Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 KAPITEL 2

Fa yu kan tan abi wan bun konsensi?

Fa yu kan tan abi wan bun konsensi?

„Tan abi wan bun konsensi.”​—1 PETRUS 3:16.

1, 2. Fu san ede a de tumusi prenspari taki wan sma abi wan flashlight te a e waka na ini a dungru? Fu san ede wi kan agersi wan flashlight nanga a konsensi fu wi?

PRAKSERI wan sma di e waka na strati na ini a dungru. San a abi fanowdu fu sorgu taki a no e fadon èn taki nowan ogri e miti en? A musu abi wan flashlight fu man si pe a e waka.

2 Efu yu e waka na ini a dungru èn yu no abi wan flashlight, dan yu no o man si pe yu e go. Yu kan fadon, noso wan ogri kan pasa nanga yu. Wan flashlight e yepi yu fu si pe yu musu waka, èn a kan kibri yu libi. Wi kan agersi a flashlight nanga wan prenspari kado di Yehovah gi wi. Dati na a konsensi fu wi (Yakobus 1:17). Efu wi no ben abi wan konsensi, dan wi ben o lasi pasi. Te a konsensi fu wi e wroko bun, dan a kan yepi wi fu feni a yoisti pasi na ini a libi èn fu tan na tapu a pasi dati. Sobun, meki wi go luku san na a konsensi, èn fa a e wroko. Baka dati, wi sa poti prakseri na den dri aksi disi: (1) San wi kan du fu meki a konsensi fu wi wroko bun? (2) Fu san ede wi musu hori a konsensi fu trawan na prakseri? (3) Fa wi e kisi wini te wi e tan abi wan bun konsensi?

SAN NA A KONSENSI ÈN FA A E WROKO?

3. San a Griki wortu di vertaal nanga „konsensi” wani taki trutru? San libisma wawan man du fu di den abi wan konsensi?

3 Na ini Bijbel, a Griki wortu di vertaal nanga „konsensi”,  trutru wani taki „a sabi di wan sma sabi ensrefi”. Tra fasi leki den meti nanga den tra sani di e libi na grontapu, Gado meki wi na so wan fasi taki wi man sabi wisrefi. Fu taki en leti, wi kan ondrosuku wisrefi fu kon si efu wi e libi na wan fasi di fiti. A konsensi fu wi e krutu den sani di wi e du, den denki di wi abi, èn den bosroiti di wi e teki. A kan tiri wi fu teki bun bosroiti, noso a kan warskow wi fu no teki don bosroiti. Te wi teki bun bosroiti, dan wi o firi bun, ma te wi teki don bosroiti, dan wi o kisi konsensi fonfon.

4, 5. (a) Fa wi du sabi taki Adam nanga Eva ben abi wan konsensi, èn san pasa di den trangayesi a wet fu Gado? (b) Gi wan tu eksempre di e sori fa a konsensi fu reti-ati man fu a ten bifo Yesus ben e wroko.

4 Sensi a bigin di Gado meki mansma nanga umasma, a gi den wan konsensi. Adam nanga Eva ben sori taki den abi wan konsensi. Wi kan si dati te wi e luku taki den ben e firi syen baka di den sondu (Genesis 3:7, 8). Ma a sari fu taki dati a konsensi fonfon di den ben abi, no ben man yepi den. Den ben trangayesi a wet fu Gado fu espresi. Na so den bosroiti fu opo densrefi teige Yehovah Gado èn fu tron feanti fu en. Leki libisma di no ben abi sondu, den ben sabi heri bun san den ben e du, èn den no ben man drai go baka na Gado kwetikweti.

5 Tra fasi leki Adam nanga Eva, furu sondu libisma arki a konsensi fu den. Fu eksempre, a reti-ati man Yob ben man taki: „Mi sabi taki mi abi leti èn mi o tan tyari misrefi na a fasi dati. Nowan dei fu mi libi mi o abi konsensi fonfon” (Yob 27:6). Yob ben de wan man di ala ten ben e arki a konsensi fu en, èn a  ben e meki a konsensi fu en tiri en te a ben musu du sani èn te a ben musu teki bosroiti. Dati meki a ben kan taki nanga ala prisiri taki a no ben abi konsensi fonfon, èn taki a no ben e firi syen. Luku a difrenti na mindri Yob nanga David. Di David no ben sori lespeki gi Saul, a kownu di Yehovah ben salfu, dan „bakaten, David en konsensi bigin fon en” (1 Samuel 24:5). A konsensi fonfon di David ben abi yepi en trutru, fu di a leri fu no meki a fowtu dati noiti moro.

6. San e sori taki ala libisma abi wan konsensi?

6 A de so taki na den futuboi fu Yehovah wawan abi wan konsensi? Prakseri den wortu disi di na apostel Paulus ben skrifi nanga yepi fu santa yeye: „Den trakondre sma no abi a wèt fu Gado. Ma te den e du san a wèt e taki sondro fu den sabi, dan dati e sori taki a wèt de na ini den ati aladi den no abi wèt. Na den srefi sma disi e sori taki a wèt skrifi na ini den ati. A konsensi fu den e sori dati tu. Den eigi prakseri e sori den taki den fowtu noso taki den no fowtu” (Romesma 2:14, 15). Srefi sma di no sabi den wet fu Yehovah, abi wan konsensi di e tiri den son leisi fu du sani di e kruderi nanga den gronprakseri fu Gado.

7. Fu san ede a konsensi fu wi no e wroko bun son leisi?

7 Ma son leisi a konsensi fu wi no e wroko bun. Fu san ede? We, prakseri na agersitori fu a flashlight. Te den batterij fu a flashlight kon leigi, dan a flashlight no o wroko moro, èn wi no o man si moro pe wi e waka. A srefi sani disi e pasa nanga a konsensi fu wi. Te wi no e studeri Gado Wortu, dan wi no o sabi san bun èn san ogri. Na so a de tu taki te wi e meki den firi fu wi basi wi tumusi, dan a konsensi fu wi kan meki wi teki don bosroiti. Iya, efu wi wani taki a  konsensi fu wi wroko bun, dan wi musu meki a santa yeye fu Yehovah tiri wi. Paulus ben skrifi: „Santa yeye e tiri mi konsensi” (Romesma 9:1). Ma fa wi kan sorgu taki a konsensi fu wi e wroko soleki fa a santa yeye fu Yehovah e tiri en? Wi musu leri fu si sani soleki fa Yehovah e si sani.

SAN WI KAN DU FU MEKI A KONSENSI FU WI WROKO BUN?

8. (a) Fa den firi fu wi kan abi krakti tapu a konsensi fu wi, èn san wi musu hori na prakseri te wi e teki bosroiti? (b) Te a konsensi fu wan Kresten no e trobi en, dan fu san ede dati no wani taki ala ten dati a konsensi fu en e wroko bun? (Luku den sani di skrifi na ondrosei fu paragraaf 8.)

8 Fa wi kan meki a konsensi fu wi tiri wi te wi e teki bosroiti? Te son sma e teki bosroiti, dan den e du soleki fa den e firi. Kande den sma disi e taki bakaten: „We, mi konsensi no e trobi mi.” Den firi fu wi kan tranga so te, taki den kan abi krakti tapu a konsensi fu wi. Bijbel e taki: „Na ati na a moro bedrigi sani di de èn a ogri srefisrefi. Suma kan sabi en?” (Yeremia 17:9) Sobun, wi no musu meki den firi fu wi basi wi. Na presi fu dati, wi musu luku fosi san Yehovah Gado feni bun. *

9. San a wani taki fu abi bigi lespeki gi Gado? Te wi abi a lespeki disi, dan fa a o tiri a konsensi fu wi?

 9 Efu trutru a konsensi fu wi e wroko bun, dan den bosroiti di wi e teki o sori taki wi abi bigi lespeki gi Gado èn taki wi no e du sani soleki fa wisrefi wani. Luku na eksempre disi. A tiriman Nehemia di ben e anbegi Gado nanga en heri ati, ben abi a reti fu teki moni fu den sma na ini Yerusalem. Toku a no du dati. Fu san ede? Fu di a ben frede srefisrefi taki Gado ben o atibron nanga en te a ben o kwinsi a pipel fu en. Nehemia no ben wani taki dati pasa kwetikweti. A ben taki: „Fu di mi ben abi bigi lespeki gi Gado, meki mi no du a sani dati” (Nehemia 5:15). A prenspari taki wi abi bigi lespeki gi Gado. Iya, wi no wani du nowan sani di wi hemel Tata no feni bun. Te wi abi a bigi lespeki dati gi Gado, dan wi o meki a Wortu fu en tiri wi te wi musu teki bosroiti.

10, 11. Sortu Bijbel gronprakseri wi musu hori na prakseri te a abi fu du nanga sopi? Fa Gado kan yepi wi fu gi yesi na den gronprakseri disi?

10 Fu eksempre, fa a de nanga sopi? Te wi de makandra nanga trawan fu meki prisiri, dan furu fu wi musu bosroiti efu wi o dringi sopi noso efu wi no o du dati. Ma wi musu sabi fosi san Bijbel e taki fu a tori disi. We, Bijbel no e taki dati wi no mag dringi sopi. Bijbel e prèise Yehovah fu di a gi libisma win (Psalm 104:14, 15). Ma Bijbel e krutu sma di e dringi tumusi furu sopi, èn di e teki prati na bradyari fesa (Lukas 21:34; Romesma 13:13). Boiti dati, te Bijbel e taki fu seryusu sondu, soleki hurulibi nanga sutadu,  dan a e kari sosrefi a dringi di sma e dringi sopi teleki den kon drungu. *​—1 Korentesma 6:9, 10.

11 Wan Kresten musu meki den gronprakseri disi tiri a konsensi fu en fu man teki bun bosroiti. Dati meki te wi musu bosroiti efu wi o dringi sopi te wi de makandra nanga trawan fu meki prisiri, dan wi e aksi wisrefi den sani disi: ’Sortu demakandra na dati? A kan tron wan bradyari fesa? Sortu swakifasi mi abi? Mi gridi gi sopi? Mi musu dringi sopi fu man firi bun? Mi man hori misrefi fu no dringi tumusi furu sopi?’ Te wi e denki dipi fu Bijbel gronprakseri èn fu den aksi di e opo kon, dan a bun fu begi Yehovah fu yepi wi. (Leisi Psalm 139:23, 24.) Na so wi e gi pasi taki Yehovah tiri wi nanga yepi fu en santa yeye. Boiti dati, wi e meki den gronprakseri fu Gado tiri a konsensi fu wi. Ma ete wan sani de di wi musu hori na prakseri te wi e teki bosroiti.

FU SAN EDE WI MUSU HORI A KONSENSI FU TRAWAN NA PRAKSERI?

Te wi e meki Bijbel tiri a konsensi fu wi, dan dati kan yepi wi fu bosroiti efu wi o dringi sopi

12, 13. Fu san ede a konsensi fu son Kresten e wroko heri tra fasi leki a di fu trawan? San wi musu du na ini den sortu situwâsi dati?

12 Kande yu e fruwondru son leisi fu si taki a konsensi fu son Kresten e wroko heri tra fasi leki a di fu trawan. Wan sma ben kan feni taki son sani noso son gwenti no fiti. Wan tra sma baka, lobi den sani dati èn a no abi problema nanga den. Kande wan sma lobi fu dringi wan sani te a e blo en ede pikinso  nanga den mati fu en. Ma wan tra sma baka, ben kan feni taki a sani dati no fiti. Fu san ede a konsensi fu a wan sma e wroko heri tra fasi leki a di fu a trawan? Fa wi kan sori taki wi e hori den sma disi na prakseri te wi e teki bosroiti?

13 Furu sani de fu san ede sma e difrenti fu makandra. Son sma kweki heri tra fasi leki tra sma. Fu eksempre, son sma sabi heri bun taki den abi wan swakifasi di ben e gi den problema fosi. Kande den no ben man basi a swakifasi dati ala ten (1 Kownu 8:38, 39). Te a abi fu du nanga sopi, dan a no de fu taki dati den sortu sma disi e luku bun. Efu so wan sma kon na yu oso, èn yu wani gi en sopi fu dringi, dan kande a konsensi fu en e taigi en fu no teki a sopi dati. Yu o firi wan fasi? Noso yu o dwengi en fu teki a sopi? Nôno. Fu di yu lobi yu brada, meki yu o hori a konsensi fu en na prakseri, awansi yu no sabi fu san ede a no wani dringi sopi. Kande a no wani fruteri yu dati tu.

14, 15. Gi wan eksempre di e sori fa a konsensi fu son fosi Kresten ben e wroko heri tra fasi leki a di fu trawan? Sortu rai Paulus gi den Kresten disi?

14 Na apostel Paulus ben si taki a konsensi fu son Kresten na ini a fosi yarihondro, ben e wroko heri tra fasi leki a di fu trawan. Na a ten dati, son Kresten ben feni taki a no fiti fu nyan nyanyan di sma ben tyari leki ofrandi gi falsi gado (1 Korentesma 10:25). A konsensi fu Paulus no ben e trobi en te a ben e nyan den sortu nyanyan disi di sma ben gwenti seri na wowoyo. Gi Paulus, falsi gado ben de noti. A nyanyan dati noiti no ben kan de fu den gado disi, fu di a ben komoto fu Yehovah, èn na en ben abi en. Ma Paulus  ben e frustan taki tra sma ben e denki tra fasi fu a tori disi. Kande son sma ben e anbegi falsi gado fayafaya fosi den tron Kresten. Gi den Kresten disi, iniwan sani di fosi ben abi fu du nanga afkodrei, ben de wan tegu sani. Fa Paulus lusu a problema disi?

15 Paulus ben taki: „Ma wi di de tranga na ini a bribi musu yepi den wan di swaki na ini a bribi, so taki den kan tyari den hebi fu den. Wi no musu plisi wisrefi. Bika srefi Krestes no ben plisi ensrefi” (Romesma 15:1, 3). Paulus ben sori taki neleki Krestes, wi musu suku a bun fu wi brada fosi. Na wan tra okasi, Paulus taki dati a moro bun a no nyan nowan meti, leki fu meki wan lobi skapu di Krestes dede gi, naki futu.​—Leisi 1 Korentesma 8:13; 10:23, 24, 31-33.

16. Te a konsensi fu son Kresten no e gi pasi taki den du son sani, dan fu san ede den no musu krutu trawan di e si sani tra fasi leki den?

 16 Ma te a konsensi fu son Kresten no e gi pasi taki den du son sani, dan den no musu krutu trawan di e si sani tra fasi. Den no musu dwengi trawan tu fu si sani soleki fa den e si sani. (Leisi Romesma 14:10.) Iya, a konsensi fu wi a no fu krutu trawan, ma na fu krutu wisrefi. Memre den wortu fu Yesus: „No krutu sma moro, so taki Gado no krutu unu” (Mateyus 7:1). Te a abi fu du nanga tori pe sma mag teki den eigi bosroiti, dan ala sma na ini a gemeente musu luku bun fu no krutu trawan di e si sani tra fasi leki den. Na presi fu dati, wi e du muiti fu sorgu taki lobi  nanga wánfasi de na wi mindri, wi no e broko makandra saka, ma wi e gi makandra deki-ati.​—Romesma 14:19.

WAN BUN KONSENSI E TYARI WINI KON GI WI

Te a konsensi fu wi e wroko bun, dan den bosroiti di wi o teki o meki wi firi koloku, èn wi o abi wan korostu firi

17. San pasa nanga a konsensi fu furu sma na ini a ten disi?

17 Na apostel Petrus ben skrifi: „Tan abi wan bun konsensi” (1 Petrus 3:16). Wan konsensi di e wroko na wan fasi di Yehovah Gado feni bun, na wan moi kado. A konsensi dati no de leki a di fu furu sma na ini a ten disi. Paulus ben taki fu sma di a ’konsensi fu den dede neleki na wan faya isri bron en’ (1 Timoteyus 4:2). Te wan faya isri bron wan sma en skin, dan a e libi wan marki, èn a pisi dati fu a skin e kon dede. Furu sma abi wan konsensi di no e wroko moro, fu di a bron èn a dede so te taki a no e warskow den moro gi ogri. Den sma disi no e kisi konsensi fonfon, èn den no e firi syen. Na ini a ten disi, a gersi leki furu sma breiti taki den no e kisi konsensi fonfon moro.

18, 19. (a) Te wi abi konsensi fonfon, dan san dati e sori? (b) San wi kan du te wi konsensi e tan fon wi aladi wi sori berow gi sondu di wi ben du fosi?

18 Fu taki en leti, a konsensi fonfon di wi e kisi, na fu taigi wi taki wi du wan sani di no bun. Te den firi dati e meki taki wan sma di du wan sondu e sori berow, dan Gado o gi en pardon, awansi a du seryusu sondu. Kownu David, fu eksempre, ben kisi konsensi fonfon di a du wan seryusu sondu. Ma Gado gi en pardon fu di a ben abi trutru berow. Fu di David ben e tegu gi a sondu di a du, èn fu di a teki a bosroiti fu gi yesi na den wet fu Yehovah ala ten, meki en srefi ondrofeni taki Yehovah ’na wan bun Gado di de  klariklari fu gi sma pardon’ (Psalm 51:1-19; 86:5). Ma son sma di sori berow èn di kisi pardon fu den sondu fu den, e tan abi konsensi fonfon èn den e tan firi syen. San kan yepi den sma disi?

19 Son leisi, wan sma di du sondu kan tan abi konsensi fonfon wan heri pisi ten, aladi dati no de fanowdu moro. Te dati e pasa, dan kande wi musu overtoigi wisrefi taki Yehovah bigi moro wi ati pe ala den firi fu wi e komoto. Wi musu bribi taki Yehovah lobi wi èn taki a gi wi pardon trutru, neleki fa wi e gi trawan deki-ati fu du. (Leisi 1 Yohanes 3:19, 20.) Ma te wi abi wan krin konsensi, dan wi o firi korostu, wi no o bruya, èn wi o firi koloku trutru, wan sani di no de fu feni makriki na ini a grontapu disi. Furu sma di ben du seryusu sondu fosi, kon abi a korostu firi disi, èn now den e tan anbegi Yehovah Gado nanga wan bun konsensi.​—1 Korentesma 6:11.

20, 21. (a) Fa a buku disi o yepi yu? (b) Sortu fri wi leki Kresten abi, ma fa wi musu gebroiki a fri dati?

20 A buku disi na fu yepi yu fu de koloku, so taki yu kan tan abi wan bun konsensi na ini den muilek lasti dei disi fu a sistema fu Satan. A no de fu taki dati a buku disi no kan taki fu ala den Bijbel wet nanga gronprakseri di kan yepi yu na ini situwâsi di kan opo kon ibri dei. Boiti dati, no fruwakti taki yu o feni wet di e sori krin san yu musu du na ini situwâsi pe yu konsensi musu tiri yu. A buku disi na fu yepi yu fu kon sabi fa yu kan gebroiki Gado Wortu na ini yu aladei libi, so taki a konsensi fu yu e wroko moro bun. Tra fasi leki a wet di Gado ben gi Moses, „a wèt fu Krestes” e gi Kresten deki-ati fu arki a konsensi fu  den èn fu hori densrefi na Bijbel gronprakseri. A no e gi den deki-ati nomo fu hori densrefi na wet di skrifi (Galasiasma 6:2). Sobun, Yehovah gi Kresten bun furu fri. Ma a Wortu fu en e memre wi taki noiti wi musu gebroiki a fri dati „fu kibri takrudu” (1 Petrus 2:16). Na presi fu dati, a fri dati e gi wi a tumusi moi okasi fu sori Yehovah taki wi lobi en.

21 Te yu e begi Gado fu yepi yu fu kon sabi fa yu kan fiti Bijbel gronprakseri na ini yu libi, èn te yu e du san yu aksi en, dan yu o tan go doro nanga wan prenspari sani di yu bigin du di yu leri sabi Yehovah. Iya, yu o ’leri fa fu gebroiki yu frustan fu man si sani krin’ (Hebrewsma 5:14). Ibri dei yu o kisi wini fu a konsensi fu yu di Bijbel e tiri. Neleki fa a flashlight e skèin leti fu sori yu pe yu musu waka, na so a konsensi fu yu o yepi yu fu teki bosroiti di yu hemel Tata feni bun. Na so Gado o tan lobi yu.

^ paragraaf 8 Bijbel e sori taki te a konsensi fu wi no e trobi wi, dan dati no wani taki ala ten taki a e wroko bun. Fu eksempre, Paulus ben taki: „Mi abi wan krin konsensi na ini ala sani. Toku dati no wani taki dati mi na wan reti-ati sma. Ma a sma di e ondrosuku mi na Yehovah” (1 Korentesma 4:4). Srefi den sma di e frufolgu Kresten soleki fa Paulus ben du, ben kan du dati sondro taki a konsensi fu den e trobi den, fu di den e denki taki Gado e agri nanga san den e du. Te wi feni taki wi abi wan krin konsensi, dan wi musu de seiker taki Gado e agri nanga den sani di wi e du.​—Tori fu den apostel 23:1; 2 Timoteyus 1:3.

^ paragraaf 10 Furu datra e taki dati sopiman no man hori densrefi fu no dringi tumusi furu sopi. Dati meki den sortu sma disi no musu dringi sopi srefisrefi.

 

Kon sabi moro

STUDIE-WAKTITOREN

Teki koni bosroiti na ini yu libi

Fa wi kan sorgu taki wi e teki bosroiti di Gado feni bun? San kan yepi wi fu du san wi bosroiti?