Go na content

Go na table of contents

Yehovah Kotoigi

Tongo Sranantongo

 KAPITEL 1

San a wani taki fu „lobi Gado”?

San a wani taki fu „lobi Gado”?

„Te wi lobi Gado, dan wi o hori den komando fu en. Toku den komando fu en no de wan hebi.”​—1 YOHANES 5:3.

1, 2. Fu san ede yu lobi Yehovah Gado?

YU LOBI Gado? Efu yu gi yusrefi abra kaba na Yehovah Gado, dan a no de fu taki dati yu sa piki ’iya’ nanga wan krakti sten. Yu abi leti fu piki so! Wi abi ala reide fu lobi Yehovah. Fu taki en leti, wi lobi Gado fu di a lobi wi. Luku san Bijbel e taki: „Wi abi lobi, fu di na Gado fosi ben lobi wi.”​—1 Yohanes 4:19.

2 Yehovah fosi sori lobi gi wi. A gi wi wan tumusi moi grontapu fu libi na tapu. A e gi wi den sani di wi abi fanowdu fu tan na libi (Mateyus 5:43-48). Ma san moro prenspari, na taki a e yepi wi fu tan abi wan bun matifasi nanga en. A gi wi en Wortu, Bijbel. Boiti dati, a e gi wi a kari fu taki nanga en na ini begi, èn a e pramisi wi taki a o arki den begi fu wi èn taki a o gi wi en santa yeye fu yepi wi (Psalm 65:2; Lukas 11:13). San moro prenspari, na taki a seni en Manpikin di a  lobi so te, kon na grontapu fu gi en libi leki wan lusu-paiman so taki wi kan kon fri fu sondu nanga dede. A lobi di Yehovah sori gi wi, tranga trutru!​—Leisi Yohanes 3:16; Romesma 5:8.

3. (a) San wi musu du efu wi wani taki Gado tan lobi wi? (b) Sortu prenspari sani wi musu aksi wisrefi, èn pe wi kan feni piki tapu na aksi dati?

3 Yehovah wani taki wi kisi wini fu têgo fu a lobi fu en. Ma wi srefi musu bosroiti efu wi wani dati. Gado Wortu e sori taki wi musu du wan sani  efu wi wani taki Gado tan lobi wi (Yudas 20, 21). A musu de krin fu si taki wi abi warderi gi a lobi di Yehovah e sori gi wi. Dati meki wi musu aksi wisrefi a prenspari sani disi: ’Fa mi kan sori taki mi lobi Gado?’ Wi e si a piki tapu na aksi disi na ini den wortu di na apostel Yohanes ben skrifi nanga yepi fu santa yeye: „Te wi lobi Gado, dan wi o hori den komando fu en. Toku den komando fu en no de wan hebi” (1 Yohanes 5:3). A bun te wi e luku finifini san den wortu disi wani taki, fu di wi wani sori wi Gado taki wi lobi en fu tru.

SAN A WANI TAKI FU „LOBI GADO”?

4, 5. Fruteri san meki taki yu bigin lobi Yehovah.

4 Na ini 1 Yohanes 5:3 na apostel Yohanes e taki fu a dipi lobi di ibriwan fu wi musu abi gi Gado. Yu sabi ete o ten yu bigin lobi Yehovah?

Te wi gi wisrefi abra na Yehovah èn te wi teki dopu, dan wi e bigin wan libi pe wi e gi yesi na Yehovah fu di wi lobi en

5 Prakseri fa a ben de di yu kon sabi den tru tori fu Yehovah èn den sani di a o du, èn di yu bigin poti bribi na ini En. Yu kon frustan taki aladi yu gebore leki wan sondu sma di no ben sabi Gado, toku Yehovah meki Krestes opo a pasi gi yu fu kisi a libi sondro sondu di Adam ben lasi, èn fu libi fu têgo (Mateyus 20:28; Romesma 5:12, 18). Yu bigin frustan sortu bigi sani Yehovah du di a meki en Manpikin di a lobi so te, kon na grontapu fu dede gi yu. A sani disi ben naki yu ati, èn yu bigin lobi a Gado di sori so furu lobi gi yu.​—Leisi 1 Yohanes 4:9, 10.

6. Fa wi e sori taki wi abi trutru lobi gi wan sma? San yu du fu di yu lobi Gado?

 6 Ma a lobi di yu ben abi gi Yehovah na a bigin musu kon moro tranga. Lobi a no wan firi nomo. Te wi abi trutru lobi gi Gado, dan wi no e taki nomo: „Mi lobi Yehovah.” Neleki fa a de nanga trutru bribi, na so a de tu taki te wi abi trutru lobi gi Gado, dan dati o de fu si na den sani di wi e du (Yakobus 2:26). Te wi lobi wan sma, dan wi o du sani di a feni bun. Sobun, di yu bigin lobi Yehovah, dan yu kisi na angri fu libi na wan fasi di yu hemel Tata feni bun. Yu na wan dopu Kotoigi? Efu dati de so, dan a tranga lobi di yu kon abi gi Gado meki taki yu teki wan tumusi prenspari bosroiti. Yu gi yusrefi abra na Yehovah fu du a wani fu en, èn yu teki dopu leki bakapisi fu dati. (Leisi Romesma 14:7, 8.) Te wan sma gi ensrefi abra na Yehovah, dan a o abi fu du a sani disi di na apostel Yohanes e taki now.

„WI O HORI DEN KOMANDO FU EN”

7. San na wan tu fu den komando fu Gado, èn san a wani taki fu gi yesi na den?

7 Yohanes e sori san wi o du te wi lobi Gado: „Wi o hori den komando fu en.” San na den komando fu Gado? Na ini en Wortu, Bijbel, Yehovah e gi wi difrenti komando di e taigi wi krin san a e fruwakti fu wi. Fu eksempre, a e taigi wi taki wi no musu kon drungu, wi no musu libi wan huru libi, wi no musu anbegi falsi gado, wi  no musu fufuru, èn wi no musu lei (1 Korentesma 5:11; 6:18; 10:14; Efeisesma 4:28; Kolosesma 3:9). Wan sma di e gi yesi na den komando fu Gado, e hori ensrefi na den wet fu Bijbel di e sori wi krin san Gado e aksi fu wi.

8, 9. Fa wi kan kon sabi san Yehovah feni bun, srefi na ini situwâsi pe Bijbel no abi wan wet di e sori krin san wi musu du? Gi wan eksempre.

8 Ma efu wi wani taki Yehovah breiti nanga wi, dan wi no musu gi yesi soso na den komando fu en di e sori wi krin san a e fruwakti fu wi. Yehovah no e poti wan lo wet gi wi fu sori wi fa wi musu libi. Dati meki ibri dei wi kan miti nanga situwâsi pe Bijbel no e sori wi krin san wi musu du. Fa wi kan kon sabi san na a wani fu Yehovah na ini den sortu situwâsi dati? Bijbel e sori krin fa Gado e denki. Te wi e studeri Bijbel, dan wi e leri san Yehovah lobi èn san a no lobi kwetikweti. (Leisi Psalm 97:10; Odo 6:16-19.) Wi e kon frustan fa Yehovah wani taki wi musu denki èn fa a wani taki wi musu tyari wisrefi. O moro wi e kon sabi den fasi fu Yehovah èn a wani fu en, o moro wi sa meki a denki fu en tiri wi te wi e teki bosroiti èn te wi e du sani. Sobun, awansi wi e miti nanga situwâsi pe Bijbel no e taigi wi krin san fu du, toku nofo tron wi kan kon sabi „san na a wani fu Yehovah”.​—Efeisesma 5:17.

9 Fu eksempre, Bijbel no abi wan komando di e taigi wi krin taki wi no musu luku felem noso  telefisi programa pe sma e du ogri-ati sani, noso pe sma e libi wan huru libi. Ma a de so trutru taki wi abi wan wet fanowdu di e taigi wi krin fu no luku den sortu sani dati? Wi sabi fa Yehovah e denki fu den sortu tori disi. A Wortu fu en e taigi wi krin: „Efu wan sma lobi ogridu, dan Gado no lobi en kwetikweti” (Psalm 11:5). Bijbel e taki tu: „Gado o krutu huruman nanga sutaman” (Hebrewsma 13:4). Te wi e poti prakseri na den wortu dati di skrifi nanga yepi fu santa yeye, dan wi kan kon sabi krin san na a wani fu Yehovah. Dati meki wi no e luku felem noso programa pe den sortu sani di wi Gado no lobi kwetikweti, de fu si krinkrin. Wi sabi taki Yehovah e prisiri te wi e wai pasi gi den fisti gwenti dati di a grontapu disi e si leki bun fasi fa den kan abi prisiri. *

10, 11. Fu san ede wi e gi yesi na Yehovah, èn fa wi e du dati?

10 San na a moro prenspari sani di e meki taki wi e gi yesi na den komando fu Gado? Fu san ede wi wani meki muiti ibri dei fu libi na wan fasi di e kruderi nanga a denki fu Gado? Wi no wani gi yesi na Gado soso fu di wi no wani kisi strafu, noso fu di wi wani wai pasi gi den takru bakapisi di libisma e kisi te den e trangayesi Gado (Galasiasma 6:7). Na presi fu dati, wi e gi yesi na Yehovah fu di wi e si dati leki wan tumusi moi okasi  fu sori en taki wi lobi en. Neleki fa wan pikin e du muiti fu sorgu taki en papa breiti nanga en, na so wi wani du ala muiti tu fu sorgu taki Yehovah breiti nanga wi (Psalm 5:12). Yehovah na wi Tata, èn wi lobi en. Noti e gi wi moro prisiri, leki fu sabi taki wi e libi na wan fasi di e meki taki ’Yehovah lobi wi’.​—Odo 12:2.

11 Sobun, te wi e gi yesi na Yehovah, dan wi no e si dati leki wan hebi. Wi no e gi yesi tu soso na ini spesrutu situwâsi, noso te wi e fruwakti fu kisi wini. * Wi no e luku fosi na sortu komando wi o gi yesi èn sortuwan wi o trangayesi. Nôno, wi no o gi yesi na Gado soso te a makriki gi wi, ma wi o ’gi yesi nanga wi heri ati’ (Romesma 6:17). Wi abi a srefi denki leki a psalm skrifiman di ben skrifi: „Mi o prisiri nanga den komando fu yu di mi lobi” (Psalm 119:47). Iya, wi lobi fu gi yesi na Yehovah. Wi e frustan taki wi musu gi yesi na en ala ten, èn na ini ala sani, fu di a e frudini dati (Deuteronomium 12:32). Wi wani taki Yehovah musu taki a srefi sani fu wi di a Wortu fu en e taki fu Noa. Luku san Bijbel e taki fu a reti-ati famiri-edeman disi di ben gi yesi na Gado furu yari langa fu di a ben lobi En: „Noa du ala san Gado taigi en fu du. A du leti so.”​—Genesis 6:22.

12. O ten wi e meki Yehovah en ati prisiri?

 12 Fa Yehovah feni en te wi e gi yesi na en nanga wi heri ati? A Wortu fu en e taki dati te wi e gi yesi na en, dan dati e meki en „ati prisiri” (Odo 27:11). A de so trutru taki na ati fu a Moro Hei Masra fu hemel nanga grontapu e prisiri te wi e gi yesi na en? Iya, a tru, èn Yehovah abi leti fu prisiri! Yehovah meki wi leki sma di kan teki den eigi bosroiti. Disi wani taki dati wi kan bosroiti efu wi o gi yesi na en, noso efu wi no o du dati (Deuteronomium 30:15, 16, 19, 20). Te wi e bosroiti fu gi yesi na Yehovah fu di wi lobi en nanga wi heri ati, dan wi hemel Tata e prisiri trutru (Odo 11:20). Boiti dati, wi e bosroiti fu abi a moro bun fasi fu libi.

„DEN KOMANDO FU EN NO DE WAN HEBI”

13, 14. Fu san ede wi kan taki dati ’den komando fu Gado no de wan hebi’? Gi wan agersitori.

13 Na apostel Yohanes e fruteri wi wan moi sani fu den komando fu Yehovah: „Den komando fu en no de wan hebi.” * Yehovah no e fruwakti tumusi furu fu wi, èn den komando fu en no de wan hebi. Sobun, sondu libisma man gi yesi na den wet fu en.

 14 Luku na agersitori disi. Wan bun mati fu yu e aksi yu fu yepi en froisi go na wan tra oso. A abi furu dosu di a musu tyari go drape. Sonwan fu den lekti nofo so taki wán sma nomo kan opo den. Ma trawan hebi so te taki tu sma musu opo den. A mati fu yu e sori yu den dosu di a wani taki yu opo. Yu denki taki a ben o aksi yu fu opo den dosu di a sabi taki den hebi tumusi gi yu? Nôno. A no ben o wani taki yu wawan opo den dosu dati, fu di a no wani taki yu kisi mankeri. Na so a de tu taki wi lobi-ati Gado no e aksi wi fu hori wisrefi na komando di e aksi tumusi furu fu wi (Deuteronomium 30:11-14). Noiti a ben o aksi wi fu tyari so wan hebi lai. Yehovah sabi den swakifasi fu wi, bika a „sabi heri bun fa wi meki, èn a e hori na prakseri taki na fu doti wi meki”.​—Psalm 103:14.

15. Fu san ede wi kan de seiker taki den komando fu Yehovah e tyari furu wini kon gi wi?

15 Den komando fu Yehovah no de wan hebi kwetikweti. Wi o kisi furu wini te wi e gi yesi na den. (Leisi Yesaya 48:17.) Dati meki Moses ben kan taigi den Israelsma fu owruten: „Yehovah taigi wi fu hori ala den wèt disi. Na so wi o abi lespeki gi Yehovah wi Gado. Ala ten sani o waka bun gi wi, èn wi o tan na libi, soleki fa wi tan na libi teleki tide” (Deuteronomium 6:24). Wi kan de seiker tu taki Yehovah ben abi a bun fu wi na prakseri di a gi wi den komando fu en. Iya, a  wani taki sani waka bun nanga wi fu têgo. A sani dati no e fruwondru wi, a no so? Yehovah na wan Gado di koni pasa marki (Romesma 11:33). Dati meki a sabi san moro bun gi wi. Boiti dati, Yehovah srefi na lobi (1 Yohanes 4:8). Lobi, a moro prenspari fasi fu en, abi krakti tapu ala sani di a e taki èn e du. Ala den komando di a gi den futuboi fu en, e sori taki a lobi den trutru.

16. Fa a du kon taki wi kan tan gi yesi na Gado, aladi na ogri grontapu disi e suku fu abi krakti na wi tapu, èn aladi wi abi sondu?

16 Disi no wani taki dati a makriki fu gi yesi na Gado. Wi musu du tranga muiti fu sorgu taki na ogri grontapu disi di „de na ini a makti fu na ogriwan” no abi krakti na wi tapu (1 Yohanes 5:19). Wi musu feti tu nanga den sondu firi fu wi di e gi wi deki-ati fu trangayesi den wet fu Gado (Romesma 7:21-25). Ma a lobi di wi abi gi Gado kan yepi wi fu wini a strei. Yehovah e blesi den wan di e gi yesi na en fu di den wani sori en taki den lobi en. A e gi en santa yeye na „den wan di e gi yesi na en leki tiriman” (Tori fu den apostel 5:32). A yeye dati e yepi wi fu kweki moi fasi di kan yepi wi fu tan gi yesi na Gado.​—Galasiasma 5:22, 23.

17, 18. (a) Na sortu sani wi o poti prakseri na ini a buku disi, èn san wi musu hori na prakseri te wi e du dati? (b) San wi o luku na ini a tra kapitel?

17 Na ini a buku disi, wi o poti prakseri na den gronprakseri fu Yehovah, na a fasi fa a wani taki  wi tyari wisrefi, èn na furu tra sani di e sori san na a wani fu en. Te wi e du dati, dan a bun fu hori wan tu prenspari sani na prakseri. Hori na prakseri taki Yehovah no e dwengi wi fu gi yesi na den wet nanga den gronprakseri fu en. A wani taki wi gi yesi na en nanga wi heri ati. No frigiti taki Yehovah e aksi wi fu libi na wan fasi di o tyari furu wini kon gi wi nownow kaba, èn di o meki wi kisi têgo libi na ini a ten di e kon. No frigiti tu taki te wi e gi yesi na Yehovah nanga wi heri ati, dan wi e sori en taki wi lobi en trutru.

18 Fu yepi wi fu kon sabi san bun èn san ogri, Yehovah gi wi wan konsensi. Ma efu wi wani taki a konsensi fu wi tiri wi na a yoisti fasi, dan a musu wroko bun. Wi o luku a tori dati na ini a tra kapitel.

^ paragraaf 9 Luku kapitel 6 fu a buku disi di e tyari kon na krin fa wi kan abi prisiri na wan fasi di fiti.

^ paragraaf 11 Srefi den ogri yeye kan gi yesi aladi den no wani du dati trutru. Di Yesus ben taigi den ogri yeye fu komoto na sma tapu, dan den ben abi fu saka densrefi na en ondro èn den ben musu gi yesi na en, aladi den no ben wani du dati trutru.​—Markus 1:27; 5:7-13.

^ paragraaf 13 A Griki wortu di vertaal nanga „hebi” na 1 Yohanes 5:3 vertaal leki „ogri” na Tori fu den apostel 20:29, 30, èn a abi fu du nanga den takru sma di ben fadon komoto na bribi. Den sma disi ben e taki „sani di no tru”, èn den ben e pruberi fu kori trawan.