Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 27

„Fu tru, Gado bun srefisrefi!”

„Fu tru, Gado bun srefisrefi!”

1, 2. Na ini sortu sani fu a libi wi e si a bunfasi fu Gado? Fa Bijbel e poti krakti tapu a fasi disi?

WAN tu sma di de bun mati langa ten kaba e sidon nyan nanga makandra, na dorosei na ini a switi son. Den e lafu èn den e taki tori, aladi den e nyan bun fu den moi sani di den e si lontu den. Farawe wan gronman e tanapu luku go na ini a gron fu en. A e lafu fu di a e si fa dungru wolku e wai kon èn fa den fosi dropu fu na alen e saka kon tapu den sani di a prani. Na wan tra presi wan man nanga en wefi e prisiri fu si taki a pikin fu den e bigin waka fu a fosi leisi.

2 We, kande den sma disi no sabi, ma den alamala e nyan bun fu a srefi sani, namku a bunfasi fu Yehovah Gado. Kerkisma lobi taki dati „Gado bun”. Ma Bijbel e taki en na wan moro krakti fasi. A e taki: „Fu tru, Gado bun srefisrefi!” (Sakaria 9:17) Ma a sori leki furu sma na ini a ten disi no sabi san den wortu dati wani taki trutru. We, san a bunfasi fu Yehovah Gado wani taki trutru, èn sortu krakti a bunfasi fu Gado abi tapu ibriwan fu wi?

Wan prenspari pisi fu a lobi fu Gado

3, 4. San na bunfasi? Fu san ede wi kan taki dati bunfasi na wan fasi fa Gado e sori lobi?

3 Soleki fa Bijbel e sori, dan bunfasi e poti prakseri na a kefalek moi fasi fa wan sma e tyari ensrefi. Te yu luku en fini, dan bunfasi de fu si na ini ala sani di Yehovah e du. Ala den fasi fu en, sosrefi a makti, a retidu, nanga a koni fu en, na fasi di bun dorodoro. Toku a moro soifri fasi fu fruklari san na bunfasi, na taki a de wan fu den fasi fa Yehovah e sori a lobi fu en. Fu san ede wi kan taki dati?

4 Sma di abi bunfasi, lobi fu du sani gi trawan. Na apostel Paulus sori taki a e gi moro prisiri te wan sma e sori bunfasi leki te a de regtfardiki nomo (Romesma 5:7). Wi kan fruwakti  taki wan sma di de regtfardiki, sa hori ensrefi na ala den markitiki fu a wet, ma wan sma di bun e du moro leki dati. Ensrefi e bigin du sani di e tyari wini gi trawan. Soleki fa wi sa si, dan dati na a fasi fa Yehovah e sori en bunfasi. A de krin taki a de a bigi lobi fu Yehovah di e meki taki a e sori a bunfasi dati.

5-7. Fu san ede Yesus ben weigri fu meki sma kari en „Bun Leriman”? Tapu sortu prenspari tori a poti krakti di a taki dati?

5 Nowan sma man sori bunfasi leki fa Yehovah man du dati. Syatu bifo Yesus dede, wan man ben kon na en fu aksi en wan sani. A man dati ben kari Yesus „Bun Leriman”. Ne Yesus piki en: „Fu san ede yu e taki dati mi bun? Nowan sma bun, soso wán sma nomo, èn dati na Gado” (Markus 10:17, 18). Kande a piki dati e fruwondru yu pikinso. Fu san ede Yesus taigi a man a sani dati? Te yu luku en bun, dan Yesus ben de wan „Bun Leriman”, a no so?

6 Leki fa a sori, dan a man disi ben e gebroiki den wortu „Bun Leriman” fu korikori Yesus. Ma Yesus sori sakafasi èn a gi a grani dati na en Tata na hemel, di bun dorodoro (Odo 11:2). Na a fasi dati Yesus poti krakti sosrefi tapu wan tumusi prenspari tori. Yehovah na a wan-enkri sma di musu sori wi san bun. En wawan abi a reti trutru fu taki san bun èn san ogri. Fu di Adam nanga Eva ben e suku fu kon abi a reti dati tu, meki den prefuru fu nyan fu a bon fu sabi bun nanga ogri. Yesus de tra fasi leki den; a e saka ensrefi na ondro den markitiki di en Tata e poti.

7 Boiti dati, Yesus ben sabi taki Yehovah na a sma fu pe ala bun sani e komoto. En na a Sma di e gi „ibri bun presenti nanga ibri volmaakti kado” (Yakobus 1:17). Meki wi go luku fa a bunfasi fu Yehovah e kon na krin na ini a fasi fa a de klariklari fu gi sani.

Buweisi di e sori taki Yehovah bun srefisrefi

8. Fa Yehovah sori bunfasi gi a heri libisma famiri?

8 Iniwan sma di oiti libi na grontapu nyan bun fu a bunfasi  fu Yehovah. Psalm 145:9 e taki: „Yehovah bun gi ala sma.” San na wan tu eksempre fu a bunfasi fu en? Bijbel e taki: „A meki unu kon sabi en fu di a du bun sani, a gi unu alen komoto fu hemel èn a gi unu bun ten sosrefi, so taki un ati firi bun fu di un abi bogobogo nyanyan nanga prisiri” (Tori fu den Apostel 14:17). Oiti yu firi koloku srefisrefi baka di yu nyan wan kefalek switi nyanyan? Yehovah sori en bunfasi fu di a meki grontapu nanga wan watra sistema di e krin a watra doronomo èn fu di a gi wi „bun ten”, so taki wi kan abi nofo nyanyan. Efu a no ben du dati, dan nyanyan no ben o de. Yehovah no sori bunfasi nomo gi den sma di lobi en, ma a sori en gi ala sma. Yesus ben taki: „A e meki a son fu en opo gi takru sma èn gi bun sma; a e meki alen fadon gi regtfardiki sma nanga sma di no regtfardiki.”Mateyus 5:45.

Yehovah e ’gi unu alen komoto fu hemel èn a e gi unu bun ten’

9. Fa na apra e sori wi a bunfasi fu Yehovah?

9 Furu sma no e si moro sortu kefalek bigi sani Yehovah e  du gi libisma, fu di a e sorgu taki a son e tan wroko bun, fu di a e gi wi alen, makandra nanga bun ten. Teki wan apra leki eksempre. A froktu disi e gro na ala presi fu grontapu pe a no faya noso kowru tumusi. Toku wan apra na wan moi froktu di switi fu nyan; a abi furu watra nanga tra prenspari sani di e gi wi krakti. Yu ben sabi taki na heri grontapu yu abi sowan 7500 difrenti sortu apra? Son apra redi, sonwan abi wan sortu gowtu kloru, èn trawan geri noso grun. Son apra pikin leki wan kersi, trawan bigi leki wan bigi apresina. Te yu hori wan pikin apra siri na ini yu anu, dan a gersi wan lawlaw sani. Ma a pikin siri disi e gro kon tron wan fu den moro moi bon (Heisingi 2:3). Na a bigin fu a yari den aprabon lai  kefalek moi bromki èn pasa afu fu a yari den e gi froktu. Ibri yari, sowan 75 yari langa, wán aprabon kan meki nofo froktu fu lai 20 dosu, ibriwan fu den nanga 19 kilo apra!

A pikin siri disi e tron wan bon di kan gi nyanyan èn di kan gi sma prisiri someni tenti yari langa

10, 11. Fa a fasi fa wi skin meki, e sori a bunfasi fu Gado?

10 Fu di Yehovah bun srefisrefi meki a gi wi wan skin di meki na wan „tumusi fruwondru fasi”, so taki wi kan nyan bun fu ala den sani di a meki gi wi (Psalm 139:14). Prakseri den tori baka di kari na a bigin fu a kapitel disi. Sortu sani di sma kan si e meki taki den momenti dati e gi prisiri? We, kande a de a prisiri fesi fu wan pikin-nengre, noso na alen di e saka kon na tapu den gron pe sma prani sani. A kan de den kefalek moi kloru di de fu si na loktu te a son e dongo. Na ai fu libisma meki na so wan fasi taki a man si moro leki 300.000 difrenti kloru! A yesi fu wi man yere den difrenti fasi fa sma e taki, wi man fu yere den sten di wi lobi, wi man yere te winti e wai mindri den bon, noso te wan yongu pikin e bari lafu fu prisiri. Fa a du kon taki wi man si èn yere den moi sani dati? Bijbel e taki: „A yesi di e yere, nanga na ai di e si, den ala tu na sani di Yehovah srefi meki” (Odo 20:12). Ma wi ai nanga wi yesi na soso tu sani di Gado meki poti na wi skin.

11 Ete wan buweisi fu a bunfasi fu Yehovah, na a noso fu wi di e meki taki wi kan smeri sani. Wan libisma kan smeri sowan 10.000 difrenti sortu sani. Prakseri wan tu fu den nomo: yu kan smeri te wan sma e bori a nyanyan di yu lobi, yu e smeri bromki, wiri di fadon komoto na den bon, noso a smoko fu wan udu faya di e waran yu skin. So a de tu taki yu man firi sani. Dati meki yu e firi te wan switi winti e wai kon na ini yu fesi, yu man firi te wan lobiwan fu yu e brasa yu, yu kan hori wan froktu na ini yu anu èn firi fa a grati. Te yu beti wan pisi fu a froktu dati, dan yu tongo e yepi yu fu tesi a froktu. A switi fu man tesi ala den difrenti froktu. Iya, wi abi ala reti fu taki fu Yehovah nanga tranga sten: „A bunfasi di yu kibri leki wan gudu gi den wan di e frede yu, furu  srefisrefi!” (Psalm 31:19) Ma fa Yehovah ’kibri bunfasi leki wan gudu’ gi den wan di e frede En?

Bunfasi di sa tyari têgo blesi kon gi sma

12. Sortu sani di Yehovah ben seti gi wi prenspari moro leki iniwan tra sani? Fu san ede?

12 Yesus ben taki: „Buku taki: ’Sma no musu libi fu brede wawan, ma fu ibri wortu di Yehovah mofo taki’” (Mateyus 4:4). Iya, den sani di Yehovah seti fu gi wi leri, kan tyari moro wini gi wi leki den sani di a seti gi wi na skin sei, bika a leri fu Yehovah kan meki wi kisi têgo libi. Na ini kapitel 8 fu a buku disi, wi si taki na ini den lasti dei disi Yehovah seti wan paradijs na yeye fasi, èn a du dati nanga yepi fu a makti di a abi fu meki sani kon bun baka. Wan fu den prenspari sani fu a paradijs dati, na a leri fu Gado di sma e kisi bogobogo.

13, 14. (a) San a profeiti Esekièl ben si na ini wan fisyun? San a fisyun dati wani taki gi wi na ini ten disi? (b) San Yehovah seti fu kibri a libi fu den getrow futuboi fu en?

13 Na ini wan moi profeititori fu Bijbel di e taki fu a ten di Gado o meki sani kon bun baka, a profeiti Esekièl ben si wan fisyun fu wan tempel di ben meki kon bun baka èn di ben kon furu nanga glori. Pikinso watra ben e lon komoto na ini a tempel dati. Safrisafri a watra di ben e lon go na dorosei fu a tempel ben kon moro furu teleki a tron wan „bigi bradi liba”. A watra fu a liba disi ben e tyari blesi kon awinsi pe a ben e lon go. Bon ben e gro na den syoro fu a liba. Den bon disi ben e gi nyanyan èn den ben de leki dresi gi sma. A liba dati ben tyari libi kon srefi na ini a sowtu Dede Se, pe libi no de! (Esekièl 47:1-12) Ma san ala den sani disi ben wani taki?

14 A tempel di Esekièl si ben e prenki a soifri anbegi di Yehovah ben o seti baka na grontapu, soleki fa a fisyun ben sori. Neleki fa a liba na ini a fisyun tyari libi kon na ala sei, na so den sani di Gado seti fu gi a pipel fu en libi, ben o kon moro furu dei fu dei. Sensi a ten di Yehovah seti a soifri anbegi kon  bun baka na ini 1919, a blesi a pipel fu en nanga ala sortu sani di kan yepi den fu kisi libi. Fa a du dati? We, a gebroiki a Bijbel, buku di abi fu du nanga Bijbel, konmakandra, nanga kongres. Na so fasi a yepi milyunmilyun sma fu kon sabi tumusi prenspari tru tori. Yehovah gebroiki den sortu sani disi fu leri sma fu a moro prenspari sani di a seti fu gi den libi, namku a frulusu-ofrandi fu Krestes. Na ofrandi disi e yepi ala sma di lobi Yehovah trutru èn di e frede en sosrefi, fu kon bun baka nanga en èn fu kisi a howpu taki den kan libi fu têgo. * Fu dati ede, a pipel fu Yehovah nyan bun fu wan fesa na yeye fasi na ini den lasti dei disi, aladi grontapu e dede fu angri na yeye fasi.Yesaya 65:13.

15. Na sortu fasi a bunfasi fu Yehovah sa doro getrow libisma na a ten fu a Dusun Yari Tiri fu Krestes?

15 Ma a liba di Esekièl si na ini a fisyun, no e tapu fu lon te na owru sistema disi kon na wan kaba. Na presi fu dati, a watra fu en sa kon moro furu srefi na ini a ten fu a Dusun Yari Tiri fu Krestes. Na a ten dati, Yehovah sa gebroiki a Mesias Kownukondre fu meki na srakti-ofrandi fu Yesus tyari wini gi a getrow libisma famiri dorodoro, èn safrisafri den sa kon volmaakti. Dan wi sa prisiri trutru taki Yehovah sori wi a bunfasi fu en!

Tra sani di abi fu du nanga a bunfasi fu Yehovah

16. Fa Bijbel e sori taki a bunfasi fu Yehovah abi fu du nanga difrenti tra fasi fu en sosrefi? San na wan tu fu den fasi disi?

16 A bunfasi fu Yehovah no wani taki nomo dati a e gi sma sani. Gado ben taigi Moses: „Misrefi sa meki ala mi bunfasi pasa na yu fesi, èn mi sa meki a nen fu Yehovah bekènti gi yu.” Bakaten a tori e taki tu: „Yehovah ben pasa na en fesi èn ben fruklari: ’Yehovah, Yehovah, wan Gado di abi sari-ati nanga switifasi, di no e atibron esi-esi èn di abi lobi bun-ati nanga  waarheid pasa marki’” (Exodus 33:19; 34:6). Sobun, a bunfasi fu Yehovah abi fu du nanga furu tra moi fasi fu en. Meki wi go luku tu fu den fasi disi.

17. San na switifasi? Fa Yehovah sori a fasi disi gi sondu libisma?

17 „Switifasi.” A fasi disi e fruteri wi krin fa Yehovah e handri nanga den libisani di a meki. Yehovah no grofu, a no de wan sma di no abi firi, noso di e kwinsi trawan, soleki fa furu sma e du te den abi makti. Ma na presi fu dati, A e sori safri-ati nanga switifasi gi sma. Leki eksempre, Yehovah ben taigi Abraham: „Opo yu ede grantangi, èn luku fu a presi pe yu de, go na noordsei, na zuidsei, na owstusei èn na westsei” (Genesis 13:14). Na ini furu Bijbel, sma puru a wortu „grantangi”. Ma Bijbel sabiman e taki dati a fasi fa a pisi tori disi skrifi na ini den Hebrew buku e sori taki Gado no ben gi Abraham wan komando, ma taki a ben aksi en na wan lespeki fasi fu du wan sani. Tra presi de na ini Bijbel pe Gado taki na so wan fasi tu (Genesis 31:12; Esekièl 8:5). Prakseri nomo taki a Moro Heiwan fu hemel nanga grontapu, e taki „grantangi”, aladi a e taki nanga wan libisma! Na ini a grontapu disi furu sma grofu, den asranti, èn den no e sori lespeki gi trawan. Dati meki a de wan tumusi prisiri sani fu prakseri a switifasi di Yehovah, wi Gado e sori.

18. Na sortu fasi Yehovah „abi . . . waarheid pasa marki”? Fu san ede den wortu dati e gi sma deki-ati?

18 ’A abi . . . waarheid pasa marki.’ Bedrigifasi lai srefisrefi na ini a grontapu disi. Ma Bijbel e memre wi: „Gado a no wan libisma so taki a ben sa fruteri lei” (Numeri 23:19). Iya, Titus 1:2 e taki dati „Gado . . . no man lei”. Gado bun tumusi fu kan taki lei. Sobun, wi kan frutrow den pramisi fu Yehovah dorodoro; wi abi a dyaranti taki san a e taki sa kon tru. Bijbel e taki srefi dati Yehovah na „a Gado fu waarheid” (Psalm 31:5). A no de so nomo taki a no e taki lei, ma a e fruteri furu tru tori sosrefi. A no de wan sma di e tan tiri nomo, noso wan sma di e kibri sani gi trawan. Na presi fu dati a e gebroiki a bigi koni fu en fu yepi en getrow futuboi fu kon frustan sani  moro krin. * A e leri den srefi fa fu libi akruderi den tru tori di a e fruteri den, so taki den kan „tan waka na ini a waarheid” (3 Yohanes 3). Sortu krakti a bunfasi fu Yehovah musu abi tapu ibriwan fu wi?

„Den sa prisiri pasa marki nanga a bunfasi fu Yehovah”

19, 20. (a) Fa Satan suku fu meki Eva lasi a frutrow di a ben abi na ini a bunfasi fu Yehovah? San ben de a bakapisi? (b) Sortu krakti a bunfasi fu Yehovah musu abi na wi tapu? Fu san ede?

19 Di Satan kori Eva na ini a dyari fu Eden, dan a gebroiki triki fu pori a frutrow di na uma disi ben abi na ini a bunfasi fu Yehovah. Yehovah ben taigi Adam: „Fu ibri bon fu a dyari yu kan nyan te yu bere furu.” A musu de taki dusundusun moi bon ben de na ini a dyari, ma fu wán bon nomo Yehovah ben taigi libisma taki den no ben musu fasi en. Ma luku fa Satan poti en fosi aksi gi Eva: „A de so trutru, taki Gado ben taki dati unu no musu nyan fu ibri bon fu a dyari?” (Genesis 2:9, 16; 3:1) Satan ben drai den wortu fu Yehovah fu meki Eva prakseri taki Yehovah ben e kibri wan bun sani gi en. A de wan sari sani taki a kisi Eva nanga a triki dati. Eva, èn sosrefi furu tra mansma nanga umasma di libi baka en, bigin tweifri na a bunfasi fu Gado, aladi ibriwan sani di Eva ben abi ben komoto fu Gado.

20 Wi sabi o furu sari nanga pina den sortu tweifri dati tyari kon na ini grontapu. Sobun, meki wi gi yesi na san skrifi na ini Yeremia 31:12: „Fu tru den sa . . . prisiri pasa marki nanga a bunfasi fu Yehovah.” Iya, a bunfasi fu Yehovah musu furu wi ati nanga prisiri trutru. Noiti wi musu tweifri na den bun prakseri fu wi Gado, di lai so furu bunfasi. Wi kan frutrow en dorodoro, fu di a wani soso bun gi den wan di lobi en.

21, 22. (a) San na wan tu sani di yu ben sa wani du fu sori taki yu e warderi a bunfasi fu Yehovah? (b) Fu sortu fasi fu Gado wi sa taki na ini a kapitel di e kon? Fa a fasi dati e difrenti fu bunfasi?

 21 Moro fara a de so taki wi e prisiri srefisrefi te wi kisi na okasi fu fruteri tra sma fu a bunfasi fu Gado. Psalm 145:7 e taki fu a pipel fu Yehovah, taki: „Den sa taki fayafaya fu yu bunfasi di de pasa marki.” Ibri dei fu wi libi, wi e kisi wini fu a bunfasi fu Yehovah, na a wan noso tra fasi. Fu san ede yu no e teki en leki wan gwenti fu taki Yehovah tangi ibri dei gi a bunfasi fu en, aladi yu e kari spesrutu sani gi san yu wani taki en tangi? Te wi e prakseri fu a bunfasi fu Yehovah, te wi e taki en tangi fu dati ibri dei, èn te wi e fruteri tra sma fu dati tu, dan dati sa yepi wi fu de leki a bun Gado fu wi. O moro wi o suku fasi fu du bun, neleki fa Yehovah e du bun, o moro wi sa kon krosibei na en. Na owru apostel Yohanes ben skrifi: „Lobiwan, no du san ogri, ma du san bun. A sma di e du bun, de fu Gado.”3 Yohanes 11.

22 A bunfasi fu Yehovah abi fu du sosrefi nanga wan tu tra fasi fu en. Leki eksempre, Gado abi „lobi bun-ati . . . pasa marki”, noso loyaal lobi (Exodus 34:6). A fasi disi e go moro dipi leki bunfasi, fu di Yehovah e sori a fasi disi soso gi den getrow futuboi fu en. Na ini a tra kapitel, wi sa leri fa a e du dati.

^ paragraaf 14 A moro bigi eksempre fu a bunfasi fu Yehovah na a lusu-paiman. Fu ala den milyunmilyun yeye libisani di Yehovah meki, a ben teki en wan-enkri gebore Manpikin di a lobi so te, fu dede gi wi.

^ paragraaf 18 A fiti taki Bijbel e agersi waarheid nanga leti. A psalm skrifiman ben singi: „Seni yu leti nanga yu waarheid go na doro” (Psalm 43:3). Yehovah e skèin furu leti fu waarheid tapu den wan di wani teki a leri fu en, noso di wani taki a yepi den fu kon frustan sani moro krin.2 Korentesma 4:6; 1 Yohanes 1:5.

Kon sabi moro

A WAKTITOREN

Gado e du furu bun gi wi

Gado e du furu bun gi libisma ibri dei, awinsi den no de nanga tangi srefisrefi.