Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 TRA PRENSPARI SANI

Fa mi e denki fu den pikinpikin sani di datra e puru fu den fo prenspari pisi fu brudu, èn fu son oparâsi?

Fa mi e denki fu den pikinpikin sani di datra e puru fu den fo prenspari pisi fu brudu, èn fu son oparâsi?

Brudu abi fo prenspari pisi. Dati na redi brudu-cel, weti brudu-cel, brudu-plaat, nanga plasma. Datra e puru pikinpikin sani na ini den fo prenspari pisi disi. Fu eksempre, redi brudu-cel abi na eiwit hemoglobine. Datra e gebroiki son dresi di meki fu a hemoglobine fu libisma noso fu meti, fu dresi sma di no abi nofo redi brudu-cel, noso di lasi tumusi furu brudu.

Pikinmoro 90 procent fu a plasma na watra, èn a abi bun furu hormoon, sowtu, enzym, vitamine, sukru nanga tra sani di a skin abi fanowdu fu man tan gosontu. Plasma abi sosrefi stollingsfactor (dati na sani di e meki taki a brudu no e tan lon te wan sani koti wan sma, noso te a kisi mankeri). A plasma abi sosrefi sani di e yepi a skin fu feti teige  siki, èn a abi eiwit soleki albumine. Efu wan sma kisi wan siki, dan datra kan spoiti na eiwit gammaglobuline gi en. Den e puru na eiwit disi di lai antistof fu feti teige wan siki, fu a brudu plasma fu sma di kon betre kaba fu a siki dati. Datra kan puru eiwit soleki interferon nanga interleukine na ini weti brudu-cel, fu dresi virusinfectie nanga kanker.

Kresten mag teki dresi di meki nanga pikinpikin sani di datra puru fu den fo prenspari pisi fu brudu? Bijbel no e taki finifini fu a tori disi. Dati meki ibriwan fu wi musu meki en konsensi tiri en fu teki wan bosroiti di Gado feni bun. Kande son sma o weigri ala dresi di meki fu den pikinpikin sani disi. Den sma disi ben kan feni taki a Wet di Gado ben gi Israel ben e taki dati te wan sma ben srakti wan meti, dan a ben musu ’trowe a brudu na gron’ (Deuteronomium 12:22-24). Toku son sma di e weigri fu teki brudu, noso wan fu den prenspari pisi fu brudu, e bosroiti fu teki dresi di meki fu den pikinpikin sani di datra e puru fu den fo prenspari pisi fu brudu. Kande den feni taki den pikinpikin sani disi a no brudu di e prenki a libi fu wan meti, noso fu wan sma.

Te wi musu bosroiti efu wi o teki dresi di meki fu den pikinpikin sani di datra e puru fu den fo prenspari pisi fu brudu, dan wi musu aksi wisrefi den sani disi: Te mi bosroiti fu no teki nowan fu den pikinpikin sani disi, dan mi  no kan teki nowan dresi di abi den sani disi, èn di e yepi a skin fu feti virus nanga tra siki, noso di e tapu a brudu fu lon te mi kisi mankeri. Mi hori a sani disi na prakseri? Mi man fruteri wan datra fu san ede mi no e teki sonwan fu den pikinpikin sani di datra e puru fu den prenspari pisi fu brudu, noso fu san ede mi e teki den?

Oparâsi. Hemodilutie na wan fasi fa datra e du oparâsi.  Son leisi den e du oparâsi tu nanga yepi fu wan cell-saver. Na hemodilutie, datra e meki a brudu fu a sma lon go na ini wan saka, dan den e poti wan infuus di abi plasma so taki a sma abi nofo brudu di e lon ete na ini en skin, èn baka dati den e meki a brudu na ini a saka lon go baka na ini a sma skin. Te datra e gebroiki wan cell-saver, dan den e fanga a brudu di wan sma lasi na a oparâsi, èn den e gi en a brudu dati wantewante baka. A masyin e fanga a brudu di e lon te den koti a sma, dan a masyin e krin a brudu dati, èn a e meki a lon go baka na ini a sma skin. Fu di ibri datra kan du den sortu oparâsi disi na en eigi fasi, meki wan Kresten musu kon sabi san a datra fu en abi na prakseri fu du.

Te yu musu bosroiti efu yu o du den sortu oparâsi disi, dan aksi yusrefi: ’Kon meki wi taki dati datra meki pikinso fu mi brudu lon komoto na ini mi skin, èn a brudu tapu fu lon wan pisi ten. A de so taki a konsensi fu mi o gi mi pasi fu si a brudu disi leki wan pisi fu mi skin ete, so taki a no de fanowdu fu ’trowe en na gron’? (Deuteronomium 12:23, 24) Te datra e puru pikinso fu mi brudu fu moksi en nanga wan dresi, èn te den ben o poti a brudu dati baka na ini mi skin, dan a sani dati ben o trobi mi konsensi? Efu mi e weigri ala datrayepi di abi fu du nanga mi eigi brudu, dan mi musu hori na prakseri tu taki mi no o meki datra ondrosuku a brudu fu mi, mi no o meki datra gebroiki hart-longmachine èn mi no o teki datrayepi soleki dialyse. Mi prakseri a sani dati?’

Wan Kresten musu bosroiti gi ensrefi fa a wani taki datra gebroiki en eigi brudu te a musu du oparâsi. Son leisi datra e ondrosuku wan sma brudu, noso den e du son sani pe den e teki pikinso fu a sma brudu, kande fu moksi en nanga wan dresi, èn baka dati den e spoiti en baka gi a sma. Na ini a situwâsi disi tu, wan Kresten musu bosroiti gi ensrefi efu a o meki datra du dati gi en.