Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 24

Nowan sani kan „prati wi fu a lobi fu Gado”

Nowan sani kan „prati wi fu a lobi fu Gado”

1. Sortu firi di e meki furu sma lasi-ati, kan meki tru Kresten lasi-ati sosrefi?

YEHOVAH GADO lobi yu trutru? Son sma e agri taki Gado lobi a libisma famiri, soleki fa Yohanes 3:16 e taki. Toku den e prakseri: ’Mi no denki taki Gado kan lobi mi leki fa mi de dyaso.’ Ten na ten, srefi tru Kresten kan tweifri na a tori disi. Wan man di ben lasi-ati ben taki: „A muilek srefisrefi gi mi fu bribi taki Gado e broko en ede nanga mi trutru.” Na so yu e prakseri tu son leisi?

2, 3. Suma wani taki wi musu bribi taki Yehovah no lobi wi èn taki wi no warti noti gi en? Fa wi kan puru a denki dati?

2 Satan de nomonomo fu meki wi bribi taki Yehovah Gado no lobi wi èn taki wi no prenspari gi en. Iya, furu tron Satan e kori sma fu di a e meki den kisi heimemre noso bigifasi (2 Korentesma 11:3). Ma a e prisiri sosrefi te a kan meki swakiwan lasi lespeki gi densrefi (Yohanes 7:47-49; 8:13, 44). A e du disi spesrutu na ini den „lasti dei” disi di muilek srefisrefi. Furu sma na ini a ten disi kweki na ini osofamiri pe sma ’no lobi makandra’. Tra sma e kisi fu du ibri tron baka nanga sma di grofu, sma di e prakseri densrefi nomo, èn sma di tranga-ede (2 Timoteyus 3:1-5). Son sma pina furu yari langa fu di trawan libi takru nanga den; sma desko den fu di den de fu wan tra ras, noso sma ben abi bita-ati gi den. Dati meki den sortu sma disi e firi leki den no warti noti, noso den firi taki sma no kan lobi den noiti.

3 No bruya efu yu abi den sortu firi disi di e meki yu lasi-ati. Ten na ten furu fu wi e krutu wisrefi tumusi hebi. Ma memre taki a Wortu fu Gado meki nanga a marki fu „poti sani kon reti”, èn fu „rutu sani puru di de bun dipi” (2 Timoteyus 3:16; 2 Korentesma 10:4). Bijbel e taki: „Wi sa gi wi ati dyaranti te  wi de na en fesi, awansi na sortu fasi wi ati e krutu wi. Bika Gado bigi moro wi ati èn a sabi ala sani” (1 Yohanes 3:19, 20). Meki wi luku fo difrenti fasi fa Bijbel kan yepi wi fu ’gi wi ati a dyaranti’ taki Yehovah lobi wi.

Yehovah e warderi yu

4, 5. Fa na agersitori di Yesus fruteri fu den pikin fowru e sori taki wi warti gi Yehovah?

4 Na a fosi presi, Bijbel e sori wi krin taki ala den futuboi fu Gado de warti gi en. Leki eksempre, Yesus ben taki: „A no tu pikin fowru den e seri gi wan pisi moni di no warti furu? Ma toku, nowan fu den sa fadon na gron sondro taki un Tata sabi. Ma srefi den wiwiri na un ede teri. Fu dati ede unu no musu frede: un warti moro leki furu pikin fowru” (Mateyus 10:29-31). Prakseri san den wortu dati ben wani taki gi den arkiman fu Yesus na ini a fosi yarihondro.

„Un warti moro leki furu pikin fowru”

5 Kande wi e aksi wisrefi fu san ede wan sma ben sa wani bai wan pikin fowru. We, na ini a ten fu Yesus den sortu pikin fowru dati ben de den moro bunkopu fowru di sma ben kan bai fu nyan. Luku taki, gi wan pisi moni di no ben warti furu, wan sma ben kan kisi tu fu den fowru dati. Ma bakaten Yesus taki dati te wan sma ben sa pai tu pisi moni, dan a no ben e kisi fo, ma feifi pikin fowru srefi. Sma ben e kisi wan fowru baksis neleki a no ben warti noti. Kande den fowru dati no ben de noti gi libisma, ma fa a Mekiman ben e prakseri fu den? Yesus taki: „Gado no e frigiti nowan fu den.” Iya, srefi a fowru di sma e gi baksis, A no e frigiti (Lukas 12:6, 7). Kande wi e bigin frustan now san Yesus ben wani sori wi. Efu wan pikin fowru de so prenspari gi Yehovah, dan a musu de taki wi libisma warti moro srefi! Soleki fa Yesus ben taki, dan Yehovah sabi ala sani fu wi. Iya, srefi den wiwiri fu wi ede a teri!

6. Fa wi du sabi taki san Yesus ben taki fu wi ede-wiwiri di Gado teri, de so trutru?

6 A tru taki Gado teri den wiwiri fu wi? Kande son sma e prakseri taki san Yesus ben taki drape, no kan de so trutru. Ma prakseri a howpu di wi abi fu kisi wan opobaka. A no de  fu taki dati Yehovah musu sabi wi dorodoro fu kan meki wi baka! Wi de so warti gi en taki a e memre ala sani fu wi. A e memre a fasi fa wi meki, a fasi fa wi de, èn sosrefi ala den sani di wi hori na ede èn di wi ondrofeni na ini wi libi. * Sobun, efu Gado man du ala den sani dati, dan a no sa tranga gi en fu teri den pikinmoro 100.000 wiwiri di e gro na tapu wi ede.

Sortu bun sani Yehovah e si na ini wi?

7, 8. (a) San na wan tu fasi di Yehovah lobi fu si te a e ondrosuku den ati fu libisma? (b) San na wan tu fu den wroko fu wi di Yehovah e si leki warti sani?

7 Leki di fu tu sani, Bijbel e leri wi san Yehovah e warderi fu den futuboi fu en. Fu taki en leti, dan Yehovah e prisiri nanga den bun fasi fu wi èn nanga den muiti di wi e du. Kownu David ben taigi en manpikin Salomo: „Yehovah e ondrosuku ala ati, èn a sabi ala sani di sma e prakseri fu go du” (1 Kroniki 28:9). Sobun, Gado e ondrosuku na ati fu milyardmilyard libisma na ini na ogri grontapu disi di lai bita-ati, èn te a feni wan sma di abi wan ati di lobi vrede, waarheid, nanga regtfardikifasi, dan dati e gi en bigi prisiri! San e pasa te Gado e feni wan sma di lobi en trutru, di e suku fu leri moro fu en èn di wani prati a sabi dati nanga trawan? Yehovah e taigi wi taki a e si den wan di e fruteri tra sma fu en. A abi ’wan buku srefi fu memre’ sma. Drape a e skrifi a nen fu ala ’den wan di e frede Yehovah èn di e prakseri en nen’ (Maleaki 3:16). Den sortu fasi dati warti gi en.

8 San na wan tu bun wroko di warti gi Yehovah? We, a no de fu taki dati a e warderi ala den muiti di wi e du fu de leki en Manpikin, Yesus Krestes (1 Petrus 2:21). Wan prenspari wroko di Gado e si leki wan warti sani, na a preiki fu a bun nyunsu fu  en Kownukondre. Na ini Romesma 10:15, wi e leisi: „O moi den futu de fu den sma di e meki bun nyunsu bekènti!” Kande wi no ben o prakseri fu wi futu taki den „moi”. Ma dyaso wi futu e agersi den muiti di futuboi fu Yehovah e du fu preiki a bun nyunsu. Gi Gado ala den sortu muiti dati moi srefisrefi èn a e si den leki warti sani.Mateyus 24:14; 28:19, 20.

9, 10. (a) San e gi wi a dyaranti taki Yehovah e warderi a fasi fa wi e horidoro te wi e kisi tesi? (b) Sortu takru denki Yehovah no abi fu den getrow futuboi fu en?

9 Yehovah e warderi en sosrefi te wi e horidoro (Mateyus 24:13). Memre taki Satan wani dati yu musu gowe libi Yehovah. Ibri dei di yu e tan getrow na Yehovah, na wan dei pe yu e yepi fu gi piki tapu den tyalensi fu Satan (Odo 27:11). Son leisi a no makriki fu tan horidoro. Siki, problema na moni sei, den broko-ede fu a libi, nanga tra problema kan meki taki ibri dei e tron wan tesi gi wi. Wi kan lasi-ati te sani no e pasa na a momenti di wi e fruwakti dati (Odo 13:12). Ma efu wi horidoro te den sortu tyalensi dati miti wi, dan Yehovah e warderi dati moro srefi. Dati na fu san ede Kownu David ben aksi Yehovah fu kibri den watra-ai fu en na ini wan „godo”, aladi  a taki nanga ala frutrow: „Den no de na ini a buku fu yu?” (Psalm 56:8) Iya, te wi e pina, noso te wi e krei soso fu di wi wani tan getrow dorodoro na Yehovah, dan a e warderi dati èn e memre dati tu. A e si den leki warti sani tu.

Yehovah e warderi wi te wi e horidoro aladi wi e kisi tesi

10 Ma a kan de so taki wan sma di e krutu ensrefi no wani bribi den buweisi taki wi warti gi Gado. Kande na ati fu a sma dati e tan taigi en: ’Ma so furu tra sma de di de moro bun eksempre leki mi. A musu de taki Yehovah e lasi-ati te a e teki mi gersi nanga den sma dati!’ Yehovah no e teki sma gersi nanga makandra, èn a fasi fa a e prakseri fu sma, e sori taki a e firi gi den (Galasiasma 6:4). Na wan tumusi koni fasi a e luku san de na ini wi ati, èn a e warderi a bun di a e si na ini wi, awinsi o pikin a bun dati de.

Yehovah e prati san bun fu san takru

11. San wi kan leri fu Yehovah te wi luku a fasi fa a handri nanga Abia?

11 Leki di fu dri sani, te Yehovah e ondrosuku wi, dan a e teki en ten fu luku den bun sani na ini wi. Fu eksempre, Yehovah ben gi a komando taki a heri kownu lin fu Kownu Yerobeam di ben fadon komoto na bribi, ben musu kisi pori. Ma Yehovah ben taki dati Abia, wan fu den manpikin fu a kownu, ben musu beri na wan yoisti fasi. Fu san ede? „Yehovah, a Gado fu Israel, ben si wan bun sani na ini en” (1 Kownu 14:1, 10-13). Te yu luku en bun, dan Yehovah ondrosuku a yonkuman dati èn A ben feni „wan bun sani” na ini en ati. Awinsi o pikin a bun sani dati ben de, gi Yehovah a ben bun nofo fu meki sma skrifi en poti na ini en Wortu srefi. Gado blesi a bun dati sosrefi; na wan fasi di fiti A sori sari-ati gi a wán memre dati fu na osofamiri di ben fadon komoto na bribi.

12, 13. (a) Fa a tori fu Kownu Yosafat e sori taki Yehovah e luku den bun sei fu wi, srefi te wi du sondu? (b) Fa Yehovah e tyari ensrefi leki wan lobi-ati Papa ini a tori fu den bun wroko nanga den bun fasi fu wi?

12 Wan moro moi eksempre na a di fu a bun Kownu Yosafat. Di a Kownu dati ben du wan don sani, dan a profeiti fu Yehovah  taigi en: „Fu dati ede Yehovah e atibron srefisrefi nanga yu.” Disi na wan seryusu tori! Ma dati no ben de a heri boskopu fu Yehovah. A taki moro fara: „Toku mi si bun sani na ini yu” (2 Kroniki 19:1-3). Sobun, a regtfardiki atibron fu Yehovah no ben meki taki a kon breni gi den bun sani fu Yosafat. Fu tru, Yehovah de tra fasi leki sondu libisma! Te wi e atibron nanga trawan, dan a kan taki wi e kon breni gi den bun sani fu den. Te wi sondu, dan wi kan kon breni gi den bun sani fu wisrefi, kande fu di wi lasi-ati, fu di wi e firi syen, èn fu di wi konsensi e fon wi. Ma memre taki Yehovah e gi wi pardon efu wi abi berow fu wi sondu èn efu wi e du tranga muiti fu no meki den srefi fowtu baka.

13 Te Yehovah e ondrosuku yu, dan a e trowe den sondu dati, neleki fa wan sma di e diki gowtu e trowe a doti di no warti noti. Fa a de nanga den bun fasi fu yu èn nanga den bun sani di yu e du? Iya, dati na den „pisi gowtu” di Yehovah e kibri! Oiti yu si fa lobi-ati papa nanga mama e kibri sani di den pikin fu den meki na skoro? Son tron den e kibri den sani dati omeni tenti yari langa, srefi baka te den pikin frigiti den sani dati kaba. We, Yehovah lobi en pikin moro ala papa nanga mama. Solanga wi tan getrow na en, a no sa frigiti den bun wroko nanga den bun fasi fu  wi noiti. Fu taki en leti, Gado no e si en leki wan regtfardiki sani fu frigiti den bun sani fu wi, èn noiti a e du sani di no de regtfardiki (Hebrewsma 6:10). Ma ete wan tra fasi de fa Gado e ondrosuku wi.

14, 15. (a) Fu san ede den sondu fu wi no e meki Yehovah kon breni gi den bun sani na ini wi? Gi wan eksempre. (b) San Yehovah o du nanga den bun sani di a e si na ini wi? Fa a e prakseri fu den sma di e tan getrow na en?

14 Yehovah e luku pasa den sondu fu wi èn a e si den bun sani di wi kan du. Luku wan eksempre: Sma di lobi moi sani soleki skedrei sa du ala muiti fu seti so wan skedrei kon bun baka te wan sani pasa nanga en. Na ini Londen, Ingrisikondre, wan presi de pe yu kan go luku skedrei nanga tra moi sani. Wan leisi wan sma go na inisei, a teki wan gon èn a pori wan skedrei fu Leonardo da Vinci, di ben warti sowan 30 milyun Amerkan dala. Ma noiti wan sma kon nanga a denki fu trowe a skedrei dati. Wantewante den bigin du sani fu seti a kefalek skedrei disi di owru sowan 500 yari. Fu san ede? Fu di a ben de wan warti sani gi den sma di lobi skedrei. We, yu warti moro leki wan skedrei di meki nanga kreiti èn nanga krofaya, a no so? Iya, gi Gado yu warti srefisrefi, awinsi fa a sondu di wi kisi e gi yu mankeri (Psalm 72:12-14). Yehovah Gado, a koni Mekiman fu libisma, sa du san de fanowdu fu yepi ala den wan di e saka densrefi na ondro a lobi-ati sorgu fu en, so taki den kan kon volmaakti te fu kaba.Tori fu den Apostel 3:21; Romesma 8:20-22.

15 Iya, Yehovah e si bun sani na ini wi, di wisrefi no man si kande. Solanga wi e tan dini en, a sa meki a bun dati gro na ini wi teleki wi kon de volmaakti. A no abi trobi san a grontapu fu Satan du nanga wi, Yehovah e si den getrow futuboi fu en leki sma di warti trutru.Hagai 2:7.

Yehovah e du sani fu sori a lobi fu en

16. San na a moro bigi buweisi taki Yehovah lobi wi? Fa wi du sabi taki a presenti disi de gi ibriwan fu wi?

16 Leki di fu fo sani, Yehovah e du furu fu sori taki a lobi wi.  Iya, a frulusu-ofrandi fu Krestes na a moro bun fasi fa Gado ben kan sori taki Satan lei di a taki dati wi no warti noti, noso taki sma no kan lobi wi. Memre taki Yesus dede na a pina udu na wan ogri-ati fasi, èn taki Yehovah ondrofeni hebi banawtu di a ben musu luku fa en lobi Manpikin e dede. Noiti wi musu frigiti taki den sani disi e sori krin taki den lobi wi srefisrefi. A de wan sari sani taki furu sma no man bribi taki a presenti disi kan de gi den sosrefi. Den e firi leki den no warti fu dati. Ma memre taki na apostel Paulus ben frufolgu den bakaman fu Krestes. Toku a ben skrifi: „A Manpikin fu Gado . . . ben lobi mi èn [a] ben gi ensrefi abra fu mi ede.”Galasiasma 1:13; 2:20.

17. Fa Yehovah e hari wi kon na en èn na en Manpikin?

17 Yehovah e sori krin taki a lobi wi fu di a e yepi ibriwan fu wi fu kisi wini fu na srakti-ofrandi fu Krestes. Yesus ben taki: „Nowan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Iya, Yehovah srefi e hari wi kon na en Manpikin èn en e gi wi a howpu fu libi fu têgo. Fa a e du dati? We, a e gebroiki a preikiwroko nanga a santa yeye fu en fu yepi ibriwan fu wi fu kon frustan den tru tori fu en èn fu gebroiki den na ini wi libi. A e du disi aladi wi na sondu sma di e meki fowtu. Dati meki Yehovah kan taki fu wi san a ben taki fu Israel: „Mi ben lobi yu nanga wan lobi di sa tan te ten di no skotu. Dati meki mi hari yu kon nanga lobi bun-ati.”Yeremia 31:3.

18, 19. (a) San na a moro moi fasi fa Yehovah e sori taki a lobi wi? San e sori taki a no e gi a frantwortu disi na nowan tra sma? (b) Fa a Wortu fu Gado e gi wi a dyaranti taki Yehovah na wan arkiman di e frustan fa wi e firi?

18 Wan fu den moro moi fasi fa wi kan ondrofeni a lobi fu Yehovah na a grani di a gi wi fu begi. Bijbel e gi ibriwan fu wi a kari fu ’begi Gado doronomo’ (1 Tesalonikasma 5:17). A e arki tu. Bijbel e kari en a „Yereman fu begi” srefi (Psalm 65:2). A no gi a frantwortu disi na nowan tra sma; a no gi en na en eigi Manpikin srefi. Prakseri nomo: A Mekiman fu hemel  nanga grontapu e gi wi deki-ati fu kon krosibei na en na ini begi, sondro fu frede. Fa a e arki dan? A de wan sma di no lobi wi, di de sondro firi, noso di no e broko en ede nanga wi? Kwetikweti.

19 Yehovah e frustan fa sma e firi. San dati wani taki? Wan getrow owru Kresten ben taki: „Mi kan frustan fa yu e firi te a pen fu yu de na ini mi ati.” Ma Yehovah e firi a pen fu wi trutru? Luku san Bijbel taki fu a pisi ten di Gado pipel, Israel, ben nyan pina: „Ala ten te den ben de na ini banawtu, en ben de na ini banawtu sosrefi” (Yesaya 63:9). A no ben de so nomo taki Yehovah ben e si den nowtu fu den; a ben e frustan fa a pipel ben e firi. Den sani di Yehovah srefi e taigi den futuboi fu en e sori wi o furu a e firi gi wi: „A sma di e fasi unu, e fasi a popki fu mi ai” (Sakaria 2:8). * Dati ben o hati srefisrefi! Iya, Yehovah e firi gi wi. Te wan sani e hati wi, dan a e hati en tu.

20. Nanga sortu fowtu denki wi musu luku bun efu wi wani gi yesi na a rai fu Romesma 12:3?

20 Wan Kresten di e si sani na wan yoisti fasi, sabi taki Gado lobi den futuboi fu en èn taki A e warderi den; toku a no sa prakseri taki disi e gi en primisi fu abi bigifasi noso fu prakseri ensrefi nomo. Na apostel Paulus ben skrifi: „Fu di Gado ben sori mi a bun-ati fu en, meki mi kan taigi un alamala fu no denki moro fu unsrefi leki san de fanowdu, ma gebroiki un frustan na wan koni fasi, ibriwan fu unu nanga a bribi di Gado gi unu” (Romesma 12:3). Wan tra Bijbel e taki: „Mi e taigi un alamala fu un no si unsrefi moro hei leki san un de. Ma un mus de na un krin ferstan” (Nyun Testamenti). Sobun, wi kan prisiri na ini a waran lobi fu wi hemel Tata, ma meki  wi gebroiki wi frustan tu èn meki wi memre taki wi no kan du noti fu frudini a lobi fu Gado.Lukas 17:10.

21. Gi sortu lei fu Satan wi musu kakafutu doronomo? Sortu tru tori fu Bijbel wi kan gebroiki fu gi wi ati a dyaranti taki Gado lobi wi?

21 Meki ibriwan fu wi du ala san wi man fu kakafutu gi den lei fu Satan di wani fu meki wi bribi taki wi no warti noti, noso taki sma no kan lobi wi. Kande yu ondrofeni sani na ini a libi di meki taki yu no e bribi taki Gado man lobi yu, so taki a e gersi leki srefi a bigi lobi fu En, no kan yepi yu. Kande yu e denki taki den bun sani di yu e du, pikin tumusi fu Gado si den, aladi a man si ala sani. Noso kande yu e denki taki den sondu fu yu bigi so te, taki srefi a dede fu a lobi Manpikin fu Gado no man tapu den. Efu disi na den sani di ondrofeni leri yu, dan a leri yu leitori. Kakafutu gi den sortu lei dati nanga yu heri ati! Meki wi poti prakseri na den tru tori di Gado ben meki Paulus skrifi, fu tan gi wisrefi a dyaranti taki Gado lobi wi. A ben taki: „Mi abi na overtoigi taki nowan dede, nowan libi, nowan engel, nowan tiri, nowan enkri sani di de now noso di musu kon ete, nowan krakti, nowan hei sani, nowan dipi sani, nowan enkri sani di Gado meki, sa man prati wi fu a lobi fu Gado di de na ini Krestes Yesus, wi Masra.”Romesma 8:38, 39.

^ paragraaf 6 Furu tron Bijbel e taki dati a howpu fu na opobaka abi fu du nanga a memre di Yehovah e memre sani. A getrow man Yob ben taigi Yehovah: „O . . . taki yu ben o poti wan ten gi mi èn ben sa memre mi!” (Yob 14:13) Yesus taki fu na opobaka fu „ala sma di de na ini den memregrebi”. A fiti taki Yesus taki dati fu di Yehovah e memre ala den dedewan di a wani gi wan opobaka.Yohanes 5:28, 29.

^ paragraaf 19 Son Bijbel e meki a gersi leki den sma di e fasi Gado pipel no e fasi na ai fu Gado, ma taki den e fasi den eigi ai noso na ai fu Israel. A fowtu disi kon fu di sma di ben e skrifi Bijbel abra, ben feni taki a pisi disi no e sori lespeki gi Gado; fu dati ede den ben skrifi en tra fasi. A fowtu denki fu den ben meki taki sma no man si krin moro o furu Yehovah e firi gi sma.