Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

 KAPITEL 5

A Kownu tyari moro sani fu a Kownukondre kon na krin

A Kownu tyari moro sani fu a Kownukondre kon na krin

FU SAN A KAPITEL E TAKI

Gado pipel kon frustan prenspari sani fu a Kownukondre. Den kon sabi suma na den tiriman fu a Kownukondre èn suma den o tiri. Den kon frustan tu san a wani taki fu horibaka gi a Kownukondre

1, 2. Fu san ede yu kan agersi Yesus nanga wan koni sma di e tyari wan grupu fu go luku wan foto?

KON MEKI WI TAKI dati yu nanga wan tu sma e go na wan moi foto èn wan man di sabi a foto bun e tyari unu fu luku a foto. Fu di yu nanga den tra sma na ini a grupu no sabi a foto, meki yu e arki bun te a man e taki. Wanwan leisi unu e aksi a man son sani fu a foto. Ma a no e taigi unu ala sani wantewante. A e wakti a yoisti momenti te unu doro na den presi di abi fu du nanga den sani di unu wani sabi. O moro unu e waka na ini a foto, o moro yu e kon si taki a man disi abi furu koni. Yu e fruwondru trutru, bika a sabi soifri o ten a musu taigi yu san yu musu sabi.

2 Na so a de tu nanga tru Kresten. Wi wani sabi ala sani fu a moro moi foto di de. Disi na a Kownukondre fu Gado, „a foto di abi trutru fondamenti” (Hebr. 11:10). Di Yesus ben de na grontapu, a ben de leki a man di e tyari sma fu luku wan foto. A ben yepi den bakaman fu en fu kon sabi moro fu a Kownukondre. Ma a de so taki a ben piki ala den aksi fu den wantewante? A ben e fruteri den ala sani fu a Kownukondre wantewante? Nôno. A taki: „Furu sani de di mi musu taigi unu ete, ma unu no man tyari den now” (Yoh. 16:12). Fu di Yesus koni, meki a no ben e fruteri den disipel sani di den no ben o man frustan.

3, 4. (a) Fa Yesus tan yepi den bakaman fu en fu kon sabi moro fu Gado Kownukondre? (b) San wi o luku na ini a kapitel disi?

3 Na a lasti neti di Yesus ben de na grontapu a ben taki den sani di skrifi na Yohanes 16:12. Fa den bakaman fu Yesus ben o kisi leri fu Gado Kownukondre baka a dede fu en? A ben gi den apostel a  dyaranti disi: „A santa yeye di e sori san tru, . . . o leri unu ala san tru” (Yoh. 16:13). * Wi kan si a santa yeye tu leki wan man di e tyari sma fu luku wan foto èn di abi pasensi. Nanga yepi fu a santa yeye Yesus e leri den bakaman fu en san den musu sabi fu a Kownukondre èn a e du disi na a yoisti ten.

4 Meki wi luku now fa a santa yeye fu Yehovah yepi tru Kresten fu kon sabi moro fu a Kownukondre. Wi o luku fosi fa wi kon frustan o ten Gado Kownukondre bigin tiri. Baka dati wi o luku suma na den tiriman fu en èn suma den o tiri. Wi o luku tu san na a howpu di den tu grupu disi abi. A lasti sani di wi o luku, na fa den bakaman fu Krestes kon frustan san a wani taki fu horibaka gi a Kownukondre.

Wan prenspari yari

5, 6. (a) Sortu fowtu denki den Bijbel Ondrosukuman ben abi fu a Kownukondre èn fu a kotiten? (b) Fu san ede den denki disi no e sori taki Yesus no ben e tiri den bakaman fu en?

5 Soleki fa wi si na ini kapitel 2 fu a buku disi, dan omeni yari na fesi den Bijbel Ondrosukuman ben taki kaba dati 1914 ben o de wan prenspari yari di abi fu du nanga son Bijbel profeititori. Ma na a ten dati den ben e bribi taki Krestes ben kon na ini 1874 èn taki a bigin tiri na hemel na ini 1878. Den ben e bribi tu taki a Kownukondre no ben o tiri na ala sei wantewante. Disi ben o pasa na ini oktober 1914. Den ben e taki tu dati a kotiwroko ben o du fu 1874 te go miti 1914 èn na a kaba fu a pisi ten dati den salfuwan ben o go na hemel. A de krin taki den brada no ben e frustan sani bun. Ma disi wani taki dati Yesus no ben e tiri den bakaman fu en nanga yepi fu a santa yeye? Kwetikweti!

6 Prakseri na agersitori na a bigin fu a kapitel disi. Den sma ben wani sabi ala sani wantewante èn kande sonwan fu den ben e denki taki den sabi son sani kaba. Ma disi no e sori taki a man di ben e tyari den na ini a foto no e du en wroko bun. Na so a de tu taki son leisi Gado pipel no ben frustan krin fa Yehovah ben o du son sani, fu di a ten no ben doro ete taki a santa yeye yepi den fu frustan den sani dati. Ma disi no wani taki dati Yesus no e tiri  den. Fu dati ede, te den brada si taki den fowtu, den de klariklari fu taki dati èn nanga sakafasi den e kenki den denki.​—Yak. 4:6.

7. Sortu sani Gado meki en pipel kon sabi na ini den yari baka 1919?

7 Na ini den yari baka 1919 Gado blesi en pipel fu di a meki a leti skèin moro krin. (Leisi Psalm 97:11.) Na ini 1925, A Waktitoren ben abi wan prenspari artikel di ben nen „A bigin fu wan nyun pipel”. Na artikel ben abi krin buweisi fu Bijbel taki a Mesias Kownukondre ben seti na ini 1914. Disi ben de a kontru fu a profeititori fu Openbaring 12, di e taki dati na uma fu Gado na hemel ben o kisi wan pikin. * Na artikel ben sori tu taki a frufolgu nanga den tesi di a pipel fu Yehovah ben kisi na ini a ten fu a Fosi Grontapufeti, ben sori krin taki den ben trowe Satan kon na grontapu. „A abi bigi atibron fu di a sabi taki en ten syatu.”​—Openb. 12:12.

8, 9. (a) Fa a kon na krin o prenspari Gado Kownukondre de? (b) Sortu aksi wi o luku?

8 O prenspari a Kownukondre de? Na ini 1928, A Waktitoren bigin sori taki a Kownukondre prenspari moro a frulusu di sma kan kisi te den e bribi na ini a lusu-paiman. Iya, nanga yepi fu a Mesias Kownukondre Yehovah o meki en nen kon santa, a o sori taki en na a Moro Hei Tiriman, èn a o du ala san a pramisi libisma.

9 Suma ben o tiri makandra nanga Krestes na ini a Kownukondre? Suma a Kownukondre ben o tiri? Sortu wroko den bakaman fu Krestes musu du?

A kotiwroko tyari kon na krin suma na den salfuwan

10. San Gado pipel ben frustan langa ten kaba fu a nomru 144.000?

10 Furu yari fosi 1914 tru Kresten ben frustan kaba taki 144.000 bakaman fu Krestes ben o tiri makandra nanga en na ini hemel. * Den Bijbel Ondrosukuman ben frustan taki a nomru disi no e agersi wan sani, ma na trutru 144.000 sma. Den ben frustan tu taki sensi a fosi yarihondro sma bigin abi a howpu disi fu go na hemel.

11. Fa den Kresten di Bijbel e agersi nanga a trowmisi fu Krestes, kon sabi sortu wroko den musu du na grontapu?

11 Ma san den Kresten disi di Bijbel e agersi nanga a trowmisi fu Krestes, musu du te den de na grontapu ete? Den ben sabi taki Yesus sori o prenspari a preikiwroko de èn taki a wroko dati ben abi  fu du nanga wan kotiten (Mat. 9:37; Yoh. 4:35). Soleki fa wi si na ini kapitel 2, dan den ben denki wan pisi ten taki a ben o teki 40 yari fu du a kotiwroko èn na a kaba den salfuwan ben o go na hemel. Ma den no ben frustan a tori disi bun fu di a wroko ben go doro baka den 40 yari. Now wi sabi taki a kotiten bigin trutru na ini 1914. Dati ben de a ten fu prati na aleisi (den salfu Kresten) fu a takru wiwiri (den falsi Kresten). Sobun, a moro prenspari wroko ben de fu tyari den tra salfu Kresten fu a grupu fu 144.000 sma kon na wán.

A kotiten bigin na ini a yari 1914 (Luku paragraaf 11)

12, 13. Fa den agersitori di Yesus gi fu den tin nyunwenke nanga den talenti kon tru na ini den lasti dei?

12 Sensi 1919 Krestes tan sori a koni srafu di de fu frutrow o prenspari a preikiwroko de. A ben gi den bakaman fu en a wroko dati di a ben de na grontapu ete (Mat. 28:19, 20). A ben sori tu fa den salfu bakaman fu en ben o du a preikiwroko. Fa a sori dati? Nanga na agersitori fu den tin nyunwenke, Yesus sori taki den salfuwan ben musu tan na ai efu den ben wani go na a bigi trowfesa na hemel. Na ini wan tra agersitori Bijbel e sori taki te a grupu fu 144.000 salfuwan de na hemel, den o de leki a „trowmisi” fu Krestes (Openb. 21:2). Nanga na agersitori fu den talenti, Yesus sori taki den salfu futuboi fu en ben o du a preikiwroko fayafaya.​—Mat. 25:1-30.

13 Na ini den hondro yari di pasa den salfuwan sori taki den tan na ai èn taki den ben de fayafaya. A no de fu taki dati den o kisi furu blesi fu di den tan na ai! Ma a de so taki na a kotiten den ben o  tyari soso den tra sma fu a grupu fu 144.000 salfuwan kon na wán?

A Kownukondre e tyari den sma di a o tiri kon na wán

14, 15. Fu sortu fo grupu sma a buku „A kibritori kon na krin” ben e taki?

14 Bun langa kaba den anbegiman fu Yehovah ben wani sabi suma na a „bigi ipi” (a „bigi grupu”, King James Version) di kari na Openbaring 7:9-14. A no de fu taki dati a ten no ben doro ete gi Krestes fu sori suma na den sma fu a bigi grupu disi. Dati meki den sani di den brada ben e taki na a ten dati no ben e kruderi kwetikweti nanga san wi sabi now. Ma wi breiti taki wi kon frustan a tori disi moro krin èn a no muilek fu frustan.

15 Na ini 1917, a buku „A kibritori kon na krin” ben sori taki „tu sortu frulusu de gi den sma di o go na hemel èn tu sortu frulusu de gi den sma di o libi na grontapu”. Suma na den sma di ben o kisi frulusu na den difrenti fasi disi? A fosi grupu na den 144.000 sma di ben o tiri makandra nanga Krestes. A di fu tu grupu na a bigi ipi. Na a ten dati den ben e denki taki a bigi ipi na den sma di ben e kari densrefi Kresten, ma di ben de na ini den falsi Kresten kerki ete. Den sma disi ben abi bribi, ma den no ben abi nofo bribi fu man komoto na ini den falsi Kresten kerki. Fu dati ede den ben o kisi wan moro lagi posisi na ini hemel. A di fu dri grupu na den owruten anbegiman fu Gado soleki Abraham nanga Moses. Den ben e kari a grupu disi den „owruten wartisma”. Den sma disi ben o libi na grontapu èn den ben o tiri a di fu fo grupu sma. Dati na den tra sma di ben o libi na grontapu.

16. Fa a leti bigin skèin moro krin na ini 1923 nanga 1932?

16 Ma now wi e frustan a tori disi tra fasi. Fa a santa yeye yepi den bakaman fu Krestes fu si sani moro krin? Safrisafri a leti bigin skèin moro krin. Sensi 1923, A Waktitoren ben sori kaba taki wan grupu sma de di no abi a howpu fu go na hemel. Den o libi na grontapu na ondro a tiri fu Krestes. Na ini 1932, A Waktitoren ben taki fu Yonadab di ben e horibaka gi Kownu Yehu fu Israel di a ben kisi a wroko  fu puru ala falsi anbegi na ini Israel (2 Kow. 10:15-17). A tijdschrift ben taki dati wan grupu sma de na ini a ten disi di yu kan agersi nanga Yonadab. A ben taki tu dati Yehovah ben o yepi a grupu disi fu „pasa a feti fu Armagedon”, so taki den kan libi dyaso na grontapu.

17. (a) Fa a leti skèin moro krin na ini 1935? (b) Fa furu Kresten ben e firi di den kon frustan suma na a bigi grupu? (Luku a faki „ Furu sma ben breiti srefisrefi”.)

17 Na ini 1935 a leti skèin moro krin na a kongres na ini Washington, D.C. Na a kongres dati a kon na krin taki a bigi ipi na a grupu sma di o libi na grontapu. Den sma disi na den skapu fu na agersitori di Yesus fruteri fu den skapu nanga den bokoboko (Mat. 25:33-40). A bigi ipi ben o de na ini a grupu fu den „tra skapu” di Yesus ben musu tyari kon na wán (Yoh. 10:16). A takiman J. F. Rutherford ben aksi: „Ala sma di abi a howpu fu libi fu têgo na grontapu, grantangi, unu kan opo tanapu?” Ne moro leki afu fu den sma drape opo tanapu! Dan a taki: „Luku! A bigi grupu!” Furu sma ben breiti srefisrefi di den kon frustan now sortu howpu den ben abi.

18. Sortu wroko den bakaman fu Krestes ben musu du èn san ben de a bakapisi?

18 Sensi a ten dati Krestes sori den bakaman fu en taki den musu du muiti fu tyari den sma kon na wán di de fu a bigi ipi di o pasa a bigi banawtu libilibi. Na a bigin, a no ben gersi taki a grupu disi ben o bigi tumusi. Wan leisi Brada Rutherford ben taki srefi: „A sori leki ’a bigi grupu’ no o de so bigi.” Ma now wi srefi e si fa Yehovah blesi a kotiwroko sensi a ten dati! Nanga yepi fu Yesus èn a santa yeye, den salfuwan nanga den „tra skapu” kon tron „wán ipi” di e wroko makandra na ondro „wán skapuman”, soleki fa Yesus ben taki na fesi.

Brada Rutherford no ben denki taki someni sma ben o de na ini a bigi ipi (Fu kruktu-anusei go na reti-anusei: Nathan H. Knorr, Joseph F. Rutherford, nanga Hayden C. Covington)

19. Fa wi kan yepi fu meki a bigi ipi kon moro bigi?

19 A moro bigi grupu fu anbegiman fu Gado o libi fu têgo na ini wan paradijs na grontapu na ondro a tiri fu Krestes nanga den 144.000 sma di o tiri makandra nanga en. A de wan prisiri sani fu si fa Krestes yepi Gado pipel fu frustan moro bun sortu howpu sma abi gi a ten di e kon. Wi breiti srefisrefi fu fruteri den sma di wi e miti na ini a preikiwroko fu a howpu disi! Meki wi tan fruteri sma a sani disi so furu leki wi man, so taki a bigi ipi kan kon  moro bigi. Na so moro nanga moro sma o prèise a nen fu Yehovah!​—Leisi Lukas 10:2.

A bigi ipi e kon moro bigi dei fu dei

Fa sma musu horibaka gi a Kownukondre

20. (a) San na den dri pisi fu Satan en organisâsi? (b) San wan sma no musu du efu a e horibaka gi Gado Kownukondre?

20 Now di Gado pipel ben kon sabi moro fu a Kownukondre, wi kan frustan taki den ben musu kon sabi moro krin tu san a wani taki fu horibaka gi a Kownukondre dati. Na ini 1922 A Waktitoren ben taki dati tu organisâsi de: a di fu Yehovah èn a di fu Satan. A di fu Satan abi dri pisi: bisnis, kerki nanga politiek. Den sma di e horibaka gi Gado Kownukondre na ondro a tiri fu Krestes no musu du wan sani di kan meki taki den go moksi nanga wan fu den pisi fu Satan organisâsi (2 Kor. 6:17). Fa so?

21. (a) Sortu warskow di abi fu du nanga bigi bisnis a koni srafu gi Gado pipel? (b) San A Waktitoren taki fu „Babilon a Bigiwan” na ini 1963?

21 Doronomo a koni srafu sori taki bigi bisnis kan meki wan sma du kruka sani èn den warskow Gado pipel fu no feti baka gudu (Mat. 6:24). Ala ten den buku fu wi sori suma de na ini a kerki pisi fu Satan en organisâsi. Na ini 1963 A Waktitoren sori krin taki „Babilon a Bigiwan” a no soso den falsi Kresten kerki, ma na ala falsi kerki na grontapu. Fu dati ede, den anbegiman fu Gado kisi yepi fu „komoto drape” (Openb. 18:2, 4). Awinsi fu sortu kondre den de noso fu sortu pipel den komoto, den alamala tapu nanga ala den falsi kerki gwenti di den ben abi. Kapitel 10 fu a buku disi e taki moro fu a tori disi.

22. Fa furu Bijbel Ondrosukuman ben e frustan Romesma 13:1 na a ten fu a Fosi Grontapufeti?

22 Ma fa a de nanga a politiek pisi fu na organisâsi fu Satan? A de so taki Kresten ben kan teki prati na den feti nanga dyugudyugu fu den kondre na grontapu? Na a ten fu a Fosi Grontapufeti den Bijbel Ondrosukuman ben sabi kaba taki den bakaman fu Krestes no kan go kiri tra sma (Mat. 26:52). Ma furu fu den ben abi wan tra denki fu a rai di skrifi na ini Romesma 13:1 di e sori taki sma musu gi yesi na „den tiriman”. Den ben taki dati wan Kresten ben musu go na ini a legre, a ben musu weri srudatikrosi èn a ben kan abi wan gon srefi. Ma na presi fu sutu den feanti kiri, a ben musu sutu na ini a loktu.

23, 24. Fa Gado pipel ben e frustan Romesma 13:1 na a ten fu a Di Fu Tu Grontapufeti? Fa den kon si sani moro krin?

23 Na ini 1939 di a Di Fu Tu Grontapufeti bigin,  wan artikel na ini A Waktitoren ben sori finifini san a wani taki fu no teki sei na ini politiek afersi. Na artikel ben sori krin taki Kresten no ben musu teki prati na nowan feti noso dyugudyugu fu den pipel fu a grontapu fu Satan. A rai disi ben kon na a yoisti ten! A ben yepi den bakaman fu Krestes fu no kisi a brudu-paiman di someni kondre kisi na ini a feti dati. Ma wan tra sani ben de tu di den ben musu kon frustan moro bun. Sensi 1929 den buku fu wi ben sori taki den tiriman fu Romesma 13:1 no ben de den tiriman fu grontapu, ma na Yehovah nanga Yesus.

24 Ma nanga yepi fu a santa yeye den bakaman fu Krestes kon frustan Romesma 13:1-7 moro krin na ini 1962. Fu dati ede, den tyari wan tu prenspari artikel kon na doro na ini den Waktitoren fu 15 november nanga 1 december fu a yari dati. Te fu kaba, Gado pipel kon frustan taki den musu saka densrefi na ondro den tiriman, ma a no ala ten den kan gi yesi na den tiriman. Disi de krin fu si te yu prakseri san Yesus ben taki: „Pai Grankownu san na fu Grankownu,  ma pai Gado san na fu Gado” (Luk. 20:25). Tru Kresten e frustan now taki den tiriman fu Romesma 13 na den tiriman fu grontapu èn taki Kresten musu saka densrefi na den ondro. Ma son leisi den no kan du dati. Te den tiriman wani taki wi trangayesi Yehovah Gado, dan wi e gi den a srefi piki leki den apostel fu owruten: „Fu di Gado na wi tiriman, meki wi musu gi yesi na en moro leki na libisma” (Tori 5:29). Na ini kapitel 14 fu a buku disi wi o luku fa Gado pipel sori taki den no e teki sei na ini politiek afersi.

Wi breiti srefisrefi fu sori sma taki Bijbel e taki dati den kan libi fu têgo!

25. Fu san ede yu breiti taki a santa yeye e yepi wi fu frustan moro fu Gado Kownukondre?

25 Prakseri ala den sani di den bakaman fu Krestes kon sabi fu a Kownukondre na ini den hondro yari di pasa. Wi kon sabi o ten Gado Kownukondre seti na hemel èn o prenspari a de. Wi sabi krin now taki son anbegiman fu Gado abi a howpu fu go na hemel èn trawan abi a howpu fu libi na grontapu. Wi sabi fa wi musu horibaka gi Gado Kownukondre aladi wi e saka wisrefi na ondro den tiriman fu grontapu. Aksi yusrefi: ’Mi ben o sabi den prenspari sani disi efu Yesus Krestes no ben yepi a koni srafu na grontapu fu frustan den èn fu leri sma den?’ A de wan blesi trutru taki Krestes e tiri wi nanga yepi fu a santa yeye!

^ paragraaf 3 Wan wortubuku e sori taki a Griki wortu di vertaal nanga „leri” wani taki „fu sori a pasi”.

^ paragraaf 7 Fosi a ten dati den ben denki taki a fisyun disi ben sori taki den Lomsu sma nanga den sma di no ben de Kresten na ini a Gran Kownukondre Rome ben o feti nanga makandra.

^ paragraaf 10 Na ini yuni 1880 A Waktitoren ben taki dati den 144.000 sma na Dyu di ben o teki a Kresten bribi fosi 1914. Ma bakaten na ini a srefi yari dati den kon frustan a tori disi tra fasi èn dati e kruderi moro nanga a fasi fa wi e si a tori disi now.