Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

 KAPITEL 18

Fa Gado pipel e kisi moni fu du a Kownukondre wroko?

Fa Gado pipel e kisi moni fu du a Kownukondre wroko?

FU SAN A KAPITEL E TAKI

Wi o luku fu san ede a pipel fu Yehovah e gi moni fu horibaka gi a preikiwroko èn fa den e du dati

1, 2. (a) San Brada Russell piki wan domri di ben wani sabi pe den Bijbel Ondrosukuman e feni a moni fu du a wroko fu den? (b) San wi o luku na ini a kapitel disi?

WAN leisi wan domri fu a Protestant Kerki kon aksi Brada Charles T. Russell pe den Bijbel Ondrosukuman e feni a moni fu du a wroko fu den.

Brada Russell piki en: „Noiti wi e piki moni na den konmakandra fu wi.”

A domri aksi en: „Ma dan pe unu e feni a moni?”

„Efu mi taigi yu pe wi e feni a moni, yu no o bribi mi”, na so Brada Russell taki. A taki moro fara: „Te sma e kon na den konmakandra fu wi, wi no e meki den poti moni na ini baskita. Ma den e si taki moni de fanowdu fu du a wroko disi èn den e prakseri: ’A zaal disi e kostu moni . . . Fa mi kan gi moni fu horibaka gi a wroko disi?’”

A domri luku Brada Russell èn a no ben wani bribi en.

„Mi e taigi yu krin fa sani de”, na so brada Russell taigi en. „Na dati sma e aksi mi trutru: ’Fa mi kan gi moni fu horibaka gi a wroko disi?’ Te wan sma di abi moni feni taki Masra blesi en, dan a wani gebroiki a moni gi Masra. Ma efu wan sma no abi moni, dan fu san ede wi musu dwengi en fu gi moni?” *

2 Brada Russell ben e taki trutru „fa sani de”. Langa ten kaba Gado pipel abi a gwenti fu gi sani nanga den heri ati fu horibaka gi a tru anbegi. Na ini a kapitel disi wi o poti prakseri na wan tu eksempre na ini Bijbel ten èn na ini a ten disi. Te wi  o luku fa na organisâsi e kisi moni fu du a Kownukondre wroko na ini a ten disi, dan a bun fu aksi wisrefi: ’Fa mi kan horibaka gi a Kownukondre?’

„Meki ibri sma di wani, tyari sani gi Yehovah”

3, 4. (a) San Yehovah sabi fu den anbegiman fu en? (b) Fa den Israelsma horibaka gi a wroko fu bow a tabernakel?

3 Yehovah e frutrow den tru anbegiman fu en. A sabi taki efu den kisi na okasi, den o gi sani nanga prisiri fu horibaka gi a wroko fu en. Meki wi luku tu eksempre fu Israel na ini owruten.

4 Baka di Yehovah frulusu den Israelsma fu Egepte, a taigi den fu bow wan tenti noso wan tabernakel fu anbegi en. Den ben o abi furu sani fanowdu fu meki a tabernakel nanga den sani di ben musu kon na ini. Yehovah taigi Moses fu gi a pipel na okasi fu horibaka gi a wroko dati. A taki: „Meki ibri sma di wani, tyari sani gi Yehovah” (Eks. 35:5). San a pipel du? Prakseri taki no so langa pasa, a pipel disi ben musu du „ibri sortu tranga wroko” leki srafu na ini Egepte (Eks. 1:14). Ma den sori taki den ben wani horibaka gi a wroko trutru. Dati meki den gi gowtu, solfru, nanga tra diri sani. Furu fu den sani disi den ben kisi fu den Egeptesma di ben e basi den fosi (Eks. 12:35, 36). Den Israelsma ben gi moro leki san ben de fanowdu. Dati meki Moses ben musu taigi den fu „no tyari sani moro”.​—Eks. 36:4-7.

5. San den Israelsma du di David gi den na okasi fu horibaka gi a wroko fu bow a tempel?

5 Sowan 475 yari baka dati David gi en eigi „gowtu nanga solfru” fu yepi bow a fosi tempel na grontapu pe sma ben kan go anbegi a tru Gado. A gi den tra Israelsma na okasi tu fu horibaka gi a wroko. A aksi den: „Suma fu unu wani gi Yehovah wan presenti tu?” A pipel ’tyari presenti gi Yehovah nanga den heri ati’ (1 Kron. 29:3-9). Na ini wan begi David sori pe ala den gudu disi komoto. A taigi Yehovah: „Na yu gi wi ala san wi abi èn na den sani di yu ben gi wi, na dati wi e gi yu baka.”​—1 Kron. 29:14.

6. Fu san ede moni de fanowdu gi a wroko di a Kownukondre e du èn sortu aksi e opo kon?

6 Moses nanga David no ben abi fu dwengi  Gado pipel fu gi sani. Na presi fu dati, a pipel ben e gi sani nanga den heri ati. Fa a de na ini a ten disi? Wi sabi heri bun taki moni de fanowdu gi a wroko di Gado Kownukondre e du. Moni de fanowdu fu meki Bijbel nanga tra buku di e taki fu Bijbel, fu bow konmakandra presi nanga bijkantoro èn fu sorgu den presi disi. Moni de fanowdu tu fu yepi brada nanga sisa di kisi fu du nanga rampu. Dati meki den prenspari aksi disi e opo kon: Pe a moni e komoto? Sma musu dwengi den bakaman fu Kownu Yesus fu gi moni fu horibaka gi a wroko?

„Noiti wi sa begi noso aksi libisma fu horibaka gi a wroko disi”

7, 8. Fu san ede a pipel fu Yehovah no e begi sma moni?

7 Brada Russell nanga den mati fu en ben e weigri fu du den srefi sani di den falsi Kresten kerki e du fu feni moni. Na ini a di fu tu Waktitoren di kon na doro, wan pisi ben skrifi di ben nen „Yu wani A Waktitoren?” Drape Brada Russell ben taki: „Wi e bribi taki YEHOVAH e horibaka gi A Waktitoren, èn noiti wi sa begi noso aksi libisma fu horibaka gi a wroko disi. Te a sma di taki: ’Ala a gowtu nanga a solfru fu den bergi na fu mi’, no e sorgu moro taki moni de, dan wi o frustan taki a ten doro fu no tyari a tijdschrift disi kon na doro moro” (Hag. 2:7-9). Now moro leki 130 yari baka dati, A Waktitoren e kon na doro ete èn na organisâsi di e tyari en kon na doro e drai bun ete!

8 A pipel fu Yehovah no e begi sma moni. Den no e piki moni na den konmakandra èn den no e skrifi brifi gi sma fu aksi den moni. Den no e hori bingo, bunkopuseri noso tra sani fu kisi moni. Den e du san A Waktitoren taki langa ten pasa: „Noiti wi ben feni taki a fiti fu begi sma moni gi a wroko fu Masra, soleki fa furu kerki e du . . . Wi feni taki a no bun kwetikweti fu begi moni na den fasi disi na ini a nen fu wi Masra. Wi denki taki Masra no feni a sani disi bun èn a no e blesi den  sma di e gi a moni disi. Boiti dati, a no e blesi a wroko di sma e du nanga a moni disi tu.” *

„Meki ibri sma gi soleki fa a bosroiti na ini en ati”

9, 10. San na wán sani di e meki taki wi e gi sani fu horibaka gi a Kownukondre?

9 Sma no abi fu dwengi wi fu gi sani fu horibaka gi a Kownukondre. Na presi fu dati, wi de klariklari fu gebroiki wi moni nanga den tra sani di wi abi fu horibaka gi Kownukondre afersi. Fu san ede wi de klariklari fu gi sani? Meki wi luku dri sani.

10 (1) Wi e gi sani fu di wi lobi Yehovah èn wi wani du „den sani di e prisiri en” (1 Yoh. 3:22). Yehovah e prisiri trutru nanga wan anbegiman di e gi sani nanga en heri ati. Luku san na apostel Paulus taki fu a fasi fa Kresten musu gi sani. (Leisi 2 Korentesma 9:7.) Wan tru Kresten no gridi fu gi sani èn sma no abi fu dwengi en tu. Ma a e gi sani fu di a „bosroiti na ini en ati” fu du dati. * Sobun, te a e si taki wan nowtu de, dan a e luku san a kan du fu yepi. Yehovah ’lobi sma di e gi sani nanga prisiri’.

Den yonguwan fu wi na ini Mosambik lobi fu gi sani tu

11. Fu san ede wi e gi Yehovah den moro bun sani di wi abi?

11 (2) Wi e gi sani fu di wi wani sori Yehovah taki wi de nanga tangi gi den furu blesi di a e gi wi. Meki wi luku san wi kan leri fu wan fu den wet di Gado ben gi a pipel Israel. (Leisi Deuteronomium 16:16, 17.) Te den man fu Israel ben e go na den dri alayari fesa, dan den ben musu ’gi furu sani fu di Yehovah ben e gi den furu blesi’. Fu dati ede, fosi wan man ben go na wan fu den fesa, a ben musu luku sortu blesi Yehovah gi en. Efu a ben abi warderi gi den blesi disi, a ben o gi Yehovah den moro bun sani di a abi. Na so a de tu taki te wi e prakseri den furu blesi di Yehovah gi wi, dan dati e gi wi deki-ati fu gi en den moro bun sani di wi abi. Den sani di wi e gi nanga wi heri ati, e sori o furu warderi wi abi gi den blesi di Yehovah gi wi. Wan fu den sani di wi kan gi Yehovah, na den gudu di wi abi.​—2 Kor. 8:12-15.

12, 13. (a) Fa a gi di wi e gi sani e sori taki wi lobi a Mesias Kownu? (b) O furu wan sma musu gi?

12 (3) Wi e gi sani fu sori taki wi lobi wi Kownu  Yesus Krestes. Fa so? Luku san Yesus taigi den disipel fu en a lasti neti di a ben de na grontapu. (Leisi Yohanes 14:23.) Yesus taki: „Efu wan sma lobi mi, a o du san mi taki.” Wan fu den sani di Yesus „taki” dati wi musu du, na fu preiki a bun nyunsu fu a Kownukondre na heri grontapu (Mat. 24:14; 28:19, 20). Wi e gi yesi na Yesus te wi e du ala san wi man fu horibaka gi a Kownukondre preikiwroko. Disi wani taki dati wi e gebroiki wi ten, wi krakti nanga den gudu di wi abi fu horibaka gi a wroko disi. Na so fasi wi e sori taki wi lobi a Mesias Kownu.

13 Iya, leki trutru bakaman fu a Kownukondre wi wani horibaka gi a Kownukondre nanga wi heri ati èn dati meki wi e gi moni. O furu wi musu gi? Na wi srefi musu bosroiti dati. Ibri sma musu luku omeni a man gi. Furu fu wi brada nanga sisa no gudu (Mat. 19:23, 24; Yak. 2:5). Ma Yehovah nanga en Manpikin e warderi san den e gi nanga den heri ati, awinsi a no furu. Dati de wan trowstu gi den brada nanga sisa disi.​—Mark. 12:41-44.

Fa wi e kisi moni?

14. San Yehovah Kotoigi ben e taigi sma fosi, te ben e prati den buku fu den?

14 Fosi, te Yehovah Kotoigi ben e prati buku di e taki fu Bijbel, dan den ben e taigi sma taki den kan gi wan moni gi den buku. Den du disi furu yari langa. Den no ben e aksi furu moni srefisrefi. Na a fasi disi den sma di no ben abi furu moni ben kan kisi den buku fu wi tu. A no de fu taki dati efu wan sma ben wani den buku, ma a no ben abi a moni, dan den Kownukondre preikiman no ben e draidrai fu gi en. San ben prenspari gi den preikiman, na taki reti-ati sma musu leisi den buku fu wi èn kisi wini fu dati.

15, 16. (a) Sortu kenki a Tiri Skin tyari kon na ini 1990? (b) Fa sma kan gi moni fu horibaka gi a wroko fu wi? (Luku sosrefi a faki “ San wi e du nanga a moni di wi e kisi?”)

15 Na ini 1990 a Tiri Skin bigin tyari kenki kon na ini a fasi fa wi e prati den buku fu wi. Na ini a yari dati den brada nanga sisa na ini Amerkankondre no ben e aksi sma moni moro gi den buku. Ma efu wan sma ben wani gi wan moni fu  horibaka gi a wroko, a ben kan du dati. Ala den gemeente na ini Amerkankondre ben kisi wan brifi di ben taki: „Wi o gi den preikiman nanga tra sma den tijdschrift èn den buku fu wi sondro fu aksi den fu gi wan moni. Wi no o taki noti fu gi den a denki srefi taki den musu gi wan moni efu den wani kisi den buku. . . . Iniwan sma di wani gi wan moni fu horibaka gi a leriwroko di wi e du, kan du dati. Ma awinsi den no gi moni, toku den kan kisi den buku.” A seti disi ben e sori krin taki wi no e kisi pai gi a wroko disi, ma wi e du en fu yepi sma fu kon sabi Gado. Na so wi e sori krin taki „wi no e meki moni nanga a wortu fu Gado” (2 Kor. 2:17). Bakaten ala den bijkantoro na heri  grontapu tyari a kenki disi kon na ini a kondre fu den.

16 Fa sma kan gi moni fu horibaka gi a wroko? Den Kownukondre zaal fu Yehovah Kotoigi abi boksu pe sma kan poti moni. Na tapu den boksu disi skrifi: „Gi a wroko di e du na heri grontapu”, „Bow fu Kownukondre zaal na heri grontapu” èn „Kostu fu a gemeente”. Boiti dati, sma kan seni moni langalanga gi na organisâsi fu Yehovah Kotoigi. Ibri yari wan artikel e kon na ini A Waktitoren di e sori san sma kan du efu den wani gi wan sani fu horibaka gi a wroko fu wi.

San wi e du nanga a moni di wi e kisi?

17-19. Tyari kon na krin fa wi e gebroiki a moni di wi e kisi (a) gi a wroko di e du na heri grontapu, (b) gi a bow fu Kownukondre zaal na heri grontapu, èn (c) gi den kostu fu a gemeente.

17 Moni „gi a wroko di e du na heri grontapu”. Wi e gebroiki a moni disi fu tapu den kostu fu a preikiwroko di wi e du na heri grontapu, fu meki buku èn fu seni den go na kondre na heri grontapu. Wi e gebroiki en tu fu bow bijkantoro èn fu hori den bun. Boiti dati, wi e gebroiki a moni disi fu hori difrenti skoro pe sma e kisi leri fu Bijbel, èn fu sorgu gi zendeling, kring-opziener nanga spesrutu pionier. Wan tra sani, na taki wi e gebroiki a moni disi fu yepi brada nanga sisa di kisi fu du nanga wan rampu. *

18 Moni gi a „bow fu Kownukondre zaal na heri grontapu”. A moni disi na fu yepi den gemeente fu bow nyun Kownukondre zaal noso fu meki den kon bun baka. Te wi e poti moni gi a bow fu Kownukondre zaal na heri grontapu, dan tra gemeente kan kisi wini fu a seti disi tu. Nanga yepi fu a seti disi, gemeente na ini pôti kondre kan bow Kownukondre zaal. *

19 Moni gi den „kostu fu a gemeente”. A moni disi na fu sorgu gi a Kownukondre zaal èn fu pai den kostu di a gemeente e meki te den e gebroiki a zaal. Den owruman kan bosroiti tu taki a ben o bun fu seni pikinso fu a moni disi gi a bijkantoro fu horibaka gi a wroko di wi e du na heri  grontapu. Fosi den e du dati, den e aksi a gemeente efu den e agri nanga a bosroiti di den wani teki. Efu a gemeente feni dati bun, dan den e seni a moni gi a bijkantoro. Ibri mun a brada di e luku den monitori fu a gemeente e meki wan raportu, dan den e leisi dati gi a gemeente.

20. Fa yu kan gi grani na Yehovah nanga „den gudu di yu abi”?

20 Te wi e prakseri san na organisâsi fu Yehovah e du fu preiki a bun nyunsu fu a Kownukondre na heri grontapu èn fu meki disipel, dan dati e gi wi deki-ati fu „gi Yehovah grani nanga den gudu di [wi] abi” (Odo 3:9, 10). A krakti nanga a koni di wi abi, na gudu di wi kan gebroiki fu horibaka gi a Kownukondre wroko. Den moi fasi di wi abi leki Kresten, na gudu tu di wi kan gebroiki fu gi Yehovah grani. A no de fu taki dati wi wani gebroiki den sani disi so furu leki wi man na ini a wroko di wi e du gi a Kownukondre. Ma hori na prakseri taki wi kan gebroiki a moni fu wi tu fu horibaka gi a Kownukondre. Meki wi du muiti fu gi san wi man èn o ten wi man. A moni di wi e gi nanga wi heri ati e gi grani na Yehovah èn a e sori taki wi wani horibaka gi a Mesias Kownukondre.

^ paragraaf 1 A Waktitoren fu 15 yuli 1915, bladzijde 218, 219, na ini Ingrisitongo.

^ paragraaf 8 A Waktitoren fu 1 augustus 1899, bladzijde 201, na ini Ingrisitongo.

^ paragraaf 10 Wan sabiman taki dati a Griki wortu di vertaal nanga „bosroiti” wani taki dati wan sma „prakseri bun fosi a teki a bosroiti”. A taki tu: „Wan sma e kisi prisiri te a gi wan sani, ma toku a musu seti sani bun fu kan gi a sani.”​—1 Kor. 16:2.

^ paragraaf 17 Kapitel 20 e fruteri moro fu a yepi di wi e yepi wi brada nanga sisa di kisi fu du nanga rampu.

^ paragraaf 18 Kapitel 19 e taki moro fini fu a bow di wi e bow Kownukondre zaal.