Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 10

Fa yu kan sabi san na a tru bribi?

Fa yu kan sabi san na a tru bribi?

1. A tru taki wán tru bribi nomo de?

„Luku bun nanga den falsi profeiti.”MATEYUS 7:15.

Yesus ben leri den bakaman fu en taki wán bribi nomo de èn dati na a tru bribi. A de leki wan pasi di e tyari sma go na têgo libi. Yesus ben taki: „Wan tu sma nomo e feni” a pasi dati (Mateyus 7:14). Na soso te sma e anbegi Gado na wan fasi di e kruderi nanga en Wortu, Bijbel, Gado o feni na anbegi fu den bun. Ala tru anbegiman abi a srefi bribi.Leisi Yohanes 4:23, 24; 14:6; Efeisesma 4:4, 5.

2. San Yesus ben taki fu falsi Kresten?

„Den e taigi ala sma taki den sabi Gado, ma den sani di den e du, e sori taki den no sabi en.”TITUS 1:16.

Yesus ben warskow taki falsi profeiti ben o pori a tru Kresten bribi. Den falsi profeiti disi kan gersi tru anbegiman. Den kerki fu den e taki dati den na Kresten. Ma yu kan kon sabi suma na den trutru. Fa yu kan sabi dati? Na a tru anbegi wawan kan meki taki sma kon abi moi fasi èn taki den e tyari densrefi na wan fasi di fiti tru Kresten.Leisi Mateyus 7:13-23.

3. Fa yu kan kon sabi suma na den tru anbegiman?

Luku den feifi sani disi:

  • Tru anbegiman e si Bijbel leki a Wortu fu Gado. Den e du muiti fu hori densrefi na den gronprakseri fu Bijbel. Fu dati ede a tru bribi e difrenti fu bribi di abi fu du nanga libisma denki (Mateyus 15:7-9). Tru anbegiman e du san den e leri trawan.Leisi Yohanes 17:17; 2 Timoteyus 3:16, 17.

  •   Den tru bakaman fu Yesus e gi grani na Gado en nen, Yehovah. Yesus meki a nen fu Gado bekènti èn na so a gi grani na a nen dati. A yepi sma fu kon sabi Gado èn a leri den fu begi Gado fu meki a nen fu en kon santa (Mateyus 6:9). Sortu kerki na ini a kontren pe yu e libi, e meki a nen fu Gado bekènti?Leisi Yohanes 17:26; Romesma 10:13, 14.

  • Tru Kresten e preiki Gado Kownukondre. Gado ben seni Yesus fu kon preiki a bun nyunsu fu a Kownukondre. Gado Kownukondre na a wan-enkri howpu gi libisma. Yesus taki fu a Kownukondre teleki a dei di a dede (Lukas 4:43; 8:1; 23:42, 43). A ben taigi den bakaman fu en fu preiki Gado Kownukondre. Efu wan sma e kon taki nanga yu fu Gado Kownukondre, dan fu sortu kerki a sma dati de nofo tron?Leisi Mateyus 24:14.

  • Den bakaman fu Yesus no de wan pisi fu na ogri grontapu disi. Yu kan sabi suma na den, fu di den no e teki prati na politiek èn den no e bemui nanga den kesekese di de na ini a libimakandra (Yohanes 17:16; 18:36). Boiti dati, den no e teki na eksempre fu sma di e du ogri èn di abi takru gwenti.Leisi Yakobus 4:4.

  • Tru Kresten abi bun furu lobi gi makandra. Nanga yepi fu Gado Wortu, den leri fu lespeki sma fu ala kulturu. Nofo tron, falsi bribi e horibaka fayafaya gi a feti di sma fu difrenti kondre e feti nanga makandra, ma tru anbegiman e weigri fu du dati (Mika 4:1-3). Na presi taki tru Kresten e denki densrefi nomo, den de klariklari fu gebroiki den ten nanga den gudu fu den fu yepi trawan èn fu gi den deki-ati.Leisi Yohanes 13:34, 35; 1 Yohanes 4:20.

4. Yu man si san na a tru bribi?

Sortu kerki e leri sma sani di e komoto soso fu Gado Wortu? Sortu kerki e gi grani na Gado nen èn e meki bekènti taki Gado Kownukondre na a wan-enkri howpu gi libisma? Sortu grupu e sori lobi gi trawan èn e weigri fu teki prati na orloku? San yu denki?Leisi 1 Yohanes 3:10-12.

 

Kon sabi moro

San Bijbel e leri wi trutru?

A fasi fu anbegi di Gado feni bun