1, 2. Sortu kefalek sani Elia ben si kaba na ini en libi, ma sortu tumusi aparti sani a ben si di a ben de na ini a mofo fu a ston-olo fu a Horeb-bergi?

ELIA ben si someni kefalek sani kaba. A ben si fa blaka fowru tyari nyanyan kon gi en tu tron wan dei, di a ben lowe go kibri. Di angriten ben de na ini a kondre, dan a ben si fa wan kroiki nanga blon èn wan nanga oli no ben kon leigi na ini a heri pisi ten dati. Wan leisi a si srefi fa faya komoto fu hemel baka di a ben begi Gado (1 Kownu, kapitel 17, 18). Toku noiti ete Elia ben si iniwan sani leki san a o si now.

2 A ben e bukundu na a mofo fu wan ston-olo fu a Horeb-bergi, di a si wan tu tumusi aparti sani pasa leti na en fesi. Fosi wan bigi winti ben kon. A musu de taki a winti ben e meki bigi babari, bika a ben abi so furu krakti taki a ben e priti bergi opo èn ben e panya klepston. Baka dati, den kefalek krakti di de na inisei fu a grontapu ben tyari wan bigi gronseki kon. Dan wan bigi faya kon. A musu de taki Elia ben man firi a bigi faya dati di ben e pasa na ini a kontren.1 Kownu 19:8-12.

„Luku! Yehovah ben e pasa”

3. Sortu fasi fu Gado ben kon na krin na ini den tumusi aparti sani di Elia ben si? Pe wisrefi kan si buweisi fu a prenspari fasi disi?

3 Te yu luku en bun, dan ala den difrenti sani di Elia ben si ben e sori a bigi makti fu Yehovah Gado. A no de fu taki, dati wi no abi fu si wan wondru fu kon sabi taki Gado abi a makti disi. Ala sma kan si a makti fu en. Bijbel e fruteri wi taki den sani di Yehovah meki na buweisi fu en „têgo krakti nanga en makti leki Gado” (Romesma 1:20). Prakseri nomo fa a de te faya e koti na loktu èn te yu e yere fa bigi dondru e bari! Prakseri a watra fu wan bun bigi sula di e saka kon nanga furu krakti, noso a loktu di lai nanga so furu stari taki wi no man teri den! Den sortu sani disi e sori yu taki Gado abi bun furu makti, a no so? Toku wan tu sma nomo na ini a grontapu disi man si trutru taki Gado abi makti. Soso wan pikin grupu fu den sma dati e frustan san a  makti dati wani taki trutru. Ma te wi kon frustan a kefalek moi fasi disi di Gado abi, dan wi sa si krin fu san ede wi musu wani kon krosibei na Yehovah. Na ini a pisi disi, wi sa go ondrosuku a kefalek bigi makti fu Yehovah finifini.

Wan prenspari fasi fu Yehovah

4, 5. (a) San a nen fu Yehovah abi fu du nanga a krakti, noso a makti fu en? (b) Fu san ede a fiti taki Yehovah ben teki mankaw leki eksempre fu agersi a makti fu en?

4 A makti fu Yehovah na wan aparti sortu makti. Yeremia 10:6 e taki: „Nowan sma no de di de leki yu, o Yehovah. Yu bigi èn yu nen abi furu krakti.” Luku taki krakti noso makti abi fu du nanga a nen fu Yehovah. Hori disi na prakseri: Soleki fa a sori, dan a nen fu en wani taki „A e meki kon tron”. Fa a du kon taki Yehovah man fu meki ensrefi kon tron iniwan sani di a wani? We, wan prenspari sani di e meki taki a man du dati, na a makti fu en. Iya, Yehovah abi a makti fu du iniwan sani di de fanowdu fu meki a wani fu en kon tru. A makti dati na wan fu den moro prenspari fasi fu en.

5 Noiti wi sa man frustan trutru o bigi a makti fu Yehovah de. Dati meki a e gebroiki agersitori fu yepi wi pikinso. Leki fa wi si kaba, dan a e gebroiki a mankaw fu agersi a makti fu en (Esekièl 1:4-10). Na eksempre dati fiti srefisrefi, fu di srefi a mankaw di sma e kweki leki osometi, na wan bigi tranga meti. Moro furu a ben de so taki a moro tranga meti di sma fu Palestina na ini Bijbel ten ben sabi, ben de a mankaw. Ma den ben sabi taki wan moro bigi sortu mankaw ben de, namku a werdri mankaw; wan meti di no de moro (Yob 39:9-12). Julius Caesar, a Kèiser fu Rome, ben taki dati pikinmoro den kaw disi ben bigi leki asaw. „Den tranga kefalek”, a ben skrifi, „èn den gaw srefisrefi tu.” Prakseri o pikin èn o swaki yu ben o firi yusrefi te yu ben o tanapu na sei so wan meti!

6. Fu san ede meki Yehovah na a wan-enkri sma di wi kan kari „na Almaktiwan”?

6 Na so wi kan taki tu dati libisma swaki srefisrefi te yu ben sa  teki libisma gersi nanga Yehovah, a Gado fu makti. So a de tu taki, srefi den tranga kondre de gi Gado leki fini doti na tapu wan wegi (Yesaya 40:15). Tra fasi leki iniwan libisani, dan Yehovah abi a makti fu du iniwan sani di a wani, bika en na a wan-enkri sma di wi kan kari „na Almaktiwan” (Openbaring 15:3). * Yehovah „tranga srefisrefi” èn a abi „bigi krakti pasa marki” (Yesaya 40:26). A krakti fu en furu so te, taki a no man kaba noiti. A no abi sani fanowdu fu gi en krakti, fu di „krakti na fu Gado” (Psalm 62:11). Ma fa Yehovah e sori a makti fu en dan?

A fasi fa Yehovah e sori a makti fu en

7. San na a santa yeye fu Yehovah? Nanga sortu sani den Hebrew nanga Griki wortu fu Bijbel di vertaal nanga santa yeye, abi fu du?

7 Yehovah e tan gebroiki en santa yeye bogobogo. A yeye dati na a makti di Gado e gebroiki fu du sani. Fu taki en leti, dan na ini Genesis 1:2, Bijbel e kari a krakti disi a „wroko krakti” fu Gado. Den Hebrew nanga Griki wortu di vertaal nanga „yeye”, kan vertaal son leisi nanga „winti”, „bro”, noso „tranga winti di e wai”. Sma di skrifi wortubuku e taki dati den Hebrew nanga den Griki wortu dati abi fu du nanga wan krakti di e du sani, aladi yu no man si a krakti dati. Neleki fa wi no man si a winti, na so wi no man si a yeye fu Gado, ma den sani di a yeye fu Gado e du na sani di wi e si krin.

8. Nanga san Bijbel e agersi a yeye fu Gado? Fu san ede a fiti fu agersi a yeye fu Gado nanga den sani dati?

8 Gado kan gebroiki en santa yeye na ala sortu fasi. Yehovah kan gebroiki en fu du iniwan sani di a abi na prakseri. Fu dati ede a fiti, taki na wan agersi fasi Bijbel e kari a yeye disi, a „finga” fu Gado, a „tranga anu” fu en, noso na „anu di a langa” fu du wan sani (Lukas 11:20; Deuteronomium 5:15; Psalm 8:3). Wan man kan gebroiki en anu fu du furu difrenti sortu wroko pe a musu gebroiki a krakti fu en na difrenti fasi. So a de tu taki Gado kan gebroiki a yeye fu en fu du iniwan sani di a abi na prakseri. Fu eksempre, a meki den moro pikin sani di wi no man si nanga  wi ai, a meki den watra fu a Redi Se prati fu makandra, èn a meki den fosi yarihondro Kresten taki na ini tra tongo.

9. O furu makti Yehovah abi leki tiriman?

9 Yehovah abi makti tu fu di en na a Moro Heiwan fu hemel nanga grontapu. Yu man frustan trutru san a wani taki fu abi milyunmilyun sma na yu ondro, sma nanga bunbun frustan di de klariklari fu du ala san yu e komanderi den? Yehovah abi a sortu makti dati fu tiri sma. A abi libisma leki futuboi, èn furu tron Bijbel e teki den gersi nanga wan bigi legre (Psalm 68:11; 110:3). Ma te yu teki wan libisma gersi nanga wan engel, dan libisma swaki srefisrefi. Iya, di a legre fu Asiria ben go feti nanga a pipel fu Gado, dan wán engel nomo kiri 185.000 srudati fu a legre dati na ini wán neti! (2 Kownu 19:35) Den engel fu Gado „tranga srefisrefi”.Psalm 103:19, 20.

10. (a) Fu san ede Bijbel e kari na Almaktiwan, Yehovah fu den legre? (b) Suma na a moro maktiwan fu ala sani di Yehovah meki?

10 Omeni engel de? A profeiti Danièl ben kisi wan fisyun fu hemel pe a ben si moro leki 100 milyun yeye libisani na fesi a kownusturu fu Yehovah. Ma noti no e sori taki a si ala den engel di de na hemel (Danièl 7:10). Sobun, a kan taki someni milyun engel de. Dati meki Bijbel e kari Gado, Yehovah fu den legre. A fasi disi fa Bijbel e kari Gado e sori a hei posisi fu en leki a Komandanti fu wan bun bigi legre fu tranga engel di orga bun. Gado poti wán fu den yeye libisani disi leki fesiman fu ala den trawan. A wan dati na en wan-enkri lobi Manpikin, „a fosi geborewan fu ala den sani di Gado meki” (Kolosesma 1:15). Leki a gran engel, dati wani taki a granman fu ala den engel, den seraf, nanga den kerubim, dan Yesus de a moro maktiwan fu ala sani di Yehovah meki.

11, 12. (a) Na sortu fasi a wortu fu Gado abi krakti? (b) San Yesus ben taki fu sori o furu makti Yehovah abi?

11 Yehovah e sori a makti fu en na ete wan tra fasi. Hebrewsma 4:12 e taki: „A wortu fu Gado de libilibi èn a abi krakti.” Yu si a bigi krakti di Bijbel, a wortu fu Gado, noso a boskopu di skrifi nanga santa yeye, kan abi tapu sma? A kan tranga wi, a kan tranga wi bribi, èn a kan yepi wi fu tyari bigi kenki kon na ini wi  libi. Na apostel Paulus ben warskow Kresten brada nanga sisa na ini a ten fu en, fu luku bun nanga sma di ben e libi wan doti fisti hurulibi. Ma baka dati a ben taki: „Toku, sonwan fu unu ben de den sortu sma dati” (1 Korentesma 6:9-11). Iya, „a wortu fu Gado” ben abi krakti na den tapu èn a yepi den fu kenki.

12 A makti fu Yehovah bigi so te, èn a fasi fa a e sori a makti dati de so kefalek taki nowan sani no kan tapu en fu du san a wani. Yesus ben taki: „Gado man du ala sani” (Mateyus 19:26). Gi sortu sani Yehovah e gebroiki a makti fu en?

A e gebroiki en makti fu du san a abi na prakseri

13, 14. (a) Fu san ede wi kan taki dati Yehovah a no wan sortu krakti di no abi firi gi sma? (b) Na sortu fasi Yehovah e gebroiki a makti fu en?

13 A yeye fu Yehovah na wan krakti di bigi moro ala tra krakti di wi sabi. Yehovah a no wan sortu krakti di no abi firi gi sma, noso wan sani pe krakti e komoto na ini nomo. A de wan Gado di de trutru èn a gebroiki a makti fu en fa ensrefi wani. Ma san e pusu Gado dan fu gebroiki a makti fu en?

14 Soleki fa wi o si, dan Gado e gebroiki en makti fu meki sani, fu pori sani, fu kibri sma, èn fu meki sani kon bun baka, sobun, fu du iniwan sani di de fanowdu fu meki den volmaakti prakseri fu en kon tru (Yesaya 46:10). Son tron Yehovah e gebroiki a makti fu en fu tyari prenspari sani kon na krin di abi fu du nanga a sma di a de èn nanga den markitiki fu en. Boiti dati, dan a e gebroiki en makti fu meki a wani fu en kon tru; a e gebroiki en fu sori taki a abi a reti fu de a Moro Heiwan, èn fu meki a santa nen fu en kon santa baka nanga yepi fu a Mesias Kownukondre. Noti no kan tapu en fu du san a abi na prakseri.

15. San Yehovah e du nanga a makti fu en te a abi fu du nanga den futuboi fu en? Fa disi ben kon na krin ini a tori fu Elia?

15 Yehovah e gebroiki a makti fu en sosrefi fu tyari wini gi ibriwan fu wi. Luku san 2 Kroniki 16:9 e taki: „Yehovah fu en sei, den ai fu en e luku a heri grontapu lontu fu gebroiki a krakti fu en fu a bun fu den sma di lobi en nanga den heri ati.” Na eksempre fu Elia di kari na a bigin fu a kapitel disi, na wan bun eksempre  fu dati. Fu san ede Yehovah ben sori Elia a makti fu En na so wan kefalek fasi? We, na ogri-ati uma-kownu Iseibèl ben sweri taki a ben o meki sma kiri Elia. Na lowe a profeiti ben lowe gowe fu kibri en libi. A ben e firi leki a ben de en wawan, a ben e frede, èn a ben lasi-ati; a ben e firi neleki a tranga wroko fu en ben de fu soso. Fu trowstu Elia di ben e sari trutru, dan Yehovah du wan tu kefalek sani fu memre en na a makti di A abi. A winti, a gronseki, nanga a faya ben e sori taki a moro tranga Sma fu hemel nanga grontapu ben de drape nanga Elia. Fu san ede a ben sa frede Iseibèl, aladi na almakti Gado ben de na en sei?1 Kownu 19:1-12. *

16. Fu san ede wi kan kisi trowstu te wi e prakseri bun fu a bigi makti fu Yehovah?

16 Aladi Yehovah no e du wondru moro na ini a ten disi, toku a no kenki sensi den dei fu Elia (1 Korentesma 13:8). Te now ete a de klariklari fu gebroiki a makti fu en gi a bun fu den wan di lobi en. A tru taki a e libi na ini den hei presi pe den yeye e tan, ma toku a no de fara fu wi. A kan du ala san a wani nanga a makti fu en, sobun a no abi trobi o fara wan sani de. Na presi fu dati „Yehovah de krosibei fu ala den wan di e kari en” (Psalm 145:18). Wan leisi di a profeiti Danièl ben e begi Yehovah fu yepi en, dan wan engel ben kon na Danièl bifo a ben kaba begi srefi! (Danièl 9:20-23) Sobun, noti no kan tapu Yehovah fu yepi den wan di a lobi èn fu tranga den sma dati.Psalm 118:6.

A makti fu Gado e meki taki wi no man go krosibei na en?

17. Na sortu fasi a makti fu Yehovah e meki taki wi frede en, ma sortu frede a makti disi no musu meki wi kisi?

17 A makti fu Yehovah musu meki wi frede en? Te yu luku en bun, dan wi musu piki iya èn nôno. Wi kan piki iya, fu di a  makti fu en e meki wi kon frustan krin taki wi musu abi frede gi Gado. Dati wani taki dati wi musu abi bigi lespeki nanga warderi gi Gado, soleki fa wi ben taki syatu kaba na ini kapitel 3. Bijbel e taki dati a sortu frede dati „na a bigin fu koni” (Psalm 111:10). Ma wi e piki nôno sosrefi, fu di a makti fu Gado no e meki taki wi e kisi wan sortu takru frede gi en, noso taki wi e frede fu go krosibei na en.

18. (a) Fu san ede furu sma no e frutrow den wan di abi furu makti? (b) Fa wi du sabi taki a makti fu Yehovah no kan meki a kon kruka?

18 „Makti kan meki sma kon kruka; tumusi furu makti e meki sma kon kruka dorodoro.” Na so na Ingrisi historia skrifiman Lord Acton ben skrifi na ini 1887. Sma gebroiki den wortu fu en furu tron, kande fu di furu sma e si den wortu disi leki tru tori. Soleki fa a historia sori ibri tron baka, dan sondu libisma lobi fu gebroiki a makti fu den na wan fasi di no fiti (Preikiman 4:1; 8:9). A sani disi meki taki furu sma no e frutrow den wan di abi makti èn den e tan farawe fu den. Ma now, wi sabi taki Yehovah abi ala makti. A sani dati meki taki Gado kon kruka pikinso tu? Nôno, kwetikweti! Neleki fa wi ben si kaba, dan Gado de santa, noti no kan pori a fasi fa a de. Yehovah no de leki den sondu man nanga uma di abi furu makti na ini a kruka grontapu disi. Noiti a gebroiki a makti fu en fu du ogri èn noiti a sa du dati tu.

19, 20. (a) Sortu tra fasi fu Yehovah abi krakti tapu a fasi fa a e sori a makti fu en? Fu san ede dati de wan trowstu gi wi? (b) Sortu agersitori yu kan gebroiki fu sori taki Yehovah man dwengi ensrefi? Fu san ede a sani dati e hari yu?

19 Memre taki makti a no a wan-enkri fasi fu Yehovah. Wi musu taki ete fu a retidu, a koni, nanga a lobi fu en. Ma wi no musu prakseri taki Yehovah e sori den fasi fu en wan fru wan, neleki en na wan sortu masyin di e wroko na wán fasi nomo. Na presi fu dati, wi sa si na ini den kapitel di e kon taki a de so ala ten taki a retidu, a koni, nanga a lobi fu Yehovah abi krakti tapu a fasi fa a e sori a makti fu en. Prakseri fu wan tra fasi di Gado abi tu, wan fasi di yu no e si so furu na ini grontapu tiriman — a fasi fu dwengi yusrefi.

 20 Kon meki wi taki dati yu miti wan man di en skin bigi so te, noso di tranga so te, taki yu e frede en. Ma baka wan pisi ten yu e si taki a abi switifasi. Ala ten a de klariklari fu gebroiki en krakti fu yepi trawan èn fu kibri den, spesrutu swakiwan noso den wan di no abi sma fu yepi den. Noiti a e gebroiki a krakti fu en fu du ogri. Yu e si fa sma e kosi en sondro taki a du den wan sani, toku a e tan tiri, a no e atibron; a tyari ensrefi na wan lespeki fasi, aladi a e sori switifasi srefi. Yu e bigin aksi yusrefi efu yu ben o man sori den srefi switi maniri dati èn efu yu ben o man hori yusrefi tu, spesrutu efu yu ben tranga neleki en! O moro yu ben o kon sabi so wan man, o moro yu ben o lobi en, a no so? Te yu luku en bun, dan moro furu sani de fu san ede wi wani kon krosibei na a almakti Yehovah. Poti prakseri na a tekst pe den puru a nen fu a kapitel disi: „Yehovah no e kisi atibron esi-esi èn a abi bigi makti” (Nahum 1:3). Yehovah no de esi fu gebroiki a makti fu en fu du sani nanga sma, srefi nanga den ogriwan a no e handri so. A abi safrifasi nanga switifasi. A sori krin taki en na wan sma di „no e kisi atibron esi-esi”, srefi te sma e tanteri en.Psalm 78:37-41.

21. Fu san ede meki Yehovah no e dwengi sma fu du a wani fu en? San dati e leri wi fu en?

21 Meki wi luku wan tra fasi fa Yehovah e dwengi ensrefi.  Efu yu ben abi ala makti, dan yu denki taki yu ben o suku fu dwengi sma son leisi fu du san yu wani? Yehovah di abi so furu makti, no e dwengi sma fu dini en. A tru taki a wan-enkri fasi fa wi kan kisi têgo libi na te wi e dini Gado. Toku Yehovah no e dwengi wi fu dini en. Na presi fu dati a e sori lespeki gi ibriwan sma, fu di a e gi wi na okasi fu teki wi eigi bosroiti. A e warskow wi taki a kan abi takru bakapisi te wi e teki don bosroiti èn a e fruteri san na den blesi di wi kan kisi te wi e teki bun bosroiti. Ma toku a e meki wisrefi bosroiti san wi o du (Deuteronomium 30:19, 20). Yehovah no wani kwetikweti taki sma musu dini en fu di a dwengi den, noso fu di den e frede a bigi makti fu en. A e suku den wan di wani dini en fu di densrefi wani, iya, fu di den lobi en.2 Korentesma 9:7.

22, 23. (a) San e sori taki Yehovah e prisiri fu gi tra sma sma makti nanga krakti? (b) San wi sa go luku na ini a kapitel di e kon?

22 Meki wi go luku ete wan lasti sani di e sori fu san ede wi no musu libi nanga wan sortu takru frede gi na Almakti Gado. Libisma di abi furu makti e frede furu tron fu prati a makti dati nanga trawan. Ma Yehovah e prisiri tu fu gi makti na den anbegiman fu en di e tan getrow na en. A e gi furu frantwortu na tra sma tu, soleki na a Manpikin fu en (Mateyus 28:18). Yehovah e gi den futuboi fu en krakti tu. Bijbel e fruklari: „Fu yu, o Yehovah, a bigi nanga a makti, nanga a moifasi nanga a tumusi bunfasi nanga a wartifasi de; bika ala sani na hemel èn na grontapu na fu yu. . . . Na ini yu anu krakti nanga makti de, èn na ini yu anu a makti de fu meki sani kon bigi èn fu gi krakti na ala sma.”1 Kroniki 29:11, 12.

23 Iya, nanga prisiri Yehovah o gi yu krakti. Te sma wani dini en, dan a de klariklari srefi fu gi den „krakti di bigi pasa marki” (2 Korentesma 4:7). Fa yu e firi fu so wan Gado di abi bigi krakti, di e gebroiki a makti fu en na so wan lobi-ati fasi èn di e hori ensrefi na hei markitiki? A Gado disi no e hari yu? Na ini a kapitel di e kon, wi sa poti prakseri na a fasi fa Yehovah e gebroiki a makti di a abi fu meki sani.

^ paragraaf 6 A Griki wortu di vertaal nanga „Almakti” wani taki „Tiriman fu ala sani; a Sma di abi ala makti”.

^ paragraaf 15 Bijbel e taki dati „Yehovah no ben de na ini a winti . . . , a gronseki . . . , a faya”. Futuboi fu Yehovah de tra fasi leki den sma di e anbegi gado di no de trutru, fu di den no e prakseri taki Gado de na ini sani soleki winti, watra, nanga faya. Gado bigi tumusi fu kan de na ini iniwan fu den sani di a meki.1 Kownu 8:27.