Go na content

Go na a tra menu

Go na table of contents

Yehovah Kotoigi

Sranantongo

Yu kan abi wan koloku osofamiri

 PISI 1

Meki Gado yepi yu fu abi wan koloku trowlibi

Meki Gado yepi yu fu abi wan koloku trowlibi

„A sma di meki den na a bigin, meki wan man nanga wan uma.”Mateyus 19:4

Yehovah * Gado trow a fosi man nanga uma. Bijbel e taigi wi taki a meki a fosi uma èn a ’tyari en go na a man’. Adam ben breiti so te taki a taki: „Ai, disi na trutru bonyo fu mi bonyo. Èn skin fu mi skin” (Genesis 2:22, 23). Te now ete Yehovah wani taki sma di trow musu de koloku.

Te yu trow, dan yu e denki kande taki ala sani o go heri bun. Ma fu taki en leti, srefi masra nanga wefi di lobi makandra trutru o kisi problema son leisi (1 Korentesma 7:28). Na ini a brochure disi yu o feni rai fu Bijbel. Efu yu fiti den rai disi, dan yu trowlibi èn yu osofamiri o de koloku.Psalm 19:8-11.

 1 TYARI A FRANTWORTU DI YEHOVAH GI YU

SAN BIJBEL E TAKI: Wan masra na a ede fu na osofamiri.Efeisesma 5:23.

Masra: Yehovah wani taki yu sorgu yu wefi na wan lobi-ati fasi (1 Petrus 3:7). A meki yu wefi leki wan yepi gi yu èn a wani taki yu musu warderi en èn lobi en (Genesis 2:18). Yu musu lobi yu wefi so furu, taki yu musu de klariklari fu plisi en na presi fu plisi yusrefi.Efeisesma 5:25-29.

Wefi: Yehovah wani taki yu abi furu lespeki gi yu masra èn taki yu e yepi en fu tyari en frantwortu (1 Korentesma 11:3; Efeisesma 5:33). Horibaka gi den bosroiti di a e teki èn yepi en nanga yu heri ati (Kolosesma 3:18). Te yu du disi, dan yu masra o breiti nanga yu èn Yehovah o breiti nanga yu tu.1 Petrus 3:1-6.

SAN YU KAN DU:

  • Aksi yu trowpatna san yu kan du fu tron wan moro bun patna. Arki bun san a e taki èn du san yu man fu de wan moro bun patna

  • Abi pasensi. A o teki ten fosi un ala tu kon sabi fa fu meki makandra koloku

2 HORI DEN FIRI FU YU PATNA NA PRAKSERI

SAN BIJBEL E TAKI: Yu musu poti prakseri na den sani di yu patna abi fanowdu (Filipisma 2:3, 4). Warderi yu patna èn hori na prakseri taki Yehovah wani taki den futuboi fu en musu sori „switifasi gi ala sma” (2 Timoteyus 2:24). Te ’sma e taki sani sondro fu denki, dan a de neleki na dyuku den e dyuku trawan nanga wan feti-owru, ma a tongo fu den koniwan na dresi’. Dati meki yu musu denki bun fosi yu taki (Odo 12:18). Yehovah en yeye o yepi yu fu taki na wan switi fasi èn na wan lobi-ati fasi.Galasiasma 5:22, 23; Kolosesma 4:6.

SAN YU KAN DU:

  • Fosi yu nanga yu patna taki fu wan seryusu tori, dan begi Yehovah fu yepi yu so taki yu man hori yusrefi èn so taki yu kan de klariklari fu arki

  • Prakseri bun san yu o taki èn fa yu o taki en

 3 DENKI LEKI WÁN MAN

SAN BIJBEL E TAKI: Te yu trow, dan yu nanga yu patna e tron „wán skin” (Mateyus 19:5). Ma toku unu na tu difrenti sma èn a kan taki unu e si sani na difrenti fasi. Sobun, un musu leri fu kon abi wán denki (Filipisma 2:2). A prenspari fu agri nanga makandra te unu e teki bosroiti. Bijbel e taki: „Rai fu trawan o yepi yu fu du san yu abi na prakseri” (Odo 20:18). Gebroiki den rai fu Bijbel te unu e teki prenspari bosroiti.Odo 8:32, 33.

SAN YU KAN DU:

  • No fruteri yu patna nomo san yu e denki, ma meki a sabi tu fa yu e firi

  • Taki nanga yu trowpatna fosi yu teki prenspari bosroiti

^ paragraaf 4 Yehovah na a nen fu Gado soleki fa Bijbel e sori.

Kon sabi moro

A WAKTITOREN

Un masra—Meki yu frow firi taki yu lobi en

Wan osofamiri kan de sondro moni problema, aladi den no e firi taki lobi no de na den mindri.