Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 KAPITEL 10

A trowlibi na wan kado di wi kisi fu a Gado di lobi wi

A trowlibi na wan kado di wi kisi fu a Gado di lobi wi

„Dri titei di frekti kon na wán, no man hari koti na tu makriki.”​—PREIKIMAN 4:12.

1, 2. (a) San wi kan aksi wisrefi son leisi te tu sma e trow, èn fu san ede? (b) Sortu aksi wi o luku na ini a kapitel disi?

YU LOBI go na trowfesa? Furu sma lobi a sani dati, fu di den okasi dati kan gi sma furu prisiri. Yu e si a trowpaar na ini den moi krosi fu den. Ma yu e si tu fa den breiti! A dei disi den e firi koloku trutru, èn a gersi leki ala sani o waka bun gi den.

2 Ma toku, wi musu agri taki na ini a ten disi furu trowlibi no e waka bun kwetikweti. Aladi wi e winsi taki sani e waka bun gi wan nyun trowpaar, toku wi kan aksi wisrefi son leisi: ’Den sma disi o de koloku? Den o tan na makandra?’ A no de fu taki dati sani o waka bun te a masra nanga en wefi e frutrow tapu den rai di Gado e gi trowpatna èn te den e gi yesi na den rai dati. (Leisi Odo 3:5, 6.) Den musu du dati efu den wani taki Gado tan lobi den. Meki wi go luku a piki di Bijbel e gi tapu den fo aksi disi: Fu san ede yu ben o wani trow? Efu yu o trow, dan sortu trowpatna yu musu teki? Fa yu kan sreka yusrefi gi a trowlibi? San kan yepi wan trowpaar fu tan abi wan koloku trowlibi?

FU SAN EDE YU BEN O WANI TROW?

3. Fu san ede a no ben o de wan koni sani te sma e trow fu lawlaw reide?

3 Son sma e bribi taki wan sma no man de koloku efu  a no trow. A sani dati no tru kwetikweti! Yesus, di no ben trow, ben sori taki sma di no trow kisi wan warti sani fu Gado. Dati meki a gi sma di ben man tan sondro fu trow, deki-ati fu du dati (Mateyus 19:11, 12). Na apostel Paulus ben taki tu fu den wini di a e tyari kon te wan sma no trow (1 Korentesma 7:32-38). Ma Yesus nanga Paulus no ben taki dati sma no mag trow. Fu taki en leti, Bijbel e taki dati a tapu di sma e tapu trawan fu trow na wan fu den „leri fu ogri yeye” (1 Timoteyus 4:1-3). Ma toku, den wan di no trow èn di wani anbegi Yehovah sondro taki sani e puru den prakseri, o kisi furu wini. Dati meki a no ben o de wan koni sani efu wan sma ben o trow fu wan lawlaw reide, kande fu di trawan e dwengi en fu du dati.

4. Fu san ede wan bun trowlibi de fanowdu fu man kweki pikin bun?

4 Ma wan sma kan abi bun reide fu trow. Iya, a trowlibi na wan kado di wi kisi fu a Gado di lobi wi. (Leisi Genesis 2:18.) Sobun, a trowlibi kan tyari furu wini kon gi wi, èn wi kan de koloku tu. Fu eksempre, wan bun trowlibi prenspari fu man abi wan koloku osofamiri-libi. Pikin-nengre musu gro kon bigi na ini wan osofamiri pe sani e waka bun, pe a papa nanga a mama fu den e sori lobi gi den, èn pe den e kisi bun leri nanga rai (Psalm 127:3; Efeisesma 6:1-4). Ma sma no e trow soso fu di den wani kisi pikin.

5, 6. (a) Soleki fa Preikiman 4:9-12 e sori, dan sortu wini a e tyari kon te tu sma de bun mati fu makandra? (b) Fa wan trowlibi kan de leki dri titei di frekti kon na wán?

5 Poti prakseri na a tekst na a bigin fu a kapitel disi, èn na den vers na fesi: „Tu sma moro bun leki wán, bika den e feni wan pai gi a tranga wroko fu den. Efu wan fu den ben o fadon, dan a trawan kan opo en patna. Ma  san o pasa te a wan e fadon, ma wan trawan no de fu opo en? Boiti dati, efu tu sma e didon nanga makandra, dan den kan kon waran. Ma fa wán sma nomo kan tan waran? Kande wan sma ben kan basi wan trawan di de en wawan. Ma te tu sma ben o de, dan den ben o man feti nanga en. Dri titei di frekti kon na wán, no man hari koti na tu makriki.”​—Preikiman 4:9-12.

6 Na a fosi presi, den tekst disi e sori sortu wini a e tyari kon te wi abi mati. A no de fu taki dati sma di trow, na bun mati fu makandra. Soleki fa den tekst disi e sori, dan trowpatna kan yepi makandra, den kan trowstu makandra, èn den kan kibri makandra gi ogri. Ma a trowlibi o waka moro bun te den tu sma disi abi ete wan sani di kan yepi den. Te tu titei frekti kon na wán, dan sma kan hari den koti makriki. Ma te dri titei frekti kon na wán, dan a moro muilek fu hari den koti. Te masra nanga wefi e si en leki wan tumusi prenspari sani fu du a wani fu Yehovah, dan a trowlibi fu den o de leki den dri titei dati di frekti kon na wán. Fu di Yehovah prenspari srefisrefi na ini a trowlibi disi, meki a trowlibi o waka bun seiker.

7, 8. (a) Sortu rai Paulus ben gi Kresten di no trow èn di no man basi den seks firi fu den? (b) Fa Bijbel e yepi wi fu si sani na a yoisti fasi te a abi fu du nanga a trowlibi?

7 Boiti dati, na ini a trowlibi wawan a fiti taki sma abi seks nanga makandra. Te trowpatna abi seks nanga makandra, dan dati na wan sani di e gi den prisiri trutru (Odo 5:18). Awinsi wan sma di no trow pasa a ten te den seks firi fu en tranga srefisrefi, toku a kan muilek ete gi en fu basi den firi disi. Efu a no e basi den firi disi, dan dati kan meki taki a e tyari ensrefi na wan fasi di no fiti. Nanga yepi fu santa yeye Paulus skrifi a rai disi gi sma di no trow: „Efu den no man hori densrefi, dan meki den  trow, bika a moro bun fu trow leki fu meki tranga lostu moro den.”​—1 Korentesma 7:9, 36; Yakobus 1:15.

8 Awansi sortu reide wan sma abi fu trow, a bun te a e si sani na a yoisti fasi. Soleki fa Paulus ben taki, dan den sma di e trow „o kisi banawtu na ini den libi” (1 Korentesma 7:28). Sma di trow e kisi problema di sma di no trow no e kisi. Ma efu yu e bosroiti fu trow, dan fa yu kan sorgu taki den blesi furu moro den problema di yu o kisi? Wan sani di o yepi yu, na te yu suku wan bun trowpatna.

SAN NA WAN BUN TROWPATNA?

9, 10. (a) Sortu agersitori Paulus gebroiki fu sori fu san ede a no bun fu de wán nanga sma di no e anbegi Yehovah? (b) San o de a bakapisi te wan sma e trangayesi a rai di Gado gi fu no trow nanga wan sma di no e anbegi Yehovah?

9 Nanga yepi fu santa yeye, Paulus skrifi a prenspari sani disi di wi musu hori na prakseri te wi e suku wan trowpatna. A ben skrifi: „No kon de wán nanga sma di no de na bribi.” Na ini Grikitongo a tekst disi e taki: „No kon na ondro a srefi tyatyari nanga sma di no de na bribi” (2 Korentesma 6:14). Sma di ben e du gronwroko sabi na agersitori di Paulus gebroiki heri bun. Efu sma e poti tu meti di no bigi noso di no tranga a srefi na ondro wán tyatyari, dan ala tu meti o pina. Na so a de tu taki te wan anbegiman fu Gado e trow nanga wan sma di no e anbegi Gado, dan a no de fu taki dati den o kisi problema. Efu wan fu den patna wani taki Yehovah tan lobi en aladi a trawan no e broko en ede nanga a sani dati, dan den no o man frustan makandra. A sani disi kan tyari furu problema kon. Dati meki Paulus gi Kresten a rai fu trow „soso nanga wan sma di de wan bakaman fu Masra”.​—1 Korentesma 7:39.

 10 Son Kresten di no trow, feni taki a moro bun te den trow nanga wan sma di no e anbegi Gado, leki fu tan firi leki den de den wawan. Son Kresten e bosroiti fu trangayesi a rai di Bijbel e gi, èn den e trow nanga wan sma di no e dini Yehovah. Nofo tron, sani no e waka bun gi den sma disi. Te fu kaba, den e kon si taki den abi wan trowpatna, ma den no man taki nanga en fu den moro prenspari sani na ini a libi. A sani disi o meki a sma disi firi leki a de en wawan, ma a firi disi o moro tranga leki fosi a ben trow. Ma koloku taki dusundusun Kresten di no trow e gi yesi na a rai fu Gado te a abi fu du nanga a trowlibi. (Leisi Psalm 32:8.) Aladi den e howpu taki wan dei o kon pe den o trow, toku den e tan den wawan teleki den feni wan trowpatna di e anbegi Yehovah Gado.

11. San kan yepi yu fu teki wan bun trowpatna? (Luku sosrefi a faki „ Sortu sani mi musu luku te mi e suku wan patna?”)

11 Ma a no fu di wan sma e anbegi Yehovah, dan dati wani taki dati a de wan bun trowpatna. Efu yu e prakseri fu trow, dan suku wan sma di abi den fasi di yu lobi, di e suku fu go na fesi na ini a tru anbegi, èn di lobi Gado nanga en heri ati. A koni srafu di de fu frutrow tyari furu artikel kon na doro di e taki fu den tori disi, èn a ben o bun fu begi Gado fu yepi yu fu gi yesi na den rai dati. Na so yu o sabi san na a yoisti sani fu du te yu musu teki a prenspari bosroiti disi. *​—Leisi Psalm 119:105.

12. Sortu gwenti de na ini furu kondre, èn sortu Bijbel eksempre e yepi na ini a tori disi?

12 Na ini furu kondre, a gwenti de taki papa nanga mama e suku wan trowpatna gi a pikin fu den. Na ini den sortu kulturu dati, ala sma e agri taki papa nanga  mama abi nofo koni nanga ondrofeni fu teki so wan prenspari bosroiti. Nofo tron, den sortu trowlibi disi e waka bun, neleki fa a ben de na ini Bijbel ten. Na eksempre fu Abraham di ben seni a futuboi fu en fu go suku wan wefi gi Isak, kan yepi papa nanga mama na ini a ten disi di e suku wan trowpatna gi a pikin fu den. Abraham no ben e broko en ede nanga moni èn nanga biginen. Na presi fu dati, a du ala muiti fu feni wan frow gi Isak, èn a frow disi ben musu de wan anbegiman fu Yehovah. *​—Genesis 24:3, 67.

FA YU KAN SREKA YUSREFI GI A TROWLIBI?

13-15. (a) Fa a gronprakseri na Odo 24:27 kan yepi wan yonkuman di e prakseri fu trow? (b) San wan yongu uma kan du fu sreka ensrefi gi a trowlibi?

13 Efu yu e prakseri fu trow, dan a ben o bun fu aksi yusrefi: ’Mi de srekasreka gi a trowlibi?’ A no a fasi fa yu e denki fu lobi, fu seks, fu a trowlibi, noso fu pikin, e sori efu yu de srekasreka gi a trowlibi. Ma wan man nanga wan uma di wani trow, musu hori na prakseri taki a trowlibi e tyari wan tu frantwortu kon.

14 Wan yonkuman di e suku wan wefi musu denki dipi fu a gronprakseri disi: „Seti sani fu man du a wroko di yu abi fu du na dorosei èn sreka a gron fu yu. Baka dati yu musu seti yu osofamiri tu” (Odo 24:27). San disi wani taki? Na ini Bijbel ten, a ben de so taki efu wan man ben wani trow fu seti wan osofamiri, dan a ben musu aksi ensrefi: ’Mi de srekasreka fu sorgu gi wan wefi  èn gi den pikin di wi o kisi kande?’ A man disi ben musu wroko fosi, iya, a ben musu sorgu gi den sani di a ben prani. Na ini a ten disi, wan man di wani trow musu hori ensrefi tu na a gronprakseri disi. Solanga a man wroko, a o abi fu wroko. Gado Wortu e sori taki te wan man no e sorgu gi en osofamiri, te a no e meki ten gi den, èn te a no e studeri nanga den, dan a man dati takru moro wan sma di no e bribi!​—Leisi 1 Timoteyus 5:8.

15 Wan uma di wani trow musu de klariklari fu teki wan tu hebi frantwortu na en tapu. Bijbel e taki fu wan tu sani di wan uma musu man du èn fu wan tu fasi di a musu abi fu man yepi en masra fu sorgu gi na osofamiri (Odo 31:10-31). Man nanga uma di e hasti densrefi fu trow sondro fu sreka densrefi gi den frantwortu di o kon na den tapu, e denki densrefi nomo. Fu taki en leti, den no e prakseri fa den kan de wan bun patna gi a sma di o tron a trowpatna fu den. Ma san moro prenspari, na taki sma di e prakseri fu trow, musu man hori densrefi na Bijbel gronprakseri.

16, 17. Fu sortu Bijbel gronprakseri sma di wani trow musu denki dipi?

16 Wan sma di wani trow, musu denki dipi fu a frantwortu di Gado gi masra nanga wefi. Wan man musu sabi san a wani taki fu de edeman fu wan Kresten osofamiri. A frantwortu disi, no e gi en a reti fu tanteri na osofamiri fu en. Na presi fu dati, a musu teki na eksempre fu Yesus te a e tyari a frantwortu fu en leki edeman fu na osofamiri (Efeisesma 5:23). Wan Kresten uma musu frustan tu san na a moi frantwortu di a abi leki wefi. A o de klariklari fu saka ensrefi na ondro „den wèt fu en masra”? (Romesma 7:2) A e saka ensrefi kaba na ondro a wet fu Yehovah nanga Krestes (Galasiasma 6:2). A frantwortu di a masra fu en abi na ini na osofamiri, na wan  tra wet. A o horibaka gi a masra fu en di de wan sondu sma? A o saka ensrefi na en ondro? Efu a no wani du dati, dan a no musu trow.

17 Boiti dati, ibriwan fu den trowpatna musu hori den firi fu a trawan na prakseri. (Leisi Filipisma 2:4.) Paulus ben skrifi: „Meki ibriwan fu unu lobi en wefi leki fa a lobi ensrefi. Na a tra sei, a wefi musu abi bigi lespeki gi en masra.” Nanga yepi fu a santa yeye, Paulus ben frustan taki wan man musu man firi taki a wefi fu en abi bigi lespeki gi en, èn a wefi musu man firi taki en masra lobi en.​—Efeisesma 5:21-33.

Furu sma di e hori nanga makandra e teki a koni bosroiti fu meki ete wan sma de makandra nanga den

18. Fu san ede tu sma di e hori nanga makandra musu leri fu dwengi densrefi?

18 Dati meki te tu sma e hori nanga makandra, dan dati a no soso fu meki prisiri. Na a ten dati a man nanga na uma musu leri sabi makandra bun, fu man si efu a ben o de wan koni sani fu trow nanga makandra. Na a ten dati, den musu leri fu dwengi densrefi! Kande den abi a tranga firi fu freiri nanga makandra. Fu taki en leti, ala sma kan abi den firi dati. Ma te wan sma lobi wan trawan trutru, dan a no o wani du nowan enkri sani di kan pori a matifasi di a lobiwan fu en abi nanga Gado (1 Tesalonikasma 4:6). Sobun, efu yu e hori nanga wan sma, dan yu musu leri fu dwengi yusrefi. Yu o kisi wini fu a sani disi yu heri libi langa, awansi yu trow noso awansi yu no trow.

FA YU KAN MEKI A TROWLIBI FU YU TAN WAKA BUN?

19, 20. Gi wan eksempre di e sori fa Kresten no musu si a trowlibi?

19 Efu wan trowpaar wani taki a trowlibi fu den tan waka bun, dan den musu abi a yoisti denki fu a trowlibi.  Fu taki en leti, a trowlibi a no a kaba fu wan sani, ma na a bigin fu wan sani di Yehovah seti, èn a sani dati musu tan fu ala ten (Genesis 2:24). A sari fu taki dati furu sma na ini a ten disi no e denki so fu a trowlibi. Na ini son kulturu, sma e agersi a trowlibi nanga „a tai di sma e tai tu titei kon na wán”. Kande den sma disi no sabi taki a sani dati e sori krin fa furu sma e si a trowlibi. Fa so? We, te yu tai wan sani nanga wan titei, dan yu musu man lusu en baka te yu wani.

 20 Furu sma na ini a ten disi e si a trowlibi leki wan sani di de fu wan pisi ten nomo. Den e hasti densrefi fu trow, fu di den e denki taki den o feni san den abi fanowdu, ma te sani no e waka bun, dan den feni taki den musu man broko trow wantewante. No frigiti taki Bijbel e agersi a trowlibi nanga wan titei. Titei di meki gi sipi, meki na so wan fasi, taki den e tan bun, èn awansi bigi winti e wai, toku den no e koti. A trowlibi na wan seti tu di meki fu tan, awansi problema e kon. Ma memre san Yesus ben taki: „San Gado tyari kon na wán nowan sma musu prati” (Mateyus 19:6). Efu yu o trow, dan yu musu si a trowlibi na a srefi fasi dati. A sani disi wani taki dati a trowlibi na wan hebi? Kwetikweti.

21. Fa masra nanga wefi musu tan denki fu makandra, èn san kan yepi den fu du dati?

21 Wan masra nanga en wefi musu tan denki bun fu makandra. Efu ibriwan fu den e poti prakseri na den bun fasi fu a trawan èn na a muiti di a e meki, dan den o firi prisiri èn den o de koloku. Wan sma kan tan denki bun fu a trowpatna fu en di abi sondu? We, aladi Yehovah sabi heri bun taki wi abi fowtu, toku wi abi a frutrow taki a e tan denki bun fu wi. A psalm skrifiman ben aksi: „Ke Yah, Yehovah, efu na fowtu yu ben e luku, dan suma ben o man tanapu na yu fesi?” (Psalm 130:3) Masra nanga wefi musu denki bun fu makandra tu, èn den musu de klariklari fu gi makandra pardon.​—Leisi Kolosesma 3:13.

22, 23. Fa Abraham nanga Sara de wan bun eksempre gi trowpaar na ini a ten disi?

22 Te trowpatna e tan horidoro na ini a trowlibi, dan te fu kaba den o de moro koloku èn den o abi moro  prisiri. Bijbel e taki fu a trowlibi fu Abraham nanga Sara na a ten di den ben owru kaba. A libi fu den no ben de sondro problema kwetikweti. Sara ben musu gowe libi a moi oso fu en na ini a gudu foto Ur, fu go tan na ini tenti en heri libi langa. Prakseri fa Sara di ben kan abi sowan 60 yari na a ten dati, ben musu fu firi. Toku a saka ensrefi na en masra ondro. A ben de wan bun patna gi Abraham, èn a ben e horibaka gi en na wan lespeki fasi te a ben e teki bosroiti. A no ben e saka ensrefi na en ondro soso fu di a ben musu du dati. Srefi na ini en ati, a ben e kari Abraham en masra (Genesis 18:12; 1 Petrus 3:6). Sara ben e lespeki Abraham nanga en heri ati.

23 Ma a sani disi no wani taki dati ala ten Abraham nanga Sara ben e denki a srefi. Wan leisi, Sara taigi Abraham wan sani, èn Abraham „mandi” na en tapu. Ma Yehovah taigi Abraham fu arki a wefi fu en, èn Abraham du dati nanga sakafasi. A sani dati tyari blesi kon gi na osofamiri fu den (Genesis 21:9-13). Masra nanga wefi na ini a ten disi, srefi den wan di trow omeni tenti yari kaba, kan leri furu fu den tu sma disi di ben lobi Gado.

24. O ten a trowlibi e gi Yehovah Gado grani, èn fu san ede?

24 Na ini a Kresten gemeente, furu dusundusun trowpaar de di abi wan koloku trowlibi. Den wefi e lespeki den masra, den masra lobi den wefi èn den e gi den grani. Boiti dati, den ala tu e du muiti fu poti a wani fu Yehovah na a fosi presi na ini den libi. Efu yu e bosroiti fu trow, dan a bun fu suku wan bun patna, sreka yusrefi bun gi a trowlibi, du muiti fu libi na ini freide nanga yu patna, èn sori lobi gi en. Dan a trowlibi fu yu o gi Yehovah Gado grani èn A o tan lobi yu.

^ paragraaf 11 Luku kapitel 2 fu a buku A sroto gi wan kolokoe osofamiri, di Yehovah Kotoigi tyari kon na doro.

^ paragraaf 12 Son reti-ati famiri-edeman ben abi moro leki wán wefi. Di Yehovah ben e tiri den famiri-edeman nanga a pipel Israel, dan a gi pasi taki den teki moro leki wán trowpatna. Aladi Yehovah no ben seti sani so, toku a sorgu taki sani ben e waka na wan orga fasi. Ma Kresten e hori na prakseri taki Yehovah no e gi pasi moro taki den anbegiman fu en abi moro leki wán trowpatna.​—Mateyus 19:9; 1 Timoteyus 3:2.