Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 2

Suma na Gado?

Suma na Gado?

1. Fu san ede wi musu anbegi Gado?

A tru Gado na a Mekiman fu ala sani. A no ben abi wan bigin èn noiti a o abi wan kaba (Psalm 90:2). A bun nyunsu di skrifi na ini Bijbel e kon fu en (1 Timoteyus 1:11). Fu di na Gado gi wi libi, meki wi musu anbegi en wawan.Leisi Openbaring 4:11.

2. Fa Gado de?

Noiti wan sma si Gado, bika en na wan Yeye. Disi wani taki dati a hei moro den libisani na grontapu (Yohanes 1:18; 4:24). Toku den sani di Gado meki e yepi wi fu frustan fa a e denki èn fa a e firi. Fu eksempre, den someni difrenti froktu nanga bromki e sori wi taki a abi lobi nanga koni. A bigi hemel e sori wi o furu krakti Gado abi.Leisi Romesma 1:20.

Ma wi kan leri moro fu den fasi fu Gado te wi e leisi Bijbel. Fu eksempre, Bijbel e fruteri wi san Gado lobi èn san a no lobi, fa a e libi nanga sma, èn san a e du te sma e du bun noso ogri.Leisi Psalm 103:7-10.

3. Gado abi wan nen?

Yesus ben taki: „Wi Tata na hemel, meki yu nen kon santa” (Mateyus 6:9). Aladi Bijbel e kari Gado na Almaktiwan, noso a Moro Heiwan, toku a abi wán nen nomo. Na ini ibri tongo sma e taki a nen na wan tra fasi. Na ini Sranantongo wi gwenti taki „Yehovah”. Ma son sma e taki „Yahweh”.Leisi Psalm 83:18.

Sma puru a nen fu Gado na ini furu Bijbel èn den poti den wortu Masra noso Gado na ini a presi fu dati. Ma di Bijbel skrifi, dan a ben abi a nen fu Gado sowan  7000 tron na ini. Yesus ben meki sma kon sabi a nen fu Gado, te a ben gi sma leri fu Gado.Leisi Yohanes 17:26.

4. Yehovah e broko en ede nanga wi?

Neleki a lobi-ati papa disi, Gado e du sani di o tyari wini kon gi wi fu ala ten

Yu denki taki a pina di de na ala sei e sori taki Yehovah na wan Gado di no e broko en ede nanga wi? Son sma e taki dati Gado e meki wi pina fu tesi wi, ma dati no tru.Leisi Yakobus 1:13.

Gado gi libisma a grani fu teki den eigi bosroiti. Wi e warderi en trutru taki wisrefi kan bosroiti efu wi wani dini Gado (Yosua 24:15). Ma fu di furu sma e du ogri nanga trawan, meki furu pina de. Yehovah e sari te a e si taki so furu kruktudu e pasa.Leisi Genesis 6:5, 6.

Yehovah na wan Gado di e broko en ede nanga wi. A wani taki wi nyan bun fu a libi. Heri esi a o tyari wan kaba kon na pina èn na den sma di e meki taki pina de. Ma Yehovah sabi fu san ede a e gi pasi taki pina de fu wan pisi ten. Na ini Les 8 wi o leri fu san ede a e du dati.Leisi 2 Petrus 2:9; 3:7, 13.

5. Fa wi kan kon moro krosibei na Gado?

Yehovah wani taki wi kon krosibei na en. Wi kan du dati te wi e taki nanga en na ini begi. A e broko en ede nanga ibriwan fu wi (Psalm 65:2; 145:18). A de klariklari fu gi wi pardon. A e si a muiti di wi e du fu plisi en, srefi efu wi e meki fowtu son leisi. Sobun, awinsi wi e meki fowtu, toku wi kan tron wan bun mati fu Gado.Leisi Psalm 103:12-14; Yakobus 4:8.

Fu di Yehovah gi wi libi, meki wi musu lobi en moro iniwan tra sma (Markus 12:30). Te yu e leri sabi Gado èn te yu e du a wani fu en, dan na so yu e sori taki yu lobi en èn yu o kon moro krosibei na en.Leisi 1 Timoteyus 2:4; 1 Yohanes 5:3.

Kon sabi moro

GADO ABI BUN NYUNSU GI WI!

Gado abi wan nen?

Gado abi furu titel soleki Moro Hei Gado, Mekiman nanga Masra. Ma Gado en eigi nen skrifi sowan 7000 tron na ini Bijbel.