Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

 KAPITEL 17

Kownukondre preikiman e kisi leri

Kownukondre preikiman e kisi leri

FU SAN A KAPITEL E TAKI

Wi o luku fa den skoro fu na organisâsi fu wi e yepi Kownukondre preikiman fu du a wroko fu den

1-3. (a) Fa Yesus seti sani fu meki a preikiwroko du na tra presi? (b) Sortu aksi e opo kon?

YESUS ben e preiki na ini Galilea tu yari langa. (Leisi Mateyus 9:35-38.) A ben e go na furu foto nanga dorpu fu gi leri na ini den snoga èn fu preiki a bun nyunsu fu a Kownukondre. Te a ben e preiki, bigi grupu sma ben kon arki en. Yesus ben si taki „a kotiwroko bigi” èn moro wrokoman ben de fanowdu.

2 Yesus ben seti sani fu meki a preikiwroko du na tra presi tu. Fa a du dati? A ben seni den 12 apostel fu en fu go „preiki fu Gado Kownukondre” (Luk. 9:1, 2). Kande den apostel ben aksi densrefi fa den ben musu du a wroko disi. Ma fosi Yesus seni den go preiki, a gi den leri na wan lobi-ati fasi, neleki fa en Papa na hemel ben gi en leri.

3 Kande yu e prakseri fu den aksi disi: Sortu leri Yesus kisi fu en Papa? Sortu leri Yesus gi den apostel fu en? Fa a de na ini a ten disi? A de so taki a Mesias Kownu e gi en pipel leri tu, so taki den kan du a wroko di a gi den? Efu a e gi den leri, dan fa a e du dati?

„Mi e taki den sani disi soleki fa a Tata leri mi”

4. O ten èn pe Yesus kisi leri fu en Papa?

4 Yesus ben taki krin dati na en Papa ben gi en leri. Di Yesus ben e du en diniwroko na grontapu, a taki: „Mi e taki den sani disi soleki fa a Tata leri mi” (Yoh. 8:28). O ten èn pe Yesus kisi leri? Soleki fa a sori, dan a bigin kisi leri syatu baka di Gado meki en (Kol. 1:15). Milyunmilyun yari langa a fosi Manpikin disi fu Gado ben de na hemel nanga en. A heri pisi ten dati a ben e arki èn luku en Papa, a  „Gran Leriman” (Yes. 30:20). Na so a Manpikin disi kisi a moro bun leri. A kon sabi den fasi fu en Papa, den sani di en Papa ben du, èn den sani di en Papa o du ete.

5. Fa a Papa leri en Manpikin sortu wroko a ben musu du na grontapu?

5 Baka wan pisi ten Yehovah bigin leri en Manpikin sortu wroko a ben musu du na grontapu. Meki wi luku wan profeititori di e sori fa a Gran Leriman gi en fosi Manpikin leri. (Leisi Yesaya 50:4, 5.) A profeititori e taki dati Yehovah ben e wiki en Manpikin „ibri mamanten”. A sani disi e meki wi prakseri wan leriman di e wiki a studenti fu en fruku mamanten fu gi en leri. Wan buku di e fruklari Bijbel wortu taki: „A de neleki Yehovah e tyari en go na skoro fu leri en san a musu preiki èn fa a musu du dati.” Sobun, na a „skoro” dati na ini hemel Yehovah leri en Manpikin ’san a musu taki èn san a musu leri sma’ (Yoh. 12:49). A Papa leri en Manpikin tu fa a ben musu gi leri. * A leri di Yesus kisi na hemel yepi en fu du en wroko na grontapu èn fu leri den bakaman fu en fu du a preikiwroko.

6, 7. (a) San Yesus leri den apostel fu en èn sortu wroko a gi den fu du? (b) Sortu leri Yesus gi den bakaman fu en na ini a ten disi?

6 Sortu leri Yesus gi den apostel fu en? Mateyus kapitel 10 e taki dati a taigi den krin fa den ben musu du a preikiwroko. A taigi den pe den ben musu preiki (vers 5, 6) èn sortu boskopu den ben musu tyari gi sma (vers 7). A taigi den taki den ben musu frutrow na Yehovah tapu (vers 9, 10). A sori den tu fa den ben musu taki nanga den ososma (vers 11-13), san den ben musu du te sma no ben wani arki den (vers 14, 15), èn san den ben musu du te den ben o kisi frufolgu (vers 16-23). * A bun leri di Yesus gi den apostel fu en ben o yepi den fu teki fesi na ini a preikiwroko di ben o du bakaten.

7 Fa sani de na ini a ten disi? Yesus, a Kownu fu Gado Kownukondre gi den bakaman fu en a moro prenspari wroko di de. Den musu preiki ’a bun nyunsu fu a Kownukondre, so taki sma fu ala kondre kan yere dati’ (Mat. 24:14). A de so taki a Kownu leri wi fa fu du a prenspari wroko disi? Iya, a du dati! Wi Kownu na hemel sorgu taki den bakaman  fu en kisi leri fa fu preiki oso fu oso èn fa fu tyari den spesrutu frantwortu na ini den gemeente.

Preikiman e leri fa fu preiki a bun nyunsu

8, 9. (a) San ben de a moro prenspari sani di meki taki den ben e hori a Theokrasia Diniwroko-skoro? (b) Fa a mindriwiki konmakandra yepi yu fu de wan moro bun preikiman?

8 Langa ten kaba na organisâsi fu Yehovah gi Gado pipel leri na den kring konmakandra, den kongres, nanga den gemeente konmakandra soleki a Diniwroko Konmakandra. Na so den kan du a preikiwroko moro bun. Ma na ini den yari baka 1940 den brada di ben e teki fesi na a edekantoro fu wi, bigin seti sani fu gi leri nanga yepi fu difrenti skoro.

9 A Theokrasia Diniwroko-skoro. Soleki fa wi si na ini kapitel 16, a skoro disi bigin hori na ini 1943. Ma a de so taki a skoro ben seti fu meki den studenti hori moro bun lezing na den konmakandra? Nôno. A moro prenspari sani di meki taki den ben e hori a skoro disi, na fu leri Gado pipel fu prèise Yehovah nanga den sani di den e taki na ini a preikiwroko (Ps. 150:6). Den brada nanga sisa di de na a skoro disi e leri fu de moro bun Kownukondre preikiman. Now wi e kisi a leri disi na a mindriwiki konmakandra.

10, 11. Suma kan go na a Gileadskoro èn fu san ede den seti a skoro disi?

10 A Waktitoren Bijbelskoro Gilead. Tapu 1 februari 1943 den bigin nanga a skoro di den e kari now a Waktitoren Bijbelskoro Gilead. Biginbigin den ben seti a skoro disi fu gi leri na pionier nanga tra furuten dinari, so taki den ben kan go preiki leki zendeling na wan tra kondre. Ma sensi oktober 2011 a skoro disi na soso gi den wan di e du spesrutu furuten diniwroko kaba. Sobun, den sma di kan go na a skoro disi na den spesrutu pionier, den kring-opziener nanga den wefi fu den, sma fu Betel, nanga zendeling di no go na a skoro disi ete.

11 Fu san ede a Gileadskoro seti? Wan brada di e gi leri na a skoro langa ten kaba, taki: „A skoro disi seti fu tranga a bribi fu den studenti nanga yepi fu Gado Wortu. Den e kisi yepi tu fu tyari densrefi leki moro bun Kresten, so taki den o man du den wroko moro bun na ini den kondre pe den o go. Wan tra prenspari sani di den studenti e leri na a skoro, na fu du a preikiwroko nanga moro faya.”​—Ef. 4:11.

12, 13. Sortu krakti a Gileadskoro ben abi tapu a preikiwroko na heri grontapu? Gi wan eksempre.

 12 Sortu krakti a Gileadskoro ben abi tapu a preikiwroko na heri grontapu? Sensi 1943 moro leki 8500 sma kisi leri na a skoro dati. * Den sma di kisi leri na a Gileadskoro go leki zendeling na moro leki 170 kondre. Fu di den gebroiki a leri di den kisi bun, meki den ben man du a wroko fu den fayafaya èn den ben man yepi trawan fu de fayafaya preikiman tu. Furu tron den zendeling disi teki fesi na ini a preikiwroko na presi pe nowan Kownukondre preikiman ben de noso pe wan tu nomo ben de.

13 Luku fu eksempre san pasa na ini Yapan. Na a pisi ten fu a Di Fu Tu Grontapufeti den brada nanga sisa fu Yapan no ben e preiki oso fu oso moro. Na ini augustus 1949 yu no ben abi tin preikiman fu Yapan srefi. Ma na a kaba fu a yari dati 13 sma fu a Gileadskoro ben e preiki leki zendeling na ini Yapan. Baka dati den seni moro zendeling go. Na ini a bigin den zendeling ben e wroko moro furu na ini den bigi foto èn bakaten den go na den tra foto. Ala ten den zendeling ben e gi den Bijbelstudie fu den nanga den tra preikiman deki-ati fu go na ini a pionierwroko. A muiti fu den fayafaya zendeling disi ben abi bun bakapisi. Now Yapan abi moro leki 216.000 Kownukondre preikiman èn moro leki 40 procent fu den na pionier! *

14. San den skoro fu na organisâsi fu wi e sori krin? (Luku sosrefi a faki „ Skoro fu gi leri na Kownukondre preikiman”.)

14 Tra skoro fu na organisâsi fu wi. A Pionierskoro, a Bijbelskoro gi Kresten trowpaar nanga a Bijbelskoro gi brada di no trow yepi sma fu tron moro bun Kresten èn fu teki fesi na ini a preikiwroko. * Ala den skoro disi fu na organisâsi fu wi e sori krin taki wi Kownu e leri den bakaman fu en fu du a preikiwroko bun.​—2 Tim. 4:5.

Den brada e kisi leri fu tyari spesrutu frantwortu

15. Fa den brada di abi frantwortu kan teki na eksempre fu Yesus?

15 Memre taki a profeititori fu Yesaya e sori taki Yesus kisi leri fu Gado. Na so a Manpikin fu Gado ben ’sabi san a ben musu taigi den sma di weri’ (Yes. 50:4). Di Yesus ben de na grontapu a ben gebroiki den sani di a leri fu gi deki-ati na den sma di ben ’musu wroko hebi èn di ben musu tyari hebi lai’  (Mat. 11:28-30). Neleki Yesus, na so den brada di abi frantwortu na ini gemeente wani gi deki-ati na den tra brada nanga sisa. Fu dati ede na organisâsi seti difrenti skoro fu leri lepi brada fa den kan yepi den tra brada nanga sisa moro bun.

16, 17. Fu san ede a Kownukondre Diniwroko-skoro seti? (Luku sosrefi a voetnoot.

16 A Kownukondre Diniwroko-skoro. A fosi leisi di den hori a skoro disi ben de tapu 9 maart 1959 na South Lansing, New York. A skoro disi ben hori wán mun langa gi den kring-opziener, den distrikt-opziener nanga den gemeente dinari (di wi e kari fesiman fu den owruman now). Bakaten den no ben e hori a skoro disi na ini Ingrisitongo nomo, ma na ini tra tongo tu. Safrisafri den bigin hori a skoro disi na difrenti kondre fu gi den brada leri na heri grontapu. *

Brada Lloyd Barry e gi leri na a Kownukondre Diniwroko-skoro na Yapan na ini 1970

17 A yaribuku fu Yehovah Kotoigi fu 1962 ben  sori fu san ede den seti a Kownukondre Diniwroko-skoro. A taki: „Na ini a grontapu disi pe sma no abi furu ten, wan owruman na ini wan gemeente fu Yehovah kotoigi musu de wan man di orga en libi bun, so taki a man poti prakseri na a heri gemeente èn so taki a kan de wan blesi gi den. Na a srefi ten a no kan de wan man di no e poti prakseri na en osofamiri, soso fu di a e poti prakseri na a gemeente. A musu man du ala tu sani bun. A de wan bigi grani gi brada di abi frantwortu na ini den gemeente na heri grontapu, fu kon makandra na a Kownukondre Diniwroko-skoro. Drape den o kisi leri di o yepi den fu du san Bijbel e taki dati wan owruman musu man du!”​—1 Tim. 3:1-7; Titus 1:5-9.

18. Fa ala anbegiman fu Gado e kisi wini fu a Kownukondre Diniwroko-skoro?

18 Ala anbegiman fu Gado e kisi wini fu a Kownukondre Diniwroko-skoro. Fa so? Te owruman nanga  dinari ini a diniwroko e du san den leri na a skoro disi, dan den kan gi deki-ati na den tra brada nanga sisa neleki fa Yesus ben du dati. Wi alamala breiti te wan owruman noso dinari ini a diniwroko e gi wi deki-ati, a no so? Yu no breiti taki den e teki ten fu arki yu? (1 Tes. 5:11) Den lepi brada disi na trutru blesi gi a gemeente fu den!

19. Sortu tra skoro a Leri Komte seti èn fu san ede den du dati?

19 Tra skoro fu na organisâsi fu wi. A Leri Komte fu a Tiri Skin seti tra skoro tu fu gi leri na brada di abi frantwortu na ini na organisâsi fu wi, soleki den gemeente owruman, den kring-opziener nanga den brada fu den Bijkantoro Komte. Den skoro disi na fu yepi den brada disi fu tyari den furu frantwortu fu den moro bun. Den skoro disi di e gi leri fu Bijbel, e gi den brada deki-ati fu tan abi wan tranga bribi èn fu gebroiki den rai fu Bijbel te den e sorgu gi den skapu fu Yehovah di a lobi srefisrefi.​—1 Petr. 5:1-3.

A fosi klas fu a Dinariskoro na Malawi na ini 2007

20. Fu san ede Yesus ben kan taki dati wi alamala na sma di „kisi leri fu Yehovah”? San yu wani du nanga a leri di yu kisi?

20 A de krin taki a Mesias Kownu sorgu taki den bakaman fu en kisi bun leri. Ala den leri disi komoto fu hemel. Yehovah gi leri na en Manpikin èn a Manpikin gi leri na den bakaman fu en. Fu dati ede Yesus ben kan taki dati wi alamala na sma di „kisi leri fu Yehovah” (Yoh. 6:45; Yes. 54:13). Meki a de so taki wi alamala gebroiki den leri disi bun. Memre taki a moro prenspari sani fu san ede wi e kisi den leri disi, na fu yepi wi fu abi wan tranga bribi, so taki wi man du wi wroko moro bun.

^ paragraaf 5 Fa wi sabi taki a Papa leri en Manpikin fa a ben musu gi leri? Prakseri a sani disi: Yesus ben gebroiki furu agersitori di a ben e gi leri. Na so wan profeititori kon tru di Gado ben meki sma skrifi someni hondro yari na fesi (Ps. 78:2; Mat. 13:34, 35). A de krin taki Yehovah ben bosroiti langa ten kaba taki en Manpikin ben o gi sma leri nanga yepi fu agersitori noso eksempre.​—2 Tim. 3:16, 17.

^ paragraaf 6 Wan tu mun baka dati Yesus „teki ete seibitenti sma èn a seni den tu na tu” fu du a preikiwroko. A leri den tu fa fu du a preikiwroko.​—Luk. 10:1-16.

^ paragraaf 12 Son sma go na a Gileadskoro moro leki wán leisi.

^ paragraaf 13 Efu yu wani sabi moro fu a wroko di den zendeling fu a Gileadskoro du na grontapu, dan luku kapitel 23 fu a buku Jehovah’s Getuigen — Verkondigers van Gods koninkrijk.

^ paragraaf 14 A Skoro gi Kownukondre preikiman kon na ini a presi fu a Bijbelskoro gi Kresten trowpaar nanga a Bijbelskoro gi brada di no trow.

^ paragraaf 16 Now ala owruman kan go na a Kownukondre Diniwroko-skoro di e hori wán dei noso wan tu dei langa. A skoro disi no e hori ibri yari. Sensi 1984 dinari ini a diniwroko kan go na a skoro disi tu.

Kon sabi moro

STUDIE-WAKTITOREN

„Grati a pasi pe yu e poti yu futu” fu kan go na fesi

Fa yu kan puru sani di de na tapu yu pasi? Fa yu kan du moro na ini a diniwroko fu Gado?

STUDIE-WAKTITOREN

Yepi trawan fu du ala san den man gi Yehovah

Fa wi kan yepi yongu brada nanga brada di no dopu so langa ete fu go na fesi?