Go na content

Go na a tra menu

Go na table of contents

Yehovah Kotoigi

Sranantongo

Yu kan abi wan koloku osofamiri

 PISI 7

Fa fu gi yu pikin leri

Fa fu gi yu pikin leri

„Den sani di mi e taigi unu tide, musu de na ini un ati. Un musu leri un pikin den sani disi ibri tron baka, so taki den no frigiti den.”Deuteronomium 6:6, 7

Di Yehovah seti a trowlibi a gi papa nanga mama a frantwortu fu sorgu den pikin (Kolosesma 3:20). Na unu abi a frantwortu fu leri un pikin fu lobi Yehovah èn fu tron bigisma di e tyari densrefi bun (2 Timoteyus 1:5; 3:15). Un musu kon sabi tu san de na ini na ati fu un pikin. Ma un srefi musu de wan bun eksempre tu. Soso te a Wortu fu Yehovah de na ini un ati, unu o man gi un pikin leri fu Yehovah.Psalm 40:8.

 1 SORGU TAKI YU PIKIN NO FREDE FU TAKI NANGA YU

SAN BIJBEL E TAKI: „Ibriwan sma musu de gaw fu yere. A no musu de gaw fu taki” (Yakobus 1:19). Meki yu pikin firi taki den kan kon taki nanga yu ala ten. Den musu sabi taki yu de klariklari fu arki den te den wani taki nanga yu. Efu yu oso na wan presi pe freide de, dan a o makriki gi den pikin fu yu fu taki fa den e firi (Yakobus 3:18). Efu den e denki taki yu o bari den noso taki yu o krutu den fosi den kaba taki, dan den no o fruteri yu ala sani. Abi pasensi nanga yu pikin, èn abi a gwenti fu taigi den taki yu lobi den.Mateyus 3:17; 1 Korentesma 8:1.

SAN YU KAN DU:

  • Meki ten gi yu pikin te den wani taki nanga yu

  • Abi a gwenti fu taki nanga yu pikin, no wakti teleki den abi problema

2 PRUBERI FU FRUSTAN FA DEN E FIRI

SAN BIJBEL E TAKI: „A sma di man si a dipi fu wan tori o feni bun” (Odo 16:20). Son leisi yu no musu arki nomo san den pikin fu yu e taki, ma yu musu pruberi fu frustan fa den e firi trutru. Te yongusma e taki, dan nofo tron den e meki wan sani moro bigi leki fa a de. Noso den e taki wan hati sani aladi na ini den ati den no e firi so. „Te wan sma e gi piki fosi a yere wan tori, dan dati na wan don sani fu du” (Odo 18:13). No mandi esi.Odo 19:11.

SAN YU KAN DU:

  • Awinsi san den pikin fu yu taki, no koti den mofo èn no rigeri nanga den

  • Pruberi fu memre fa yu ben e firi di yu ben yongu leki den èn sortu sani ben prenspari gi yu

 3 TEKI BOSROITI LEKI WÁN MAN

SAN BIJBEL E TAKI: „Mi manpikin, gi yesi na a leri di yu papa e gi yu èn no drai baka gi a wèt fu yu mama” (Odo 1:8). Yehovah gi papa nanga mama a frantwortu fu sorgu gi den pikin. Un musu leri un pikin fu lespeki unu èn fu gi yesi (Efeisesma 6:1-3). Pikin-nengre kan si te den papa nanga mama no ’abi wán denki’ (1 Korentesma 1:10). Efu unu no e agri nanga makandra fu wan tori, dan no taki dati na fesi den pikin fu unu fu di a sani disi kan meki taki den lasi lespeki gi unu.

SAN YU KAN DU:

  • Taki nanga makandra èn bosroiti fa unu o gi un pikin piri-ai

  • Efu yu patna abi wan tra denki fu a fasi fa den pikin musu kisi leri, dan pruberi fu frustan fu san ede a e denki so

 4 BOSROITI SAN UNU O DU

SAN BIJBEL E TAKI: „Leri wan boi fu waka a yoisti pasi” (Odo 22:6). Den pikin fu yu no o kisi bun maniri fu densrefi. Un musu bosroiti na fesi fa unu o gi un pikin leri èn fa unu o gi den piri-ai (Psalm 127:4; Odo 29:17). Disi no wani taki nomo dati yu e strafu den pikin, ma yu musu leri den tu fu san ede yu poti son wet gi den (Odo 28:7). Leri den tu fu lobi a Wortu fu Yehovah èn fu frustan fa den kan gebroiki den rai fu Bijbel (Psalm 1:2). Disi o yepi den fu sabi san bun èn san no bun.Hebrewsma 5:14.

SAN YU KAN DU:

  • Meki den pikin fu yu si Gado leki wan Mati di den kan frutrow

  • Yepi den fu si sortu sani kan pori a matifasi di den abi nanga Gado, soleki son sani tapu Internet. Leri den tu fa den musu wai pasi gi den sani dati. Leri den fu luku bun nanga sma di wani abi seks nanga pikin-nengre

„Leri wan boi fu waka a yoisti pasi”

Kon sabi moro

A WAKTITOREN

Fa yu musu gi yu pikin piri-ai?

Bijbel e taki fu dri fasi fa wi kan gi piri-ai na a yoisti fasi.