Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 4

Suma na Yesus Krestes?

Suma na Yesus Krestes?

1. Fa a libi fu Yesus ben bigin?

Sortu fasi fu Yesus ben meki taki sma ben lobi kon na en?MATEYUS 11:29; MARKUS 10:13-16.

Tra fasi leki libisma, Yesus ben libi leki wan yeye na hemel bifo a gebore na grontapu (Yohanes 8:23). A ben de a fosi sani di Gado meki, èn a yepi Gado fu meki ala tra sani. En na a wan-enkri sma di Yehovah srefi meki èn fu dati ede a fiti taki Bijbel e kari en „a wan-enkri” Manpikin fu Gado (Yohanes 1:14). Yesus ben de a sma di ben e taki gi Gado èn fu dati ede Bijbel e kari en „a Wortu”.Leisi Odo 8:22, 23, 30; Kolosesma 1:15, 16.

2. Fu san ede Yesus ben kon na grontapu?

Fu seni en Manpikin kon na grontapu, Gado teki a libi fu Yesus na hemel poti na ini a muru fu a Dyu nyunwenke Maria. Sobun, a papa fu Yesus no ben de wan libisma (Lukas 1:30-35). Yesus ben kon na grontapu (1) fu leri sma den tru tori fu Gado, (2) fu gi sma na eksempre fa fu du a wani fu Gado srefi na ini muilek ten, èn (3) fu gi a libi fu en di ben de sondro sondu, leki „wan lusu-paiman”.Leisi Mateyus 20:28.

3. Fu san ede wi abi wan lusu-paiman fanowdu?

Wan lusu-paiman na san wan sma e pai fu frulusu wan trawan, so taki den no kiri en (Eksodes 21:29, 30). Gado no ben wani taki libisma kon owru èn taki den dede. Fa wi du sabi dati? Gado ben taigi a fosi man, Adam, taki efu a ben o du a sani di Bijbel e kari „sondu”, dan a ben o dede. Sobun, efu Adam no ben sondu, a no ben o dede noiti (Genesis 2:16, 17; 5:5). Soleki fa  Bijbel e sori, dan na Adam meki taki dede „kon” na grontapu. Sobun, Adam meki taki ala den bakapikin fu en kisi sondu èn a strafu gi dati na dede. Wi abi wan lusu-paiman fanowdu fu frulusu wi fu a dedestrafu di Adam tyari kon na wi tapu.Leisi Romesma 5:12; 6:23.

Suma ben o man pai a lusu-paiman fu frulusu wi fu dede? Te wi dede, dan wi e pai soso gi wi eigi sondu. Nowan sondu libisma man pai gi den sondu fu trawan.Leisi Psalm 49:7-9.

4. Fu san ede Yesus dede?

Tra fasi leki wi, Yesus no ben abi sondu. Sobun, a no ben abi fu dede gi den sondu fu en. Na presi fu dati, Yesus dede gi den sondu fu tra sma. Gado seni en Manpikin fu dede gi wi èn na so a sori taki a abi bigi lobi gi libisma. Yesus sori lobi gi wi tu fu di a gi yesi na en Papa èn fu di a gi en libi gi den sondu fu wi. Leisi Yohanes 3:16; Romesma 5:18, 19.

5. San Yesus e du now?

Di Yesus ben de na grontapu, a dresi siki sma, a gi dedesma wan opobaka, èn a yepi sma di ben de na nowtu. Na so a sori san a o du gi ala libisma di e gi yesi na Gado (Mateyus 15:30, 31; Yohanes 5:28). Baka di Yesus dede, Gado wiki en baka fu libi leki wan yeye (1 Petrus 3:18). Baka dati, Yesus ben e wakti na a reti-anusei fu Yehovah, teleki A gi en makti fu tiri leki Kownu fu heri grontapu (Hebrewsma 10:12, 13). Now Yesus e tiri leki Kownu na hemel èn den bakaman fu en na grontapu e meki a bun nyunsu dati bekènti na heri grontapu.Leisi Danièl 7:13, 14; Mateyus 24:14.

Heri esi, Yesus o gebroiki a makti di a abi leki Kownu, fu tyari wan kaba kon na ala pina èn na den sma di e pina trawan. Ala sma di e gi yesi na Yesus, fu di den e poti bribi na ini en, o libi na ini wan paradijs na grontapu.Leisi Psalm 37:9-11.