Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 8

Makti fu meki sani kon bun baka—Yehovah „e meki ala sani kon nyun”

Makti fu meki sani kon bun baka—Yehovah „e meki ala sani kon nyun”

1, 2. Sortu sani a libisma famiri kan lasi na ini a ten disi? Sortu krakti dati kan abi na wi tapu?

WAN pikin e bigin bari krei fu di a lasi noso broko wan preisani fu en di a lobi. Kande a fasi fa a e krei e broko yu ati! Ma oiti yu si fa so wan pikin e prisiri te en papa noso mama e gi en a sani baka di a ben lasi? Kande a makriki gi a papa noso a mama fu feni a preisani, noso fu meki en baka. Ma a pikin breiti kefalek èn a e fruwondru srefisrefi. A ben denki taki a preisani ben lasi noso pori fu têgo, ma now a kisi en baka!

2 Yehovah, wi moro bigi Papa, abi a makti fu meki sani kon bun baka, srefi te en pikin na grontapu e prakseri taki ala sani lasi krinkrin. A no de fu taki dati wi no e taki fu trutru preisani. Na ini den ’muilek ten disi di tranga fu pasa’, wi e lasi sani di warti omeni tron moro preisani (2 Timoteyus 3:1-5). A gersi leki furu warti sani di libisma lobi de fu lasi gowe, soleki den oso, den gudu, a wroko fu den, èn sosrefi a bun gosontu fu den. Kande wi e sari sosrefi te wi e prakseri a fasi fa sma e doti grontapu, san e meki taki meti nanga tra libisani e dede gowe. Ma nowan sani e hati wi so, leki te wan lobiwan fu wi e dede. A kan bruya wi srefisrefi te wi e lasi wan lobiwan na ini dede, spesrutu fu di wi sabi taki wi no man du noti.2 Samuel 18:33.

3. Fu sortu moi howpu di e gi wi trowstu wi kan leisi na ini Tori fu den Apostel 3:21? San Yehovah o gebroiki fu meki a prakseri dati kon tru?

3 A de wan trowstu fu dati ede fu leri fu a makti di Yehovah abi fu meki sani kon bun baka! Wi sa si taki furu difrenti sani de di Gado man meki kon bun baka gi en pikin na grontapu, èn a sa du dati tu. Iya, Bijbel e sori taki Yehovah wani taki ’ala sani kon bun baka’ (Tori fu den Apostel 3:21). Fu man du dati,  Yehovah sa gebroiki en Mesias Kownukondre, di en Manpikin Yesus Krestes e tiri. Buweisi de di e sori taki a Kownukondre disi bigin tiri na ini hemel na ini 1914 (Mateyus 24:3-14). * Sortu sani sa kon bun baka? Meki wi go luku wan tu kefalek fasi fa Yehovah meki sani kon bun baka. Wan fu den sani disi wi e si èn e ondrofeni nownow kaba, ma wan tu tra sani de tu di o pasa na heri grontapu na ini a ten di e kon.

A soifri anbegi ben seti kon bun baka

4, 5. San pasa nanga a pipel fu Gado na ini 607 b.G.T.? Sortu howpu Yehovah ben gi den?

4 Wan sani di Yehovah seti kon bun baka nownow kaba, na a soifri anbegi. Fu kan kon frustan san dati wani taki, dan meki wi go luku syatu fa a historia fu a kownukondre fu Yuda ben waka. Na so fasi wi sa kon si na wan kefalek moi fasi fa Yehovah gebroiki en makti fu meki sani kon bun baka.Romesma 15:4.

5 Prakseri nomo fa getrow Dyu ben e firi di Yerusalem kisi pori na ini 607 b.G.T. A foto di den ben lobi so te, ben pori krinkrin, den skotu ben broko. Moro ogri srefi, a tumusi moi tempel di Salomo ben bow èn di ben de a wan-enkri presi na grontapu pe a soifri anbegi fu Yehovah ben de, ben tron wan ipi broko ston (Psalm 79:1). Sma ben tyari ala den wan di ben tan na libi go na ini katibo na Babilon èn a kondre fu den ben tron wan presi pe werdri meti ben e libi (Yeremia 9:11). Te yu ben o luku a tori na wan libisma fasi, dan a ben gersi leki ala sani lasi (Psalm 137:1). Ma Yehovah, di ben taki langa ten na fesi taki a pori disi ben o kon, ben gi sma a howpu taki wan ten ben o kon pe ala sani ben o kon bun baka.

6-8. (a) Fu sortu tori den Hebrew profeiti ben e skrifi ibri tron baka? San ben de a fosi kontru fu den profeititori disi? (b) Fa a pipel fu Gado na ini a ten disi e si a kontru fu den profeititori di abi fu du nanga sani di Gado ben meki kon bun baka?

 6 Fu taki en leti, ibri tron baka den Hebrew profeiti ben e skrifi fu a meki di Gado ben o meki sani kon bun baka. * Yehovah ben gebroiki den profeiti dati fu pramisi taki a kondre ben o kon bun baka èn taki a ben o kon furu nanga sma baka. A gron ben o kon fatu, èn werdri meti nanga ogri feanti no ben o du ogri nanga den sma fu a kondre. A ben taki dati a kondre fu den ben o tron wan moi paradijs! (Yesaya 65:25; Esekièl 34:25; 36:35) Boiti dati, dan a soifri anbegi ben o seti kon bun baka, èn a tempel ben o bow baka (Mika 4:1-5). Den profeititori dati ben e gi den Dyu howpu baka, so taki den ben kan horidoro na ini den 70 yari fu katibo na ini Babilon.

7 Te fu kaba, a ten ben doro fu meki sani kon bun baka. Di den Dyu kon fri fu Babilon, den drai go baka na Yerusalem èn den bow a tempel fu Yehovah baka (Esra 1:1, 2). Yehovah ben e blesi den, solanga den ben e hori densrefi na a soifri anbegi. A ben meki a gron fu a kondre gi bun nyanyan èn a meki ala sani waka bun na ini a kondre fu den. A kibri den gi feanti èn gi den werdri meti di ben e libi na ini a kondre dati someni tenti yari langa. A musu de taki den ben e prisiri srefisrefi nanga a makti di Yehovah abi fu meki sani kon bun baka! Ma den sani di pasa na a ten dati ben de soso a fosi kontru fu den profeititori di ben e sori taki Gado ben o meki sani kon bun baka. Den profeititori ben o abi wan moro bigi kontru na „a kabapisi fu den dei”. Sobun, den ben o kon tru na ini a ten fu wi, te a Bakapikin fu Kownu David di Gado ben pramisi langa ten kaba, ben o kisi kownumakti.Yesaya 2:2-4; 9:6, 7.

8 Syatu baka di Yesus ben tron kownu fu a hemel Kownukondre na ini 1914, dan a bigin poti prakseri na a yeye nowtu fu a getrow pipel fu Gado na grontapu. Na ini 537 b.G.T., Sirus, a winiman fu Persia kondre, ben fri den Dyu di ben tan abra na ini Babilon. Na a srefi fasi Yesus ben fri den bakaman fu en, a Dyu fikapisi na  yeye fasi. A puru den na ondro a makti fu a disiten Babilon, noso a grontapumakti fu falsi anbegi (Romesma 2:29; Openbaring 18:1-5). Sensi 1919, a soifri anbegi ben kisi en yoisti presi baka na ini a libi fu tru Kresten (Maleaki 3:1-5). Sensi a ten dati, a pipel fu Yehovah anbegi en na ini en yeye tempel, dati na den sani di a ben seti gi a soifri anbegi fu Gado. Fu san ede a sani disi de prenspari gi wi na ini a ten disi?

Fu san ede a de prenspari fu kon bun baka na yeye fasi

9. San den falsi Kresten kerki du nanga na anbegi fu Gado, baka di ala den apostel dede? Ma san Yehovah du na ini a ten fu wi?

9 Prakseri fa sani waka na ini a historia. Kresten na ini a fosi yarihondro ben kisi furu blesi na yeye fasi. Ma Yesus nanga den apostel ben e warskow taki a tru anbegi ben o kon pori èn taki a ben o lasi gowe (Mateyus 13:24-30; Tori fu den Apostel 20:29, 30). Baka di ala den apostel dede, dan a falsi Kresten bribi opo kon. Den kerki fesiman fu den ben teki difrenti falsi leri nanga gwenti abra. Den ben e meki taki sma no ben man go krosibei na Gado fu di den ben taki dati Gado prati na dri pisi, aladi a de wán Gado, èn disi na wan sani di sma no man frustan. Den ben leri sma tu fu go na den priester fu fruteri den ala den sondu fu den, èn fu anbegi Maria nanga difrenti tra „santawan”, na presi fu Yehovah. Ma san Yehovah du dan, baka someni yarihondro fu falsi leri? Na ini a grontapu fu tide, wan grontapu di lai nanga falsi bribi èn nanga gwenti di no e kruderi nanga a wani fu Gado, dan Gado srefi du wan sani fu seti a soifri anbegi kon bun baka! Nanga ala reti wi kan taki dati a sani disi na wan fu den moro prenspari sani di e feni presi na ini a ten fu wi.

10, 11. (a) San na tu sani di abi fu du nanga a paradijs na yeye fasi? San disi abi fu du nanga yu? (b) Sortu sma Yehovah tyari kon na wán na ini a paradijs na yeye fasi? Sortu grani den sa kisi?

10 Dati meki tru Kresten na ini a ten disi de na ini wan paradijs na yeye fasi. San na tu prenspari sani di abi fu du nanga a paradijs disi? A fosiwan na a soifri anbegi fu a tru Gado, Yehovah. A blesi wi nanga wan fasi fu anbegi di no moksi nanga lei èn di de soifri. A blesi wi nanga yeye nyanyan. Disi e yepi wi fu leri moro  fu wi hemel Tata, so taki wi kan plisi en èn kon krosibei na en (Yohanes 4:24). A di fu tu sani di abi fu du nanga a paradijs na yeye fasi, abi fu du nanga sma. Soleki fa Yesaya taki na fesi, dan „na ini a kabapisi fu den dei”, Yehovah leri den anbegiman fu en fu suku vrede. A meki taki wi no e feti moro. Aladi wi na sondu sma, toku a e yepi wi fu teki „a nyun fasi fa wan sma musu de”. A e blesi den muiti fu wi, fu di a e gi wi en santa yeye di e meki taki wi e kon kisi moi fasi noso maniri (Efeisesma 4:22-24; Galasiasma 5:22, 23). Te yu e du san a yeye fu Gado e sori yu, dan yu na wan fu den sma di e libi na ini a paradijs na yeye fasi trutru.

11 Den sma di Yehovah tyari kon na wán na ini a paradijs na yeye fasi fu en na sma di a lobi, iya, den na sma di lobi en, di lobi vrede èn di „sabi taki den abi Gado fanowdu” (Mateyus 5:3). Den sma dati sa kisi a grani fu si fa Gado o meki sani kon bun baka na wan moro bigi fasi te a libisma famiri nanga a heri grontapu sa kon bun baka.

„Luku! Mi e meki ala sani kon nyun”

12, 13. (a) Fu san ede den profeititori di e taki fu a ten pe Gado o meki sani kon bun baka, musu kon tru na ete wan tra fasi? (b) San Yehovah ben wani du nanga grontapu soleki fa a ben taki na ini Eden? Fu san ede disi e gi wi howpu gi a tamara?

12 Furu profeititori di e taki fu a ten di sani o meki kon bun baka, no abi fu du nomo nanga a fasi fa sma musu kon bun baka na yeye fasi. Wan eksempre fu dati na san Yesaya ben skrifi fu wan ten pe sikiwan, sma di lan, breniwan, nanga dofu sma ben o kon betre, èn pe dede srefi ben o kaba fu têgo (Yesaya 25:8; 35:1-7). Den pramisi dati no ben kon tru na ini Israel fu owruten. Ma aladi wi si fa den pramisi disi kon tru na yeye fasi na ini a ten fu wi, toku wi kan fruwakti taki na ini a ten di e kon, den sa kon tru dorodoro. Fa wi du sabi dati?

13 Na ini a ten fu Eden, Yehovah ben sori krin san a ben wani du nanga a grontapu: A ben musu kon furu nanga wan koloku, gosontu libisma famiri di ben o libi na ini wánfasi. Man nanga uma ben o abi fu sorgu grontapu nanga ala den sani na en tapu, fu meki a heri planeiti tron wan paradijs (Genesis 1:28). Te yu luku a libi na ini a ten disi, dan a no de so kwetikweti. Ma wi  no abi fu frede, fu di nowan sani kan tapu Yehovah fu du san a wani (Yesaya 55:10, 11). Yesus, a Mesias Kownu di Yehovah poti na wroko, sa seti a Paradijs disi na a heri grontapu.Lukas 23:43.

14, 15. (a) Fa Yehovah o meki „ala sani kon nyun”? (b) Fa a libi na ini a Paradijs o de? Sortu sani fu a Paradijs e hari yu moro furu?

14 Prakseri fa a sa de te heri grontapu tron wan Paradijs! Yehovah e taki fu a ten dati: „Luku! Mi e meki ala sani kon nyun” (Openbaring 21:5). Prakseri san dati o wani taki. Baka te Yehovah gebroiki en makti fu pori na owru takru sistema disi, dan wi o si wan „nyun hemel nanga wan nyun grontapu”. Disi wani taki dati wan nyun tirimakti na hemel sa tiri a nyun grontapu libimakandra pe sma sa libi di lobi Yehovah èn e du en wani (2 Petrus 3:13). Gado sa meki taki Satan nanga den ogri yeye mati fu en no sa man du noti moro (Openbaring 20:3). Fu a fosi leisi na ini someni dusun yari, libisma sa kon fri fu a kruka, bita-ati, takru krakti dati. A no de fu taki dati sma sa breiti srefisrefi te dati pasa.

15 Te fu kaba, wi sa man sorgu a moi planeiti disi soleki fa wi ben musu du dati sensi a bigin. A grontapu meki na so wan fasi taki a kan meki ensrefi kon bun baka. Den se nanga den liba kan krin densrefi efu den sani di ben e doti den no de moro; te ala orloku tapu, dan den kontren di pori na ini orloku kan kon bun baka. A sa switi srefisrefi fu yepi sorgu a grontapu na wan fasi di fiti, fu di wi o yepi fu meki a tron wan presi di gersi wan bigi bromki dyari, neleki wan bigi dyari fu Eden di abi ala sortu moi sani na ini! Na presi taki libisma e pori ala den meti nanga den sani di e gro na grontapu, dan den o libi na ini vrede nanga ala sani di de lontu den. Srefi pikin-nengre no sa abi fu frede den werdri meti.Yesaya 9:6, 7; 11:1-9.

16. Sortu sani di Gado sa meki kon bun baka na ini a Paradijs sa tyari wini gi ala getrow sma?

16 Wi sa ondrofeni tu fa wisrefi o kon bun baka. Den sma di libi pasa Armagedon o si fa sma na heri grontapu o kon betre na wan wondru fasi. Yesus sa gebroiki a makti di Gado gi en fu meki sani kon bun baka, neleki fa a ben du di a ben de na grontapu. A sa meki taki breniwan kan si baka, dofuwan kan yere baka, èn a skin fu sma di lan èn fu tra siki sma kon bun baka (Mateyus 15:30). Den owruwan o kon yongu, den o abi wan bun gosontu  èn den o kisi krakti baka (Yob 33:25). Ala den ploiploi na den skin o kon grati, den o man tanapu leti-opo èn den titei fu den skin sa kisi nyun krakti. Ala getrow libisma o si taki den bakapisi fu sondu e gowe safrisafri, teleki den komoto krinkrin. Dan wi o taki Yehovah Gado dusun tron grantangi fu a kefalek krakti di a abi fu meki sani kon bun baka! Meki wi poti prakseri now na wan tumusi moi sani di abi fu du nanga a span ten pe Gado o meki sani kon bun baka.

Den dedewan sa kisi libi baka

17, 18. (a) Fu san ede Yesus ben piri-ai gi den Saduseisma? (b) San ben meki Elia aksi Yehovah fu wiki wan dede sma?

17 Na ini a fosi yarihondro G.T., son kerki fesiman di den ben kari Saduseisma, no ben e bribi na ini na opobaka. Yesus ben piri-ai gi den èn a ben taigi den: „A no de soleki fa unu e taki, bika unu no sabi den Santa Buku èn unu no sabi a krakti fu Gado tu” (Mateyus 22:29). Iya, den Santa Buku e sori taki Yehovah abi a makti fu meki sani kon bun baka. Fa so?

18 Prakseri san ben pasa na ini den dei fu Elia. Wan weduwe ben e hori a dedeskin fu en manpikin na ini en anu. A ben de a wan-enkri pikin fu en. A musu de taki a profeiti Elia, di ben de leki fisitiman na ini na oso fu a weduwe disi wan pisi ten kaba, ben e sari srefisrefi di a si dati. Wan pisi ten pasa, a ben du wan sani fu no meki a pikin disi dede fu angri. A kan taki Elia ben kon lobi a pikin boi disi. A mama ben brokosaka krinkrin. A boi dati ben de a wan-enkri sma di ben e memre en na en masra di ben dede kaba. Kande a ben howpu taki en manpikin ben o sorgu en te a kon owru. Na uma disi ben bruya, a ben e frede taki a ben e kisi strafu gi wan sondu di a ben du. Elia no ben man sidon luku fa a situwâsi fu na uma ben e kon moro takru. Safri a teki a dedeskin puru na a anu fu a mama, a kren go na a kamra fu en, èn a begi Yehovah Gado fu gi a pikin en sili, noso en libi baka.1 Kownu 17:8-21.

19, 20. (a) Fa Abraham ben sori taki a ben e bribi na ini a makti di Yehovah abi fu meki sani kon bun baka? Fu san ede a ben e bribi dati? (b) Fa Yehovah ben blesi Elia gi a bribi fu en?

19 Elia no ben de a fosi sma di ben e bribi na ini na opobaka.  Wan tu yarihondro na fesi, Abraham ben bribi taki Yehovah ben abi a makti fu meki sani kon bun baka, èn a no fu soso a ben e bribi dati. Di Abraham ben abi 100 yari èn Sara ben abi 90 yari, dan na wan wondru fasi Yehovah ben meki Sara kon de nanga bere fu wan manpikin, aladi den tu sma disi ben owru tumusi fu man meki pikin (Genesis 17:17; 21:2, 3). Bakaten, di a boi disi ben kon bigi kaba, dan Yehovah aksi Abraham fu tyari en manpikin leki ofrandi. Abraham ben sori bribi, fu di a ben sabi taki Yehovah ben kan gi en lobi manpikin Isak libi baka (Hebrewsma 11:17-19). A kan taki a tranga bribi dati ben meki taki, bifo Abraham kren go na tapu a bergi fu tyari Isak leki ofrandi, a ben kan gi den futuboi fu en a dyaranti taki a ben o drai kon baka nanga Isak.Genesis 22:5.

„Luku, yu manpikin de na libi”!

20 Yehovah ben kibri a libi fu Isak. Dati meki Isak no ben abi fu kisi wan opobaka na a ten dati. Ma ini a tori fu Elia, a manpikin fu a weduwe ben dede kaba. Toku dati no ben tan so. Yehovah ben blesi a bribi fu a profeiti fu di a gi a pikin wan opobaka! Dan Elia gi a boi baka na en mama, aladi a taki den wortu disi di a mama no ben sa frigiti noiti: „Luku, yu manpikin de na libi”!1 Kownu 17:22-24.

21, 22. (a) San ben de a marki fu den opobaka di kari na ini Bijbel? (b) O furu sma o kisi wan opobaka na ini a Paradijs? Suma o gi den na opobaka dati?

21 Dati na a fosi tron taki wi e leisi na ini Bijbel taki Yehovah gebroiki a makti di a abi fu meki sma kon na libi baka. Bakaten Yehovah ben gi makti na Elisa, Yesus, Paulus, nanga Petrus, so taki den ben kan wiki dedesma. A no de fu taki dati den wan di ben kisi wan opobaka, dede baka te fu kaba. Toku den sortu Bijbel tori disi e sori wi na wan moi fasi fa sani o de na ini a ten di e kon.

22 Bijbel e kari Yesus ’na opobaka nanga a libi’. Na ini a Paradijs a sa handri akruderi a nen dati (Yohanes 11:25). A sa gi milyunmilyun sma wan opobaka, èn a o gi den na okasi fu libi fu têgo na ini a Paradijs na grontapu (Yohanes 5:28, 29). Prakseri fa a o de te lobiwan nanga famiriman e miti makandra, baka di dede  ben prati den wan langa ten. Iya, prakseri fa den o brasa makandra, aladi den e krei fu prisiri! Ala libisma sa prèise Yehovah gi a makti di a abi fu meki sani kon bun baka.

23. San na a moro bigi fasi fa Yehovah sori a makti fu en? Fa disi e gi wi a dyaranti taki san wi e howpu fu a tamara sa kon tru?

23 Yehovah gi wi a dyaranti taki a howpu dati sa kon tru nomonomo. A moro bigi fasi fa Yehovah sori a makti fu en, ben de di a gi en Manpikin, Yesus, wan opobaka leki wan makti yeye, so taki baka Yehovah, Yesus ben abi a moro bigi makti. Hondrohondro sma si Yesus, baka di a kisi wan opobaka (1 Korentesma 15:5, 6). Den buweisi disi nofo srefi fu overtoigi sma di e tweifri. Yehovah abi a makti fu gi sma libi baka.

24. Fu san ede wi kan abi a frutrow taki Yehovah sa wiki den dedewan? Sortu howpu ibriwan fu wi kan abi?

24 A no de so nomo taki Yehovah abi a makti fu wiki den dedewan, ma ensrefi wani du dati tu. A yeye fu Gado ben meki a getrow man Yob taki dati Yehovah e angri fu wiki den dedewan (Yob 14:15). Yu no e firi fu tron wan bun mati fu wi Gado, di e angri fu gebroiki en makti na wan lobi-ati fasi fu meki sani kon bun baka? Ma memre taki na opobaka na soso wan fu den kefalek fasi fa Yehovah o meki sani kon bun baka. Tan du muiti fu kon moro krosibei na en, èn tan sori warderi gi a warti howpu di yu abi, namku a howpu taki yu kan de drape fu si fa Yehovah „e meki ala sani kon nyun”.Openbaring 21:5.

^ paragraaf 3 ’A ten pe ala sani sa kon bun baka’ bigin di a Mesias Kownukondre ben seti, èn di wan bakapikin fu Kownu David ben tron kownu. Yehovah ben pramisi David taki wan bakapikin fu en ben o tiri fu têgo (Psalm 89:35-37). Ma baka di Babilon pori Yerusalem na ini 607 b.G.T., dan nowan bakapikin fu David sidon na tapu a kownusturu fu Gado dyaso na grontapu. Yesus ben gebore na grontapu leki wan bakapikin fu David. Di a ben kisi kownumakti na ini hemel, dan a ben tron a Kownu di Gado ben pramisi langa ten kaba.

^ paragraaf 6 Wan tu profeiti di ben taki fu a tori disi ben de: Moses, Yesaya, Yeremia, Esekièl, Hosea, Yoèl, Amos, Obadya, Mika, nanga Sefanya.