Go na content

Go na a tra menu

Go na table of contents

Yehovah Kotoigi

Sranantongo

Kon krosibei na Yehovah

 KAPITEL 20

„En ati furu nanga koni”, toku a abi sakafasi

„En ati furu nanga koni”, toku a abi sakafasi

1-3. San e gi wi a dyaranti taki Yehovah abi sakafasi?

WAN papa wani leri a nyofi pikin fu en wan prenspari sani. A wani doro na ati fu a pikin. Ma fa a musu du dati? A musu tanapu fesi a pikin èn taki grofu nanga en? Noso a musu go tapu en kindi na sei a pikin, aladi a e taki switi nanga a pikin? A no de fu taki dati wan koni papa di abi sakafasi, o taki nanga a pikin na wan switi fasi.

2 Sortu Papa Yehovah de? A abi heimemre, noso a abi sakafasi? A grofu, noso a abi switifasi? Yehovah sabi ala sani, èn a abi ala koni. Ma furu tron wi e si taki sabi nanga koni no abi fu meki taki wan sma abi sakafasi, a no so? Soleki fa Bijbel e taki, dan „sabi e meki sma kisi heimemre” (1 Korentesma 3:19; 8:1). Toku, Yehovah di „ati furu nanga koni”, abi sakafasi tu (Yob 9:4). Dati no wani taki dati Yehovah no abi wan hei posisi, noso taki a glori fu en no de so bigi. Ma a wani taki dati a no abi heimemre. Fu san ede dati de so?

3 Fu di Yehovah de santa meki a no abi heimemre, bika heimemre e doti sma (Markus 7:20-22). Luku sosrefi san a profeiti Yeremia ben taigi Yehovah: „A no de fu taki dati yu sili [Yehovah srefi] sa memre mi èn taki a sa boigi abra mi” (Kragisingi 3:20). * Prakseri dati nomo! Yehovah, a Moro Hei Masra fu hemel nanga grontapu, ben de klariklari fu „boigi”, noso fu saka ensrefi fu poti prakseri na Yeremia, aladi a ben de wan sondu  man (Psalm 113:7). Iya, Yehovah abi sakafasi. Ma san a sakafasi di Gado e sori wani taki dan? San a fasi dati abi fu du nanga koni? Fu san ede a de prenspari gi wi?

A fasi fa Yehovah e sori taki a abi sakafasi

4, 5. (a) San na sakafasi, èn fa wi kan si taki wan sma abi sakafasi? Fu san ede wi no musu si en leki wan swakifasi noso leki wan sani di e sori taki wan sma no abi deki-ati? (b) Fa Yehovah ben sori sakafasi na ini a fasi fa a handri nanga David? O prenspari a de gi wi taki Yehovah abi sakafasi?

4 Sakafasi wani taki dati wan sma e saka ensrefi, a no asranti èn a no abi bigifasi. Sakafasi e komoto fu na ati. Sobun, te wan sma abi sakafasi, dan a e sori eigifasi leki safri-ati fasi, pasensi, èn a e hori trawan na prakseri (Galasiasma 5:22, 23). Den sani disi na fasi di e kon fu Gado. Sobun, noiti wi musu prakseri taki so wan sma swaki noso taki a no abi deki-ati. Den fasi disi no e tapu Yehovah fu sori en regtfardiki atibron èn fu gebroiki a makti fu en. Na presi fu dati Yehovah e gebroiki a sakafasi nanga safri-ati fasi fu en, fu sori a bigi krakti di a abi èn fu sori taki a man dwengi ensrefi dorodoro (Yesaya 42:14). San sakafasi abi fu du nanga  koni? Wan buku pe sani skrifi di abi fu du nanga Bijbel, e taki: „Te fu kaba wi kan taki dati sakafasi . . . na te wan sma no e prakseri ensrefi nomo; a fasi disi de tumusi prenspari fu kisi iniwan sortu koni.” Sobun, wan sma no kan kon koni trutru efu a no abi sakafasi. Fa a sakafasi fu Yehovah abi wini gi wi?

Wan koni papa e handri nanga sakafasi èn na wan safri-ati fasi nanga den pikin fu en

5 Kownu David ben singi gi Yehovah, taki: „Yu sa gi mi a skilt fu yu di sa kibri mi, èn yu eigi reti-anu sa hori mi tanapu, èn yu eigi sakafasi sa meki mi kon bigi” (Psalm 18:35). Te yu luku en bun, dan Yehovah ben boigi fu du sani gi a sondu man disi. Iya, ibri dei baka a kibri en èn a horibaka gi en tu. David ben sabi taki efu a ben sa kisi frulusu, èn efu en leki kownu ben sa kisi glori, dan a ben o de nomo fu di Yehovah ben de klariklari fu saka Ensrefi fu yepi en na a fasi dati. Fu taki en leti, suma fu wi ben o abi a howpu fu kisi frulusu efu Yehovah no ben abi sakafasi, èn efu a no ben de klariklari fu saka ensrefi fu handri nanga wi leki wan safri-ati èn lobi-ati Papa?

6, 7. (a) San a wani taki dati Yehovah abi sakafasi? (b) San safri-ati fasi abi fu du nanga koni? Suma e gi a moro bun eksempre ini a tori disi?

6 Sakafasi na wan moi fasi di getrow libisma musu suku fu kon abi. A abi fu du nanga koni. Leki eksempre, Odo 11:2 e taki: „Koni de na den sma di abi sakafasi.” Toku Bijbel no e taki noiti dati Yehovah e sori sakafasi soleki fa libisma e du dati. Fu san ede? We, a no de so taki a no abi sakafasi kwetikweti. Te Bijbel e taki dati wan libisma abi sakafasi, dan dati wani taki dati a sma sabi soifri san a man du èn san a no man du. Ma na Almaktiwan man du ala sani, boiti efu ensrefi no wani du wan sani, kande fu di a wani hori ensrefi na en eigi regtfardiki markitiki (Markus 10:27; Titus 1:2). Moro fara a de so taki en leki a Moro Heiwan no abi fu saka ensrefi na ondro nowan sma. Sobun, te wi e taki dati Yehovah abi sakafasi, dan wi no musu prakseri a sakafasi di libisma e sori.

7 Ma Yehovah abi sakafasi fu di a de klariklari fu poti prakseri na libisma leki wi. Yehovah abi safri-ati fasi tu. A e leri den futuboi fu en taki safri-ati fasi de tranga fanowdu fu kan kisi trutru koni. Fu dati ede Bijbel e taki fu a „safri-ati fasi di koni sma e  sori” (Yakobus 3:13). * Yehovah e gi a moro bun eksempre ini a tori disi. Meki wi go luku fa a e du dati.

Yehovah e sori sakafasi fu di a e prati a frantwortu fu en nanga tra sma èn fu di a e arki sma

8-10. (a) Fu san ede a de wan aparti sani taki Yehovah de klariklari fu prati a frantwortu fu en nanga tra sma èn fu arki sma? (b) Fa na Almaktiwan sori sakafasi te yu luku fa a handri nanga den engel fu en?

8 Wi kan si tumusi moi buweisi fu a sakafasi fu Yehovah te wi luku taki a de klariklari fu arki sma èn fu meki tra sma tyari frantwortu. A de wan tumusi kefalek sani taki Yehovah e arki wi srefi, bika a no abi wi fanowdu fu yepi en, noso fu gi en rai (Yesaya 40:13, 14; Romesma 11:34, 35). Toku Bijbel e sori wi furu tron taki Yehovah e saka ensrefi na a fasi disi.

9 Luku fu eksempre sortu aparti sani ben pasa na ini a libi fu Abraham. Dri sma ben kon na Abraham; wán fu den a ben e kari „Yehovah”. Te yu luku en bun, dan den man disi ben de engel, ma wan fu den ben kon na ini a nen fu Yehovah èn a ben e du sani sosrefi na ini a nen fu En. Fu taki en leti, te na engel dati ben e taki èn du sani, dan a ben de Yehovah di ben e taki èn du sani. Na a fasi disi, Yehovah ben taigi Abraham taki a ben yere wan tranga „kragi krei di abi fu du nanga Sodom nanga Gomora”. Yehovah ben taki: „Mi de fu saka go na ondro nomonomo, so taki mi kan si efu den e handri trutru akruderi a tranga babari di mi yere fu a foto dati ede, èn efu a no de so, dan mi kan kon sabi disi” (Genesis 18:3, 20, 21). A no de fu taki dati a boskopu fu Yehovah no ben wani taki dati na Almaktiwan ben o „saka go na ondro” trutru. Na presi fu dati a ben seni engel fu teki presi gi en (Genesis 19:1). Fu san ede? Yehovah e si ala sani, a no so? We, ensrefi no ben kan „kon sabi” dan fa den sma na ini a kontren dati ben de? Iya! Ma na presi fu dati, Yehovah sori sakafasi fu di a gi den engel a frantwortu fu go luku fa a situwâsi ben de èn fu go na Lot nanga en osofamiri na ini Sodom.

 10 Moro fara a de so taki Yehovah e arki sma. Wan leisi a ben aksi den engel fu en fu taki san a ben kan du fu meki na ogri Kownu Akab fadon. Yehovah no ben abi a yepi dati fanowdu. Toku a ben teki a rai fu wan fu den engel èn a ben gi na engel dati a komando fu du san a ben taki (1 Kownu 22:19-22). Yu no feni taki Gado abi sakafasi trutru?

11, 12. Fa Abraham ben kon sabi taki Yehovah abi sakafasi?

11 Yehovah de klariklari srefi fu arki sondu libisma di e angri fu fruteri en san na den broko-ede fu den. Fu eksempre, a fosi leisi di Yehovah taigi Abraham taki A ben o pori Sodom nanga Gomora, dan a getrow man dati kon bruya pikinso. Ne Abraham taki: „Mi no denki taki yu o handri na a fasi disi.” Baka dati a ben aksi: „A Krutuman fu heri grontapu no sa du san reti?” A ben aksi Yehovah efu a ben o kibri den foto efu 50 regtfardikisma ben de drape. Yehovah ben gi en a dyaranti taki A ben o du dati. Ma Abraham aksi ete wan tron efu Yehovah ben o du dati te soso 45, 40, noso moro mendri regtfardikisma ben de drape. Aladi Yehovah ben gi en a dyaranti taki a ben o kibri a foto efu regtfardikisma ben de drape, toku Abraham tan aksi teleki a nomru ben saka go miti tin. Kande Abraham no ben frustan trutru o furu sari-ati Yehovah abi. Wi no sabi fu san ede Abraham poti den aksi dati, ma toku Yehovah tan sori pasensi nanga sakafasi, fu di a gi en mati Abraham na okasi fu taki san de tapu en ati.Genesis 18:23-33.

12 Omeni koni sma di kisi hei skoroleri ben sa arki nanga so furu pasensi te wan sma di no kisi so furu skoroleri, e taki nanga den? * Ma a Gado fu wi ben arki nanga ala pasensi, èn na so a sori sakafasi. Na ini a srefi takimakandra dati, Abraham ben kon si tu taki Yehovah „no e atibron esi-esi” (Exodus 34:6). A kan taki Abraham ben frustan taki a no ben abi a reti fu aksi a Moro Heiwan san a e du. Dati meki a ben begi tu tron: „Mi e aksi Yehovah, grantangi, no atibron nanga mi” (Genesis 18:30, 32). A  no de fu taki dati Yehovah no ben atibron nanga en. A de krin taki A abi „safri-ati fasi di koni sma e sori”.

Yehovah e fiti ensrefi na sma

13. Fu san ede wi kan taki dati Yehovah „e fiti ensrefi” trutru?

13 A sakafasi fu Yehovah e kon na krin sosrefi na ini wan tra moi fasi fu en, namku taki a e fiti ensrefi. A de wan sari sani taki a fasi disi no de fu si so furu na sondu libisma. Yehovah de klariklari fu arki den koni mekisani fu en. Boiti dati, dan a de klariklari tu fu du san den e aksi en, solanga leki a no de kontrari den regtfardiki markitiki fu en. A fasi disi na ete wan tumusi prenspari marki fu a koni fu Gado. Yakobus 3:17 e taki: „A sma di abi a koni fu Gado . . . e fiti ensrefi.” Na sortu fasi wi kan taki dati Yehovah di abi ala koni, e fiti ensrefi? We, na a fosi presi a man fiti ensrefi na ibri situwâsi. Memre taki a nen fu En e leri wi taki a e meki ensrefi kon tron iniwan sani di de fanowdu fu meki den prakseri fu en kon tru (Exodus 3:14). We, dati e sori taki a de klariklari fu fiti ensrefi na difrenti situwâsi, a no so?

14, 15. San a fisyun di Esekièl ben si fu a hemel wagi fu Yehovah e leri wi fu En organisâsi na hemel? Fa na organisâsi fu Gado de tra fasi leki den di fu libisma?

14 Wan tumusi moi Bijbel tori de di e yepi wi fu frustan pikinso fa Yehovah man fiti ensrefi. A profeiti Esekièl ben kisi wan fisyun fu Yehovah en organisâsi fu yeye libisani di de na hemel. A ben si wan wagi di bigi so te, taki a ben fruwondru en srefisrefi. A ben de „a wagi” fu Yehovah di a e tyari ala ten leki fa En wani. San ben moi srefisrefi, na a fasi fa a wagi ben e buweigi. A wagi ben abi bun bigi banti di ben kan lolo go na fo sei. Den banti dati ben furu nanga ai sosrefi, so taki den ben kan si go na ala sei, èn wantewante den ben kan koti go na iniwan sei, sondro fu abi fu wakti èn sondro fu drai. A bun bigi wagi disi no ben e buweigi safrisafri leki wan bigi hebi wagi di libisma meki èn di pikinmoro no man go na fesi. Ma a ben e waka so esi leki te faya e koti, aladi a ben man koti go na wan sei sondro fu abi fu stop fosi! (Esekièl 1:1, 14-28) Iya, Yehovah, na Almaktiwan èn Moro Heiwan di e tiri na organisâsi fu en, man fu fiti ensrefi na ibri sortu situwâsi. Na a srefi fasi na organisâsi fu en e fiti ensrefi  heri bun na den situwâsi èn na den nowtu di e kenki ibri tron baka.

15 Libisma kan pruberi nomo fu fiti densrefi na so wan fasi. Ma toku a e pasa furu tron taki libisma nanga den organisâsi fu den, e hori densrefi nomo na san den e prakseri, èn den no wani fiti densrefi. Prakseri na eksempre disi: Te sma e si den bigi sipi di e tyari oli èn te den e si den bigi loko di e tyari lai, dan den e fruwondru fu si o bigi èn o tranga den sani disi de. Ma yu denki taki wan sipi noso wan loko sa man fiti ensrefi wantewante te wan situwâsi e kenki? Efu wan sani fadon na tapu a pasi fu wan loko, dan a loko no man drai baka. Wan loko no man stop wantronso te wan sani pasa. Baka te den hari a rem fu wan loko di e tyari hebi lai, dan a e sutu go na fesi pikinmoro 2 kilometer bifo a man stop te fu kaba! So a de tu nanga den bigi sipi di e tyari oli. Baka te sma kiri a masyin fu so wan sipi, dan a kan pusu go na fesi ete aiti kilometer bifo a e stop. Srefi efu a masyin fu a sipi ben sa drai go nanga baka, dan toku a sipi kan pusu go na fesi ete 3 kilometer bifo a stop! Na so a de tu nanga libisma organisâsi pe sma abi a gwenti fu du nomo san densrefi abi na prakseri. Furu tron libisma e weigri fu fiti densrefi na den nowtu nanga den situwâsi di e kenki, fu di den abi bigifasi. Son leisi wrokope ben abi fu tapu èn son tron tirimakti fadon srefi, fu di sma ben wani hori nomo na den eigi denki (Odo 16:18). Wi kan breiti taki Yehovah nanga na organisâsi fu en de heri tra fasi!

A fasi fa Yehovah e sori taki a e fiti ensrefi

16. Fa Yehovah sori taki a fiti ensrefi na Lot na a pisi ten bifo Sodom nanga Gomora kisi pori?

16 Prakseri baka fa sani waka di Gado pori Sodom nanga Gomora. Na engel fu Yehovah ben gi Lot nanga en osofamiri a spesrutu komando: „Lowe go na den bergi kontren.” Ma Lot no ben firi fu du dati. Dati meki a ben begi: „No meki mi go drape, mi e begi yu, Yehovah!” Fu di Lot ben feni taki a ben o dede efu a ben sa lowe go na den bergi, meki a ben aksi primisi fu en nanga en osofamiri lowe go na a foto Soar, di ben de krosibei. Memre taki Yehovah ben abi na prakseri fu pori a foto dati tu.  Boiti dati, dan Lot ben e frede fu soso, fu di Yehovah ben kan hori Lot na libi na den bergi kontren! Toku Yehovah arki a begi fu Lot èn a ben kibri Soar. Na engel ben taigi Lot: „Luku, mi e hori yu na prakseri na ini a tori disi tu” (Genesis 19:17-22). Dati ben de wan moi fasi fa Yehovah sori taki a e fiti ensrefi, a no so?

17, 18. Fa Yehovah sori taki a e fiti ensrefi na sma, te yu luku a tori fu Ninefei?

17 Yehovah e du wan sani tu te sma abi berow trutru; ala ten a e sori sari-ati èn e du san de reti. Prakseri san ben pasa di a profeiti Yona ben musu go na a ogri foto Ninefei. Di Yona waka go na ini den strati fu Ninefei, dan a ben musu gi den sma wan syatu boskopu nomo di ben kon fu Gado: A tranga foto ben o kisi pori na ini 40 dei. Ma dan a situwâsi kenki trutru. Den sma fu Ninefei ben abi berow èn den drai den libi!Yona, kapitel 3.

18 Wi kan leri furu te wi e agersi a fasi fa Yehovah tyari ensrefi, nanga a fasi fa Yona tyari ensrefi di a situwâsi kenki. Na ini na afersi disi Yehovah fiti ensrefi, so taki a kon tron wan Sma di e gi trawan pardon fu den sondu, na presi fu de wan „mansma fu orloku” (Exodus 15:3). * Na a tra sei, Yona no ben man fiti ensrefi na a nyun situwâsi disi leki fa Yehovah ben du dati, èn a no ben abi so furu sari-ati leki Gado. Na presi fu dati a tyari ensrefi leki a bigi loko noso a bigi sipi di wi ben taki fu den kaba. Yona ben feni taki a warskow den sma taki den ben o kisi pori, sobun den ben musu kisi pori nomonomo! Ma nanga pasensi Yehovah leri a profeiti disi di no ben abi pasensi, taki a prenspari fu fiti yusrefi na sma èn fu sori sari-ati.Yona, kapitel 4.

Yehovah e fiti ensrefi èn a e frustan taki sani de di wi no man du

19. (a) Fu san ede wi kan abi a frutrow taki Yehovah no e fruwakti tumusi furu fu wi? (b) Fa Odo 19:17 e sori taki Yehovah na wan Basi di „e handri soleki fa a fiti” èn taki a abi bun furu sakafasi?

19 Leki lasti sani, Yehovah no e fruwakti tumusi furu fu wi. Kownu David ben taki: „Ensrefi sabi heri bun fa wi meki, fu di a e hori na prakseri taki wi na doti” (Psalm 103:14). Yehovah e  frustan moro bun leki wisrefi san wi man du, san wi no man du, èn san na wi swakifasi. Noiti a e fruwakti moro fu wi leki san wi man du. Bijbel e sori taki wan difrenti de na mindri libisma basi „di e handri soleki fa a fiti” nanga den wan „di muilek fu plisi” (1 Petrus 2:18). Ma sortu Basi Yehovah de? Luku san Odo 19:17 e taki: „A sma di e yepi den mofinawan, e leni Yehovah.” A de krin taki soso wan bun basi di man fiti ensrefi, kan poti prakseri na ala den bun sani di sma e du gi den mofinawan. Te yu luku en bun, dan a tekst disi e sori tu taki a Mekiman fu hemel nanga grontapu, e si ensrefi leki wan sma di de na paiman na den libisma di e sori a sortu sari-ati disi gi trawan! Disi na a moro kefalek sortu sakafasi di wan sma kan abi.

20. Sortu dyaranti wi abi taki Yehovah e arki den begi fu wi èn taki a e piki den tu?

20 Na ini a ten disi Yehovah no kenki, bika a e tan sori safri-ati gi den futuboi fu en, aladi a e fiti ensrefi na den tu. A e arki wi te wi e sori taki wi e bribi san wi e begi en. Awinsi a no seni engel fu kon taki nanga wi, toku wi no musu prakseri taki a no e piki den begi fu wi. Memre taki di Paulus ben aksi den brada nanga sisa fu „tan begi” fu a ben kan komoto na strafu-oso, dan a ben taki sosrefi: „So taki mi kan kon baka na unu moro esi” (Hebrewsma 13:18, 19). Sobun, den begi fu wi kan meki taki Yehovah du wan sani gi wi, di a no ben o du kande!Yakobus 5:16.

21. San wi no musu taki noiti fu a sakafasi fu Yehovah, ma na presi fu dati, san wi musu kon frustan bun fu en?

 21 Sobun, Yehovah e sori sakafasi fu di a abi safri-ati, fu di a de klariklari fu arki sma, fu di a abi pasensi, èn fu di a e fiti ensrefi. Toku disi no e meki taki a e poti den regtfardiki markitiki fu en na wan sei. Den kerki tiriman fu Krestenhèit e prakseri kande taki den e fiti densrefi na sma te den e meki den markitiki fu Yehovah lasi krakti, soso fu switi a yesi fu den memre fu a kerki fu den (2 Timoteyus 4:3). Ma a fasi fa libisma e poti gronprakseri na wan sei soso fu meki ala sma firi bun, no abi noti fu du nanga a fasi fa Gado e fiti ensrefi na sma. Yehovah de santa; noiti a sa pori den regtfardiki markitiki fu en (Lefitikus 11:44). Meki wi sori dan taki wi lobi a fasi fa Yehovah e fiti ensrefi, fu di dati e sori krin taki a abi sakafasi. A no e gi yu bigi prisiri te yu e prakseri taki Yehovah Gado, a moro koni Sma fu hemel nanga grontapu, e saka ensrefi na so wan kefalek fasi? A de wan tumusi prisiri sani fu go krosibei na a tumusi bigi Gado disi di abi safri-ati fasi nanga pasensi, èn di de klariklari fu fiti ensrefi na sma!

^ paragraaf 3 Den fositen leriman fu Wet, den Soferim, ben kenki a tekst disi èn den ben skrifi taki a sma di boigi ben de Yeremia, èn taki a no ben de Yehovah. A de krin taki den ben e prakseri dati a no fiti fu taki dati Gado e saka ensrefi na so wan fasi. Leki bakapisi fu dati, furu bijbelvertaling no e sori krin san a moi bijbeltekst disi e leri wi. Ma wan Bijbel di nen The New English Bible, e taki krin dati Yeremia ben aksi Gado: „Memre, o memre mi, èn boigi kon na mi.”

^ paragraaf 7 Tra Bijbel e taki „sma di koni e du sani tapu wan safri fasi” èn „safri fasi di de wan prenspari marki fu koni”.

^ paragraaf 12 A moi fu si taki Bijbel e poti pasensi kontrari heimemre (Preikiman 7:8). A pasensi fu Yehovah na ete wan buweisi taki a abi sakafasi.2 Petrus 3:9.

^ paragraaf 18 Psalm 86:5 e taki dati Yehovah „na wan sma di bun èn di de klariklari fu gi pardon”. Di den poti a psalm disi abra na ini Grikitongo, dan den vertaal den wortu „de klariklari fu gi pardon” nanga a wortu e·pi·ei·kesʹ, noso „fiti yusrefi”.