Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 TRA PRENSPARI SANI

Fa wi musu libi nanga wan sma di puru fu a gemeente?

Fa wi musu libi nanga wan sma di puru fu a gemeente?

Wi e sari srefisrefi te wan famiriman, noso wan bun mati fu wi, puru fu a gemeente fu di a no wani sori berow. A fasi fa wi e si a rai di Bijbel e gi fu a tori disi, o sori efu wi lobi Gado trutru èn efu wi e horibaka nanga wi heri ati gi a seti fu en. * Luku wan tu aksi di abi fu du nanga a tori disi.

Fa wi musu libi nanga wan sma di puru fu a gemeente? Bijbel e taki: „Un no musu bumui nanga wan sma di e kari ensrefi wan brada, aladi a de wan huruman, noso wan gridiman, noso wan sma di e anbegi falsi gado, noso wan sma di e kosi trawan, noso wan drunguman, noso wan sma di e puru sani na tra sma anu nanga tranga. Un no musu nyan srefi nanga so wan sma” (1 Korentesma 5:11). Luku san Bijbel e taki fu wan sma di „no e tan na ini a leri fu Krestes”: „Noiti un musu teki en na ini un oso. Un no musu taki en odi tu, bika a sma di e taki en odi, e horibaka gi den ogri sani di a e du” (2 Yohanes 9-11). Wi no o bumui nanga sma di puru fu a gemeente, èn wi no o taki nanga den fu sani di abi fu du nanga na anbegi fu wi. Na tapu bladzijde 3 fu Wi Kownukondre Diniwroko fu augustus 2002, wi e leisi: „Efu wi e taigi wan sma odi nomo, dan dati kan nofo kaba fu bigin wan takimakandra èn fu kisi wan matifasi srefi nanga a sma te fu kaba. Wi ben sa wani bigin fu gi odi na wan sma di puru fu a gemeente?”

A de fanowdu trutru taki wi no bumui srefisrefi nanga den? Iya, difrenti sani de fu san ede a de fanowdu. A fosi sani, na taki wi e sori taki wi lobi Gado, èn taki wi e du san en Wortu e taki. Wi no e gi yesi na Yehovah soso te  dati makriki fu du, ma wi e gi yesi tu te a muilek fu du dati. A lobi di wi abi gi Gado, e meki taki wi e gi yesi na ala den komando fu en. Wi e du dati fu di wi sabi taki a de wan Gado fu retidu, taki a lobi wi, èn fu di wi sabi taki den wet fu en e tyari furu wini kon gi wi (Yesaya 48:17; 1 Yohanes 5:3). A di fu tu sani, na taki te wi no e bumui nanga wan sma di no wani sori berow, dan dati o kibri wi èn a gemeente. A matifasi di wi abi nanga Gado no o pori, den takru gwenti fu a sma no o abi krakti na wi tapu, èn a gemeente no o kisi porinen (1 Korentesma 5:6, 7). A di fu dri sani, na taki te wi e tan hori wisrefi na Bijbel gronprakseri, dan dati kan tyari wini kon tu gi a sma di puru fu a gemeente. Te wi e horibaka gi a bosroiti di a krutu komte teki, dan kande dati o naki na ati fu a sma di weigri fu teki a yepi fu den owruman. Te a sma disi no man bumui moro nanga den lobiwan fu en, dan kande dati o yepi en fu „kisi ensrefi”. Iya, a o frustan taki a du wan seryusu sondu, èn a o du muiti fu drai kon baka na Yehovah.​—Lukas 15:17.

Kon meki wi taki dati na wan famiriman fu wi puru fu a gemeente. Fu di famiriman lobi makandra, meki a kan de wan bigi tesi fu gi yesi na Yehovah. Fa wi musu libi nanga wan famiriman di puru fu a gemeente? Wi no man taki fu ibri situwâsi di kan opo kon, ma wi o go luku tu fu den.

Son leisi, a sma di puru fu a gemeente e libi ete na ini a srefi oso nanga den tra memre fu na osofamiri. Fu di a sma disi de wan memre fu na osofamiri ete, meki a kan tan du den aladei sani makandra nanga den tra sma fu na osofamiri. Ma a sani di a sma du e sori taki a no wani dini Yehovah moro makandra nanga den famiriman fu en. Sobun, den famiri fu en di wani tan gi yesi na Gado, no kan teki prati moro na a anbegi makandra nanga en. Fu eksempre, efu a sma di puru fu a gemeente de na a Osofamiri Anbegi, dan a no mag teki prati na a studie. Ma efu a  sma disi na wan yongu pikin, dan a papa nanga mama fu en abi a frantwortu ete fu gi en leri. Sobun, papa nanga mama di lobi den pikin, kan seti sani fu studeri Bijbel nanga a pikin fu den. *​—Odo 6:20-22; 29:17.

Ma son leisi, a sma di puru fu a gemeente no e libi moro na oso. Aladi wanwan leisi a kan de fanowdu taki na osofamiri e miti nanga a sma disi fu taki fu prenspari famiri afersi, toku den musu luku bun taki den no e bumui tumusi nanga a sma. Kresten di wani tan gi yesi na Gado, no e suku okasi fu taki nanga wan famiriman di puru fu a gemeente èn di no e tan moro nanga den. Ma fu di den wani gi yesi na Yehovah èn na a organisâsi fu en, meki den e hori densrefi na a seti fu Bijbel te wan sma puru fu a gemeente. Te den e tan gi yesi na Yehovah, dan dati de gi a bun fu a sma di du wan seryusu sondu, èn kande a sma dati o kisi wini fu a piri-ai di a kisi. *​—Hebrewsma 12:11.

^ paragraaf 1 Den Bijbel gronprakseri di abi fu du nanga a seti disi, fiti tu gi sma di hari densrefi puru fu a gemeente.

^ paragraaf 2 Efu yu wani sabi moro fini fa yu musu libi nanga yongu pikin di puru fu a gemeente èn di e libi ete na oso, dan luku A Waktitoren fu 1 oktober 2001, bladzijde 16, 17, nanga De Wachttoren fu 15 november 1988, bladzijde 20.

^ paragraaf 1 Efu yu wani sabi moro fini fa yu musu libi nanga famiriman di puru fu a gemeente, dan luku a Bijbel rai di skrifi na ini Wi Kownukondre Diniwroko fu augustus 2002, bladzijde 3, 4, èn na ini De Wachttoren fu 15 april 1988, bladzijde 26-31.