1, 2. Sortu „santa kibritori” musu hari wi prakseri? Fu san ede?

KIBRITORI! Den tori dati e hari sma prakseri so kefalek, taki furu libisma no man hori den sortu tori disi gi densrefi. Toku Bijbel e taki: „A de a glori fu Gado fu kibri wan tori” (Odo 25:2). Iya, nanga reti Yehovah di de a Moro Hei Tiriman nanga Mekiman, e kibri son sani gi a libisma famiri teleki a yoisti ten doro fu tyari den tori dati kon na krin.

2 Ma wan tumusi moi kibritori de di Yehovah tyari kon na krin na ini a Wortu fu en, èn a sa hari wi prakseri trutru. Den e kari en „a santa kibritori di abi fu du nanga a wani fu [Gado]” (Efeisesma 1:9). Te yu leri fu a kibritori disi, dan a no de so nomo taki yu o kon sabi nyun sani, ma a kan yepi yu tu fu kisi frulusu èn a kan sori yu pikinso fu a tumusi bigi koni fu Yehovah.

A kon na krin safrisafri

3, 4. Fa a profeititori di skrifi na Genesis 3:15 ben e gi sma howpu? Sortu dangratori, noso sortu „santa kibritori”, ben de na ini a tori disi?

3 Di Adam nanga Eva sondu, dan a ben kan gersi leki a prakseri di Yehovah ben abi fu seti wan paradijs na heri grontapu pe volmaakti libisma ben o libi na ini, ben pori. Ma Gado poti prakseri na a problema wantewante. A ben taki: „Mi sa poti feantifasi na mindri yu [a sneki] nanga na uma èn na mindri yu siri nanga en siri. A sa masi yu na yu ede èn yu sa masi en na en bakafutu.”Genesis 3:15.

4 Den wortu disi ben dangra fu tru. San den ben wani taki? Suma ben de na uma disi? Suma ben de a sneki? Suma ben de a „siri” di ben o masi a sneki na en ede? Adam nanga Eva no ben kan sabi dati kwetikweti. Toku a ben de so taki den wortu disi di Gado ben taki, ben e gi howpu na ala den getrow bakapikin  fu den tu sma disi di no ben tan getrow. Regtfardikifasi ben o wini te fu kaba. San Yehovah ben abi na prakseri ben o kon tru nomonomo. Ma fa? We, dati ben de wan kibritori! Bijbel e kari en „a koni fu Gado na ini wan santa kibritori, a koni di kibri”.1 Korentesma 2:7.

5. Sori fu san ede Yehovah tyari a kibritori fu en kon na krin safrisafri.

5 Yehovah, di de a „Sma di e tyari kibritori kon na krin”, ben o sori finifini te fu kaba fa a kibritori disi ben o kon tru (Danièl 2:28). Ma a ben o du dati safrisafri, a no ben o tyari ala sani kon na krin wantronso. Fu gi wan eksempre, wi ben sa kan prakseri a lobi-ati fasi fa wan papa e piki en manpikin di e aksi en: „Papa, pe mi komoto?” Wan koni papa e fruteri a pikin boi fu en soso san a man frustan. Te a boi e kon moro owru, dan a papa e fruteri en moro fini fa a tori de. Na so a de tu nanga Yehovah. Na en e bosroiti o ten a bun fu fruteri a pipel fu en san na a wani nanga den prakseri fu en.Odo 4:18; Danièl 12:4.

6. (a) San na a marki fu wan frubontu, noso kontrakti? (b) Fu san ede a de so wan aparti sani taki Yehovah meki frubontu nanga libisma?

6 Fa Yehovah ben tyari den sortu tori dati kon na krin? Furu fu den tori dati a ben tyari kon na krin nanga yepi fu difrenti frubontu, noso kontrakti. A kan taki yusrefi ben meki wan kontrakti wan leisi tu, kande fu bai wan oso, noso fu leni wan moni. A kontrakti dati ben de wan dyaranti taki sani ben o waka soleki fa yu ben kruderi. Ma fu san ede Yehovah ben musu meki frubontu, noso kontrakti, nanga libisma? A tru taki a pramisi fu Gado na wan dyaranti kaba taki a o du san a taki. Ma aladi dati tru, dan toku a de so taki na difrenti okasi, Gado ben horibaka gi a pramisi fu en nanga yepi fu kontrakti di de akruderi wet. Den kruderi disi di no wan sma man broko, e gi wi leki sondu libisma wan moro tranga frutrow taki den pramisi fu Yehovah sa kon tru.Hebrewsma 6:16-18.

 A frubontu nanga Abraham

7, 8. (a) Sortu frubontu Yehovah ben meki nanga Abraham, èn san dati ben tyari kon na krin fu a santa kibritori? (b) Fa Yehovah ben tyari kon na krin safrisafri suma ben o de den afo fu a pramisi Siri?

7 Moro leki tu dusun yari baka di Yehovah yagi libisma puru na ini a Paradijs, a taigi en getrow futuboi Abraham: „Fu tru mi sa meki yu siri kon furu leki den stari na hemel . . . èn nanga yepi fu yu siri ala pipel fu grontapu sa blesi densrefi trutru, fu di yu arki mi sten” (Genesis 22:17, 18). A sani disi no ben de wan pramisi nomo. Yehovah ben poti en leki wan frubontu di ben seti akruderi wet. A ben sweri srefi fu horibaka gi a frubontu dati, èn wi sabi taki Gado no man broko den sweri fu en (Genesis 17:1, 2; Hebrewsma 6:13-15). A de wan tumusi aparti sani taki a Moro Hei Masra ben meki wan kontrakti fu blesi a libisma famiri!

„Mi sa meki yu siri kon furu leki den stari na hemel”

8 A frubontu nanga Abraham ben tyari kon na krin taki a pramisi Siri ben o kon leki wan libisma, fu di a ben o de wan bakapikin fu Abraham. Ma suma ben o de a siri dati? Te fu kaba Yehovah tyari kon na krin taki fu den manpikin fu Abraham, a ben teki Isak fu tron na afo fu a Siri. Fu den tu manpikin fu Isak, Gado ben teki Yakob (Genesis 21:12; 28:13, 14). Bakaten Yakob ben taki wan profeititori di ben abi fu du nanga wán fu den 12 manpikin fu en: „A tiriman-tiki no sa komoto na Yuda, èn so tu a kownu-tiki na mindri den futu fu en, teleki Silo [„A wan di abi ala reti”] kon; èn na en den pipel sa gi yesi” (Genesis 49:10). Na a ten dati a ben kon na krin taki a Siri ben o de wan kownu, wan bakapikin fu Yuda!

A frubontu nanga Israel

9, 10. (a) Sortu frubontu Yehovah ben meki nanga a pipel fu Israel? Na sortu fasi a frubontu dati ben e kibri den? (b) Fa a Wet ben e tyari kon na krin taki libisma abi wan lusu-paiman fanowdu?

9 Na ini 1513 b.G.T., Yehovah seti sani di ben o meki taki a ben kan sori moro krin san na a santa kibritori. A ben meki wan frubontu nanga den bakapikin fu Abraham, a pipel fu Israel. Aladi a Wet fu Moses no e teri moro, toku a frubontu  disi ben de wan prenspari pisi fu den sani di Gado ben o du, so taki a pramisi Siri ben kan kon. Fa so? Meki wi luku dri difrenti fasi. Na a fosi presi a Wet ben de leki wan skotu fu kibri sma (Efeisesma 2:14). Den regtfardiki markitiki fu a Wet ben e prati den Dyu fu den sma di no ben de Dyu. Na a fasi dati a Wet ben yepi fu kibri a famirilin fu a pramisi Siri. Fu di Gado kibri a Dyu pipel, meki den ben de ete na a ten di a Mesias ben musu gebore na ini a lo fu Yuda.

10 Leki di fu tu sani, a Wet ben e sori krin taki libisma abi wan lusu-paiman fanowdu. Fu di a Wet ben bun dorodoro, meki a ben tyari kon na krin taki sondu libisma no ben man hori en finifini. Dati meki a Wet ben de fu „tyari sondu kon na krin, teleki a siri di kisi a pramisi ben o doro” (Galasiasma 3:19). A Wet ben seti na so wan fasi taki sma ben kan kisi pardon fu sondu nanga yepi fu meti-ofrandi, ma fu wan pisi ten nomo. Ma soleki fa Paulus ben skrifi, dan a „brudu fu mankaw nanga krabita no man puru sondu”. Dati meki den sortu ofrandi disi ben de nomo fu agersi a frulusu-ofrandi fu Krestes (Hebrewsma 10:1-4). We, gi getrow Dyu a frubontu dati ben kon tron wan ’leriman di ben e tyari den go na Krestes’.Galasiasma 3:24.

11. Sortu tumusi moi okasi a Wetfrubontu ben e gi Israel, ma fu san ede a pipel dati leki grupu ben lasi na okasi dati?

11 Leki di fu dri sani, a frubontu dati ben gi a pipel fu Israel wan tumusi moi okasi. Yehovah taigi den taki efu den ben sa tan hori densrefi na a frubontu, dan den ben o tron „wan kownukondre fu priester èn wan santa pipel” (Exodus 19:5, 6). Te fu kaba den fosi sma di ben tron memre fu a hemel kownukondre fu priester ben de sma fu a trutru Israel. Ma leki grupu, den Israelsma ben kakafutu gi a Wetfrubontu, den no teki a Mesias Siri, èn na so fasi den lasi a tumusi moi okasi dati. Ma suma ben o furu a nomru dan fu den sma di ben o de na ini a kownukondre fu priester? San a pipel dati, di ben abi so wan bigi grani, ben o abi fu du nanga a pramisi Siri? Den sani dati di ben abi fu du nanga a santa kibritori, ben o kon na krin na a ten di Gado ben poti.

 A frubontu nanga David fu wan kownukondre

12. Sortu frubontu Yehovah ben meki nanga David? Fa disi ben tyari moro fu a santa kibritori kon na krin?

12 Na ini a di fu 11 yarihondro b.G.T., Yehovah tyari moro fu a santa kibritori kon na krin di a ben meki wan tra frubontu. A ben pramisi a getrow Kownu David: „Fu tru mi sa meki yu siri opo kon baka yu, . . . èn mi sa seti a kownukondre fu en steifi . . . Fu tru mi sa seti a kownusturu fu en steifi, te ten di no skotu” (2 Samuel 7:12, 13; Psalm 89:3). Now a famirilin fu a pramisi Siri ben kon na krin moro srefi, fu di a ben o komoto na ini na oso fu David. Ma a kan taki wan libisma leki wi ben o tiri trutru „te ten di no skotu”? (Psalm 89:20, 29, 34-36) So wan libisma kownu ben o man frulusu a libisma famiri fu sondu nanga dede?

13, 14. (a) San Yehovah e pramisi a salfu Kownu fu en, soleki fa Psalm 110 e sori? (b) Sortu tra sani di ben abi fu du nanga a Siri di ben o kon ben kon na krin nanga yepi fu den profeiti fu Yehovah?

13 Nanga yepi fu a santa yeye, David ben skrifi: „Yehovah taigi mi Masra, taki: ’Go sidon na mi reti-anu, teleki mi poti den feanti fu yu leki wan futubangi gi yu futu.’ Yehovah meki wan sweri (èn a no sa firi sari): ’Yu na wan priester te ten di no skotu akruderi a fasi fu Melkiseidek!’” (Psalm 110:1, 4) Den wortu fu David ben abi fu du langalanga nanga a pramisi Siri, noso a Mesias (Tori fu den Apostel 2:35, 36). A Kownu disi no ben o tiri komoto fu Yerusalem, ma komoto fu hemel, na a „reti-anu” fu Yehovah. A sani dati ben o gi en a makti fu tiri Israel, ma sosrefi fu tiri heri grontapu (Psalm 2:6-8). Ete wan sani ben kon na krin dyaso. Luku taki Yehovah ben meki wan tumusi prenspari sweri taki a Mesias ben o de „wan priester . . . akruderi a fasi fu Melkiseidek”. Neleki Melkiseidek, di ben e dini leki kownu nanga priester na ini den dei fu Abraham, na so a Siri di ben o kon ben o kisi a frantwortu langalanga fu Gado fu dini leki Kownu èn leki Priester!Genesis 14:17-20.

14 Na ini den yari baka dati Yehovah gebroiki den profeiti fu en fu tyari a santa kibritori kon na krin moro soifri. Leki eksempre, Yesaya ben fruteri taki a Siri ben o dede leki srakti-ofrandi  (Yesaya 53:3-12). Mika ben taki na fesi pe a Mesias ben o kon gebore (Mika 5:2). Danièl ben taki wan profeititori srefi di ben sori soifri o ten a Siri ben o sori ensrefi èn o ten a ben o dede.Danièl 9:24-27.

A santa kibritori kon na krin!

15, 16. (a) Fa a du kon taki a Manpikin fu Yehovah ben „komoto na ini wan uma”? (b) San Yesus ben kisi fu a libisma papa nanga mama fu en? O ten a ben doro leki a pramisi Siri?

15 A fasi fa den profeititori disi ben o kon tru no ben de krin teleki a Siri srefi ben kon. Galasiasma 4:4 e taki: „Di a ten di ben poti ben doro en marki krinkrin, dan Gado ben seni en Manpikin kon, di ben komoto na ini wan uma.” Na ini a yari 2 b.G.T., wan engel taigi wan Dyu nyunwenke di ben nen Maria: „Luku! yu sa de nanga bere èn yu sa kisi wan manpikin, èn yu musu kari en Yesus. A wan disi sa bigi èn den sa kari en a Manpikin fu a Moro Heiwan; èn Yehovah Gado sa gi en a kownusturu fu en tata David . . . Santa yeye sa kon na yu tapu èn krakti fu a Moro Heiwan sa tapu yu. Fu dati ede sma o kari a pikin di o gebore, a santawan, a Manpikin fu Gado.”Lukas 1:31, 32, 35.

16 Bakaten, Yehovah poti a libi fu en Manpikin di ben de na hemel, go na ini a muru fu Maria, so taki a ben kan komoto na ini wan uma. Maria ben de wan sondu uma. Ma Yesus no ben kisi a sondu fu en, fu di a ben de „a Manpikin fu Gado”. Toku a ben de wan bakapikin fu David di ben abi a reti fu kisi kownumakti fu di a libisma papa nanga mama fu en ben de bakapikin fu David tu (Tori fu den Apostel 13:22, 23). Di Yesus teki dopu na ini a yari 29 G.T., dan Yehovah ben salfu en nanga santa yeye èn A ben taki: „Disi na mi Manpikin, a lobiwan di mi feni bun” (Mateyus 3:16, 17). A Siri ben doro now! (Galasiasma 3:16) A ten ben doro fu tyari moro fu a santa kibritori kon na krin.2 Timoteyus 1:10.

17. Fa a ben kon na krin san Genesis 3:15 ben wani taki?

17 Na ini a diniwroko fu en, Yesus sori taki a sneki fu Genesis 3:15 ben de Satan èn taki a siri fu a sneki ben de den bakaman fu Satan (Mateyus 23:33; Yohanes 8:44). Bakaten a ben kon na  krin fa den alamala ben o kisi pori fu têgo (Openbaring 20:1-3, 10, 15). Na uma ben de „a Yerusalem fu tapusei”, Yehovah en organisâsi fu yeye libisani di de na ini hemel èn di de leki a wefi fu En. *Galasiasma 4:26; Openbaring 12:1-6.

A nyun frubontu

18. San na a marki fu „a nyun frubontu”?

18 Kande a moro prenspari sani di ben kon na krin ben de san Yesus ben taki na a neti bifo Yesus dede, di a fruteri den getrow disipel fu en fu a „nyun frubontu” (Lukas 22:20). Neleki a Wetfrubontu fu Moses, na so a nyun frubontu disi ben musu seti „wan kownukondre fu priester” (Exodus 19:6; 1 Petrus 2:9). Ma a frubontu disi no ben o seti wan pipel fu libisma, ma fu yeye libisani, namku „na Israel fu Gado”. Soso den getrow salfu bakaman fu Krestes ben o de na ini a grupu disi (Galasiasma 6:16). Den wan disi di ben o de na ini a nyun frubontu ben o wroko makandra nanga Yesus fu blesi a libisma famiri!

19. (a) Fa a du kon taki a nyun frubontu man fu seti „wan kownukondre fu priester”? (b) Fu san ede Bijbel e kari den salfu Kresten „wan nyun sani di Gado meki”? Omeni fu den o dini makandra nanga Krestes na ini hemel?

19 Ma fa a du kon taki a nyun frubontu man fu seti „wan kownukondre fu priester” di sa blesi libisma? Bika na presi fu krutu den disipel fu Krestes leki sondari, a frubontu ben e sorgu taki sma ben kan kisi pardon fu den sondu nanga yepi fu na srakti-ofrandi fu Krestes (Yeremia 31:31-34). So esi leki Yehovah e si den leki sma di regtfardiki, dan a e teki den na ini a famiri fu en na ini hemel èn a e salfu den nanga santa yeye (Romesma 8:15-17; 2 Korentesma 1:21). Na a fasi disi den e ’kon gebore nyun baka fu kan abi wan libilibi howpu . . . di poti na wan sei gi den na ini hemel’ (1 Petrus 1:3, 4). Fu di so wan hei posisi  na wan nyun sani gi libisma, meki den e kari den salfu Kresten di kon gebore nyun baka „wan nyun sani di Gado meki” (2 Korentesma 5:17). Bijbel e sori taki 144.000 sma o de na hemel te fu kaba, fu yepi tiri libisma di bai puru na ini sondu.Openbaring 5:9, 10; 14:1-4.

20. (a) Sortu sani di abi fu du nanga a santa kibritori ben kon na krin na ini 36 G.T.? (b) Suma sa nyan bun fu den blesi di Gado ben pramisi Abraham?

20 Makandra nanga Yesus, den salfuwan disi e tron „a siri fu Abraham” (Galasiasma 3:29). * Den fosiwan di ben tron wan pisi fu a siri dati ben de Dyu trutru. Ma na ini a yari 36 b.G.T., wan tra sani di abi fu du nanga a santa kibritori ben kon na krin: sma di no ben de Dyu ben o kisi a howpu tu fu go na hemel (Romesma 9:6-8; 11:25, 26; Efeisesma 3:5, 6). Ma na soso den salfu Kresten ben o nyan bun fu den blesi di Gado ben pramisi Abraham? Nôno, bika na ofrandi fu Yesus abi wini gi heri grontapu (1 Yohanes 2:2). Baka wan pisi ten Yehovah tyari kon na krin taki wan „bigi ipi” fu sma, di wi no sabi o bigi a o de trutru, ben o libi pasa a kaba fu a sistema disi di Satan e tiri (Openbaring 7:9, 14). Bun furu tra sma ben o kisi wan opobaka nanga a howpu fu libi fu têgo na ini wan Paradijs!Lukas 23:43; Yohanes 5:28, 29; Openbaring 20:11-15; 21:3, 4.

A koni fu Gado nanga a santa kibritori

21, 22. Na sortu fasi a santa kibritori fu Yehovah e sori a koni fu en?

21 A santa kibritori na wan tumusi aparti fasi fa wi kan si ’den furu difrenti fasi fu a koni fu Gado’ (Efeisesma 3:8-10). Yehovah sori furu koni na ini a fasi fa a seti a santa kibritori disi, èn na ini a fasi fa a tyari kon na krin safrisafri san a wani taki! Fu di a koni, meki a hori den swakifasi fu libisma na prakseri, aladi a gi den na okasi fu sori san de na ini den ati trutru.Psalm 103:14.

 22 Yehovah sori a kefalek bigi koni fu en sosrefi na ini a bosroiti di a teki fu gebroiki Yesus leki Kownu. Yehovah kan frutrow a Manpikin fu en moro leki iniwan tra libisani na hemel èn na grontapu. Di Yesus ben de leki wan libisma na grontapu, a ben ondrofeni furu difrenti sortu tesi. A e frustan den problema fu libisma heri bun (Hebrewsma 5:7-9). Fa a de dan nanga den sma di o tiri makandra nanga Yesus? Na ini den yarihondro di pasa, man nanga uma fu ala folku, di e taki difrenti tongo, di kweki na difrenti fasi èn na difrenti presi, ben tron salfuwan. Den salfuwan disi miti ala sortu problema èn den ben man wini den alamala (Efeisesma 4:22-24). A sa de wan bigi prisiri fu libi na ondro a tiri fu den kownu-priester disi di sa tiri nanga sari-ati!

23. Sortu grani Kresten abi èn san dati abi fu du nanga a santa kibritori fu Yehovah?

23 Na apostel Paulus ben skrifi: „A santa kibritori di sma no ben sabi sensi den grontapu sistema fu fositen èn sensi a ten fu den fositen sma . . . kon na krin gi den santawan fu en” (Kolosesma 1:26). Iya, den salfu santawan fu Yehovah kon frustan furu sani fu a santa kibritori, èn den prati den sani di den ben kon sabi, nanga milyunmilyun sma. Fu tru, wi alamala abi wan bigi grani! Yehovah meki „wi kon sabi san na a santa kibritori di abi fu du nanga a wani fu en” (Efeisesma 1:9). Meki wi prati a tumusi moi kibritori disi nanga tra sma, fu di wi o yepi den fu luku go na ini a tumusi bigi koni fu Yehovah Gado!

^ paragraaf 17 ’A santa kibritori fu a dini di wan sma e dini Gado fayafaya’ ben kon na krin sosrefi na ini Yesus (1 Timoteyus 3:16). Na aksi efu iniwan sma ben sa man hori en soifri retifasi na Yehovah, ben de wan kibritori wan heri pisi ten. Yesus ben piki na aksi dati. A ben hori en soifri retifasi, awinsi sortu tesi Satan ben tyari kon na en tapu.Mateyus 4:1-11; 27:26-50.

^ paragraaf 20 Nanga a srefi grupu fu sma dati Yesus ben meki „wan frubontu . . . fu wan kownukondre” sosrefi (Lukas 22:29, 30). Te yu luku en bun, dan Yesus ben meki wan kontrakti nanga a „pikin ipi” disi fu tiri makandra nanga en na ini hemel leki sma di tron a di fu tu pisi fu a siri fu Abraham.Lukas 12:32.