Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 KAPITEL 17

„Meki a santa bribi fu unu yepi unu fu kon moro tranga”

„Meki a santa bribi fu unu yepi unu fu kon moro tranga”

„Meki a santa bribi fu unu yepi unu fu kon moro tranga . . . Te unu e du dati, dan Gado o tan lobi unu.”​—YUDAS 20, 21.

1, 2. San wi musu du fu kon tranga èn gosontu, èn fu san ede a sani dati prenspari?

WI ALAMALA wani de gosontu, wi no wani taki wi skin kon swaki. Ma efu wi wani kon tranga èn gosontu, dan wi musu nyan bun èn wi musu tan oefen wi skin. Wi musu meki furu muiti fu tan gosontu. Toku wi no e weri fu du dati, fu di wi sabi taki dati bun gi wi. Ma wi musu kon tranga èn gosontu na wan tra fasi tu. Sortu fasi na dati?

2 A disipel Yudas ben taki fu a sani dati di a gi Kresten a rai disi: „Meki a santa bribi fu unu yepi unu fu kon moro tranga . . . Te unu e du dati, dan Gado o tan lobi unu” (Yudas 20, 21). San yu kan du fu meki a bribi fu yu kon moro tranga, so taki Gado kan tan lobi yu? Meki wi go luku dri prenspari sani di wi musu du.

TAN BRIBI TAKI DEN WET FU YEHOVAH BUN GI YU

3-5. (a) Fa Satan wani taki yu musu denki fu den wet fu Yehovah? (b) Fa wi musu denki fu den wet fu Gado, èn fa dati o meki wi firi? Gi wan agersitori.

3 Na a fosi presi, wi musu bribi na ini den wet fu  Gado. Di yu ben e studeri a buku disi, dan yu kon si fa Yehovah wani taki wi musu tyari wisrefi. Fa yu feni den sani di Yehovah e aksi fu yu? Satan wani kori yu fu bribi taki den wet, den gronprakseri, nanga tra sani di Yehovah e aksi fu yu, hebi tumusi gi yu. Sensi na ini Eden, di Satan si taki a triki disi e wroko bun, a tan gebroiki en teleki now (Genesis 3:1-6). A o man kisi yu nanga a triki disi? A no o man du dati te yu e si sani na a yoisti fasi.

4 Luku na agersitori disi: Yu e koiri na wan moi presi, èn yu e si wan hei skotu di tapu wan pisi fu a presi. Den sani di yu e si baka a skotu moi srefisrefi. Kande yu e denki taki a skotu e tapu pasi gi yu fu go na a moi presi. Ma te yu e luku moro bun, dan yu e si fa wan lew e onti tra meti! Now yu e frustan fu san ede a skotu de drape. A de fu kibri sma gi a lew. Wan ogri meti e suku fu du ogri nanga yu nownowde? Gado Wortu e gi wi a warskow disi: „Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.”​—1 Petrus 5:8.

5 Satan de leki wan ogri meti di e suku fu kisi wi. Fu di Yehovah no wani taki Satan kisi wi, meki a poti wet di e kibri wi gi den someni „triki” fu na ogriwan disi (Efeisesma 6:11). Sobun, te wi e denki dipi fu den wet fu Gado, dan wi o si taki wi hemel Tata gi wi den wet disi fu di a lobi wi. Te wi e denki so fu den wet fu Gado, dan wi o frustan taki den wet disi na fu kibri wi èn na fu yepi wi fu de koloku. A disipel Yakobus ben skrifi: „Efu wan sma e  luku finifini san skrifi na ini a wèt di bun srefisrefi èn di e meki sma kon fri èn a e tan du dati, dan a . . . o de koloku.”​—Yakobus 1:25.

6. San na a moro bun fasi fa yu kan kon abi moro bribi na ini den wet nanga den gronprakseri fu Gado? Gi wan eksempre.

6 Te wi e hori wisrefi na den wet fu Gado, dan dati na a moro bun fasi fa wi kan kon abi moro bribi na ini a sma di meki den wet. Wi o si tu taki den wet fu en bun. Fu eksempre, wan fu den sani fu „a wet fu Krestes”, na taki wi musu leri sma ’ala san a taigi wi fu du’ (Galasiasma 6:2; Mateyus 28:19, 20). Kresten e hori densrefi tu na a komando fu tan kon makandra fu anbegi Gado èn fu gi makandra deki-ati (Hebrewsma 10:24, 25). Yehovah wani tu taki wi abi a gwenti fu begi en doronomo èn fu du dati nanga wi heri ati (Mateyus 6:5-8; 1 Tesalonikasma 5:17). Te wi e du den sani dati, dan wi e si moro krin taki Yehovah gi wi den komando disi fu di a lobi wi. Te wi e gi yesi na den, dan wi o de koloku. Nowan tra sani na ini na ogri grontapu disi kan meki wi firi so koloku. Te yu e prakseri den wini di yu kisi fu di yu hori yusrefi na den wet fu Gado, dan yu o bribi moro tranga taki den wet fu en bun.

7, 8. Fa Gado Wortu e trowstu den wan di e broko den ede taki den no o man tan gi yesi na den wet fu Yehovah?

7 Son sma e broko den ede taki kande den no o man tan gi yesi na den wet fu Yehovah ala ten. Den e frede taki kande den o du wan sani di Yehovah no feni bun. Efu yu e firi so, dan prakseri den  wortu disi: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka. Mi winsi taki yu ben o poti prakseri na den komando fu mi! Dan a freide fu yu ben o de leki wan liba, èn a retidu fu yu ben o de leki den skwala fu se” (Yesaya 48:17, 18). Oiti yu teki a ten fu prakseri sortu deki-ati den wortu disi e gi yu?

8 Na ini a tekst disi Yehovah e memre wi taki wi e kisi wini te wi e gi yesi na en. A e pramisi fu blesi wi na tu fasi. A fosiwan, na taki a freide fu wi o de leki wan liba. Wan liba abi furu watra, a watra e lon doronomo, èn a no e kaba, na so a freide fu wi o de. A di fu tu blesi, na taki a retidu fu wi o de leki den skwala fu se. Te yu e tanapu na sekanti e luku fa den skwala e wasi kon na syoro ibri tron baka, dan yu no e tweifri taki a sani disi o tan go so doro. Yehovah e taki dati a retidu fu yu kan de leki den skwala dati. Solanga yu e meki muiti fu tan gi yesi na en, dan noiti a o gi pasi taki yu fadon! (Leisi Psalm 55:22.) A no de fu taki dati den moi pramisi disi e tranga a bribi di yu abi na ini Yehovah èn na ini den bun wet fu en.

„DU ALA MUITI FU TRON LEPI SMA”

9, 10. (a) Fu san ede a de wan moi sani te Kresten e du muiti fu tron lepi sma? (b) Te wi e meki muiti fu si sani soleki fa Gado e si sani, dan fa dati e yepi wi fu de koloku?

9 Bijbel e taki fu ete wan sani di wi musu du fu kon abi wan moro tranga bribi: „Meki wi du ala muiti fu tron lepi sma” (Hebrewsma 6:1). A moi  srefisrefi te wan Kresten e du muiti fu tron wan lepi sma. Wi alamala abi sondu, ma toku wi alamala kan tron lepi Kresten. Boiti dati, o moro wan Kresten e kon lepi, o moro a o prisiri fu dini Yehovah. Fu san ede dati de so?

10 Wan lepi Kresten e si sani soleki fa Yehovah e si sani (Yohanes 4:23). Paulus ben skrifi: „Den sma di e du san a skin wani, e prakseri soso den sani di abi fu du nanga a skin. Ma den sma di e du san a yeye wani, e prakseri soso den sani di abi fu du nanga a yeye” (Romesma 8:5). Wan sma di e du san a skin wani, no de koloku, fu di a e suku soso en eigi bun, a no man si sani krin, èn a e feti baka gudu. Wan sma di e du san a yeye wani, de koloku fu di a e poti ala en prakseri na Yehovah, „a koloku Gado” (1 Timoteyus 1:11). So wan sma wani du soso san Yehovah feni bun, èn srefi te tesi e miti en, a no e  lasi en prisiri. Fu san ede? Fu di tesi e gi wan sma okasi fu sori taki Satan na wan leiman, èn fu tan gi yesi na Yehovah. Na so wan fasi a e meki na ati fu wi hemel Tata prisiri.​—Odo 27:11; leisi Yakobus 1:2, 3.

11, 12. (a) San Paulus taki dati Kresten musu „leri” fu du, èn san a Griki wortu di vertaal nanga „leri” wani taki? (b) Fa wan beibi nanga wan sportman e leri fa fu gebroiki den skin?

11 Fu man tron wan lepi Kresten, dan wan sma musu leri fu si sani soleki fa Gado e si sani. Luku a tekst disi: „Tranga nyanyan na gi lepi sma. A de gi sma di leri fa fu gebroiki den frustan fu man si sani krin, so taki den kan sabi san bun èn san no bun” (Hebrewsma 5:14). Di Paulus taki dati wi musu „leri” fa fu gebroiki wi frustan fu man si sani krin, dan a gebroiki wan Griki wortu di sma ben gwenti gebroiki na den sportskoro fu Grikikondre. A wortu dati abi fu du nanga wan sportman di e ’leri fa fu du wan sport’. Prakseri o furu muiti wan sma musu du fu leri wan sport bun.

Wan sportman e oefen en skin

12 Di wi gebore, wi no ben sabi fa fu gebroiki wi skin. Fu eksempre, wan beibi no sabi fa fu gebroiki en anu nanga en futu bun. Dati meki a e wai en anu go na ala sei, èn son leisi a e naki ensrefi na ini en fesi. Ma safrisafri a e leri fa fu gebroiki en skin. A beibi e bigin kroipi, a e bigin waka, èn te fu kaba a e bigin lon. * Ma fa a de nanga wan sportman?  Te yu e si taki wan sportman e dyompo drai moi salto, dan a no de fu taki dati a ben musu leri fu man du dati. A sportman disi no leri den sani dati wantronso, ma a ben musu oefen bun langa. Bijbel e sori taki te wi e oefen wi skin, dan dati „bun gi wan tu sani nomo”. Ma te wi e leri fa fu gebroiki wi frustan fu man si sani krin, dan dati e tyari moro wini kon!​—1 Timoteyus 4:8.

13. Fa wi kan leri fa fu gebroiki wi frustan fu man si sani krin?

13 Na ini a buku disi, wi taki fu furu sani di o yepi yu fu leri fa fu gebroiki yu frustan fu man si sani krin, so taki yu kan tan gi yesi na Yehovah leki wan lepi Kresten. Begi Gado fu yepi yu frustan den gronprakseri nanga den wet fu en te yu musu teki bosroiti na ini yu aladei libi. Ibri leisi te yu e teki bosroiti, aksi yusrefi: ’Sortu wet noso gronprakseri fu Bijbel abi fu du nanga a tori disi? Fa mi kan hori misrefi na den gronprakseri dati? San mi musu du so taki mi hemel Tata feni mi bun?’ (Leisi Odo 3:5, 6; Yakobus 1:5.) Ibri bosroiti di yu e teki na a fasi dati, o yepi yu fu kon si sani moro krin. Te yu e du dati, dan yu o tron wan lepi Kresten di e tan du san Yehovah wani.

14. Sortu angri wi musu kon abi fu man tron lepi Kresten, ma gi san wi musu luku bun?

14 Awinsi wan sma na wan lepi Kresten, toku a musu tan du muiti fu go na fesi. Wan sma musu nyan fu man gro bun. Dati meki Paulus ben taki: „Tranga nyanyan na gi lepi sma.” Te yu e tan studeri Gado Wortu, dan a de neleki yu e nyan tranga  nyanyan. A sani disi o meki taki yu bribi kon moro tranga. Te yu e du san yu leri, dan yu e sori taki yu koni, èn Bijbel e taki: „Koni na a moro prenspari sani.” Sobun, wi musu kon abi na angri fu studeri den tru tori di wi Hemel Tata e leri wi (Odo 4:5-7; 1 Petrus 2:2). A no de fu taki dati te wi e kisi sabi nanga koni fu Gado, dan dati no wani taki dati wi musu kisi heimemre. Wi musu ondrosuku wisrefi doronomo fu sorgu taki wi no e kon abi heimemre noso wan tra swakifasi. Paulus ben skrifi: „Tan ondrosuku efu unu de na bribi. Tan buweisi sortu sma unu de.”​—2 Korentesma 13:5.

15. Fu san ede wi musu abi lobi fu man tan go na fesi?

15 Aladi wan sma tranga èn gosontu, toku a de fanowdu taki a e nyan ibri dei èn taki a e sorgu ensrefi bun. San wi abi fanowdu fu man tron lepi Kresten di e tan go na fesi? A moro prenspari sani na lobi. A lobi di wi abi gi Yehovah èn gi wi Kresten brada nanga sisa musu kon moro tranga. Efu wi no abi lobi, dan ala a koni di wi abi èn ala den sani di wi e du, o de fu soso (1 Korentesma 13:1-3). Te wi abi lobi, dan wi o tron lepi Kresten di e tan go na fesi.

 TAN POTI PRAKSERI NA A HOWPU DI YEHOVAH E GI

16. Sortu denki Satan wani taki sma abi? San Yehovah gi wi fu sorgu taki Satan no e kori wi.

16 Ete wan sani di kan yepi yu fu kon abi wan tranga bribi, na te yu e poti prakseri na a howpu di Yehovah e gi. Fu man du dati, dan yu musu luku bun fa yu e denki. Satan, a tiriman fu a grontapu disi, sabi heri bun fa fu kori sma so taki den e denki takru fu sani, so taki den no e frutrow trawan, èn so taki den e bruya (Efeisesma 2:2). A denki disi no bun gi wan Kresten, neleki fa nyanyan di pori no bun gi wan sma. Koloku taki Yehovah gi wi wan prenspari sani di kan kibri wi gi den triki fu Satan. A sani dati na howpu.

17. Fa Gado Wortu e sori taki howpu na wan prenspari sani?

17 Bijbel e taki fu difrenti sani di Gado gi wi fu feti teige Satan nanga a grontapu fu en. Wan prenspari fetisani, na a helm, noso „a howpu di wi abi taki wi o kisi frulusu” (1 Tesalonikasma 5:8). Wan srudati na ini Bijbel ten ben sabi taki a ben o lasi en libi esi-esi efu a go feti sondro wan helm. Nofo tron, wan helm ben meki fu isri noso kopro, èn wan srudati ben e weri en na tapu wan musu di ben meki fu skapu-wiwiri noso fu leribuba. A helm ben e sorgu taki a srudati no kisi mankeri na en ede. Neleki fa wan helm e kibri na ede fu wan sma, na so howpu e kibri a fasi fa wan sma e denki.

18, 19. Fa Yesus sori taki a ben abi wan tranga howpu? Fa wi kan teki na eksempre fu en?

 18 Yesus ben de a moro bun eksempre fu wan sma di ben tan abi wan tranga howpu. Memre san a ben ondrofeni a lasti neti fu en libi na grontapu. Wan bun mati fu en tori en fu moni ede. Wan tra mati ben lei taki a no ben sabi en. Den tra mati fu en lowe gowe libi en. En eigi kondreman drai baka gi en, èn den bari taki den srudati fu Rome ben musu kiri en. Wi kan taki dati Yesus kisi hebi tesi, di kande noiti wi o kisi. San yepi en fu horidoro? Hebrewsma 12:2 e taki: „Na fu di a ben sabi taki prisiri ben e wakti en, meki a ben de klariklari fu dede na a pinapostu sondro fu broko en ede taki a ben o kisi syen. A go sidon na a reti-anusei fu a kownusturu fu Gado.” Yesus noiti no frigiti ’a prisiri di ben e wakti en’.

19 Sortu prisiri ben e wakti Yesus? We, a ben sabi taki te a ben o horidoro, dan a ben o yepi fu santa a nen fu Yehovah. A ben o gi a moro bigi buweisi taki Satan na wan leiman. Nowan enkri howpu ben kan gi Yesus so furu prisiri! A ben sabi tu taki Yehovah ben o blesi en te a ben o tan gi yesi na en. Iya, te fu kaba a ben o de makandra baka nanga en Papa. Yesus ben tan prakseri a moi howpu dati srefi na ini tumusi muilek ten. Wi musu du a srefi. Wi abi wan moi howpu tu. Yehovah e gi ibriwan fu wi a grani fu yepi santa a bigi nen fu en. Wi kan sori taki Satan na wan leiman te wi e teki Yehovah  leki wi Moro Hei Tiriman, èn te wi e tan sori taki wi lobi en awansi sortu tesi e miti wi.

20. San kan yepi yu fu tan abi wan bun denki fu sani èn fu tan abi wan tranga howpu?

20 Yehovah wani blesi den futuboi fu en di e tan gi yesi na en, èn a e angri tu fu du dati. (Yesaya 30:18; leisi Maleaki 3:10.) Yehovah lobi fu gi den futuboi fu en san den ati wani, solanga den sani dati e kruderi nanga a wani fu en (Psalm 37:4). Sobun, tan poti prakseri na a howpu di yu abi. Noiti no teki a takru denki fu a grontapu fu Satan abra. Efu yu e si taki a denki fu grontapu e kon abi krakti tapu yu ati nanga yu frustan, dan begi Yehovah fayafaya fu gi yu „a freide fu Gado di bigi moro iniwan sani di libisma man frustan”. A freide dati o kibri yu ati nanga yu frustan.​—Filipisma 4:6, 7.

21, 22. (a) Sortu tumusi moi howpu den sma fu a „bigi ipi” abi? (b) Sortu howpu di Bijbel e gi wi, yu lobi, èn san yu o du?

21 A no de fu taki dati yu abi wan tumusi moi howpu! Efu yu de fu a „bigi ipi” di o „komoto na  ini a bigi banawtu”, dan prakseri a libi di yu o abi na ini a ten di e kon (Openbaring 7:9, 14). Te Satan nanga den ogri yeye fu en no de moro, dan yu o firi trutru frulekti, fu di noiti wan fu wi libi na ini wan grontapu sondro Satan. Na a ten dati, te Yesus nanga den 144.000 salfuwan o tiri makandra na ini hemel, wi o prisiri srefisrefi fu wroko makandra fu kenki grontapu kon tron wan paradijs. Wi e prisiri trutru taki wan kaba o kon na ala siki, taki wi o si den lobiwan fu wi di ben dede, èn taki wi o kisi a libi di Gado ben wani taki wi abi! Te wi no abi nowan sondu moro, dan wi o kisi a moro bigi blesi disi di skrifi na Romesma 8:21: ’Wi o kon fri na wan tumusi moi fasi leki pikin fu Gado.’

22 A fri di Yehovah wani gi yu, na wan sani di yu no man frustan now. Fu man kisi a fri dati, dan yu musu gi yesi na en. Yu no feni taki a prenspari fu du ala muiti now fu gi yesi na Yehovah ibri dei? Fu dati ede, tan tranga a bribi fu yu so taki Gado tan lobi yu fu têgo!

^ paragraaf 12 Sabiman e taki dati te fu kaba, ala libisma man firi fa fu gebroiki den anu nanga futu. Dati meki wan sma kan naki anu awinsi en ai tapu. Wan sma di no abi a firi disi moro fu di a siki, no ben man tanapu, a no ben man waka, èn a no ben man sidon moro.

Kon sabi moro

BUKU NANGA BROCHURE

Teki na eksempre fu sma di ben abi bribi

Fa wi kan kisi wini te wi e kon sabi man nanga uma na ini Bijbel di ben abi bribi?