Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

 KAPITEL 3

Yehovah e tyari kon na krin san a o du

Yehovah e tyari kon na krin san a o du

FU SAN A KAPITEL E TAKI

Safrisafri Yehovah e tyari kon na krin san a o du, ma a e du dati soso gi den wan di abi bigi lespeki gi en

1, 2. Fa Yehovah tyari kon na krin san a abi na prakseri gi libisma?

PAPA NANGA MAMA di lobi den pikin fu den e taigi den pikin san den wani du leki osofamiri. Ma toku den no e fruteri den pikin ala sani wantewante, fu di a kan taki den pikin no owru nofo fu man frustan son sani.

2 Na so a de tu nanga Yehovah. Pikinsopikinso a tyari kon na krin san a abi na prakseri gi libisma. Ma a du disi soso te a ben feni taki a ten doro fu meki libisma sabi dati. Meki wi luku syatu fa Yehovah tyari sani fu a Kownukondre kon na krin na ini ala den yari di pasa.

Fu san ede a Kownukondre de fanowdu?

3, 4. A de so taki Yehovah bosroiti na fesi fa a libi fu libisma ben o waka? Tyari disi kon na krin.

3 Biginbigin Yehovah no ben abi na prakseri fu seti a Mesias Kownukondre. Fu san ede wi e taki dati? We, Yehovah no bosroiti na fesi taki libisma ben o trangayesi en. A meki Adam nanga Eva na so wan fasi taki den srefi ben kan bosroiti san den ben wani du nanga den libi, ma a sori den tu san a ben fruwakti fu libisma. A taigi den: „Meki pikin èn kon furu, teleki unu kon lai na grontapu èn basi ala sani na grontapu” (Gen. 1:28). Yehovah ben wani tu taki den ben musu gi yesi na en fu di na en abi a reti fu taki san bun èn san no bun (Gen. 2:16, 17). Adam nanga Eva ben kan bosroiti fu gi yesi na Yehovah ala ten. Efu den nanga ala den sma di ben o kon baka den ben du dati, Gado no ben o abi fu seti wan Kownukondre di abi Krestes leki Kownu. Dan heri grontapu ben o furu now nanga libisma di no abi sondu èn alamala ben o anbegi Yehovah.

 4 Aladi Satan, Adam, nanga Eva trangayesi Yehovah, toku Yehovah no kenki a prakseri di a ben abi fu furu grontapu nanga libisma di no abi sondu. Na presi fu dati, a feni wan tra fasi fu du san a abi na prakseri. A de neleki te wan sma ben o rèi go na wan presi. Kande a pasi di a teki tapu. Ma dati no wani taki dati a no man doro a presi pe a musu go. A o suku wan tra pasi fu doro drape. Te Yehovah taki dati a o du wan sani, noti na hemel nanga grontapu man tapu en fu du dati. (Leisi Yesaya 55:11.) Awinsi wan sani kon na en pasi, toku a e feni wan tra fasi fu du san a wani (Eks. 3:14, 15). * Te a wani, a e taigi den futuboi fu en di e gi yesi na en, na sortu tra fasi a o du san a abi na prakseri.

5. San Yehovah du di Satan, Adam nanga Eva trangayesi en na ini Eden?

5 Di Satan, Adam nanga Eva trangayesi Yehovah na ini Eden, Yehovah bosroiti fu seti a Kownukondre (Mat. 25:34). Na a ten dati Yehovah bigin sori fa a ben o seti sani kon bun baka èn fa a ben o tyari wan kaba kon na ala den problema di Satan tyari kon fu di a ben wani abi makti (Gen. 3:14-19). Ma toku Yehovah no fruteri ala sani fu a Kownukondre wantewante.

Safrisafri Yehovah bigin tyari sani fu a Kownukondre kon na krin

6. San Yehovah sori na ini a fosi profeititori, ma san a no ben taki?

6 Na ini a fosi profeititori kaba, Yehovah sori taki ’a pikin fu wan uma’ ben o masi a sneki na en ede. (Leisi Genesis 3:15.) Ma na a ten dati a no ben taki suma ben o de a pikin fu na uma èn suma ben o de a pikin fu a sneki. Fu taki en leti, sowan 2000 yari langa Yehovah no taki noti moro fu a tori disi. *

7. Fu san ede Yehovah bosroiti taki a pikin fu na uma ben o de wan bakapikin fu Abraham èn san wi kan leri fu disi?

7 Bakaten Yehovah bosroiti taki a pikin fu na uma ben o de wan bakapikin fu Abraham. Yehovah bosroiti disi fu di Abraham ben „arki” en (Gen. 22:18). Wi kan leri wan prenspari sani fu disi: Yehovah e fruteri soso den wan di abi bigi lespeki gi en, san a o du.​—Leisi Psalm 25:14.

8, 9. San Yehovah fruteri Abraham nanga Yakob fu a pikin fu na uma?

8 Di Yehovah ben taki nanga en mati Abraham nanga yepi fu wan engel, a sori fu a fosi leisi taki a pikin fu na uma ben o de wan libisma (Gen. 22:15-17; Yak. 2:23). Ma fa a libisma disi ben o masi a sneki na en ede? Suma ben de a sneki? Bakaten Yehovah ben o gi piki tapu den aksi disi.

 9 Yehovah ben bosroiti tu taki a pikin fu na uma ben o de wan bakapikin fu Abraham en granpikin Yakob, di ben abi wan tranga bribi na ini Gado (Gen. 28:13-22). Yehovah ben meki Yakob taki wan profeititori di ben sori taki a pikin disi ben o de wan bakapikin fu Yuda, a manpikin fu Yakob. Yakob ben taki dati a bakapikin fu Yuda ben o kisi wan „kownutiki”. Disi e sori taki a pikin disi ben o de wan kownu èn ’ala pipel ben o gi yesi na en’ (Gen. 49:1, 10). Na so Yehovah sori taki a pikin fu na uma ben o de wan tiriman noso kownu.

10, 11. Fu san ede Yehovah fruteri David nanga Danièl san a ben o du?

10 Sowan 650 yari baka di Yuda dede, Yehovah fruteri Kownu David di ben de wan bakapikin fu Yuda, tra sani fu a pikin fu na uma. Yehovah ben taki dati David ben de „wan man di a lobi” (1 Sam. 13:14; 17:12; Tori 13:22). Fu di David ben abi bigi lespeki gi Yehovah, meki Yehovah bosroiti fu seti wan frubontu nanga en. A ben taki dati wan bakapikin fu David ben o tiri fu têgo.​—2 Sam. 7:8, 12-16.

11 Sowan 500 yari baka dati Yehovah meki a profeiti Danièl skrifi son sani di e sori soifri na ini sortu yari a Mesias noso a Salfuwan ben o kon na grontapu (Dan. 9:25). Danièl ben de wan ’sma di Yehovah ben lobi srefisrefi’. Fu san ede? Fu di Danièl ben abi bigi lespeki gi Yehovah èn a ben e dini Yehovah ala ten.​—Dan. 6:16; 9:22, 23.

12. San Yehovah ben taigi Danièl èn fu san ede?

12 Yehovah ben meki profeiti soleki Danièl skrifi furu sani di abi fu du nanga a pikin fu na uma, noso a Mesias. Ma Yehovah no ben feni taki a ten ben doro fu fruteri den futuboi fu en finifini san den sani di a meki den skrifi ben wani taki. Fu eksempre, baka di Danièl kisi wan fisyun fu a seti di Gado Kownukondre ben o seti, Yehovah taigi Danièl fu skrifi en na ini wan buku èn tapu en nanga wan stampu. Na so a ben o tan teleki a ten di Yehovah ben poti fu tyari den sani disi kon na krin. Na a ten dati sma ben o kon sabi „furu tru tori”.​—Dan. 12:4.

Yehovah meki futuboi fu en soleki Danièl skrifi moro sani fu a Mesias Kownukondre

Yesus tyari kon na krin san Gado o du

13. (a) Suma na a pikin fu na uma? (b) Fa Yesus tyari a profeititori fu Genesis 3:15 kon na krin?

13 Yehovah sori krin taki Yesus ben de a pikin fu na uma èn a bakapikin fu David di ben o tiri leki Kownu (Luk. 1:30-33; 3:21, 22). Di Yesus bigin nanga a diniwroko fu en, a ben tyari kon na krin san Gado ben  o du. A ben de neleki a son opo gi den sma èn den bigin si sani moro krin (Mat. 4:13-17). Yesus ben sori krin suma na „a sneki” fu Genesis 3:14, 15. A ben taki dati Didibri na „wan kiriman” èn „a tata fu ala lei” (Yoh. 8:44). Na ini a fisyun di Yohanes kisi, Yesus taki dati „a fosi sneki” na „a wan di den e kari Didibri nanga Satan”. * (Leisi Openbaring 1:1; 12:9.) Na ini a srefi fisyun dati Yesus sori fa en leki pikin fu na uma o kiri Satan te fu kaba. Na so a profeititori di Gado taki na ini Eden o kon tru.​—Openb. 20:7-10.

14-16. A de so taki den disipel ben e frustan ala den sani di Yesus ben fruteri den? Gi wan tu eksempre.

14 Soleki fa wi si na ini kapitel 1 fu a buku disi, dan Yesus taki furu fu a Kownukondre. Ma a no ala ten a ben fruteri den disipel fu en ala sani di den ben wani sabi. Son leisi Masra Yesus Krestes ben fruteri finifini tori fu a Kownukondre, ma toku den bakaman fu en no ben e frustan dati. Na bakaten fosi, den bigin frustan moro bun san a ben taki. Son leisi hondrohondro yari ben pasa fosi den kon frustan son sani. Meki wi luku wan tu eksempre.

15 Na ini a yari 33 Yesus sori krin taki den tra sma di ben o tiri makandra nanga en na ini Gado Kownukondre ben o de libisma di ben o kisi libi leki yeye na ini hemel. Ma den disipel fu en no ben e frustan disi wantewante (Dan. 7:18; Yoh. 14:2-5). Na ini a srefi yari dati Yesus fruteri wan tu agersitori di ben e sori taki a Kownukondre ben o seti wan heri pisi ten baka te a ben go na hemel (Mat. 25:14, 19; Luk. 19:11, 12). Den disipel no ben frustan a prenspari sani disi. Baka di  Yesus kisi wan opobaka den aksi en: „Yu o seti a kownukondre baka gi Israel na ini a ten disi?” Ma na a ten dati Yesus bosroiti fu no fruteri den moro fu a tori disi (Tori 1:6, 7). Yesus taki tu dati yu ben o abi wan grupu „tra skapu” di no ben o de wan pisi fu a „pikin ipi” sma di ben o tiri makandra nanga en (Yoh. 10:16; Luk. 12:32). Wan heri pisi ten baka di a Kownukondre seti na ini 1914, den bakaman fu Krestes kon frustan krin suma na den sma fu den tu grupu disi.

16 Di Yesus ben de na grontapu a ben kan fruteri den disipel fu en furu sani, ma a ben sabi taki den no ben o man frustan ala sani (Yoh. 16:12). A no de fu taki dati furu sani fu a Kownukondre kon na krin na ini a ten fu den apostel. Ma a ten no ben doro ete taki sma ben o frustan den tori disi.

Sabi fu Bijbel e kon furu na ini „a ten fu a kaba”

17. San wi musu du fu man frustan sani fu a Kownukondre? Ma san de fanowdu tu?

17 Yehovah ben taigi Danièl taki na ini „a ten fu a kaba” furu sma ben o „ondrosuku sani finifini” èn den ben o kisi bun furu sabi fu den sani di Gado o du (Dan. 12:4). Den sma di wani kon sabi den sani disi, musu du furu muiti. Ma awinsi wi ondrosuku Bijbel finifini, toku wi no o man frustan nowan sani fu a Kownukondre efu Yehovah no gi wi a grani fu frustan den sani dati.​—Leisi Mateyus 13:11.

18. Fa den sma di abi bigi lespeki gi Yehovah sori taki den abi bribi nanga sakafasi?

18 Neleki fa Yehovah tyari sani fu a Kownukondre kon na krin safrisafri na ini a ten fosi 1914, na so a e du dati now na ini a ten fu a kaba. Na ini kapitel 4  nanga 5 fu a buku disi, wi o si taki wan tu leisi a pipel fu Gado ben musu kenki a fasi fa den ben e frustan son sani, na ini den 100 yari di pasa. Ma disi wani taki dati Yehovah no ben e horibaka gi den? Kwetikweti! A horibaka gi den trutru. Fu san ede? Fu di den sma di abi bigi lespeki gi Yehovah abi tu fasi di a lobi. Den abi bribi nanga sakafasi (Hebr. 11:6; Yak. 4:6). Den futuboi fu Yehovah e bribi taki ala den pramisi na ini Gado Wortu o kon tru. Den e sori taki den abi sakafasi, fu di den e taki krin dati den no ben e frustan finifini fa den pramisi disi ben o kon tru. A sakafasi di den abi de krin fu si na ini wan sani di skrifi na ini A Waktitoren fu 1 maart 1925: „Wi sabi taki Masra e tyari en eigi Wortu kon na krin èn taki a o tyari en kon na krin gi en pipel soleki fa a wani èn o ten a wani.”

„Masra . . . o tyari en Wortu kon na krin gi en pipel soleki fa a wani èn o ten a wani”

19. San Yehovah meki wi frustan now èn fu san ede?

19 Di a Kownukondre seti na ini 1914, a pipel fu Gado no ben sabi furu fu a fasi fa den profeititori di abi fu du nanga a Kownukondre, ben o kon tru (1 Kor. 13:9, 10, 12). Fu di wi de fayafaya fu sabi fa den profeititori dati o kon tru, meki son leisi wi ben denki taki wi ben frustan den, aladi dati no ben de so. Ma na ini den yari di pasa a kon de krin taki a sani di A Waktitoren fu 1 maart 1925 taki, tru. A Waktitoren disi ben taki tu: „A moro bun fu si sani na a fasi disi: Wi no o man frustan den profeititori teleki den e kon tru noso teleki den kon tru kaba.” Now di wi de bun fara kaba na ini a ten fu a kaba, wi si taki furu profeititori fu a Kownukondre kon tru kaba èn trawan e kon tru nownow. A pipel fu Gado abi sakafasi èn den de klariklari fu kenki den denki te den si taki den fowtu. Dati meki Yehovah meki den frustan moro krin san a o du. Iya, bun furu tru tori kon na krin!

Te Gado pipel e frustan sani moro bun, a e kon na krin suma e dini en nanga en heri ati

20, 21. San den Kresten fu a fosi yarihondro du di kenki kon na ini a fasi fa den ben e frustan sani?

20 Te Yehovah e meki wi frustan sani moro bun, dan a e kon na krin fa wi ati de trutru. Wi o abi a bribi nanga a sakafasi fu kenki wi denki? Den Kresten di ben e libi baka a yari 50 ben abi fu du disi. Kon meki wi taki dati yu ben de wan Dyu Kresten di ben e libi na ini a ten dati. Yu abi furu lespeki gi a Wet di Gado gi Moses èn yu feni en wan grani taki yu na wan Israelsma,  a spesrutu pipel fu Gado. Ma now Yehovah meki na apostel Paulus skrifi na ini wan tu brifi taki sma no abi fu hori densrefi moro na a Wet èn taki Yehovah drai baka gi a pipel Israel. Na presi fu dati Yehovah ben o teki sma di wani dini en leki en pipel, awinsi den na Dyu noso trakondre sma (Rom. 10:12; 11:17-24; Gal. 6:15, 16; Kol. 2:13, 14). San yu ben o du efu yu ben yere fu a kenki disi?

21 Kresten di ben abi sakafasi ben kenki den denki èn den ben bribi den sani di Paulus tyari kon na krin nanga yepi fu a santa yeye. Dati meki Yehovah ben blesi den (Tori 13:48). Ma trawan no ben wani kenki den denki èn den tan hori densrefi na a fasi fa den ben e frustan sani (Gal. 5:7-12). Efu den no ben kenki den denki, den no ben o kisi a grani fu tiri makandra nanga Krestes.​—2 Petr. 2:1.

22. Fa yu feni den sani di wi kon frustan now fu a Kownukondre?

22 Na ini den yari di pasa Yehovah yepi wi fu frustan sani di abi fu du nanga a Kownukondre moro krin. Fu eksempre, a yepi wi fu si moro krin o ten a ben o prati den sma na grontapu neleki fa wan skapuman e prati skapu nanga bokoboko. Den skapu na den sma di a Kownukondre o tiri èn den bokoboko na den sma di no wani arki a bun nyunsu. Yehovah sori wi tu o ten a heri grupu fu 144.000 salfuwan o kaba seti, san den agersitori di Yesus fruteri fu a Kownukondre wani taki, èn o ten den lasti salfuwan o kisi libi na ini hemel. * Fa yu feni den kenki disi? Yu bribi kon moro tranga? Yu e si den kenki disi leki buweisi taki Yehovah e tan gi leri na en pipel di abi sakafasi? A buku disi o tranga yu bribi trutru. Yu o si taki safrisafri Yehovah e tyari kon na krin san a o du, ma a e du dati soso gi den wan di abi bigi lespeki gi en.

^ paragraaf 4 A nen fu Gado e kon fu a Hebrew wortu di wani taki „kon tron”. A nen fu Yehovah e sori taki a de wan sma di e du ala ten san a pramisi. Luku a faki „San a nen fu Gado wani taki” na ini Kapitel 4.

^ paragraaf 6 Furu sma na ini a ten disi feni taki 2000 yari na wan bun langa ten. Ma wi musu hori na prakseri taki fosi, libisma ben e libi moro langa. Fu eksempre, Adam ben de na libi ete di Lamek, a papa fu Noa gebore. Lamek ben de na libi ete di Sem, a manpikin fu Noa gebore. Sem ben de na libi ete di Abraham gebore.​—Gen. 5:5, 31; 9:29; 11:10, 11; 25:7.

^ paragraaf 13 Na ini den Hebrew Buku fu Bijbel a wortu „Satan” skrifi 18 leisi. Ma na ini den Griki Buku fu Bijbel „Satan” skrifi moro leki 30 leisi. Den Hebrew Buku fu Bijbel no e poti tumusi furu prakseri na Satan. Ma na presi fu dati, den e poti prakseri na sani di ben o sori suma na a Mesias. Di a Mesias kon, a sori krin suma na Satan, soleki fa wi kan leisi na ini den Griki Buku fu Bijbel.

^ paragraaf 22 Efu yu wani sabi moro fu sonwan fu den kenki disi dan luku den Waktitoren fu 1 oktober 1995, bladzijde 27-32 (noso De Wachttoren fu 15 oktober 1995, bladzijde 18-28); 15 yanuari 2008, bladzijde 20-24; 15 yuli 2008, bladzijde 17-21; 15 yuli 2013, bladzijde 9-14.