu! Prakseri fu wan tu kefalek sani di wi kan fruwakti na ini a ten di e kon.

22 Yesus o seti sani na so wan fasi taki a libi na grontapu sa kon bun dorodoro. Memre taki a ben sori taki a abi makti tapu sani soleki winti nanga watra fu di a ben kowru wan krasi winti. Sobun, te Krestes o tiri leki Kownu, dan libisma no sa abi fu frede gi drai winti, gronseki, bergi di e spiti faya tokotoko, noso tra sortu rampu. Yesus sabi heri bun fa grontapu meki, fu di en na a Tumusi Bun Wrokoman di Yehovah gebroiki fu meki grontapu nanga ala den sani di e libi na tapu. Yesus sabi fa fu gebroiki den sani na grontapu na wan yoisti fasi. Te en o tiri, dan heri grontapu o kenki kon tron wan Paradijs.Lukas 23:43.

23. Fa Yesus sa gi libisma ala san den abi fanowdu te a o tiri leki Kownu?

23 Fa a de nanga den sani di libisma abi fanowdu? Yesus ben man gebroiki wan tu brede nanga pikinso stimofo nomo, fu gi dusundusun sma nyanyan, èn den sma ben nyan teleki den  bere span. A sani dati e gi wi a dyaranti taki a tiri fu en sa meki taki angri no de moro. Iya, te nyanyan o de pasa marki èn te sma o prati en na wan reti fasi, dan angriten sa kaba fu têgo (Psalm 72:16). Te wi luku a makti di Yesus abi fu puru siki, dan dati e sori wi taki den breniwan, den dofuwan, den malengriwan, nanga den sma di lan sa kon betre krinkrin èn taki den no sa siki noiti moro (Yesaya 33:24; 35:5, 6). Te wi hori na prakseri taki Yesus man wiki den dedewan, dan dati e gi wi a dyaranti taki leki Kownu na hemel, a sa abi a makti fu wiki den milyunmilyun sma di en Tata e memre nanga bigi prisiri.Yohanes 5:28, 29.

24. San wi musu hori na prakseri te wi e sidon denki fu a makti fu Yesus? Fu san ede wi musu du dati?

24 Te wi e sidon denki fu a makti fu Yesus, dan meki wi hori na prakseri taki a Manpikin disi e du soifri san en Tata e du (Yohanes 14:9). A fasi fa Yesus e gebroiki en makti e sori wi krin fa Yehovah e gebroiki makti. Fu eksempre, prakseri a switi fasi fa Yesus ben dresi wan gwasiman. Fu di Yesus ben e firi sari gi a man, meki a fasi en èn a taki: „Mi wani” (Markus 1:40-42). A de neleki Yehovah e gebroiki den tori disi fu taigi wi: ’Dati na fa mi e gebroiki a makti fu mi!’ We, yu no e kisi a firi fu prèise wi almakti Gado èn fu taki en tangi taki a gebroiki en makti na so wan lobi-ati fasi?

^ paragraaf 1 Furu tron bigi winti e broko kon tapu a Se fu Galilea sondro fu sma fruwakti dati. Fu di a watra na ini a se disi lagi sowan 200 meter moro a watra na ini den tra bigi se fu grontapu, meki a loktu tapu a se dati moro waran leki a loktu fu a kontren lontu a se. Disi e meki taki, ten na ten, problema e opo kon. Tranga winti di e komoto fu Hermonbergi na noordsei, e wai pasa na ini a Lagipresi fu a Yordan. Disi e meki taki na a wan momenti a se kan kowru, aladi syatu baka dati wan bigi krasi winti kan wai.

^ paragraaf 12 Boiti dati, dan den Evangelietori e taki fu difrenti wondru fu Yesus leki na wán wondru nomo, aladi den no e taki finifini suma na den sma di a dresi. Leki eksempre, na wán okasi wan ’heri foto’ ben kon na en èn a ben dresi „furu” sikiwan.Markus 1:32-34.

^ paragraaf 19 Den Dyu nanga den sma di no ben de Dyu, ben abi a gwenti fu spiti fu dresi sma, noso fu spiti fu sori taki wan sma ben o kon betre. Sani di den Dyu leriman skrifi, e sori tu taki sma ben e gebroiki spiti leki dresi. Kande Yesus ben spiti na gron nomo fu sori a man taki a ben o kon betre. Ma awinsi fa a no fa, na a momenti dati Yesus no gebroiki a spiti fu en fu dresi a man.