1. Fu san ede Gado ben teki den Israelsma fu owruten leki pipel?

Gado ben teki den bakapikin fu a famiri edeman Abraham leki a pipel fu en èn a gi den wèt. A kari a pipel dati „Israel”, èn a gi den a frantwortu fu kibri a tru anbegi nanga a wortu fu en (Psalm 147:19, 20). Na so ala pipel fu grontapu ben kan kisi wini fu den Israelsma.​—Leisi Genesis 22:18.

Gado ben teki den Israelsma fu de en kotoigi. A fasi fa sani waka gi den na ini owruten, e sori fa sma di e gi yesi na Gado e kisi wini fu den wèt fu en (Deuteronomium 4:6). Na so den Israelsma ben kan yepi tra sma fu kon sabi a tru Gado.​—Leisi Yesaya 43:10, 12.

2. Fu san ede tru Kresten e wroko makandra leki wán grupu?

Bakaten, Gado no ben feni Israel bun moro. Na presi fu a pipel dati, a teki a Kresten gemeente leki a pipel fu en (Mateyus 21:43; 23:37, 38). Fosi, den Israelsma ben de den kotoigi fu Yehovah, ma now tru Kresten na den kotoigi fu en.​—Leisi Tori fu den apostel 15:14, 17.

Yesus ben orga den bakaman fu en fu preiki èn fu meki sma fu ala kondre tron disipel (Mateyus 10:7, 11; 24:14; 28:19, 20). A wroko disi e doro en heimarki, now di a grontapu disi e kon na wan kaba. Sensi di libisma de, disi na a fosi leisi di Yehovah tyari milyunmilyun sma fu ala kondre kon na wán na ini a tru anbegi (Openbaring 7:9, 10). Tru Kresten e wroko leki wán grupu fu gi makandra deki-ati èn fu yepi makandra. Den e kisi a srefi Bijbel leri na den konmakandra fu den di e hori na heri grontapu.​—Leisi Hebrewsma 10:24, 25.

 3. Fa a disiten organisâsi fu Yehovah Kotoigi bigin?

Na ini den yari baka 1870, wan pikin grupu Bijbel ondrosukuman ben e kon leri sabi den tru tori fu Bijbel di sma ben frigiti langa ten kaba. Den ben sabi taki Yesus ben orga a Kresten gemeente fu du a preikiwroko. Sobun, den bigin preiki a bun nyunsu fu a Kownukondre na heri grontapu. Na ini 1931, den teki a nen Yehovah Kotoigi.​—Leisi Tori fu den apostel 1:8; 2:1, 4; 5:42.

4. Fa Yehovah Kotoigi orga na ini a ten disi?

Na ini a fosi yarihondro, den Kresten gemeente na ini furu kondre kisi wini fu a grupu apostel nanga owruman di ben e teki fesi, èn di ben e si Yesus leki na Ede fu a gemeente (Tori fu den apostel 16:4, 5). Na so a de tu na ini a ten disi taki Yehovah Kotoigi e kisi wini fu wan grupu lepi owruman di e tiri na organisâsi fu den. A grupu disi abi a frantwortu fu luku den kantoro fu Yehovah Kotoigi pe den e vertaal buku èn pe den e meki buku na ini moro leki 600 tongo, fu gi sma leri fu Bijbel. Na so den brada disi e sorgu taki den moro leki 100.000 gemeente na heri grontapu e kisi rai nanga deki-ati. Ibri gemeente abi lepi brada di e dini leki owruman noso opziener. Den man disi e sorgu den skapu fu Gado na wan lobi-ati fasi.​—Leisi 1 Petrus 5:2, 3.

Yehovah Kotoigi orga fu preiki a bun nyunsu èn fu meki disipel. Neleki den apostel, wi e preiki oso fu oso (Tori fu den apostel 20:20). Wi de klariklari tu fu studeri Bijbel nanga reti-ati sma di lobi den tru tori fu Gado. Ma Yehovah Kotoigi no de wan organisâsi nomo. Wi na wan bigi famiri di abi wan lobi-ati Papa. Wi na brada nanga sisa di e broko den ede nanga makandra (2 Tesalonikasma 1:3). Fu di a pipel fu Yehovah orga fu plisi Gado èn fu yepi trawan, meki den de a moro koloku famiri na grontapu.​—Leisi Psalm 33:12; Tori fu den apostel 20:35.