Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 30

„Tan lobi makandra”

„Tan lobi makandra”

1-3. San na a bakapisi te wi e sori taki wi lobi trawan soleki fa Yehovah e du dati?

„WAN sma sa de moro koloku te a e gi sani, leki te a e kisi sani” (Tori fu den Apostel 20:35). Disi na wortu fu Yesus di e poti krakti tapu wan prenspari tori: Te sma e sori taki den lobi trawan sondro fu prakseri densrefi nomo, dan dati e tyari furu wini. Aladi wi e prisiri te trawan e sori lobi gi wi, toku a kan gi wi moro prisiri srefi te wi e sori lobi gi trawan.

2 Nowan sma sabi disi moro bun leki wi Tata na hemel. Soleki fa wi si na ini den tra kapitel fu pisi fo, dan Yehovah na a moro bigi eksempre fu lobi. Noiti wan sma sori lobi na so furu difrenti fasi, noso fu so wan langa ten, leki fa Yehovah du dati. A e fruwondru yu dan, taki Bijbel e kari Yehovah „a koloku Gado”?1 Timoteyus 1:11.

3 A lobi-ati Gado fu wi wani taki wi musu pruberi fu de leki en, spesrutu te wi musu sori trawan taki wi lobi den. Efeisesma 5:1, 2 e taigi wi: „Teki na eksempre fu Gado leki pikin di a lobi; tan lobi makandra.” Te wi teki na eksempre fu Yehovah èn wi e sori sma taki wi lobi den, dan wi e ondrofeni a moro bigi koloku di wan sma kan firi te a e gi trawan sani. Wi e prisiri tu fu sabi taki Yehovah e feni wi bun, bika a de a Wortu fu en di e gi wi deki-ati fu „lobi makandra” (Romesma 13:8). Ma tra sani de tu fu san ede wi musu „tan lobi makandra”.

Fu san ede lobi de so prenspari

4, 5. Fu san ede a de prenspari fu sori wi brada nanga sisa taki wi lobi den, sondro fu prakseri wisrefi nomo?

4 Fu san ede a de prenspari taki wi sori den brada nanga sisa fu wi taki wi lobi den? Fu taki en krin, lobi na a fondamenti fu a tru Kresten bribi. Sondro lobi wi no kan abi wan krosibei banti nanga den Kresten brada fu wi, èn san moro prenspari, sondro lobi wi no warti noti gi Yehovah. Luku fa Gado Wortu e poti krakti tapu den tru tori disi.

 5 Na a lasti neti fu Yesus en libi na grontapu, a taigi den bakaman fu en: „Mi e gi unu wan nyun komando, fu unu lobi makandra; neleki fa mi lobi unu, fu unu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). Luku taki Yesus ben taki: „Neleki fa mi lobi unu”. Iya, wi e kisi a komando fu sori a srefi sortu lobi di Yesus sori. Na ini kapitel 29, wi ben si taki Yesus gi wi wan kefalek bun eksempre na ini a fasi fa a sori taki a lobi trawan sondro fu prakseri ensrefi; a ben feni den nowtu nanga den afersi fu trawan moro prenspari leki den di fu en. Wi musu sori a srefi sortu lobi dati tu èn wi musu du en na so wan fasi taki srefi tra sma na dorosei fu a Kresten gemeente man si dati krin. Iya, te wi e sori lobi gi wi brada nanga sisa sondro fu prakseri wisrefi nomo, dan dati kan yepi sma fu kon sabi suma na den tru bakaman fu Krestes.

6, 7. (a) Fa wi du sabi taki lobi na wan tumusi prenspari sani na ini a Wortu fu Yehovah? (b) Tapu sortu sani di abi fu du nanga lobi, den wortu fu Paulus na ini 1 Korentesma 13:4-8 e poti krakti?

6 Ma fa a de efu wi no abi nofo lobi gi trawan? ’Efu mi no abi lobi,’ na so na apostel Paulus e taki, ’dan mi de leki wan pisi kopro di e meki babari, noso wan gengen di e loi’ (1 Korentesma 13:1). Son leisi wan gengen di e loi kan meki wan lo babari di e hati sma yesi. Fa a de nanga wan pisi kopro di e meki babari? Tra Bijbel e taki ’wan kopro tutu di e meki babari’. Na agersitori disi fiti srefisrefi! Wan sma di no abi lobi de leki wan pokusani di e meki so furu babari taki sma wani tapu den yesi, na presi taki den wani arki. Fa so wan sma kan abi wan bun banti nanga trawan? Paulus ben taki sosrefi: „Awinsi mi abi so wan tranga bribi taki mi man puru bergi poti na wan tra presi, ma mi no abi lobi, dan mi no de noti” (1 Korentesma 13:2). Prakseri nomo taki wan sma di no abi lobi „na wan sma di no warti noti”, awinsi san a ben sa du! (The Amplified Bible) A no de krin taki a Wortu fu Yehovah e sori wi taki a de wan tumusi prenspari sani fu lobi trawan?

7 Ma fa wi kan sori lobi na ini a fasi fa wi e handri nanga trawan? Fu piki na aksi dati, dan meki wi go luku san Paulus taki na ini 1 Korentesma 13:4-8. Den tekst disi no e poti krakti tapu  a lobi di Gado abi gi wi, èn den no e sori go tu na a lobi di wi abi gi Gado. Na presi fu dati Paulus e sori wi fa wi musu sori taki wi lobi makandra. A ben sori san lobi wani taki èn san a no wani taki.

San lobi wani taki

8. Fa langa pasensi kan yepi wi na ini a fasi fa wi e libi nanga trawan?

8 „Lobi abi langa pasensi.” Fu abi langa pasensi wani taki dati wi e frudrage tra sma nanga pasensi (Kolosesma 3:13). Wi abi a sortu pasensi dati fanowdu, a no so? Fu di wi na sondu sma di e dini Gado makandra nanga trawan, meki wi kan frustan taki son leisi, wi kan du sani di e meki wi Kresten brada nanga sisa mandi èn a kan taki den e meki wi mandi. Ma efu wi abi pasensi èn efu wi e frudrage makandra, dan dati kan yepi wi fu libi nanga den pikinpikin fruferi sani di wi e ondrofeni te wi de nanga trawan, so taki a vrede na ini a gemeente no abi fu pori.

9. Na sortu fasi fa wi kan sori switifasi gi trawan?

 9 „Lobi . . . abi switifasi.” Wi kan sori switifasi fu di wi e yepi trawan èn fu di wi e gi den deki-ati. Lobi e meki taki wi e luku fa wi kan sori switifasi, spesrutu gi den wan di abi furu yepi fanowdu. Fu eksempre, a kan taki wan owru brada noso sisa e firi leki a no abi mati èn kande a de fanowdu fu go luku en fu gi en deki-ati. Wan mama di musu sorgu en pikin en wawan, noso wan sisa di de na ini wan osofamiri pe a no ala sma de na bribi, kan abi yepi fanowdu. Wan sma di siki, noso di abi bigi problema kan abi deki-ati fanowdu fu wan mati di e tan horibaka gi en awinsi san e pasa (Odo 12:25; 17:17). Te wisrefi e du muiti fu sori switifasi na den fasi dati, dan wi e sori taki wi abi lobi trutru.2 Korentesma 8:8.

10. Fa lobi e yepi wi fu horibaka gi a waarheid èn fu tan taki waarheid, srefi te a no makriki gi wi fu du dati?

10 „Lobi . . . e prisiri nanga a waarheid.” Wan tra Bijbel e taki: „Lobi . . . e prisiri fu teki a sei fu san de tru.” Lobi e meki wi horibaka gi san de tru èn a e meki wi „taki waarheid nanga makandra” (Sakaria 8:16). Leki eksempre, efu wan lobiwan fu wi du wan seryusu sondu, dan lobi gi Yehovah èn sosrefi gi a sma di meki a fowtu, sa yepi wi fu hori wisrefi na den markitiki fu Gado. Wi no sa pruberi fu kibri a sondu fu a sma, èn wi no sa taki sani fu sori taki a sma no man yepi taki a du so wan sani, sosrefi wi no sa lei fu a fowtu di a sma meki. A tru taki a kan hebi gi wi taki a sma du so wan sani. Ma efu wi wani taki sani musu waka bun nanga a lobiwan fu wi, dan wi sa wani taki a kisi a lobi-ati trangaleri fu Gado èn taki a gi yesi na a trangaleri dati (Odo 3:11, 12). Leki lobi-ati Kresten, wi wani fu „du ala sani na wan opregti fasi”.Hebrewsma 13:18.

11. San wi musu pruberi fu du nanga den swakifasi fu trawan, te wi hori na prakseri taki lobi „e frudrage ala sani”?

11 „Lobi . . . e frudrage ala sani.” Den wortu dati wani taki trutru „a e tapu ala sani” (Kingdom Interlinear). Wán Petrus 4:8 e taki: „Lobi e tapu wan heri ipi sondu.” Iya, wan Kresten di e meki lobi tiri en no sa wani poti prakseri na ala den swakifasi nanga den pikinpikin fowtu di tra Kresten brada nanga sisa fu  en e meki. Furu tron den fowtu di wi brada nanga sisa e meki no bigi so kefalek, so taki wi kan tapu den sondu dati nanga lobi.Odo 10:12; 17:9.

Lobi e meki wi sori den brada nanga sisa fu wi taki wi e frutrow den

12. Fa na apostel Paulus sori taki a ben prakseri soso bun fu Fileimon? San wi kan leri fu na eksempre fu Paulus?

12 „Lobi . . . e bribi ala sani.” Wan tra bijbelvertaling e taki dati lobi „de klariklari ala ten fu bribi taki wan sani tru”. Wi no e go prakseri taki den brada nanga sisa fu wi abi takru prakseri kande, so taki wi e aksi wisrefi fu san ede den e taki noso du wan sani. Lobi e yepi wi fu prakseri „soso bun” fu wi brada èn a sa yepi wi fu frutrow wi brada tu. * Prakseri wan eksempre di skrifi na ini a brifi di Paulus ben seni gi Fileimon. Na ini a brifi disi Paulus ben gi Fileimon a deki-ati fu gi Oneisimus wan switikon te a ben o drai go baka na en. A man dati ben de wan srafu fu Fileimon; a ben lowe gowe èn a ben tron wan Kresten. Paulus no dwengi Fileimon, ma a aksi en a sani disi na wan lobi-ati fasi. A sori taki a ben sabi taki Fileimon ben o du san de reti, dati meki a taki: „Mi sabi taki yu o du san mi aksi. Dati meki mi e skrifi yu, fu di mi sabi taki yu o du moro leki san mi taki” (Fileimon 21). Te wi lobi wi brada, dan wi e frutrow den, so taki den bun sei fu den e kon na fesi moro krin.

13. Fa wi kan sori taki wi e howpu dati sani sa waka bun nanga den brada nanga sisa fu wi?

13 „Lobi . . . e howpu ala sani.” Neleki fa lobi e meki wi frutrow trawan, na so a e gi wi howpu tu. Lobi e meki wi tan howpu taki sani o go bun nanga den brada fu wi. Leki eksempre, efu wan brada „meki wan fowtu bifo a sabi”, dan wi e howpu taki a sa du wan sani te sma e pruberi fu yepi en na wan lobi-ati fasi (Galasiasma 6:1). Wi e howpu sosrefi taki a bribi fu den wan di swaki, kan kon tranga baka. Wi abi pasensi nanga den sortu sma dati, èn wi e du ala san wi man fu yepi den fu meki a bribi fu den kon tranga (Romesma 15:1; 1 Tesalonikasma 5:14).  Srefi efu wan lobiwan fu wi e gowe libi a waarheid, toku wi no e lasi howpu taki wan dei a sa kisi ensrefi baka èn drai kon baka na Yehovah, neleki a lasi manpikin na ini na agersitori fu Yesus.Lukas 15:17, 18.

14. Fa wi kan abi fu sori taki wi e horidoro te wi kisi tesi na ini a gemeente, ma san wi o du efu wi abi lobi?

14 „Lobi . . . e horidoro na ondro ala sani.” Te wi e horidoro, dan dati e yepi wi fu tanapu kánkan te wi lasi-ati noso te problema e miti wi. Wi no e kisi tesi nomo fu sma di de dorosei fu a gemeente. Son leisi wi musu sori taki wi e horidoro te wi e kisi tesi fu sma di de na ini a gemeente. Fu di wi na sondu sma, meki ten na ten wi brada kan meki wi lasi-ati. Kande den taki wan sani di e hati wi (Odo 12:18). Kande wan problema na ini a gemeente no lusu na a fasi fa wi feni taki a ben musu lusu. A kan taki wan brada di furu sma e lespeki, e tyari ensrefi na wan fasi di e bruya wi pikinso, so taki wi e aksi wisrefi: ’Fa wan Kresten kan du so wan sani?’ San wi o du efu wi kisi fu du nanga den sortu situwâsi dati? Wi o komoto na ini a gemeente èn tapu fu dini Yehovah? We, efu wi abi lobi, wi no sa du dati! Iya, lobi sa kibri wi fu no tan luku nomo sortu fowtu wan brada e meki, so taki wi no man si moro san na den bun sani di en, noso a gemeente leki grupu e du. Lobi e yepi wi fu tan getrow na Gado èn fu tan horibaka gi a gemeente, awinsi san wan tra sondu libisma e taki noso du.Psalm 119:165.

San lobi no wani taki

15. San na dyarusu? Fa lobi e yepi wi fu kakafutu gi a takru firi disi?

15 „Lobi no e dyarusu.” Te wi e dyarusu, dan dati kan meki wi kisi bigi-ai tapu tra sma sani, kande tapu den gudu fu den, den blesi di den e kisi, noso den sani di den man du. A sortu dyarusu dati na wan takru firi èn a e meki wan sma prakseri ensrefi nomo. Wan sma di no e feti nanga a firi dati kan pori a vrede na ini a gemeente. San o yepi wi fu no „dyarusu”? (Yakobus 4:5) We, a piki na, lobi. A tumusi moi fasi disi kan yepi wi fu prisiri nanga den wan fu suma wi e prakseri taki den abi wan moro bun libi leki wi (Romesma 12:15). Lobi e yepi wi fu no  firi wan fasi te den e prèise wan trawan fu di a man du wan sani na wan tumusi moi fasi, noso fu wan tumusi bun sani di a du.

16. Fu san ede wi no sa meki bigi nanga den grani di wi abi na ini a diniwroko fu Yehovah, efu wi lobi wi brada trutru?

16 „Lobi . . . no e dyaf, a no abi bigimemre.” Lobi e hori wi fu no meki bigi nanga den sani di wi man du, noso nanga den sani di wi du kaba. Efu wi lobi wi brada trutru, dan fa wi kan teki en leki wan gwenti fu meki bigi fu den moi sani di wi ben man du na ini a diniwroko, noso fu den grani di wi abi na ini a gemeente? Te wi e meki bigi na so wan fasi, dan dati kan meki trawan lasi-ati, èn a kan meki taki den e kisi a firi taki den no warti leki wi. Lobi no e gi wi pasi fu meki bigi nanga den grani di Gado e gi wi na ini en diniwroko (1 Korentesma 3:5-9). Bika, lobi „no abi bigimemre”, noso soleki fa wan tra Bijbel e taki, a no e „meki wan sma prakseri tumusi furu fu ensrefi”. Lobi e sorgu taki wi no e feni taki wi betre moro trawan.Romesma 12:3.

17. Fa lobi e yepi wi fu hori trawan na prakseri? Fa wi no sa tyari wisrefi fu dati ede?

17 „Lobi . . . no e tyari ensrefi na wan fasi di no fiti.” Wan sma di e tyari ensrefi na wan fasi di no fiti e du sani di no yoisti kwetikweti, noso sani di e sori taki a no abi maniri. Sma di e tyari densrefi na so wan fasi no abi lobi, fu di den no e broko den ede nanga den firi fu trawan, noso den no e prakseri a tanbun fu den. Na a tra sei, lobi e meki wi abi switifasi so taki wi e hori trawan na prakseri. Lobi e meki wi abi bun maniri, a e meki wi libi leki fa Gado wani, èn a meki wi abi lespeki gi wi brada nanga sisa. Sobun, lobi no sa gi wi pasi fu tyari wisrefi „na wan syen fasi”. Iya, wi no sa du nowan sani di kan bruya wi Kresten brada nanga sisa, noso di kan hati den.Efeisesma 5:3, 4.

18. Fu san ede wan sma di lobi trawan no e dwengi den fu du sani soleki fa en wani?

18 „Lobi . . . no e suku en eigi bun nomo.” Wan tra Bijbel e taki dya: „Lobi no e dwengi sma fu du soleki fa en wani.” Wan sma di lobi trawan no e suku fu meki trawan du ala sani nomo leki fa en wani, neleki a abi leti ala ten. A no e suku fu drai na ede  fu den wan di e si sani na wan tra fasi, noso a no sa pruberi fu overtoigi den, teleki den brokokindi. Te wan sma ben sa hori nomo na san en e denki, dan dati kan sori taki a abi bigimemre, èn Bijbel e taki: „Bigimemre e kon bifo wan sma fadon” (Odo 16:18). Efu wi lobi den brada nanga sisa fu wi trutru, dan wi sa lespeki a fasi fa den e prakseri fu sani, èn efu a kan, wi sa sori taki wi de klariklari fu gi den leti. Te wi de esi fu gi trawan leti, dan wi e du leki fa Paulus taki: „Meki ibriwan sma tan suku san bun gi trawan, ma no meki a tan suku san bun gi ensrefi.”1 Korentesma 10:24.

19. Fa lobi e meki wi tyari wisrefi te trawan e du sani di e hati wi?

19 „Lobi . . . no e mandi esi . . . , a no e tan memre na ogri di trawan du nanga en.” Wan sma di abi lobi no e mandi esi nanga sani di trawan e taki noso sani di den e du. Iya, wi kan mandi pikinso te trawan e du, noso taki sani di e hati wi. Ma srefi efu a de so taki wi abi leti fu atibron, toku lobi sa yepi wi fu no tan nanga na atibron dati (Efeisesma 4:26, 27). Wi no sa tan memre den hati sani di tra sma taki noso du, fu di a ben sa de neleki wi e skrifi den na ini wan buku fu no frigiti den. Na presi fu dati, lobi e meki taki wi wani du sani soleki fa wi lobi-ati Gado e du sani. Soleki fa wi ben si na ini kapitel 26, dan Yehovah e gi wi pardon te a e si taki a fiti fu du dati. Te a e gi wi pardon, dan a e frigiti a fowtu fu wi tu, sobun, na ini a ten di e kon a no sa sori wi tapu den srefi fowtu dati. Wi breiti srefisrefi taki Yehovah no e tan memre den fowtu fu wi, a no so?

20. San wi musu du efu sani no waka bun nanga wan brada noso sisa fu wi di du wan sondu?

20 „Lobi . . . no e prisiri nanga sani di no de reti.” Wan tra Bijbel e taki: „Lobi . . . no e breiti te sma e du sondu.” Ete wan Bijbel e taki: „Noiti lobi e prisiri te trawan e meki fowtu.” Wan sma di abi lobi no e prisiri te a e si sani di no reti, sobun wi no e taki bun fu nowan hurudu. San wi e du efu wan brada noso sisa fu wi e du wan sondu èn efu a kon na ini problema fu dati ede? Efu wi abi lobi, dan a sa meki taki wi no prisiri fu dati, so taki a no gersi leki wi wani taki: ’A kisi en moi! A bun gi en!’ (Odo 17:5) Ma na a tra sei wi e prisiri srefisrefi te wan brada  noso wan sisa di ben du sondu, e du muiti fu drai baka, te a ben fadon na ini ogridu.

„Wan pasi di moro bun”

21-23. (a) San Paulus ben wani sori wi di a taki dati „lobi no e misi noiti”? (b) Fu san wi sa taki na ini a lasti kapitel?

21 „Lobi no e misi noiti.” San Paulus ben wani taki nanga den wortu dati? Soleki fa a pisi tori disi e sori, dan a ben e taki fu den presenti di a yeye fu Gado ben gi den fosi Kresten. Den presenti dati ben musu sori taki Gado ben feni a nyun gemeente dati bun. Ma a no ala Kresten ben man dresi sma, taki profeititori, noso taki na ini tongo. Ma dati no ben abi trobi; wan ten ben o kon taki den presenti dati di sma ben kisi na wan wondru fasi, no ben o de moro. Toku wan tra presenti  ben de di ben o tan, wan sani di ibri Kresten ben kan kon abi. A sani dati ben bun moro iniwan presenti di sma kan kisi na wan wondru fasi èn a ben o tan moro langa leki iniwan presenti. Iya, Paulus ben kari en „wan pasi di moro bun” (1 Korentesma 12:31). San ben de a pasi disi di „moro bun”? A ben de a pasi fu lobi.

Sma e kon sabi a pipel fu Yehovah fu di den e si taki den lobi makandra

22 Fu tru, a Kresten lobi di Paulus ben taki fu en, na lobi di „no e misi noiti”, dati wani taki a no sa kaba noiti. Te na a dei fu tide a de krin suma na den tru bakaman fu Yesus, fu di den lobi den brada nanga sisa sondro fu prakseri densrefi nomo. Wi e si krin buweisi fu a lobi dati na ini den gemeente fu den anbegiman fu Yehovah na heri grontapu, a no so? A lobi dati sa tan fu têgo, bika Yehovah pramisi fu gi den getrow futuboi fu en têgo libi (Psalm 37:9-11, 29). Meki wi tan du muiti fu „tan lobi makandra”. Te wi e du dati dan wi sa si taki wi sa de moro koloku te wi e gi sma sani. Boiti dati, wi sa tan libi fu têgo, iya, wi sa man tan lobi makandra fu ala ten, fu di wi du san wi lobi-ati Gado, Yehovah e du.

23 Disi na a lasti kapitel fu pisi fo, di e taki fu lobi. Na ini a kapitel disi wi si fa wi kan sori taki wi lobi makandra. Ma fu di so furu difrenti fasi de fa wi e kisi wini fu a lobi, a makti, a retidu, nanga a koni fu Yehovah, meki wi wani aksi wisrefi: ’Fa mi kan sori Yehovah taki mi lobi en trutru?’ Na ini a lasti kapitel wi sa taki fu a pisi tori dati.

^ paragraaf 12 Disi no wani taki, dati yu o man kori wan sma makriki fu di a abi Kresten lobi. Bijbel e warskow wi: „Luku bun nanga den sma di e suku fu prati unu . . . soso fu di den wani meki trawan fadon; tan farawe fu den.”Romesma 16:17.