Go na content

Go na a tra menu

Go na table of contents

Yehovah Kotoigi

Sranantongo

Drai kon baka na Yehovah

 PISI WÁN

„Mi o go suku den wan di lasi”

„Mi o go suku den wan di lasi”

A skapu bruya. Di a ben e nyan grasi, dan sondro fu sabi a waka komoto fu na ipi. Now a no man si den tra skapu èn a no e si a skapuman. Neti e tapu. A skapu lasi na wan presi pe ogri meti e waka èn a no man du noti. Baka wan pisi ten a e yere wan sten di a sabi. Na a sten fu a skapuman. A skapuman e lon go miti a skapu, a e opo en, a e poti en na ini en dyakti èn a e tyari en go na oso.

YEHOVAH e agersi ensrefi nanga so wan skapuman. Na ini Bijbel a e gi wi a dyaranti disi: „Mi srefi o suku mi skapu èn na mi o sorgu den.”Esekièl 34:11, 12.

Den „skapu di mi e sorgu”

Suma na den skapu fu Yehovah? Den skapu fu Yehovah na sma di lobi en èn di e anbegi en. Bijbel e taki: „Meki wi anbegi en èn meki wi boigi gi en. Meki wi saka kindi na fesi Yehovah wi Mekiman. En na wi Gado èn wi na en pipel. Wi na skapu na a weigron fu en, fu di na en e sorgu wi” (Psalm 95:6, 7). Neleki fa skapu e waka baka den skapuman, na so den anbegiman fu Yehovah wani waka baka a Skapuman fu den. Disi wani taki dati den no e meki fowtu? Nôno. Son leisi den futuboi fu Gado kon de leki ’skapu di panya go na ala sei’, leki „lasi skapu” èn den kon „de leki skapu di lasi pasi” (Esekièl 34:12; Mateyus 15:24; 1 Petrus 2:25). Ma awinsi dati  pasa nanga wan sma, toku Yehovah e tan howpu taki a o drai kon baka.

Yu e si Yehovah ete leki yu Skapuman? Fa Yehovah sori taki en na wi Skapuman na ini a ten disi? Luku dri fasi fa a e sori dati:

A e gi wi leri. A leri di Yehovah e gi wi de leki nyanyan. Yehovah e taki: „Mi o tyari den go nyan na wan bun weigron. . . . Den o didon na wan bun tanpresi èn . . . den o feni wan bun weigron pe den kan nyan” (Esekièl 34:14). Ala ten Yehovah e gi wi bun leri fu Bijbel di e gi wi deki-ati na a yoisti ten. Yu e memre wan artikel, wan lezing, noso wan felem di yu ben si leki piki tapu a begi fu yu? A sani disi ben meki yu si krin taki Yehovah lobi yu, a no so?

A e kibri wi èn a e yepi wi. Yehovah e pramisi wi: „Den wan di panya go na ala sei, mi o tyari kon na wán. Te wan futu broko, dan mi o tai en. Mi o yepi den swakiwan” (Esekièl 34:16). Yehovah e gi krakti na den sma di kon swaki noso di no sabi san den musu du fu di den lai broko-ede. Na agersifasi a e dresi den skapu fu en di kisi mankeri, kande fu di wan tra brada noso sisa du wan hati sani nanga den. A e tyari den wan di gowe libi na ipi kon baka na en. Son leisi den sma disi e firi leki den no warti noti.

A e broko en ede nanga wi. Yehovah e taki: „Mi o puru den na ini ala den presi pe den ben panya go. . . . Mi o go suku den wan di lasi” (Esekièl 34:12, 16). Yehovah no e si wan sma di lasi pasi leki wan sma di no man kenki moro. A sabi te wan skapu no de, a e go suku a skapu dati èn a e prisiri te a feni en baka (Mateyus 18:12-14). A e kari den tru anbegiman fu en: „Mi skapu di mi e sorgu” (Esekièl 34:31). Yu na wan fu den skapu dati.

Yehovah no e si wan sma di lasi pasi leki wan sma di no man kenki moro. A e prisiri te a feni a skapu dati baka

„Meki ala sani kon de leki fa a ben de fosi”

Fu san ede Yehovah e suku yu? Fu san ede a e kari yu fu drai kon baka na en? Fu di a wani taki yu de koloku. A e pramisi en skapu taki den ’blesi fu en o furu leki a watra fu wan bigi alen’ (Esekièl 34:26). Yu kan bribi a pramisi disi fu di yusrefi si kaba fa a kon tru.

Prakseri baka fa a ben de di yu kon leri sabi Yehovah. Fu eksempre, fa yu ben feni en di yu kon sabi den moi tru tori di abi fu du nanga Gado nen èn den sani di a o du gi libisma? Yu e memre fa a ben switi fu de makandra nanga den Kresten brada nanga sisa fu yu na den bigi konmakandra? Di yu ben fruteri wan sma a bun nyunsu èn a ben wani kon sabi moro, dan yu ben breiti èn yu ben firi koloku, a no so?

Yu kan prisiri baka leki fa yu ben prisiri fosi. Den owruten futuboi fu Gado ben begi: „Yehovah, meki wi drai kon baka na yu, dan wi o kon baka wantewante. Meki ala sani kon de leki fa a ben de fosi” (Sari singi 5:21). Yehovah piki a begi dati èn a pipel fu en bigin dini en baka nanga prisiri (Nehemia 8:17). Na dati Yehovah o du gi yu tu.

Ma a no makriki fu kon baka na Yehovah. Luku wan tu sani di e meki en muilek fu drai kon baka èn luku san kan yepi yu.