Go na content

Go na a tra menu

Go na table of contents

Yehovah Kotoigi

Sranantongo

Yu kan abi wan koloku osofamiri

 PISI 5

Fa fu libi switi nanga den famiri fu yu

Fa fu libi switi nanga den famiri fu yu

„Un musu abi . . . bun-ati, sakafasi, safri-ati, nanga pasensi.”Kolosesma 3:12

Te tu sma trow, dan den seti wan nyun osofamiri. A no de fu taki dati yu o tan lobi yu papa nanga mama. Ma now yu trowpatna tron a moro prenspari sma na grontapu gi yu. Kande son famiri fu yu feni en muilek fu frustan a sani disi. Ma den rai fu Bijbel kan yepi yu fu si sani na a yoisti fasi. Den kan yepi yu fu libi switi nanga den famiri fu yu, aladi yu e du muiti fu meki sani waka bun na ini yu nyun osofamiri.

 1 FA YU MUSU SI DEN FAMIRI FU YU

SAN BIJBEL E TAKI: „Lespeki un papa nanga un mama” (Efeisesma 6:2). Awansi omeni yari yu abi, toku yu musu tan lespeki yu papa nanga mama. Hori na prakseri taki yu trowpatna abi wan mama nanga papa tu èn taki a musu poti prakseri na den. „Lobi no e dyarusu”, sobun no dyarusu te yu patna de bun nanga en famiri.1 Korentesma 13:4; Galasiasma 5:26.

SAN YU KAN DU:

  • No taki sani soleki: „Ala ten yu famiri e taki takru fu mi” noso „Noiti yu mama lobi san mi e du”

  • Pruberi fu frustan fa yu patna e si a tori

 2 TAKI SANI KRIN TE A DE FANOWDU

SAN BIJBEL E TAKI: „Wan man o gowe libi en papa nanga en mama. A o tai hori na en wefi èn den o tron wán skin” (Genesis 2:24). Te yu trow, dan yu papa nanga mama kan feni taki na den musu teki bosroiti gi yu ete. Kande den wani bumui tumusi na ini yu trowlibi.

Ma na yu nanga yu patna musu bosroiti o fara den kan go èn un musu taigi den dati na wan switi fasi. Yu kan taki sani krin sondro fu taki grofu (Odo 15:1). Sakafasi, switifasi nanga pasensi o yepi yu fu libi switi nanga yu famiri èn fu tan ’lobi èn frudrage makandra’.Efeisesma 4:2.

SAN YU KAN DU:

  • Efu yu feni taki den famiri e bumui tumusi na ini un libi, dan taki a tori nanga yu patna te un ati kowru

  • Unu ala tu musu agri fa unu o lusu a problema