Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

Wan brifi fu a Tiri Skin

Wan brifi fu a Tiri Skin

Wi lobi Kownukondre preikiman:

PRAKSERI fa a ben o de efu yu ben de wan memre fu a Betelfamiri na ini Brooklyn na ini 1914. Tapu freida mamanten 2 oktober yu e sidon na yu presi e wakti te Brada C. T. Russell o kon fu hori a deitekst. Wantronso a doro e opo èn Brada Russell e waka kon na inisei. Soleki fa a gwenti a e wakti wan momenti, dan nanga prisiri a e taigi a heri Betelfamiri: „Kumorgu, un alamala.” Ma na presi fu go sidon na a ede fu a tafra soleki fa a gwenti, a e naki anu, dan a e taki wan sani di e hari ala sma prakseri: „A ten fu den trakondre sma kon na wan kaba. Den kownu fu den no e tiri moro!” Yu e prisiri srefisrefi. Wan langa ten kaba yu e wakti a momenti disi! Yu nanga den tra sma fu a Betelfamiri breiti so te nanga a nyunsu disi, taki unu e naki anu wan heri pisi ten.

 Furu yari pasa sensi Brada Russell meki a prenspari sani disi bekènti. San a Kownukondre du sensi a ten dati? Bun furu! Nanga yepi fu a Kownukondre, Yehovah krin en pipel safrisafri èn a gi den leri. Den anbegiman fu en di ben de wan tu dusun nomo na ini 1914, tron wan bigi pipel fu moro leki seibi nanga afu milyun na ini a ten disi. Na sortu fasi yu kisi wini fu den leri di Gado pipel kisi?

Furu tron wi e yere brada noso sisa e taki: „Yu kan si taki a wagi fu Yehovah e go na fesi!” A e go na fesi trutru. Yehovah en wagi di e agersi a pisi fu en organisâsi di de na hemel, e go na fesi ala ten. Ma efu yu leisi a buku disi finifini, dan yu o si taki na organisâsi fu Yehovah e go na fesi moro esi sensi 1914. Kownukondre preikiman gebroiki ala sortu nyun fasi fu man preiki a bun nyunsu na heri grontapu. Den orga preikiwaka, den gebroiki koranti, felem, kotoigikarta, gramofon, radio, èn srefi Internet.

Fu di Yehovah e blesi a wroko fu wi, meki nownow wi man tyari moi buku kon na doro na ini moro leki 670 tongo èn wi man prati den gi sma sondro taki den abi fu pai gi den. Nanga den heri ati, den brada nanga sisa fu wi e go yepi fu bow Kownukondre zaal, kongreshal nanga bijkantoro na ini gudu kondre èn na ini pôti kondre. Te wan rampu de na wan presi, den lobi-ati brada nanga sisa fu wi e go esi-esi fu yepi den wan di kisi fu du nanga a rampu. Na so den e sori taki den na trutru „brada di gebore fu te nowtu de”.​—Odo 17:17.

Son leisi den kerki fesiman nanga tra gensman e pruberi fu „meki wèt fu kan du ogri”. Ma a e tranga wi bribi fu si fa ibri tron baka den ogri di den ben wani du, „meki a bun nyunsu go na fesi”.​—Ps. 94:20; Fil. 1:12.

A de wan grani gi wi fu wroko makandra nanga unu, fu di wi alamala na futuboi fu wi Kownu Yesus Krestes (Mat. 24:45). Wi wani unu fu sabi taki wi lobi un alamala trutru. Wi howpu taki a buku disi o yepi unu fu kisi moro warderi gi a historia fu wi organisâsi.

Wi e winsi soso bun gi unu,

Un brada,

A Tiri Skin fu Yehovah Kotoigi