YU E SI fa yu Bijbelstudenti e fruwondru di a kon frustan a tekst di unu leisi didyonsro. A e taki: „Yu wani taigi mi taki Bijbel e taki dati wi kan libi na ini wan paradijs fu têgo? Leti dyaso na grontapu?” A tra sma di de nanga yu na ini a preikiwroko e lafu èn a e taki: „Soleki fa yu srefi leisi, na dati Bijbel e taki.” A Bijbelstudenti e seki en ede fu di a no man bribi, dan a e taki: „Mi no man bribi taki noiti sma leri mi a sani disi!” Yu e memre taki wan tu wiki pasa a ben taki wan srefi sortu sani di a ben kon sabi taki Gado nen na Yehovah.

Furu futuboi fu Gado ondrofeni a sani disi. Den sortu ondrofenitori disi e memre wi taki wi kisi wan heri moi kado: Den tru leri fu Bijbel. Ma prakseri pikinso: Fa yu kisi a kado disi? Na ini Pisi 1 fu a buku disi wi o poti prakseri na a aksi disi. Wan sani di e sori krin taki Gado Kownukondre na wan trutru sani, na taki safrisafri a pipel fu Gado kon frustan Bijbel moro bun. Wán hondro yari kaba Yesus Krestes, a Kownu fu a Kownukondre e sorgu taki Gado pipel e leri san Bijbel e taki trutru.