Go na content

Go na a tra menu

Go na table of contents

Yehovah Kotoigi

Sranantongo

Meki Gado tan lobi yu

 KAPITEL 5

Fa wi kan hori wisrefi aparti fu grontapu?

Fa wi kan hori wisrefi aparti fu grontapu?

„Unu no de wan pisi fu grontapu.”​—YOHANES 15:19.

1. Na sortu prenspari sani Yesus ben poti prakseri a lasti neti di a ben de na grontapu leki libisma?

A LASTI neti di Yesus ben de na grontapu leki libisma, a sori den bakaman fu en taki a ben e broko en ede trutru nanga den. A ben wani taki sani ben musu waka bun nanga den. A begi srefi fu a tori dati, èn a taigi en Papa: „Mi no e aksi yu fu puru den na grontapu, ma fu kibri den, so taki na ogriwan no kan du den ogri. Den no de wan pisi fu grontapu, neleki fa mi no de wan pisi fu grontapu” (Yohanes 17:15, 16). Na ini a fayafaya begi disi, Yesus sori o furu lobi a abi gi den bakaman fu en èn o prenspari den sani ben de di a ben taigi wan tu fu den a neti na fesi. A ben taki: „Unu no de wan pisi fu grontapu” (Yohanes 15:19). Yesus ben si en leki wan tumusi prenspari sani taki den bakaman fu en ben e tan hori densrefi aparti fu grontapu!

2. San na a „grontapu” di Yesus ben taki fu en?

2 A „grontapu” di Yesus ben taki fu en, abi fu du nanga ala libisma di no sabi Gado. Satan e tiri den sma disi, èn neleki en den e denki densrefi nomo èn den abi heimemre (Yohanes 14:30; Efeisesma 2:2; 1 Yohanes 5:19). Iya, wan sma di de ’wan mati fu a grontapu  dati, na wan feanti fu Gado’ (Yakobus 4:4). Ma fa ala sma di wani taki Gado tan lobi den kan hori densrefi aparti fu grontapu, aladi den e libi na ini grontapu? Wi o luku feifi fasi fa den kan du dati: (1) Den musu tan horibaka gi a Kownukondre fu Gado di abi Krestes leki Kownu, èn den no musu teki sei na ini politiek afersi fu a grontapu disi; (2) den musu kakafutu gi a yeye fu grontapu; (3) den musu weri krosi di fiti èn den musu moi densrefi na wan fasi di fiti; (4) den no musu feti baka gudu; (5) den musu sorgu taki den abi ala den sani di Gado gi den fu feti.

TAN HORIBAKA GI GADO KOWNUKONDRE ÈN NO TEKI SEI NA INI POLITIEK

3. (a) Fa Yesus ben e si den politiek afersi fu a ten fu en? (b) Fu san ede wi kan taki dati den salfu bakaman fu Yesus e teki presi gi a Kownukondre? (Taki sosrefi fu den sani di skrifi na ondrosei fu bladzijde 59.)

3 Yesus no ben e teki prati na den politiek afersi fu en ten, ma a ben e poti ala en prakseri na a wroko di a ben e du fu preiki fu Gado Kownukondre. A ben o tron Kownu fu a hemel tirimakti disi (Danièl 7:13, 14; Lukas 4:43; 17:20, 21). Dati meki di Yesus ben e tanapu na fesi Pontius Pilatus, a Tiriman fu Rome, dan a ben kan taki nanga leti: „Mi kownukondre no de fu a grontapu disi” (Yohanes 18:36). Den reti-ati bakaman fu Krestes di e teki na eksempre fu en e tan horibaka gi en èn gi a Kownukondre fu en. Den e fruteri sma na heri grontapu fu a Kownukondre dati tu (Mateyus 24:14). „Wi na boskopuman di e teki presi gi Krestes”, na so na apostel Paulus ben skrifi. „Leki sma di e teki presi gi Krestes,  wi e begi unu: ’Kon bun baka nanga Gado.’” *​—2 Korentesma 5:20.

4. Fa ala tru Kresten sori taki den e tan horibaka gi Gado Kownukondre? (Luku a faki „ Den fosi Kresten no ben e teki sei na ini grontapu afersi”.)

4 Sma di e teki presi gi a kondre fu den na tra kondre, no e bumui na ini den afersi fu a kondre dati. Den no e teki sei tu na ini den afersi fu a kondre dati, ma den e horibaka gi a tirimakti fu den eigi kondre. Na so a de tu nanga den salfu bakaman fu Krestes di ’o tan na hemel’ (Filipisma 3:20). Fu taki en leti, fu di den e preiki a Kownukondre boskopu fayafaya, meki den yepi milyunmilyun fu den „tra skapu” fu Krestes fu „kon bun baka nanga Gado” (Yohanes 10:16; Mateyus 25:31-40). Na agersi fasi, den „tra skapu” disi e horibaka gi den salfu brada fu Krestes. Ala tu grupu e horibaka gi a Mesias Kownukondre leki wán ipi, èn den no e bumui srefisrefi na ini den politiek afersi fu grontapu.​—Leisi Yesaya 2:2-4.

5. Fa a Kresten gemeente de tra fasi leki owruten Israel? Fa a difrenti disi de fu si?

5 Soleki fa wi si, dan tru Kresten no e bumui na ini den politiek afersi fu grontapu, fu di den e horibaka gi Krestes. Ma dati a no a wan-enkri sani di e meki taki den no e du dati. Tra fasi leki Israel fu owruten di ben e tan na ini wan kondre di Gado ben gi den, wi abi Kresten brada nanga sisa na heri grontapu (Mateyus 28:19; 1 Petrus 2:9). Sobun, efu wi ben o horibaka gi politiek partèi fu wi kondre, dan wi no ben o man fruteri sma  taki Gado Kownukondre na a wan-enkri howpu gi libisma. Wánfasi no ben o de tu na mindri wi Kresten brada nanga sisa (1 Korentesma 1:10). Boiti dati, te orloku ben o de, dan wi ben o feti teige wi Kresten brada nanga sisa di Yesus taigi wi fu lobi (Yohanes 13:34, 35;  1 Yohanes 3:10-12). Dati meki Yesus ben abi leti di a taigi den disipel fu en taki den no musu teki prati na feti. A taigi den tu taki den musu lobi den feanti fu den.​—Mateyus 5:44; 26:52; luku a faki „ Mi e hori misrefi aparti fu grontapu afersi?

6. Fa wan Kresten di gi ensrefi abra na Gado musu si gran lanti?

6 Wi leki tru Kresten no gi wisrefi abra na wan  libisma, na wan organisâsi, noso na wan kondre. Nôno, wi gi wisrefi abra na Gado. Luku san 1 Korentesma 6:19, 20 e taki: „Unu no de fu unsrefi, bika Gado pai gi unu di a bai unu.” Fu dati ede, den bakaman fu Yesus e gi gran lanti den sani di a abi reti na tapu. Sobun, den e gi grani na lanti, den e pai belasting-moni, èn den e gi yesi na den wet fu lanti, solanga den no abi fu pasa den wet fu Gado. Ma aladi den e du dati, den e gi „Gado san na fu Gado” (Markus 12:17; Romesma 13:1-7). Dati wani taki dati den e anbegi Gado, den e sori lobi gi en nanga den heri ati, èn den e tan gi yesi na en. Efu a de fanowdu, den de klariklari fu dede gi Gado.​—Lukas 4:8; 10:27; leisi Tori fu den apostel 5:29; Romesma 14:8.

KAKAFUTU GI „A YEYE FU GRONTAPU”

7, 8. San na „a yeye fu grontapu”, èn fa a de fu si taki a yeye dati „de na ini” libisma?

7 Wan tra fasi fa Kresten e tan hori densrefi aparti fu grontapu, na taki den e kakafutu gi a yeye fu a grontapu disi. Paulus ben skrifi: „Wi no kisi a yeye fu grontapu, ma wi kisi a yeye di komopo fu Gado” (1 Korentesma 2:12). A ben taigi den Efeisesma: „Fosi, . . . unu ben e libi leki den sma fu a grontapu disi. Unu ben e gi yesi na a tiriman fu a yeye fu grontapu. A yeye disi na a denki fu grontapu di de leki loktu na wi lontu èn di de na ini den sma di e trangayesi Gado.”​—Efeisesma 2:2, 3.

8 A „yeye” fu grontapu na wan krakti di wi no man si èn a e gi sma deki-ati fu trangayesi Gado. A e meki tu taki ’a lostu fu a skin èn a lostu fu den ai’ basi sma (1 Yohanes 2:16; 1 Timoteyus 6:9, 10). A yeye disi e tesi  libisma fu du san a sondu skin wani èn a e kori sma doronomo. Neleki a loktu na wi lontu, a yeye disi de na ala sei. Boiti dati, a yeye disi „di de na ini” den sma di e trangayesi Gado, e meki taki safrisafri den e kisi fasi di Gado no feni bun. Te fu kaba den sma disi e denki densrefi nomo, den e kisi heimemre, den e feti fu kisi biginen, den e tyari densrefi soleki fa densrefi wani, èn den e opo densrefi teige den wan di e teki fesi. * Fu taki en syatu, a yeye fu grontapu e meki taki safrisafri den fasi fu Didibri e teki rutu na ini libisma ati.​—Yohanes 8:44; Tori fu den apostel 13:10; 1 Yohanes 3:8, 10.

9. Na sortu fasi a yeye fu grontapu kan bigin abi krakti tapu wi ati nanga wi frustan?

9 A yeye fu grontapu kan teki rutu na ini wan sma en ati nanga en frustan? Iya, dati kan. Ma dati kan pasa soso te wi no de na ai. (Leisi Odo 4:23.) Nofo tron a sani disi e bigin sondro fu wi sabi. Kande wi abi mati di wi e si leki bun sma, aladi den no lobi Yehovah trutru (Odo 13:20; 1 Korentesma 15:33). A yeye dati kan bigin abi krakti na yu tapu te yu e leisi buku di no fiti, te  yu e go tapu Internet fu luku porno noso sani fu sma di fadon komoto na bribi, te yu abi prisiri na wan fasi di no fiti, te yu e luku sport pe sma e strei hebi nanga makandra noso te yu e teki prati na den sport dati. Fu taki en leti, iniwan sma, noso iniwan sani di e gi wi deki-ati fu kon abi a denki fu Satan èn fu a grontapu fu en, kan meki taki a yeye fu grontapu abi krakti na wi tapu.

10. Fa wi kan kakafutu gi a yeye fu grontapu?

10 Fa wi kan kakafutu gi a yeye fu grontapu, so taki Gado e tan lobi wi? Wi kan du dati soso te wi e gebroiki den sani di Yehovah seti gi wi, èn te wi e begi en doronomo fu gi wi en santa yeye. Yehovah makti omeni tron moro Didibri èn na ogri grontapu di de na ondro  en makti (1 Yohanes 4:4). Dati meki a prenspari srefisrefi taki wi e begi Yehovah fu man tan krosibei na en!

WERI KROSI DI FITI ÈN MOI YUSREFI NA WAN FASI DI FITI

11. Fa a yeye fu grontapu abi krakti tapu a fasi fa sma e weri krosi?

11 Den krosi di wan sma e weri, a fasi fa a e moi ensrefi, èn a fasi fa a e hori ensrefi krin, na wan tu fu den sani di e sori sortu yeye abi krakti na en tapu. Na ini furu kondre, den krosi di sma e weri now, no fiti srefisrefi. Dati meki wan nyunsuman taki dati dyonsro sma no o man sabi moro suma na wan huru-uma èn suma a no wan. Srefi yongu meisje di no de tini ete, e weri den sortu krosi dati. Wan koranti ben taki: „Den no e syen fu sori ala den skin.” Wan tra gwenti di sma abi, na fu weri syabisyabi krosi. Te sma e weri den sortu krosi dati, dan dati e sori taki den no e broko den ede nanga tra sma. Den krosi dati e sori tu taki den sma disi no abi lespeki gi densrefi.

12, 13. Sortu gronprakseri wi musu hori na prakseri te a abi fu du nanga den krosi di wi e weri èn a fasi fa wi e moi wisrefi?

12 Fu di wi na futuboi fu Yehovah, meki wi wani weri bun krosi di krin èn di fiti gi a yoisti okasi. Ala ten wi musu weri krosi di e sori taki wi e tyari wisrefi „na wan lespeki fasi” èn taki wi de „nanga krin frustan”. Boiti dati, wi musu du „bun sani” soleki fa a fiti mansma nanga umasma „di e taki dati den e anbegi Gado”. A no de fu taki dati wi no e du den sani disi fu meki sma luku wi, ma wi wani taki ’Gado tan lobi wi’ (1 Timoteyus 2:9, 10; Yudas 21). Iya, san wi wani, na taki a moi fu wi musu de ’a sma di wi de dipi na ini wi ati’, fu di dati „warti srefisrefi gi Gado”.​—1 Petrus 3:3, 4.

 13 Hori na prakseri tu taki den krosi di wi e weri kan abi krakti tapu a fasi fa sma e si a tru anbegi. A Griki wortu di vertaal nanga „lespeki fasi”, e sori taki wi e hori a denki nanga den firi fu trawan na prakseri. Dati meki wi no musu de nomonomo fu du sani soleki fa wisrefi wani, ma wi musu hori a konsensi fu trawan na prakseri. San moro prenspari, na taki wi wani gi grani na Yehovah èn na a pipel fu en. Boiti dati, wi wani du „ala sani fu gi Gado glori”, èn na so wi e sori taki wi na dinari fu Gado.​—1 Korentesma 4:9; 10:31; 2 Korentesma 6:3, 4; 7:1.

A fasi fa mi e weri krosi e gi Yehovah grani?

14. Te a abi fu du nanga den krosi di wi e weri èn a fasi fa wi e moi wisrefi, dan sortu sani wi musu aksi wisrefi?

14 Te wi e teki prati na a preikiwroko, noso te wi e go na den Kresten konmakandra, dan a de moro prenspari srefi taki wi e weri bun krosi, taki wi e moi wisrefi na wan fasi di fiti, èn taki wi de krin. Aksi yusrefi den sani disi: ’Den krosi di mi e weri èn a fasi fa mi e moi misrefi, e meki taki sma e luku mi tumusi? Mi e meki trawan firi syen? Mi feni en moro prenspari fu du san mi srefi wani te a abi fu du nanga den tori disi, leki fu du muiti fu kisi frantwortu na ini a gemeente?’​—Psalm 68:6; Filipisma 4:5; 1 Petrus 5:6.

15. Fu san ede Gado Wortu no abi wan lo wet di e taigi wi sortu krosi wi musu weri èn fa wi musu moi wisrefi?

15 Bijbel no abi wan lo wet di e taigi Kresten finifini sortu krosi den musu weri, fa den musu moi densrefi, èn fa den musu sorgu densrefi. Yehovah no wani teki bosroiti gi wi, èn a no wani tapu wi fu gebroiki wi frustan. Na presi fu dati, a wani taki wi tron lepi sma di e hori densrefi na Bijbel gronprakseri èn „di leri fa fu gebroiki den frustan fu man si sani krin, so taki den kan  sabi san bun èn san no bun” (Hebrewsma 5:14). Ma san moro prenspari, na taki Yehovah wani taki wi sori lobi gi en èn gi tra sma. (Leisi Markus 12:30, 31.) Te wi e hori ala den sani dati na prakseri, dan wi sa si taki furu difrenti fasi de fa wi kan weri krosi, èn fa wi kan moi wisrefi. Wi kan si dati te wi e luku den someni koloku futuboi fu Yehovah na heri grontapu di e weri ala sortu moi krosi, awansi pe den de makandra.

NO FETI BAKA GUDU

16. Fa den sani di a yeye fu grontapu e meki sma du, de heri tra fasi leki den sani di Yesus ben leri den bakaman fu en? San wi musu aksi wisrefi?

16 A yeye fu grontapu kan kori wi, èn a e gi milyunmilyun sma deki-ati fu si moni nanga gudu leki sani di e meki sma de koloku. Ma Yesus ben taki: „Srefi te wan sma abi furu gudu, toku den sani di a abi no kan gi en libi” (Lukas 12:15). Yesus no ben taki dati wi no mag abi nowan enkri gudu, noso taki wi no mag abi prisiri. Ma a ben leri den bakaman fu en taki den sma di sa kisi libi èn di sa de koloku trutru, na den wan „di sabi taki den abi Gado fanowdu,” èn den wan di no e feti baka gudu. A matifasi di den sma disi abi nanga Gado na a moro prenspari sani gi den (Mateyus 5:3; 6:22). Aksi yusrefi: ’Mi e bribi den leri fu Yesus trutru, noso a de so taki „a tata fu ala lei” abi krakti na mi tapu? (Yohanes 8:44) Te mi e luku den sani di mi e taki, den sani di mi wani du, èn a fasi fa mi e libi, dan san dati e sori?’​—Lukas 6:45; 21:34-36; 2 Yohanes 6.

17. Kari wan tu wini di sma abi te den no e feti baka gudu.

17 Yesus ben taki: „Na den bun sani di wan sma e du, e sori taki a koni” (Mateyus 11:19). Luku wan tu fu den wini di sma abi te den no e feti baka gudu. Den e kisi  krakti baka, fu di den e teki prati na a Kownukondre diniwroko (Mateyus 11:29, 30). Den no abi tumusi furu sorgu nanga problema, fu di den no e broko den ede tumusi nanga sani. (Leisi 1 Timoteyus 6:9, 10.) Den abi moro ten gi den osofamiri èn gi Kresten brada nanga sisa, fu di den breiti nanga san den abi. A sani disi e meki taki den e sribi switi (Preikiman 5:12). Den de moro koloku, fu di den e du ala san den man fu gi trawan sani (Tori fu den apostel 20:35). Boiti dati, den abi „moro howpu” èn den abi wan korostu firi (Romesma 15:13; Mateyus 6:31, 32). Den blesi disi warti fu tru!

TEKI „ALA DEN SANI DI GADO GI UNU FU FETI”

18. San Bijbel e taki fu a feanti fu wi èn fu a fasi fa a e feti nanga wi?

18 Den sma di e sorgu taki Gado tan lobi den, e kisi kibri tu so taki Satan no kan kori den. Na ogri yeye disi no wani taki Kresten de koloku, èn a no wani taki wi kisi têgo libi (1 Petrus 5:8). Paulus e taki: „Wi no e feti nanga libisma, ma nanga den tirimakti, nanga den wan di abi makti, nanga den tiriman fu a dungru grontapu disi, nanga den ogri yeye na hemel” (Efeisesma 6:12). Na ini a tekst disi, a Griki wortu di vertaal nanga „feti” e sori taki a feanti fu wi no de farawe, kande na ini wan tra kampu. Nôno, wi e feti fesi nanga fesi nanga a feanti fu wi. Boiti dati, den wortu „tirimakti”, „den wan di abi makti”, èn „tiriman” e sori taki den ogri yeye orga bun, èn den de nomonomo fu feti nanga wi.

19. Taki fu den fetisani di wi leki Kresten abi.

19 Aladi wi swaki èn wi no makti leki den ogri yeye,  toku wi kan wini a feti. Fa so? We, wi musu teki ’ala den sani di Gado gi wi fu feti’ (Efeisesma 6:13). Luku san Efeisesma 6:14-18 e taki fu a tori disi: „Fu dati ede, tanapu kánkan èn meki ala sani di tru de leki wan leribuba di tai lontu un mindribere. Retidu musu de leki wan sani di unu e weri fu kibri un borsu. A faya di un abi fu preiki a bun nyunsu fu freide musu de leki susu na un futu. Awinsi san e pasa, un bribi musu de leki wan bigi skelt. Nanga dati unu o man kiri a faya fu ala den peiri di na ogriwan e sutu kon na un tapu. Weri a hèlm fu frulusu na tapu un ede èn teki a feti-owru fu a yeye, dati na Gado Wortu. Tan begi na ala sortu fasi èn begi fayafaya na ibri okasi aladi unu e meki a yeye tiri unu. Dati meki un musu tan na ai doronomo èn begi fayafaya gi ala den santawan.”

20. Fa a situwâsi fu wi e difrenti fu a di fu wan srudati?

20 Fu di na Gado gi wi den fetisani dati, meki den o man kibri wi, solanga wi e weri den ala ten. Son leisi srudati no e feti wan heri pisi ten, ma Kresten e feti doronomo fu man tan na libi. A feti dati sa go doro teleki Gado pori a grontapu fu Satan èn a fringi ala ogri yeye na ini a dipi peti (Openbaring 12:17; 20:1-3). Sobun, horidoro efu yu e feti nanga swakifasi noso takru lostu, bika wi alamala musu „kofu” wi skin fu man tan gi yesi na Yehovah (1 Korentesma 9:27). Iya, na te wi no e feti, wi musu broko wi ede!

21. San na a wan-enkri fasi fa wi kan wini a feti nanga den ogri yeye?

21 Boiti dati, wi no kan wini a feti disi nanga wi eigi krakti. Dati meki Paulus e memre wi taki wi musu begi Yehovah „fayafaya na ibri okasi”. Na a srefi ten, wi musu arki Yehovah. Iya, wi musu studeri a Wortu  fu en, èn wi musu kon makandra doronomo nanga wi Kresten brada nanga sisa di de leki srudati, fu di wi no e feti a feti disi wi wawan! (Fileimon 2; Hebrewsma 10:24, 25) Den sma di e tan gi yesi na Gado na ini ala den situwâsi disi sa wini a feti èn den o man opo taki tu gi a bribi fu den te den e kisi tesi.

DE SREKASREKA FU OPO TAKI GI A BRIBI FU YU

22, 23. (a) Fu san ede wi musu de srekasreka ala ten fu opo taki gi a bribi fu wi, èn san wi musu aksi wisrefi? (b) Na sortu tori wi sa poti prakseri na ini a tra kapitel?

22 „Fu di unu no de wan pisi fu grontapu”, na so Yesus ben taki, „meki grontapu e teige unu” (Yohanes 15:19). Dati meki Kresten musu de klariklari ala ten fu opo taki gi a bribi fu den, ma den musu du dati na wan lespeki fasi èn na wan safri-ati fasi. (Leisi 1 Petrus 3:15.) Aksi yusrefi den sani disi: ’Mi e frustan fu san ede Yehovah Kotoigi son leisi e si sani tra fasi leki fa furu sma e si sani? Te mi musu opo taki gi a bribi fu mi, dan mi man sori taki mi e bribi den sani di Bijbel nanga a koni srafu e leri wi? (Mateyus 24:45; Yohanes 17:17) Te mi musu du san Yehovah feni bun, dan mi abi deki-ati fu de tra fasi leki tra sma?’​—Psalm 34:2; Mateyus 10:32, 33.

23 Ma nofo tron te wi e suku fu hori wisrefi aparti fu grontapu, dan wi e kisi tesi na moro triki fasi. Fu eksempre, soleki fa wi ben si kaba, Satan wani taki den futuboi fu Yehovah tron wan pisi fu grontapu. Dati meki a e gi den deki-ati fu abi prisiri na wan fasi di no fiti. Fa wi kan abi prisiri na wan fasi di fiti èn di o meki wi abi wan krin konsensi? Wi sa poti prakseri na a tori dati na ini a tra kapitel.

^ paragraaf 3 Sensi a Pinksterfesa fu a yari 33, Krestes e tiri leki Kownu fu en gemeente fu salfu bakaman na grontapu (Kolosesma 1:13). Na ini 1914, Krestes tron Kownu fu „a Kownukondre fu grontapu”. Dati meki now, salfu Kresten e dini tu leki sma di e teki presi gi a Mesias Kownukondre.​—Openbaring 11:15.

^ paragraaf 8 Luku A Waktitoren fu 15 maart 2011, bladzijde 8-12.