Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 KAPITEL 7

Yu e si a libi soleki fa Gado e si en?

Yu e si a libi soleki fa Gado e si en?

„Yu na a sma di e gi libi.”​—PSALM 36:9.

1, 2. (a) Sortu kado di Gado gi wi warti spesrutu na ini a ten disi, èn fu san ede?

WI HEMEL Tata gi wi wan warti kado. A meki wi leki libisma di abi frustan èn di man sori den fasi fu en (Genesis 1:27). Fu di wi kisi a warti kado dati, meki wi man frustan sortu wini Bijbel gronprakseri e tyari kon gi wi. Te wi e hori wisrefi na den gronprakseri dati, dan wi kan kon tron lepi sma di lobi Yehovah, èn wi o tron sma tu di „leri fa fu gebroiki den frustan fu man si sani krin, so taki den kan sabi san bun èn san no bun”.​—Hebrewsma 5:14.

2 Na ini a ten disi a de tumusi prenspari taki wi e frustan krin fa wi musu fiti Bijbel gronprakseri, bika grontapu kon bruya so te, taki wet no de gi ibri situwâsi di kan opo kon na ini wi libi. Wi kan si dati te wi e suku datrayepi, spesrutu te a abi fu du nanga dresi noso oparâsi di abi fu du nanga brudu. A sani disi na wan prenspari sani gi ala sma di wani gi yesi na Yehovah. Ma wi o man teki koni bosroiti te wi e frustan den Bijbel gronprakseri di abi fu du nanga a tori disi. Na so wi o tan abi wan bun konsensi, èn Gado o tan lobi wi (Odo 2:6-11). Meki wi poti prakseri na wan tu fu den gronprakseri disi.

BRUDU NANGA A LIBI SANTA

3, 4. O ten Bijbel tyari kon na krin fu a fosi leisi taki brudu santa? Sortu gronprakseri e horibaka gi a tori dati?

3 Syatu baka di Kain kiri Abel, Yehovah tyari kon na  krin fu a fosi leisi taki brudu nanga a libi abi furu fu du nanga makandra, èn taki den tu sani disi santa srefisrefi. Gado ben taigi Kain: „Arki! A brudu fu yu brada e bari kari mi komoto fu a gron” (Genesis 4:10). Gi Yehovah, a brudu fu Abel ben e prenki a libi fu en di Kain ben teki na wan ogri-ati fasi. Sobun, a brudu fu Abel ben e bari kari Gado fu strafu a sma di ben kiri Abel.​—Hebrewsma 12:24.

4 Baka a frudu fu a ten fu Noa, Gado gi libisma primisi fu nyan meti, ma den no ben musu nyan a brudu fu den meti disi. Gado ben taki: „Te a libi fu wan meti, sobun, a brudu fu en de na ini en skin ete, dan un no musu nyan en. Boiti dati, efu wan sma, noso wan meti kiri unu, dan mi o meki a sma noso a meti pai gi dati” (Genesis 9:4, 5). A wet disi ben de gi ala den bakapikin fu Noa, te na ini a ten disi. A e sori o prenspari a sani de di Gado ben wani sori Kain. A ben wani sori en taki a libi fu ala meti nanga libisma de na ini a brudu fu den. A wet dati e sori tu taki Yehovah, a sma di e gi libi, o aksi frantwortu fu ala libisma di no abi lespeki gi brudu èn gi a libi.​—Psalm 36:9.

5, 6. Fa a Wet di Gado ben gi Moses ben e sori taki libi nanga brudu santa? (Luku sosrefi a faki „ Abi lespeki gi a libi fu meti”.)

5 Den tu prenspari tru tori disi ben de fu feni tu na ini a Wet di Gado ben gi Moses. Lefitikus 17:10, 11 e taki: „Efu wan [sma] . . . nyan brudu, dan mi o drai baka gi a sma dati èn mi o kiri en. Bika a libi fu wan libisani de na ini en brudu. Misrefi seti sani fu unu poti brudu na tapu na altari, so taki unu kan kisi pardon fu sondu. Bika na brudu wawan kan meki taki wan sma kisi pardon fu sondu, fu di libi de na ini a brudu”. *​—Luku a faki „ A krakti  di brudu abi fu meki sma kon bun baka nanga Gado”.

6 Te den no ben o gebroiki a brudu fu wan meti di srakti na tapu na altari, dan den ben musu trowe a brudu dati na tapu a gron. Sobun, na wan agersi fasi den ben e gi a libi baka na a sma fu pe a ben komoto (Deuteronomium 12:16; Esekièl 18:4). Ma luku taki den Israelsma no ben abi fu du ala sortu sani fu puru ibri dropu brudu na ini a skin fu a meti. Solanga den ben srakti a meti na a yoisti fasi èn a brudu ben lon komoto na ini a meti, dan den ben kan nyan a meti nanga wan krin konsensi, fu di den ben sori lespeki gi a sma di e gi libi.

7. Fa David sori taki a ben e si brudu leki wan santa sani?

7 David, „wan man di [Gado] lobi” ben frustan a gronprakseri di abi fu du nanga brudu (Tori fu den apostel 13:22). Wan leisi, di watra ben e kiri David, dan dri fu den man fu en boro go na ini a kampu fu a feanti, èn den teki watra fu wan peti tyari go gi en. Fa David ben feni a sani disi? A aksi den: „Fa mi kan dringi a brudu fu den man di ben kan lasi den libi di den du a sani disi?” David ben feni taki efu a dringi a watra, dan a ben o de neleki a dringi a brudu fu den dri man di ben kan lasi den libi di den go teki a watra gi en. Sobun, aladi watra ben e kiri David, toku a „kanti en trowe na fesi Yehovah”.​—2 Samuel 23:15-17.

8, 9. A de so taki Gado kon abi wan tra denki fu a libi èn fu brudu di a seti a Kresten gemeente? Fruklari dati.

8 Sowan 2400 yari baka di Yehovah ben gi Noa a wet disi, èn sowan 1500 yari baka di a Wetfrubontu ben meki, Yehovah meki a tiri skin fu a fosi Kresten gemeente skrifi a sani disi: „A santa yeye yepi wi fu teki a  bosroiti fu no poti nowan enkri hebi moro na un tapu, leki den prenspari sani disi nomo: un musu tan fara fu sani di gi leki ofrandi na falsi gado, fu brudu, fu meti di sma tyokro kiri èn fu hurudu.”​—Tori fu den apostel 15:28, 29.

9 A de krin fu si taki a tiri skin fu a fosi yarihondro ben kon si taki brudu santa èn taki Gado no ben feni en bun te sma no ben e sori lespeki gi brudu. A sani dati ben de a srefi leki te sma ben e anbegi falsi gado, noso te den ben e du hurudu. Tru Kresten na ini a ten disi e agri nanga a sani disi. Boiti dati, fu di den e hori densrefi na Bijbel gronprakseri, meki den man du san Yehovah feni bun te den e teki bosroiti di abi fu du nanga brudu.

DATRAYEPI DI ABI FU DU NANGA BRUDU

San mi o taigi wan datra fu meki a kon frustan fa mi e denki fu dresi di abi pikinpikin pisi di sma puru fu prenspari pisi fu brudu?

10, 11. (a) Fa Yehovah Kotoigi e si a teki di sma e teki brudu èn sosrefi den fo prenspari pisi fu brudu? (b) O ten Kresten kan teki den eigi bosroiti te a abi fu du nanga brudu?

10 Yehovah Kotoigi sabi taki den wortu „tan fara fu . . . brudu”, wani taki dati den no musu teki brudu, taki den no musu gi tra sma brudu, èn taki den no musu kibri a brudu fu den fu gebroiki en baka. Fu di den abi lespeki gi a wet fu Gado, meki den no e teki den fo prenspari pisi fu brudu. Dati na redi brudu-cel, weti brudu-cel, brudu-plaat, nanga plasma.

11 Na ini a ten disi, sabiman man prati den fo prenspari pisi fu brudu na ini pikinpikin pisi di den e gebroiki na difrenti fasi. Wan Kresten kan teki den pikinpikin pisi disi? A e si den pisi dati leki „brudu”? Ibri sma musu bosroiti gi ensrefi. Na so a de tu nanga datrayepi soleki hemodialyse, hemodilutie, nanga cell-saver pe datra e gebroiki wan sma en eigi brudu, ma a  brudu dati no musu kibri na fesi.​—Luku a pisi di nen „Tra prenspari sani”, ’Fa mi e denki fu den pikinpikin sani di datra e puru fu den fo prenspari pisi fu brudu, èn fu son oparâsi?

12. Fa wi musu si situwâsi pe wi musu teki wi eigi bosroiti, èn san wi musu du na ini den sortu situwâsi dati?

12 Ma yu denki taki a bosroiti di wi e teki na ini den  sortu situwâsi disi no prenspari gi Yehovah? Iya, a sani disi prenspari gi Yehovah, fu di a wani sabi trutru fa wi e denki, èn fu san ede wi e du son sani. (Leisi Odo 17:3; 24:12.) Sobun, baka te wi begi Gado fu tiri wi, èn baka te wi ondrosuku sortu dresi noso datrayepi bun fu teki, dan wi musu arki a konsensi fu wi di e yepi wi fu du san Bijbel e leri (Romesma 14:2, 22, 23). A no de fu taki dati tra sma no musu dwengi wi fu si sani soleki fa den e si sani. Wi no musu aksi trawan tu san den ben o du efu den ben de na ini a situwâsi fu wi. Na ini den sortu tori dati, ibri Kresten musu „tyari en eigi lai”. *​—Galasiasma 6:5; Romesma 14:12; Luku a faki „ Mi e si brudu leki wan santa sani?

DEN WET FU YEHOVAH E SORI TAKI A LOBI WI

13. San den wet nanga den gronprakseri fu Gado e sori wi fu en? Gi wan eksempre.

13 Den wet nanga den gronprakseri di de fu feni na ini Bijbel, e sori taki Yehovah koni èn taki a de wan Papa di lobi en pikin èn di e broko en ede trutru nanga den (Psalm 19:7-11). Aladi a wet di a gi wi fu „tan fara fu . . . brudu”, no ben de fu sori sma fa fu tan gosontu, toku a e kibri wi gi den takru bakapisi di sma e kisi te den e teki brudu (Tori fu den apostel 15:20). Fu taki en leti, furu datra e taki dati „a moro bun fasi” fu du oparâsi na ini a ten disi, na te dati e pasa sondro brudu. Gi tru Kresten, den sani dati e sori taki Yehovah koni pasa marki èn taki a lobi wi leki fa wan papa lobi en pikin.​—Leisi Yesaya 55:9; Yohanes 14:21, 23.

14, 15. (a) Sortu wet ben e sori taki Gado lobi a pipel fu en? (b) Fa yu kan hori yusrefi na den gronprakseri fu den wet di ben e yepi sma fu no kisi mankeri?

 14 Furu fu den wet di Gado ben gi a pipel fu en e sori krin taki a ben wani taki sani waka bun nanga den. Fu eksempre, den Israelsma ben gwenti du sani na tapu a daki fu den oso. Dati meki Gado ben taki dati den ben musu meki wan skotu lontu a daki, so taki sma no ben e kisi ongoloku makriki (Deuteronomium 22:8; 1 Samuel 9:25, 26; Nehemia 8:16; Tori fu den apostel 10:9). Gado ben taigi den tu taki den  ben musu tai den mankaw fu den di ben kan buku sma (Eksodes 21:28, 29). Wan sma di no ben e gi yesi na den wet disi, ben e sori taki a no ben e broko en ede srefisrefi nanga trawan. A sani disi ben kan meki taki a kisi brudu-paiman.

15 Fa yu kan hori yusrefi na den gronprakseri fu den wet disi? We, prakseri na oto fu yu, a fasi fa yu e rèi, den meti fu yu, na oso fu yu, yu wrokope, èn den sani di yu lobi du fu abi prisiri. Na ini son kondre, furu yonguwan e kisi mankeri èn den e lasi den libi. Nofo tron na fu di den e du sani sondro fu denki. Ma yonguwan di wani taki Gado tan lobi den, abi warderi gi a libi. Den no e du sani soso fu man firi switi, aladi den sani dati e tyari takru bakapisi kon. Den no abi a don denki taki ogri no e miti yonguwan. Na presi fu dati, den e wai pasi gi sani di kan meki den kisi mankeri, èn na so den e nyan bun fu den yongu yari.​—Preikiman 11:9, 10.

16. Sortu Bijbel gronprakseri e sori fa Gado e denki fu a puru di sma e puru bere? (Luku sosrefi den sani di skrifi na ondrosei fu a bladzijde disi.)

16 Srefi a libi fu wan pikin di de na ini en mamabere ete, warti na ini Gado ai. Na ini Israel fu owruten, a ben de so taki te wan sma ben naki wan bere-uma, èn na uma disi noso a beibi fu en ben lasi en libi, dan Gado ben si a sma di ben du na ogri dati leki wan kiriman. A sma dati ben „musu dede tu”. (Leisi Eksodes 21:22, 23.) * We, prakseri fa Yehovah musu  firi te a e si fa bun furu beibi e dede ibri yari, fu di sma e puru bere. Nofo tron, sma e du na ogri disi fu di den e denki densrefi nomo, èn fu di den e libi wan yayolibi.

17. Fa yu ben o trowstu wan sma di ben puru bere, fosi a kon leri sabi den wet fu Gado?

17 Ma fa a de nanga wan uma di ben puru bere fosi a kon sabi san Bijbel e leri? A de so taki Gado no o sori sari-ati gi en? Kwetikweti! Fu taki en leti, wan sma di abi trutru berow, kan de seiker taki Yehovah o gi en pardon nanga yepi fu a brudu fu Yesus (Psalm 103:8-14; Efeisesma 1:7). Iya, Krestes srefi ben taki: „Mi no kon fu kari sma di e du san reti, ma mi kon fu gi sondari deki-ati fu abi berow.”​—Lukas 5:32.

NO ABI BITA-ATI GI TRAWAN!

18. San e meki taki sma e kiri trawan, soleki fa Bijbel e sori?

18 Boiti taki wi no musu du ogri nanga trawan, Yehovah no wani taki wi abi bita-ati gi trawan, fu di na a sani dati e meki taki sma e kiri trawan. Na apostel Yohanes ben skrifi: „Ibri sma di e teige en brada, na wan kiriman” (1 Yohanes 3:15). Boiti taki a sma dati no lobi en brada, a e winsi tu taki en brada dede. Kande a sma disi e fruteri ogri-ati lei fu en brada, di ben kan meki taki Gado strafu en brada efu den sani dati ben tru (Lefitikus 19:16; Deuteronomium 19:18-21; Mateyus 5:22). Dati meki a prenspari srefisrefi taki wi no abi nowan enkri bita-ati gi trawan!​—Yakobus 1:14, 15; 4:1-3.

19. Fa wan sma di e hori ensrefi na Bijbel gronprakseri e si den tekst soleki Psalm 11:5 nanga Filipisma 4:8, 9?

19 Den sma di e si a libi soleki fa Yehovah e si en,  èn di wani taki a tan lobi den, e wai pasi gi ala sortu ogridu. Psalm 11:5 e taki: „Efu wan sma lobi ogridu, dan Gado no lobi en kwetikweti.” A tekst dati no e sori nomo fa Gado e denki, ma a e sori wi fa wi musu  libi. A tekst disi e gi sma di lobi Gado a deki-ati fu no luku felem noso tra sani pe sma e du ogri. Boiti dati, Bijbel e taki dati Yehovah na „a Gado fu freide”, èn a sani disi e gi den futuboi fu en deki-ati fu prakseri sani di e meki sma sori lobi, sani di bun, èn sani di warti fu sma prèise den, fu di den sani dati e tyari freide kon.​—Leisi Filipisma 4:8, 9.

TAN FARA FU ORGANISÂSI DI ABI BRUDU-PAIMAN

20-22. Sortu bosroiti Kresten e teki te a abi fu du nanga grontapu, èn fu san ede?

20 Gi Gado, a heri grontapu fu Satan abi brudu-paiman. A politiek sistema fu en di Bijbel e prenki leki ogri-ati meti, kiri milyunmilyun sma na wan ogri-ati fasi, sosrefi furu fu den futuboi fu Yehovah (Danièl 8:3, 4, 20-22; Openbaring 13:1, 2, 7, 8). Den bisnisman nanga den sabiman wroko makandra nanga den tirimakti disi fu meki den moro ogri-ati fetisani, èn na so den e meki bun furu moni. A sani disi e sori krin taki „heri grontapu de na ini a makti fu na ogriwan”!​—1 Yohanes 5:19.

21 Fu di den bakaman fu Yesus „no de wan pisi fu grontapu”, meki den no e bumui nanga politiek èn nanga den orloku fu a grontapu disi. Na so den e sorgu taki den no e kisi brudu-paiman (Yohanes 15:19; 17:16). * Neleki Krestes, den no e du ogri baka nanga sma di e frufolgu den. Na presi fu dati, den e sori lobi gi den feanti fu den, èn den e begi srefi gi den.​—Mateyus 5:44; Romesma 12:17-21.

 22 Ma san moro prenspari, na taki tru Kresten e tan fara fu „Babilon a Bigiwan”, di e prenki ala den falsi kerki na grontapu. Na organisâsi disi abi moro bigi brudu-paiman. Gado Wortu e taki: „Na ini a foto disi den feni a brudu fu den profeiti, a brudu fu den santawan èn a brudu fu ala den wan di sma kiri na grontapu.” Dati meki Bijbel e warskow wi: „Komoto drape, mi pipel.”​—Openbaring 17:6; 18:2, 4, 24.

23. San a wani taki fu komoto na ini Babilon a Bigiwan?

23 Te wan sma e komoto na ini Babilon a Bigiwan, dan dati no wani taki nomo taki a e puru en nen fu a kerki disi. So wan sma e tegu tu gi ala takru sani di falsi anbegi feni bun, èn e horibaka gi. Dati wani taki dati so wan sma e wai pasi gi hurudu, a no e bumui srefisrefi nanga politiek, èn a no e feti fu kon  gudu. (Leisi Psalm 97:10; Openbaring 18:7, 9, 11-17.) Nofo tron na den sani disi e meki taki sma e kiri trawan!

24, 25. (a) Fa Gado man sori sari-ati gi wan sma di abi brudu-paiman, ma di abi berow? (b) Sortu sani di Gado ben seti na ini owruten disi e meki yu prakseri?

24 Fosi wi kon sabi a tru anbegi, ibriwan fu wi ben e horibaka na difrenti fasi gi a sistema fu Satan. Sobun, wi alamala kisi brudu-paiman. Ma wi kenki wi libi, wi kon abi bribi na ini a lusu-paiman fu Krestes, èn wi gi wisrefi abra na Gado. Dati meki Gado gi wi pardon èn a e kibri wi gi sani di kan pori a matifasi di wi abi nanga en (Tori fu den apostel 3:19). A kibri di Gado e gi wi e memre wi na den loweman-foto di ben de na ini Bijbel ten.​—Numeri 35:11-15; Deuteronomium 21:1-9.

25 Fa a seti dati ben e wroko? Efu wan Israelsma ben kiri wan sma, ma a no ben du dati fu espresi, dan a ben musu lowe go na wan fu den loweman-foto. Baka te den krutuman fu a foto ben luku a tori, dan a kiriman disi ben musu tan na ini a loweman-foto, teleki a granpriester dede. Baka dati, a ben o de fri fu libi na wan tra presi. A tumusi moi eksempre disi e sori krin taki Yehovah abi sari-ati, èn taki a libi warti trutru gi en! Gado ben seti den loweman-foto fu owruten fu kibri sma, na so Gado seti wan sani fu kibri wi na ini a ten disi. Dati na a frulusu-ofrandi fu Krestes. Efu wi pasa den wet fu Gado di e sori taki brudu nanga a libi santa, ma wi no du dati fu espresi, dan a seti disi e kibri wi so taki wi no dede. Yu abi warderi gi a seti dati? Fa yu kan sori taki yu abi warderi gi en? Wan fasi fa yu kan du dati, na te yu e gi sma wan kari fu kisi wini fu a seti fu Gado fu kibri sma, spesrutu fu  di a „bigi banawtu” e kon moro krosibei.​—Mateyus 24:21; 2 Korentesma 6:1, 2.

PREIKI A KOWNUKONDRE BOSKOPU FU SORI TAKI YU ABI WARDERI GI A LIBI

26-28. Fa a situwâsi fu wi gersi a di fu a profeiti Esekièl? San wi musu du so taki Gado tan lobi wi?

26 A situwâsi fu a pipel fu Gado na ini a ten disi, e meki wi prakseri a situwâsi fu Esekièl. Yehovah ben gi a profeiti disi a wroko fu dini leki wan waktiman gi na oso fu Israel. Gado ben taki: „Yu musu arki den sani di mi e taigi yu èn yu musu warskow den gi mi.” Efu Esekièl no ben o gi yesi na a komando disi, dan a ben o kisi brudu-paiman, fu di furu sma ben o dede te Gado ben o krutu Yerusalem (Esekièl 33:7-9). Ma Esekièl gi yesi na Gado, èn na so a no kisi brudu-paiman.

27 Heri esi, a grontapu fu Satan sa kisi pori. Dati meki Yehovah Kotoigi e si en leki wan plekti èn leki wan grani fu fruteri sma a Kownukondre boskopu èn fu ’a dei fu Gado en atibron’ (Yesaya 61:2; Mateyus 24:14). Yu e teki prati doronomo na a tumusi prenspari wroko disi? Na apostel Paulus ben e si a preikiwroko fu en leki wan seryusu sani. Dati meki a ben kan taki: „Mi no abi nowan brudu-paiman, bika mi no hori noti na baka. Iya, mi fruteri unu ala sani di Gado wani libisma fu du” (Tori fu den apostel 20:26, 27). A bun te wi e teki a moi eksempre disi!

28 A no de fu taki dati efu wi wani taki Yehovah tan lobi wi, dan a no nofo te wi e si brudu nanga a libi na a fasi fa en e si den. Ma a de fanowdu tu taki wi e tan de sma di krin èn di santa soleki fa a wani. Wi o taki fu a tori dati na ini a tra kapitel.

^ paragraaf 5 Gado ben taki: „A libi fu wan libisani de na ini en brudu.” Luku san wan tijdschrift e taki fu den wortu dati: „Den wortu dati tru, fu di ibriwan fu den difrenti brudu-cel prenspari fu man tan na libi” (Scientific American).

^ paragraaf 12 Luku na Ontwaakt! fu augustus 2006, bladzijde 3-4, 5-9 èn 10-12, di Yehovah Kotoigi tyari kon na doro.

^ paragraaf 16 Skrifiman fu Bijbel wortubuku e taki dati te yu e luku den wortu fu Eksodes 21:23, dan „a no kan taki den abi fu du soso nanga na uma di e kisi mankeri”. Luku tu taki Bijbel no e taki srefisrefi taki Yehovah o luku o bigi a pikin na ini a mamabere de, te a o krutu wan sma.

^ paragraaf 70 Efu yu wani sabi moro fu a tori disi, dan luku a pisi di nen „Tra prenspari sani”, ’Fa mi e denki fu den pikinpikin sani di datra e puru fu den fo prenspari pisi fu brudu, èn fu son oparâsi?

Kon sabi moro

STUDIE-WAKTITOREN

Fu san ede wi musu de santa?

A de so taki yu no e frustan a Bijbel buku Lefitikus? A de so taki yu no feni en wan span buku? A Bijbel buku Lefitikus abi wan tu moi tori di kan yepi yu fu anbegi Gado na wan santa fasi.