Go na content

Go na a tra menu

Go na table of contents

Yehovah Kotoigi

Sranantongo

Yu kan abi wan koloku osofamiri

 PISI 2

Tai hori na makandra

Tai hori na makandra

„San Gado tyari kon na wán nowan sma musu prati.”Markus 10:9

Yehovah wani taki masra nanga wefi musu „tai hori na” makandra (Genesis 2:24). A sani disi de prenspari. Te den e du dati, dan den o frutrow makandra èn a lobi fu den o gro.

Na ini a ten disi, furu sani de di kan meki taki trowpatna no e tai hori moro na makandra. Efu yu no wani meki a sani disi miti yu, dan yu musu du den tu sani disi.

 1 SI YU TROWLIBI LEKI WAN PRENSPARI SANI

SAN BIJBEL E TAKI: „Sabi san na den moro prenspari sani” (Filipisma 1:10). A trowlibi fu yu na wan fu den moro prenspari sani na ini yu libi.

Yehovah wani taki yu e poti prakseri na yu patna èn taki unu e prisiri nanga makandra (Preikiman 9:9). A e sori krin taki noiti yu patna musu kisi a firi taki yu no abi ten gi en. Na presi fu dati un ala tu musu luku san unu kan du fu meki makandra firi koloku (1 Korentesma 10:24). Meki yu patna firi taki yu abi en fanowdu èn taki yu e warderi en.

SAN YU KAN DU:

  • Meki ten fu du sani makandra èn no meki noti kon na un mindri

  • Now di yu trow, yu no e taki „mi” moro, ma yu e taki „wi”

 2 KIBRI YU ATI

SAN BIJBEL E TAKI: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati” (Mateyus 5:28). Efu wan sma e tan prakseri den sortu sani disi di no fiti, dan yu kan taki dati a e bedrigi en patna.

Yehovah taki dati yu musu „kibri yu ati” (Odo 4:23; Yeremia 17:9). Fu man du disi, dan yu musu luku bun sortu sani yu e luku (Mateyus 5:29, 30). De neleki Yob di ben meki wan frubontu nanga en ai fu no luku wan tra uma nanga a prakseri fu abi seks nanga en (Yob 31:1). Abi a fasti bosroiti fu no luku porno noiti èn fu no kisi lobifiri gi wan sma di no de yu trowpatna.

SAN YU KAN DU:

  • Sori sma krin taki yu lobi yu trowpatna nanga yu heri ati

  • Hori na prakseri fa yu patna e firi. Efu yu si taki a matifasi di yu abi nanga wan sma e meki yu trowpatna firi fruferi, dan tapu a matifasi dati wantewante