Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 TRA PRENSPARI SANI

Fa wan sma kan tapu nanga a gwenti fu prei nanga en syenpresi?

Fa wan sma kan tapu nanga a gwenti fu prei nanga en syenpresi?

Gado no feni en bun te wan sma abi a gwenti fu prei nanga en syenpresi. Wan sma di abi a gwenti disi e denki ensrefi nomo, èn a e prakseri sani di no fiti. Wan sma di gwenti du a sani disi, kan bigin denki soso seks te a e si tra sma. So wan sma no e si seks leki wan sani di tu sma e du fu di den lobi densrefi, ma a e si en leki wan sani di a kan du fu firi switi. Ma a firi disi e tan fu wan syatu pisi ten nomo. Fu taki en leti, wan sma di e prei nanga en syenpresi no e kiri den difrenti pisi fu en skin ’di kan meki taki a kisi fu du nanga hurudu, wan libi di no krin, nanga sekslostu’. Na presi fu dati a e meki den firi disi kon moro tranga.​—Kolosesma 3:5.

Na apostel Paulus ben skrifi: „Lobiwan, . . . meki wi krin wisrefi fu ibri sani di kan doti wi skin nanga wi denki, èn meki a lespeki di wi abi gi Gado meki taki wi kon santa dorodoro” (2 Korentesma 7:1). Efu a muilek gi yu fu gi yesi na a rai dati, dan no lasi-ati. Ala ten Yehovah ’de klariklari fu gi yu pardon’ èn fu yepi yu (Psalm 86:5; Lukas 11:9-13). A muiti di yu e meki fu tapu nanga a gwenti disi, aladi son leisi yu e fadon go baka na ini a gwenti, e sori taki yu wani du san Gado feni bun. Sobun te yu ati e krutu yu, dan hori na prakseri taki „Gado bigi moro wi ati èn taki a sabi ala sani” (1 Yohanes 3:20). Gado no e si soso den sondu fu wi, ma a e si a sma di wi de trutru na ini wi ati. Dati meki a e sori sari-ati gi wi te wi e begi en fayafaya fu gi wi pardon. Sobun, noiti yu musu kon weri fu suku yepi na Gado, ma neleki wan pikin di e suku yepi na en papa te a abi problema, na so yu musu tan begi Gado fu yepi yu. Yehovah o gi yu wan krin konsensi (Psalm 51:1-12, 17; Yesaya 1:18). A no de fu taki dati yu musu du tu san yu e aksi Yehovah na ini begi. Fu eksempre, yu musu du ala muiti fu wai pasi gi iniwan  sani di abi fu du nanga porno, èn yu musu wai pasi tu gi takru kompe. *

Efu a muilek gi yu fu tapu nanga a gwenti fu prei nanga yu syenpresi, dan taki nanga yu Kresten papa noso mama, noso nanga wan lepi Kresten di yu e frutrow. *​—Odo 1:8, 9; 1 Tesalonikasma 5:14; Titus 2:3-5.

^ paragraaf 2 Furu osofamiri e poti a computer fu den na wan presi pe ala sma na ini na oso kan si en, so taki sma no gebroiki en na wan fasi di no fiti. Boiti dati, son osofamiri e bai computer programa di kan warskow den gi sani di no fiti tapu Internet. Ma nowan computer programa e tapu pasi gi ala sani di no fiti.

^ paragraaf 1 Efu yu wani sabi san yu kan du fu tapu nanga a takru gwenti disi, dan luku na artikel „Jonge mensen vragen . . . Hoe kan ik met die gewoonte stoppen?” na ini na Ontwaakt! fu november 2006. Luku sosrefi bladzijde 178-182 fu a buku Wat jonge mensen vragen​— Praktische antwoorden, Deel 1.