Go na content

Go na a tra menu

Go na table of contents

Yehovah Kotoigi

Sranantongo

Gado Kownukondre e tiri!

 KAPITEL 2

A Kownukondre seti na hemel

A Kownukondre seti na hemel

FU SAN A KAPITEL E TAKI

Wi o luku fa Gado sreka en pipel gi a ten te a Kownukondre ben o seti

1, 2. San na a moro prenspari sani di pasa na ini a historia fu heri grontapu èn fu san ede libisma no si dati?

FURU sma e aksi densrefi fa a ben o de efu den ben e libi na ini wan ten pe wan prenspari sani pasa di kenki a libi fu sma na heri grontapu. Ma efu yu ben e libi na ini so wan prenspari ten, yu denki taki yu ben o si sortu sani meki taki bigi kenki kon na grontapu? Kande yu no ben o si disi. Na ini a ten disi yu man leisi na ini historiabuku sortu sani meki taki son tirimakti fadon. Ma nofo tron den sma di ben e libi na a ten dati no ben sabi san ben e pasa. Fu taki en leti, furu sani di kenki grontapu, pasa sondro fu sma sabi. Kande den sani disi pasa na ini wan kownu-oso noso na ini wan lantikantoro. Kande wan pikin grupu prenspari lantiman teki wan bosroiti sondro taki tra sma ben sabi. Awinsi fa a no fa, den sani disi ben abi furu krakti na tapu a libi fu milyunmilyun sma.

2 Ma fa a de nanga a moro prenspari sani di pasa èn di kenki a libi fu milyunmilyun sma na grontapu? Nowan sma si a sani disi. A sani disi na a seti di Gado Kownukondre seti na hemel. Heri esi a Mesias tirimakti disi di Gado ben pramisi langa ten kaba, o tyari wan kaba kon na ala den tirimakti fu heri grontapu. (Leisi Danièl 2:34, 35, 44, 45.) A tru taki libisma no si di a sani disi pasa. Ma disi wani taki dati na kibri Yehovah ben wani kibri a tori gi den? Noso a sreka en pipel gi a ten te a Kownukondre ben o seti? Meki wi luku a tori disi.

’Mi boskopuman o sreka a pasi gi mi’

3-5. (a) Suma na „a boskopuman fu a frubontu” di Maleaki 3:1 e taki fu en? (b) San ben o pasa fosi „a boskopuman fu a frubontu” ben o kon na a tempel?

3 Sensi owruten Yehovah ben taki dati a ben o sreka en pipel gi a ten te a Mesias Kownukondre ben o  seti. Luku fu eksempre a profeititori di skrifi na Maleaki 3:1: „Luku, mi e seni mi boskopuman na mi fesi fu sreka a pasi gi mi. Wantronso a tru Masra o kon na En tempel. En na a sma di unu e suku, a boskopuman fu a frubontu, èn a sma di unu e wakti fayafaya.”

4 Fa a profeititori disi kon tru na ini a ten disi? O ten Yehovah „a tru Masra” kon luku fa a ben e go nanga den wan di e dini en na ini a fesidyari fu na agersi tempel? A profeititori e sori taki Yehovah ben o kon nanga „a boskopuman fu a frubontu”. Suma na a boskopuman disi? Dati na a Mesias Kownu Yesus Krestes! (Luk. 1:68-73) Te a ben o tron Tiriman, a ben o kon luku fa a ben e go nanga Gado pipel na grontapu èn a ben o krin den.​—1 Petr. 4:17.

5 Ma na a bigin fu Maleaki 3:1 wi e leisi fu wan tra „boskopuman”. Suma na dati? A sma disi ben o kon wan heri pisi ten fosi a Mesias Kownu ben o kon. A sani disi pasa trutru? A de so taki na ini den furu yari fosi 1914 wan sma „sreka a pasi” gi a Mesias Kownu?

6. Suma na a fosi „boskopuman” di sreka Gado pipel gi den sani di ben o pasa bakaten?

6 Na ini a buku disi wi o kisi piki tapu den sortu aksi disi te wi o luku a span historia fu Yehovah en pipel na ini a ten disi. Wi o si taki na ini den yari baka 1850, wan pikin grupu reti-ati sma ben tron a wan-enkri grupu fu trutru Kresten na mindri den furu falsi Kresten kerki. Sma ben kon sabi den leki den Bijbel Ondrosukuman. Den sma di ben e teki fesi gi a grupu disi ben de Charles T. Russell nanga wan tu krosibei mati fu en. Te yu e luku en bun, dan na den man disi ben de a „boskopuman” di ben o sreka a pasi. Na den ben e gi a pipel fu Gado leri fu Bijbel èn na den ben e sreka den gi den sani di ben o pasa bakaten. Meki wi luku fo fasi fa a „boskopuman” ben du disi.

Den anbegi Gado nanga yepi fu san tru

7, 8. (a) Suma na a pisi ten fu 1850 ben sori taki a kerkileri fu a sili di no e dede na wan lei? (b) Sortu tra kerkileri di no tru C. T. Russell nanga den mati fu en ben tyari kon na krin?

7 Te den Bijbel Ondrosukuman ben e studeri Bijbel, den ben e begi Yehovah fu yepi den frustan sani moro krin. Den ben luku san Bijbel e taki fu son kerkileri, èn te den ben agri nanga makandra fu san Bijbel e leri trutru, dan den ben tyari dati kon na doro na ini buku. Hondrohondro yari langa den  Kresten kerki ben de na ini dungru. Furu fu den leri fu den ben komoto fu owruten pipel di ben e anbegi falsi gado. Wan eksempre fu disi na a kerkileri taki libisma abi wan sili di no e dede. Na a pisi ten fu 1850 wan tu reti-ati sma di ben e studeri Bijbel fayafaya ben ondrosuku a leri disi moro fini èn den kon si taki Gado Wortu no e horibaka gi a leri disi. Henry Grew, George Stetson, nanga George Storrs ben skrifi fu a tori disi èn den ben e hori lezing fu en tu. Sondro fu frede den tyari kon na krin taki a leri disi na wan lei fu Satan. * Disi ben abi furu krakti na tapu C. T. Russell nanga den mati fu en.

8 A pikin grupu Bijbel Ondrosukuman ben kon si taki tra kerkileri di abi fu du nanga a sili di no man dede, na lei tu di e bruya sma. Wan tu fu den leri disi na a leri taki ala bun sma e go na hemel, noso taki Gado e bron den sili fu ogrisma fu têgo na ini hel. Russell nanga den mati fu en ben skrifi furu artikel, buku, brochure nanga traktaat fu sori krin taki den leri disi na lei. Boiti dati den ben e hori lezing fu den tori disi tu èn furu fu den lezing disi ben skrifi na ini koranti.

9. Fa A Waktitoren sori taki a kerkileri taki Gado na dri sma na ini wán, no tru?

9 Den Bijbel Ondrosukuman ben sori tu taki Gado a no dri sma na ini wán soleki fa furu sma e bribi. Na ini 1887 a tijdschrift „Sion Waktitoren” (Zion’s Watch Tower) ben taki: „Bijbel e sori krin taki Yehovah nanga wi Masra Yesus na tu difrenti sma, èn taki Yehovah na a Tata èn Yesus na a Manpikin.” Na artikel ben taki tu dati den no man frustan fa a leri disi kon de so prenspari. Den no ben man frustan fa someni sma ben kan bribi taki dri Gado na wán sma èn na a srefi ten a wán Gado na dri sma. Ma disi e sori nomo taki den kerki no ben de na ai èn den meki a feanti Satan kori den.

10. Fa A Waktitoren ben sori taki 1914 ben o de wan prenspari yari?

10 Soleki fa a nen e sori, dan a tijdschrift „Sion Waktitoren nanga Boskopuman di e sori taki Krestes kon” (Zion’s Watch Tower and Herald of Christ’s Presence) ben e poti furu prakseri na den profeititori di abi fu du nanga a kon di Krestes ben o kon. * Den salfuwan di ben e skrifi artikel na ini a tijdschrift disi, ben kon si taki a profeititori fu Danièl fu den „seibi pisi ten”  ben kan yepi den fu kon sabi o ten Gado ben o seti a Mesias Kownukondre. Sensi 1876 den ben e sori kaba taki den seibi ten ben o kon na wan kaba na ini a yari 1914 (Dan. 4:25; Luk. 21:24). Den brada na ini a ten dati no ben e frustan krin san ben o pasa na ini 1914, ma toku den ben e preiki na ala sei san den ben leri fu Bijbel. Te now ete den leri disi e yepi wi.

11, 12. (a) Suma yepi Brada Russell fu frustan Bijbel? (b) O prenspari a wroko ben de di Russell nanga den mati fu en du na ini den yari fosi 1914?

11 Noiti Russell nanga den mati fu en ben taki dati na den ben kon sabi san Bijbel e leri trutru. Den no ben taki dati na den wawan ben e frustan Bijbel. Russell ben taki dati a ben leri furu sani fu tra sma di ondrosuku Bijbel fosi en. A ben taki dati a moro prenspari sma di yepi en fu frustan Bijbel na Yehovah Gado. En na a sma di e leri en pipel san den musu sabi na a ten di den musu sabi dati. A krin taki Yehovah ben blesi Russell nanga den mati fu en di den du muiti fu  kon sabi sortu leri tru èn sortuwan no tru. Baka wan tu yari a ben de krin fu si taki den no ben de leki den tra grupu di ben e kari densrefi Kresten.

Brada Russell nanga den mati fu en tyari kon na krin san Bijbel e leri trutru

12 A wroko di den reti-ati man disi du na ini den yari fosi 1914 fu tyari kon na krin san Bijbel e leri trutru yepi bun furu sma! A Waktitoren fu 1 november 1917 taki: „Milyunmilyun sma na ini a ten disi kon fri fu falsi leri di ben de leki wan hebi gi den. Den no e frede moro taki den o go na ini hel èn den no e bribi tra falsi kerkileri . . . Moro leki fotenti yari pasa den tru Bijbel leri bigin kon na krin èn disi e pasa te now ete. Den de leki a watra fu wan liba di e kon hei safrisafri teleki a furu heri grontapu. Kande gensman o wani tapu sma fu panya den leri na heri grontapu, ma a o de neleki den wani pusu den skwala fu wan bigi se nanga wan sisibi nomo.”

13, 14. (a) Fa a „boskopuman” sreka a pasi gi a Mesias Kownu? (b) San wi kan leri fu den brada di ben e libi sowan 100 yari pasa?

13 Prakseri a sani disi: Furu sma no sabi taki Yesus nanga en Papa Yehovah na tu difrenti sma. Nofo tron sma e denki tu taki ala Kresten o kisi wan skin di no man dede noiti, aladi a grani disi de soso gi wan pikin grupu bakaman fu Krestes. Furu sma e denki tu taki Gado e pina sma na ini hel fu têgo. Efu Gado pipel no ben sabi san Bijbel e taki fu den tori disi, yu denki taki den ben o de srekasreka te Krestes ben o kon? Kwetikweti! A de krin taki a „boskopuman” ben sreka a pasi gi a Mesias Kownu!

14 Fa a de nanga wi na ini a ten disi? San wi kan leri fu den brada di ben e libi sowan 100 yari pasa? Wi srefi musu leisi èn studeri Gado Wortu fayafaya (Yoh. 17:3). Na ini a grontapu disi moni nanga gudu e kon moro prenspari èn sma no e poti prakseri moro na Gado Wortu. Ma wi musu sorgu taki ala ten wi e angri fu studeri Bijbel!​—Leisi 1 Timoteyus 4:15.

„Komoto drape, mi pipel”

15. San den Bijbel Ondrosukuman kon si bakaten? (Luku sosrefi a voetnoot.)

15 Den Bijbel Ondrosukuman ben leri sma taki den ben musu gowe libi den kerki di ben e bumui nanga grontapu. Na ini 1879, A Waktitoren ben taki fu a „Babilon kerki”. Disi ben abi fu du nanga a paus? Noso a ben abi fu du nanga a Lomsu Kerki? Hondrohondro yari langa den Protestant kerki ben sori taki  Lomsu Kerki ben de a Babilon di skrifi na ini den Bijbel profeititori. Ma safrisafri den Bijbel Ondrosukuman ben kon si taki „Babilon” na ini a ten disi na ala falsi Kresten kerki. Fu san ede? Fu di den alamala ben e leri sma sani di no e kruderi nanga Bijbel, soleki fa wi si na ini den paragraaf fosi a wan disi. * Bakaten den buku fu wi ben e sori moro krin san den reti-ati sma na ini den kerki fu Babilon musu du.

16, 17. (a) Fa Pisi 3 fu den „Dusun Yari Tiri”-buku nanga A Waktitoren sori sma taki den musu komoto na ini den falsi kerki? (b) San ben meki taki den warskow disi no ben sori so seryusu? (Luku a voetnoot.)

16 Fu eksempre, na ini 1891 Pisi 3 fu den buku „A Dusun Yari Tiri bigin” ben sori fa Gado drai baka gi a Babilon fu a ten disi. * A buku disi ben taki: „Gado drai baka gi a heri sistema fu en.” A ben taki tu dati ala sma di „no e agri nanga den falsi leri nanga gwenti fu Babilon musu gowe libi en”.

17 Son sma di ben de memre fu den Kresten kerki disi no ben puru den nen na den kerki, fu di den ben e denki: ’Mi e bribi den tru leri fu Bijbel èn mi no e go so furu na den konmakandra fu a kerki.’ Ma na ini yanuari 1900, A Waktitoren gi den sma a rai disi: „Ma a bun fu de nanga wán futu na ini Babilon èn nanga wán futu na dorosei? Na so wi musu gi yesi na Gado? Disi e plisi Gado? A feni disi bun? Kwetikweti. So wan sma [di de wan memre fu den kerki disi] ben meki ala sma sabi taki a ben meki wan frubontu nanga a kerki di a tron wan memre. A musu hori ensrefi na ala den wet fu a frubontu dati teleki a . . . meki ala sma sabi tu taki a puru en nen na a kerki dati èn taki a no de wan memre fu a kerki moro.” Na ini den yari baka dati a ben kon moro krin taki a rai disi na wan seryusu sani. * Futuboi fu Yehovah musu sori krin taki den no abi noti fu du nanga nowan falsi kerki.

18. Fu san ede sma musu komoto na ini Babilon a Bigiwan?

18 Doronomo den brada ben warskow sma fu komoto na ini Babilon a Bigiwan. Efu den no ben du dati, yu denki taki Krestes ben o abi wan grupu salfu futuboi na grontapu di ben o de srekasreka na a ten te a ben o tron Kownu? Kwetikweti! Soso den Kresten di fri fu a makti fu Babilon kan anbegi Yehovah „nanga yepi fu a santa yeye èn nanga yepi fu san tru” (Yoh. 4:24). A de so taki wi srefi e du ala muiti fu tan farawe fu falsi kerki? Meki wi tan gi yesi na a warskow  disi: „Komoto drape, mi pipel”!​—Leisi Openbaring 18:4.

Den kon makandra fu anbegi Gado

19, 20. Fa A Waktitoren gi Gado pipel deki-ati fu kon makandra fu anbegi Gado?

19 Den Bijbel Ondrosukuman ben leri sma taki den futuboi fu Gado musu kon makandra fu anbegi en efu den ben abi na okasi fu du dati. Tru Kresten no musu komoto na ini den falsi Kerki nomo. A prenspari tu fu kon makandra fu anbegi a tru Gado. Sensi a bigin A Waktitoren gi sma deki-ati fu du a sani disi. Fu eksempre, na ini yuli 1880, Brada Russell fruteri fa a kisi furu deki-ati na den konmakandra di a ben go hori lezing na den gemeente na difrenti presi. A ben gi den leisiman fu A Waktitoren deki-ati fu skrifi na tapu karta fa den ben e go na fesi. Sonwan fu den karta disi den ben o poti na ini A Waktitoren. Fu  san ede? A ben taki: „Meki wi alamala sabi . . . fa Masra e blesi unu. Meki wi sabi efu unu e tan kon makandra nanga den tra bribiman.”

Charles Russell nanga wan grupu fu den fosi Bijbel Ondrosukuman na ini Kopenhagen na Deinsikondre na ini 1909

20 Na ini 1882 wan artikel di ben nen „Kon makandra” ben kon na ini A Waktitoren. Na artikel ben e gi Kresten deki-ati fu hori konmakandra „fu man kisi leri, fu gi makandra deki-ati, èn fu tranga a bribi fu makandra”. Na artikel ben taki: „A no abi trobi efu sonwan fu unu kisi moro skoroleri noso efu sonwan fu unu sabi du son sani moro bun. Ibriwan fu unu musu tyari en eigi Bijbel, papira nanga potlood. Gebroiki den buku di e sori pe fu Bijbel son prenspari wortu skrifi èn gebroiki ala tra yepisani di unu abi. Luku fu sortu tori unu o taki èn aksi Gado fu gi unu en yeye meki unu frustan sani krin. Baka dati un musu leisi sani di abi fu du nanga a tori disi, un musu denki fu den, èn un musu luku san tra tekst e taki fu a tori. Dan unu kan de seiker taki a santa yeye o yepi unu fu frustan san Bijbel e taki trutru fu a tori.”

21. Fa a gemeente na ini Allegheny, Pennsylvania ben de wan bun eksempre gi den tra gemeente?

21 Na edekantoro fu den Bijbel Ondrosukuman ben de na ini Allegheny, Pennsylvania na Amerkankondre. Den Bijbel Ondrosukuman drape ben de wan bun eksempre gi trawan fu di den ben abi a gwenti fu kon makandra soleki fa a skrifi na ini Hebrewsma 10:24, 25. (Leisi en.) Brada Charles Capen ben sabi ete fa sani ben e go na den konmakandra dati di a ben de wan boi ete. A ben skrifi: „Mi e memre a tekst ete di ben skrifi na tapu a muur fu a konmakandra presi fu na organisâsi: ’Wán sma nomo na un Leriman èn un alamala na brada.’ Ala ten mi ben e hori a tekst dati na prakseri. Na mindri a pipel fu Yehovah nowan sma hei moro a trawan” (Mat. 23:8). Brada Capen ben memre tu fa den konmakandra ben tranga a bribi fu en, fa a ben e kisi furu deki-ati èn fa Brada Russell ben e du ala muiti fu yepi ibriwan fu den sma na ini a gemeente.

22. San furu reti-ati sma du di den kisi a rai fu go na den Kresten konmakandra èn san wi kan leri fu den?

22 Furu reti-ati sma ben teki na eksempre fu den brada nanga sisa na ini Allegheny èn den ben gi yesi na den rai di den ben e kisi. Na so den ben seti gemeente na tra presi fu a kondre, soleki Ohio nanga Michigan. Bakaten yu ben abi gemeente na ini heri  Noord-Amerika nanga tra kondre. Prakseri a sani disi: Efu den reti-ati sma dati no ben gi yesi na a rai fu kon makandra soleki fa Bijbel e taki, yu denki taki den ben o de srekasreka na a ten te Krestes ben o kon? Kwetikweti! Fa a de nanga wi na ini a ten disi? Wi srefi musu du ala muiti fu go na den Kresten konmakandra doronomo fu anbegi Gado èn fu tranga a bribi fu makandra.

Den preiki fayafaya

23. Fa A Waktitoren sori taki ala salfuwan musu de preikiman fu Gado Wortu?

23 Den Bijbel Ondrosukuman ben e leri sma taki ala salfuwan musu de preikiman fu Gado Wortu. Na ini 1885, A Waktitoren ben taki: „Wi no musu frigiti taki Gado salfu ibri salfuwan fu preiki (Yes. 61:1). Den kisi a kari fu du a preikiwroko.” Na ini 1888, wan tra Waktitoren ben gi a deki-ati disi: „A de krin sortu wroko wi kisi . . . Efu wi no wani du en èn efu wi e suku fasi fu no du en, dan wi na lesi futuboi. Wi e sori taki wi no warti fu abi a hei posisi di wi kisi.”

24, 25. (a) Sortu tra sani Russell nanga den mati fu en du fu gi sma deki-ati fu preiki? (b) Fa wan kolporteur ben e du a wroko fu en na a pisi ten di „furu oto no ben de”?

24 Brada Russell nanga den mati fu en no ben e gi sma deki-ati nomo fu preiki. Den bigin meki traktaat tu di den ben e kari „Bijbel Ondrosukuman traktaat”. Bakaten den kari den traktaat disi „Den fosi leri fu  Gado” èn den ben e tyari den kon na doro ibri dri mun. Den leisiman fu A Waktitoren ben e kisi den traktaat disi fu prati gi sma sondro fu aksi moni.

Wi musu aksi wisrefi: ’A preikiwroko na a moro prenspari wroko gi mi?’

25 Den sma di ben e teki a preikiwroko leki a wroko fu den ben nen kolporteur. Charles Capen di wi ben taki fu en kaba, ben de wan fu den. Bakaten a taki: „Fu man preiki na ini a heri kontren fu Pennsylvania, mi ben e gebroiki den karta di a lantikantoro fu Amerkankondre ben meki. Den karta disi ben abi ala pasi fu a kontren. Na so mi ben man waka go na ala pisi fu a kontren. Son leisi mi ben e waka dri dei na den boitipresi fu aksi sma efu den ben wani den buku „Ondrosuku fu den Buku fu Bijbel”. Baka dati mi ben yuru wan asiwagi fu tyari den buku gi den sma. Te neti mi ben e sribi na den oso fu den sma di ben e wroko gron. A pisi ten dati furu oto no ben de.”

Wan kolporteur. Luku a „Prenki fu den difrenti ten” na seisei fu na asiwagi

26. (a) Fu san ede Gado pipel ben musu du a preikiwroko fayafaya? (b) Sortu sani wi musu aksi wisrefi?

26 A no de fu taki dati na a ten dati wan sma ben musu abi deki-ati èn a ben musu de fayafaya fu man du a preikiwroko. Efu tru Kresten no ben e frustan o prenspari a preikiwroko de, yu denki taki den ben o de srekasreka te Krestes ben o kon? Kwetikweti! Fu taki en leti, a preikiwroko ben o de wan fu den prenspari sani di ben o sori taki Krestes kon (Mat. 24:14). A preikiwroko e yepi sma fu kisi libi. Sobun, Gado pipel ben musu meki a preikiwroko de a moro prenspari wroko di den e du. Na ini a ten disi wi musu aksi wisrefi: ’A preikiwroko na a moro prenspari wroko gi mi? Mi e du ala sani fu preiki so furu leki mi man?’

Gado Kownukondre seti!

27, 28. (a) San na apostel Yohanes si na ini wan fisyun? (b) San Satan nanga den ogri yeye fu en du di a Kownukondre seti?

27 Te fu kaba a prenspari yari 1914 doro. Soleki fa wi taki na a bigin fu a kapitel disi, libisma no si den prenspari sani di pasa na hemel. Ma na apostel Yohanes ben kisi wan fisyun di e sori san pasa. Prakseri a sani disi: Yohanes si „wan bigi marki” na hemel. A si taki Gado en „uma” de nanga bere èn a meki wan manpikin. Na „uma” disi na Gado en organisâsi fu yeye na hemel. Heri esi a pikin fu na uma „o tiri ala pipel nanga wan isri tiki”. Ma te a pikin gebore, ’den e tyari en esi-esi go na Gado èn na a kownusturu fu  en’. Wan tranga sten na hemel e taki: „Luku, a Gado fu wi frulusu sma, a sori a krakti fu en, a Kownukondre fu en seti kaba èn a Krestes fu en bigin tiri kaba.”​—Openb. 12:1, 5, 10.

28 A de krin taki Yohanes si na ini a fisyun disi taki a Mesias Kownukondre seti. A sani disi ben de wan prisiri sani, ma a no ala sma ben breiti. Satan nanga den ogri yeye fu en go feti nanga Mikael noso Krestes nanga den engel di tan gi yesi na Gado. San ben de a bakapisi? Bijbel e taki: „Den fringi a bigi kaiman go na grontapu. En na a fosi sneki, a wan di den e kari Didibri nanga Satan èn a e kori sma na heri grontapu. Den fringi en go na grontapu èn den fringi den engel fu en go na grontapu makandra nanga en.”​—Openb. 12:7, 9.

Na ini 1914, den Bijbel Ondrosukuman bigin si a marki taki Krestes kon, aladi tra sma no ben man si dati

29, 30. Di a Mesias Kownukondre seti, dan fa sani kenki (a) na grontapu? (b) na ini hemel?

29 Langa ten fosi 1914, den Bijbel Ondrosukuman taki dati wan muilek ten ben o bigin na ini a yari dati. Ma den srefi no ben sabi taki sani ben o pasa soifri soleki fa den ben taki. A fisyun fu Yohanes e sori taki na a ten dati Satan ben o abi moro krakti na libisma tapu. Bijbel e taki: „Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu” (Openb. 12:12). Na ini 1914 a Fosi Grontapufeti bigin èn a marki taki Krestes bigin tiri leki Kownu ben de krin fu si na heri grontapu. Den „lasti dei” fu a grontapu disi ben bigin.​—2 Tim. 3:1.

30 Ma na hemel prisiri ben de. Noiti moro Satan nanga den ogri yeye fu en ben o man go drape. Yohanes e fruteri: „Fu dati ede prisiri, un hemel èn unu di e libi drape!” (Openb. 12:12) Now di hemel ben krin èn Yesus tron Kownu, a Mesias Kownukondre ben de klariklari fu du sani gi Gado pipel na grontapu. San a Kownukondre ben o du? Soleki fa wi si na a bigin fu a kapitel disi, dan Krestes leki „a boskopuman fu a frubontu” ben o krin den futuboi fu Gado dyaso na grontapu. San disi wani taki?

Wan ten fu tesi

31. (a) San Maleaki ben taki fu a ten te Yesus ben o kon fu krin Gado pipel? (b) Fa a profeititori disi kon tru? (Luku sosrefi a voetnoot.)

31 Maleaki ben taki na fesi dati sani no ben o makriki gi Gado pipel na a ten te Yesus ben o kon fu krin  den. Maleaki skrifi: „Suma o de srekasreka na a dei te a o kon? Suma o tan tanapu te a o de fu si? Bika a o de leki a faya di wan sma e gebroiki fu meki gowtu kon soifri, èn leki a sopo fu wan wrokoman di e wasi krosi” (Mal. 3:2). Sani pasa trutru soleki fa Maleaki skrifi! Sensi 1914 Gado pipel kisi furu tesi nanga problema baka makandra. Na a ten fu a Fosi Grontapufeti furu Bijbel Ondrosukuman kisi hebi frufolgu èn furu fu den go na strafu. *

32. Sortu bruya ben kon na ini na organisâsi baka 1916?

32 Bruya ben de tu na ini na organisâsi. Na ini 1916 Brada Russell dede di a ben abi 64 yari nomo, èn furu anbegiman fu Yehovah skreki di den yere a nyunsu. Di a dede a kon na krin taki son sma ben e si en wawan leki fesiman. A ben e gersi srefi leki son sma ben si Brada Russell leki wan sortu gado, aladi a no ben wani dati kwetikweti. Furu sma ben denki taki Brada Russell wawan ben frustan Bijbel èn taki den no ben o kisi leri moro baka a dede fu en. Son sma no ben wani horibaka gi den brada di ben wani go doro nanga a wroko. Dati meki den bigin gens den brada disi èn pratifasi kon na ini na organisâsi.

33. Fa Gado pipel kisi tesi di sani no waka soleki fa den ben fruwakti?

33 Wan tra tesi di den brada nanga sisa ben kisi na taki sani no ben waka soleki fa den ben fruwakti. A tru taki „a reti ten fu den trakondre sma” kon na wan kaba na ini 1914, soleki fa A Waktitoren ben taki (Luk. 21:24). Ma den brada no ben frustan ete san ben o pasa na ini a yari dati. Den ben e denki taki na ini 1914 Krestes ben o tyari den salfu Kresten di ben de leki en trow-uma, go na hemel fu tiri makandra nanga en. Ma disi no pasa. Na a kaba fu 1917, A Waktitoren taki fu wan kotiten fu 40 yari di ben o kaba na a bigin fu 1918. Ma a preikiwroko no ben kon na wan kaba. A preikiwroko tan go na fesi baka 1918. A tijdschrift ben taki dati a kotiten ben kaba trutru, ma wan ten ben de ete fu piki a nyanyan di tan abra. Toku furu sma tapu fu dini Yehovah fu di sani no ben waka soleki fa den ben fruwakti.

34. (a) Sortu bigi tesi Gado pipel kisi na ini 1918? (b) Fu san ede den fesiman fu den Kresten kerki ben denki taki Gado pipel „dede”?

34 Den brada nanga sisa kisi wan bigi tesi na ini 1918. Na a ten dati J. F. Rutherford ben tron fesiman fu na organisâsi fu Gado baka C. T. Russell. Den ben  poti en nanga seibi tra brada di ben abi bigi frantwortu na ini na organisâsi, na strafu-oso. Aladi den brada disi no ben du nowan ogri, toku krutubangi bosroiti fu meki den koti strafu furu yari langa na ini wan strafu-oso na ini Atlanta, Georgia, na Amerkankondre. Fu wan pisi ten, a ben gersi leki a wroko fu Gado pipel ben tapu. Den „fesiman” fu na organisâsi ben de na strafu-oso, na edekantoro na Brooklyn ben tapu, èn sma ben e gens a preikiwroko na ini Amerkankondre nanga Europa. Furu fesiman fu den Kresten kerki ben breiti fu di den ben e denki taki den Bijbel Ondrosukuman no ben man du noti moro. A ben gersi leki den „dede” (Openb. 11:3, 7-10). Ma disi no ben tru kwetikweti!

Den kon na libi baka!

35. Fu san ede Yesus gi pasi taki den bakaman fu en kisi tesi, èn san a du fu yepi den?

35 Den feanti fu a tru bribi no ben sabi taki na Yesus ben gi pasi taki en pipel kisi den tesi disi. Disi ben musu pasa fu di na a ten dati Yehovah ben e krin en pipel ’leki fa wan sma e krin solfru’ (Mal. 3:3). Yehovah nanga en Manpikin ben de seiker taki den tesi disi ben o meki den tru anbegiman kon krin. Na so den ben o man dini a Kownu moro bun. Sensi a bigin fu 1919, a ben de krin taki a santa yeye gi Gado pipel libi baka, aladi den feanti fu den no ben denki taki dati ben o man pasa (Openb. 11:11). Na a ten dati Krestes du wan prenspari sani di abi fu du nanga a marki fu den lasti dei. A poti „a koni srafu di de fu frutrow” fu luku den futuboi fu en. A srafu disi na wan pikin grupu salfu brada di ben o teki fesi gi en pipel èn di ben o gi den nyanyan, noso leri na a reti ten.​—Mat. 24:45-47.

36. San e sori taki Gado pipel kon na libi baka?

36 Brada Rutherford nanga den tra brada ben komoto na strafu-oso tapu 26 maart 1919. Syatu baka dati den bigin sreka sani fu hori wan kongres na ini september. Den bigin seti sani tu fu tyari wan tra tijdschrift kon na doro di den ben o kari „A Gowtu Ten”. Den ben o prati a tijdschrift disi na ini a preikiwroko makandra nanga A Waktitoren. * Na ini a srefi yari dati den tyari a „Nyunsu” (Bulletin) kon na doro fu a fosi leisi. Now a nen Wi Kresten libi nanga a  preikiwroko​—Studie-buku. Sensi a bigin a yepi furu brada nanga sisa fu du a preikiwroko moro bun. A no de fu taki dati sensi 1919, den brada sori moro nanga moro o prenspari a de fu preiki oso fu oso.

37. Fu san ede son sma gowe libi na organisâsi na ini den yari baka 1919?

37 A preikiwroko ben tyari kon na krin moro nanga moro suma na den tru bakaman fu Krestes, bika wan sma musu abi sakafasi fu du a wroko disi. Den heimemre sma di no ben wani du a wroko disi ben gowe libi na organisâsi. Na ini den yari baka 1919, sonwan fu den sma disi bigin panya ogri-ati lei fu di den ati ben bron. Den bigin wroko makandra srefi nanga sma di ben e frufolgu den futuboi fu Yehovah.

38. Te wi e luku den bun bakapisi di den bakaman fu Krestes ben abi èn den feti di den wini, dan sani dati e sori wi?

38 Aladi den bakaman fu Krestes kisi someni problema, toku den tan go na fesi na ini a tru anbegi. Ala den bun bakapisi di den ben abi èn ibri feti di den wini e sori wi krin taki Gado Kownukondre e tiri!  Nanga yepi fu en Manpikin nanga a Mesias Kownukondre, Gado e yepi en pipel èn a e blesi den. Iya, soso nanga a yepi fu Gado a grupu disi ben man wini Satan nanga a grontapu fu en ibri tron baka, aladi den na sondu libisma!​—Leisi Yesaya 54:17.

Brada Rutherford e gi wan span lezing na wan kongres wan tu mun baka di a komoto na strafu-oso

39, 40. (a) San na wan tu moi sani na ini a buku disi? (b) Sortu wini yu kan kisi te yu e studeri a buku disi?

39 Na ini den kapitel di e kon, wi o luku san Gado Kownukondre du na grontapu na ini den yari sensi a seti na hemel. Ibri pisi fu a buku disi o poti prakseri na prenspari sani fu a Kownukondre-wroko na grontapu. Ibri kapitel abi wan faki fu luku baka san wi leri. Den faki disi o yepi ibriwan fu wi fu si efu a Kownukondre na wan trutru sani gi wi. Den lasti kapitel o sori wi taki heri esi a Kownukondre o kon fu pori den ogri sma èn fu tyari a paradijs kon. Wi o luku tu san wi kan fruwakti na a ten dati. Sortu wini yu kan kisi te yu e studeri a buku disi?

40 Satan wani meki yu lasi bribi na ini Gado Kownukondre. Ma Yehovah wani tranga yu bribi, bika a bribi disi o kibri yu èn a o meki yu tanapu kánkan (Ef. 6:16). Fu dati ede wi e gi yu a deki-ati fu studeri a buku disi bun. Ala ten yu musu aksi yusrefi: ’Gado Kownukondre na wan trutru sani gi mi?’ O moro yu e bribi na ini a Kownukondre, o moro yu o horibaka gi en fayafaya teleki Gado Kownukondre kon fu tiri grontapu. Na a ten dati ala sma o si taki Gado Kownukondre na wan trutru tirimakti di e tiri nownow kaba!

^ paragraaf 7 Efu yu wani sabi moro fu Grew, Stetson, nanga Storrs, luku a buku Jehovah’s Getuigen​—Verkondigers van Gods koninkrijk, bladzijde 45, 46, noso a DVD Jehovah’s Getuigen — Geloof in actie, Deel 1.

^ paragraaf 10 Na ini a buku disi wi o gebroiki a nen A Waktitoren. Ma a nen fu a tijdschrift disi kenki wan tu leisi sensi a bigin kon na doro na ini 1879.

^ paragraaf 15 Aladi den Bijbel Ondrosukuman ben frustan taki den ben musu prati fu den tra kerki di ben e bumui nanga grontapu, toku den ben e si son sma leki Kresten brada noso sisa fu den ete. Efu wan sma ben taki dati a e bribi na ini a lusu-paiman èn a gi ensrefi abra na Gado, dan den ben e si en leki wan Kresten brada noso sisa fu den, awinsi a no ben de wan Bijbel Ondrosukuman.

^ paragraaf 16 Te a nen fu wan buku skrifi na mindri den marki disi „ . . .”, dan a no de na ini Sranantongo. Ma te a de na ini Sranantongo, dan a nen skrifi nanga skoinsi letter.

^ paragraaf 17 Wan sani di ben meki taki den warskow disi no ben e sori so seryusu, na taki den ben skrifi den gi den 144.000 sma di ben de na ini a pikin ipi fu Krestes. Na ini kapitel 5 wi o si taki fosi 1935 den ben e denki tra fasi fu a „bigi grupu” di skrifi na ini Openbaring 7:9, 10 fu a King James Version. Na ini a grupu disi yu ben o abi bun furu sma fu den tra Kresten kerki. Den sma disi ben o de na ini wan tra grupu di ben o kisi a grani fu go na hemel fu di den ben teki a sei fu Krestes na ini a pisi ten fu a kaba.

^ paragraaf 31 A tijdschrift The Golden Age („A Gowtu Ten”, now wi sabi en leki Ontwaakt!) fu september 1920 ben de wan spesrutuwan. A ben taki finifini fu a frufolgu di den brada nanga sisa kisi na ini Kanada, Ingrisikondre, Doisrikondre nanga Amerkankondre na a ten fu a feti. A ben taki tu fu den ogri-ati sani di sma du nanga den son leisi. A ben de krin fu si taki na ini den yari bifo a Fosi Grontapufeti den brada nanga sisa no ben kisi so hebi frufolgu.

^ paragraaf 36 Furu yari langa den ben skrifi A Waktitoren fu gi leri na den sma fu a pikin ipi.

Kon sabi moro

STUDIE-WAKTITOREN

„Suma na trutru a koni srafu di de fu frutrow?”

Na artikel disi e sori moro krin suma na a koni srafu di de fu frutrow. Luku fu san ede wi abi a srafu disi fanowdu fu gi wi nyanyan.